ⴳ ⵓⵙⴰⵜⵉ ⵏ ⵜⵏⵎⵏⴰⴹⵜ ⵏ ⵜⵡⵓⵔⵉⵡⵉⵏ ⵏⵏⵙ, ⵉⵙⵎⵓⵏ ⵓⴳⵔⴰⵡ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ ⴰⵙⵙ ⵏ 2 ⴷⵓⵊⴰⵎⴱⵉⵔ 2022 ⴳ ⴰⴳⴰⴷⵉⵔ, ⵉⴳⵏⵙⴰⵙ ⵏ ⵢⴰⵏ ⵓⴳⵏⴰⵔ ⵏ ⵜⵏⵎⴰⵍⴰⵢⵉⵏ ⵏ ⵡⴰⵎⵓⵏ ⵓⵖⵔⵉⵎ ⵏ ⵜⵎⵏⴰⴹⵜ, ⴳ ⵓⵙⴰⵜⵉ ⵏ ⵢⴰⵜ ⵜⵙⴰⵡⵔⵜ ⵏ ⵓⵙⵡⵉⵏⴳⵎ ⴷ ⵓⵙⵏⵉⴼⵍ ⵏ ⵢⵉⵔⵎⵏ ⴳ ⵢⵉⴳⵔ ⵏ ⵓⵎⵢⴰⵡⴰⴹ ⴷ ⵓⵙⵏⵖⵎⵙ ⵅⴼ ⵜⵎⵙⵍⴰⵢⵜ ⵏ ⵜⴽⵕⴹⵉⵡⵉⵏ ⵉⵜⵜⵓⴳⴰⵏ ⵉ ⵜⵎⵖⴰⵔⵉⵏ.

ⵉⵡⵏⴰⵏ ⵏ ⵜⴳⵓⵔⵉ ⵏ ⵓⵏⵏⵓⵕⵥⵎ ⵏ ⵜⵙⴰⵡⵔⵜ ⴰⴷ ⵜⴰⵙⴳⵓⵎⴰⵏⵜ ⵉⵜⵜⵓⵣⵎⵎⴻⵎⵏ ⴳ ⵓⵙⴰⵜⵉ ⵏ ⵓⵙⵡⵓⵔⵉ ⵏ ⵜⵎⵔⵉⵙⵉⵏ ⵏ ⵜⵎⵔⵙⵍⵜ ⵏ ⵓⵙⵏⴰⵎ ⵙ ⵓⵢⵏⵏⴰ ⵉⵍⵍⴰⵏ ⴳ ⵜⵙⴳⵓⵔⵉ ⵏ ⵎⵕⵕⴰⴽⵛ ⵉ ⵓⵎⵏⵏⵓⵖ ⵎⴳⴰⵍ ⵜⵉⴽⵕⴹⵉⵡⵉⵏ ⵉⵜⵜⵓⴳⴰⵏ ⵉ ⵜⵎⵖⴰⵔⵉⵏ, ⵏⵏⴰ ⵜⵙⵙⵉⵔⵎ ⵍⴰⵍ ⵏ ⵡⴰⴷⴷⵓⵔ ⴰⴳⵍⴷⴰⵏ ⵍⴰⵍⵍⴰ ⵎⴰⵔⵢⴰⵎ, ⵜⵏⵏⴰ ⵎⴰⵙⵙⴰ ⵍⴰⵟⵉⴼⴰ ⴰⵅⴰⵔⴱⴰⵛ ⵜⴰⵏⵙⵙⵉⵅⴼⵜ ⵏ ⵓⴳⵔⴰⵡ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ « ⵜⵉⵏⵎⴰⵍⴰⵢⵉⵏ ⵏ ⵡⴰⵎⵓⵏ ⵓⵖⵔⵉⵎ ⴳⴰⵏⵜ ⴰⵙⴰⴳⵎ ⵏ ⵉⵏⵖⵎⵉⵙⵏ ⵏ ⵓⵏⵎⴰⵍⴰ ⵉ ⵉⵏⵖⵎⴰⵙⵏ ⵅⴼ ⵜⵎⵙⵍⴰⵢⵜ ⵏ ⵜⴽⵕⴹⵉⵡⵉⵏ ⵉⵜⵜⵓⴳⴰⵏ ⵉ ⵜⵎⵖⴰⵔⵉⵏ, ⴳⵏⵜ ⴷⵉⵖ ⵜⵏⵎⴰⵍⴰⵢⵉⵏ ⴰⴷ ⴰⵡⴷ ⵉⵡⵔⵉⴽⵏ ⵉⴷⵙⵍⴰⵏⵏ ⴳ ⵜⴷⵉⵏⴰⵎⵉⵢⵜ ⵜⴰⵎⴰⵜⴰⵢⵜ ⵏ ⵓⵙⵎⵓⵙⵙⵓ ⴳ ⵓⵡⵜⵜⴰⵙ ⵏ ⵜⵙⵉⵍⴰⵡⵜ ⵏ ⵜⴷⵍⵙⴰ ⵏ ⵓⵙⵉⴽⵙⵍ ⵏ ⵡⴰⵔ ⵜⵉⵕⴹⵉ. ⵉⵎⵏⵖⵉ ⵎⴳⴰⵍ ⵜⴰⵡⴰⵖⵉⵜ ⴰⴷ ⵏ ⵜⴽⵕⴹⵉ ⵉⵚⴽⴰⵏ ⵅⴼ ⵡⴰⵏⴰⵡ ⵜⵇⵇⴰⵏ ⵜⵜ ⵏ ⵜⵉⴳⵎⵉ ⵏ ⵢⴰⵏ ⵓⵙⵎⴽⵍ ⴰⵖⵎⵙⴰⵏ ⴰⵎⵓⵣⴰⵢ, ⴰⵏⵎⴰⴳⵓⵜ ⵉⵍⴰⵏ ⵜⵉⵖⴰⵔⵉⵡⵉⵏ ⵉ ⵜⵎⵓⴽⵔⵉⵙⵜ ⴰⴷ ⵜⴰⵏⴰⵎⵓⵏⵜ ⵜⴰⵔⴰⴼⵔⴰⵔⵜ ».

ⵜⵉⵡⵓⵔⵉⵡⵉⵏ ⵏ ⵜⵙⴰⵡⵔⵜ ⴰⴷ ⵜⴰⵎⵢⴰⵖⵜ ⵙⵙⵓⵔⴼⵏ ⵉ ⵉⵎⴷⵔⴰⵡⵏ ⴰⴷ ⵙⵙⴽⵔⵏ ⵢⴰⵏ ⵓⵙⵡⵉⵏⴳⵎ ⴰⵎⵣⵖⴰⵏ ⴰⵎⴰⴳⵔⴰⵡ ⵅⴼ ⴽⵉⴳⴰⵏ ⵏ ⵜⵙⴳⴳⵯⵉⵏ ⵏ ⵜⵎⵓⴽⵔⵉⵙⵜ ⵣⵓⵏⴷ : ⵜⵉⴳⵎⵉ ⵅⴼ ⵜⵎⵙⴽⴰⵔ ⵉⵖⵓⴷⴰⵏ ⵏ ⵓⵎⵢⴰⵡⴰⴹ ⴰⴳⴷⵓⴷⴰⵏ ⵅⴼ ⵜⵎⵙⵍⴰⵢⵜ ⵏ ⵜⴽⵕⴹⵉⵡⵉⵏ ⵉⵜⵜⵓⴳⴰⵏ ⵉ ⵜⵎⵖⴰⵔⵉⵏ, ⵜⵉⴳⵎⵉ ⵏ ⵜⵎⵢⴰⵖⵉⵏ ⴳⵔ ⵓⵙⵏⵖⵎⵙ ⴷ ⵡⴰⵎⵓⵏ ⵓⵖⵔⵉⵎ, ⵜⴰⵎⴷⵔⴰⵡⵜ ⵏ ⵓⵙⵏⴰⵎ ⵏ ⵓⵙⵏⵖⵎⵙ ⴳ ⵜⴳⵎⵉ ⵏ ⵓⵙⵎⴽⵍ ⴰⵖⵎⵙⴰⵏ ⵏ ⵜⵎⵙⴰⵔⵜ ⵏ ⵜⴽⵕⴹⵉ ⵉⵜⵜⵓⴳⴰⵏ ⵉ ⵜⵎⵖⴰⵔⵉⵏ ⵏⵖ ⴷⵉⵖ ⵉⵎⵙⴰⵔⴰⵙⵏ ⵉⵎⴰⵢⵏⵓⵜⵏ ⵏ ⵓⵎⵏⵏⵓⵖ ⵎⴳⴰⵍ ⵜⴰⵡⴰⵖⵉⵜ ⴰⴷ ⴳ ⵓⵎⵏⴰⴹ ⵏ ⵓⵎⵢⴰⵡⴰⴹ ⴰⵎⵓⵟⵟⵓⵏ.

ⴰⵣⵎⵣⵣⵓ ⵢⴰⴷ ⵉⵜⵜⵓⵙⵏⵎⴰⵍⴰ ⴰⵡⴷ ⴳ ⵓⵙⴰⵜⵉ ⵏ ⵜⵎⴷⵔⴰⵡⵜ ⵏ ⵓⴳⵔⴰⵡ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ ⴳ ⵓⵎⵣⵉⵣⵣⵍ ⴰⵎⴰⴹⵍⴰⵏ « 16 ⵏ ⵡⵓⵙⵙⴰⵏ ⵏ ⵓⵙⵎⵓⵙⵙⵓ ⵎⴳⴰⵍ ⵜⵉⴽⴰⵕⴹⵉⵡⵉⵏ ⵉⵚⴽⴰⵏ ⵅⴼ ⵡⴰⵏⴰⵡ » ⵏⵏⴰ ⵜⵙⵏⵎⴰⵍⴰ ⵜⵎⵙⴷⵓⵙⵜ ⵏ ⵜⵎⵖⴰⵔⵉⵏ ⵏ ⵜⵎⵜⵜⵉⵏ ⵎⵓⵏⵉⵏ. ⴰⵣⵎⵣⵣⵓ ⵢⴰⴷ ⴰⵎⵓⵏ ⴷⵉⴳⵙ ⵉⴳⵎⴰⵎⵏ ⵏ ⵓⵙⵇⵇⵉⵎ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ ⴷ ⵓⵏⵎⵀⴰⵍ ⴰⵎⴰⵜⴰⵢ ⵏ ⵓⴳⵔⴰⵡ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ ⵎⴰⵙⵙ ⴱⵏⵄⵉⵙⵙⴰ ⵄⴰⵙⵍⵓⵏ ⵏⵏⴰ ⵉⵙⵙⵓⴳⵓⵔⵏ ⵉⵎⵔⴰⵔⴰⵜⵏ ⵉⵎⵢⴰⵡⴰⵏⵏ ⴷ ⵉⵎⵙⴷⵍⵙⵏ ⵏ ⵜⵙⴰⵡⵔⵜ.