ⵎⴰⵙⵙⴰ ⵍⴰⵟⵉⴼⴰ ⴰⵅⵔⴱⴰⵛ, ⵜⴰⵏⵙⵙⵉⵅⴼⵜ ⵏ ⵓⴳⵔⴰⵡ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ ⵜⵏⵏⴰ ⴰⵙⵙ ⵏ 8 ⴱⵕⴰⵢⵕ 2020 ⵉⵙⴷ « ⴰⵙⵖⵓⴷⵓ ⵏ ⵜⵡⵍⴰⴼⵜ ⵏ ⵜⵎⵖⴰⵔⴰⵜ ⴰⴳⵓⵏⵙ ⵏ ⵓⵙⵏⵖⵎⵙ ⵉⴳⴰ ⴰⵡⵏⵏⵉ ⵢⴰⵜⵜⵓⵢⵏ ⵏⵏⴰ ⵓⵔ ⵢⴰⴷ ⵢⵓⵙⴰⵏ ⴷ ⵉⵣⵔⴼⴰⵏ ⵉⵣⴷⵉⵏ ⴷ ⵓⵙⵉⴽⵙⵍ », ⵜⵏⵏⴰ ⴷⵉⵖ ⵉⵙⴷ « ⴰⵙⵙⴰ, ⴰⵎⵙⴰⵔⴰⵙ ⴰⵎⵇⵔⴰⵏ ⵉⴳⴰ ⴰⵣⵔⵔⵓⵢ ⵖⵔ ⵢⴰⵏ ⵓⵙⵎⴷⵢⴰ ⵢⴰⴽⵙⵓⵍⵏ ⴳⵔ ⵡⴰⵏⴰⵡⵏ ⵉⵏⵎⵓⵔⵉⵢⵏ ».
ⴳ ⵡⴰⵡⴰⵍ ⵏⵏⵙ ⴳ ⵜⵇⵇⴰⵢⵎⵓⵜ ⵏⵏⴰ ⵉⵙⵏⵎⴰⵍⴰ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴳ ⵜⵎⵚⵕⵉⵢⵜ ⵜⴰⴳⵔⴰⵖⵍⴰⵏⵜ ⵏ ⵜⵥⵕⵉⴳⵜ ⴷ ⵓⴷⵍⵉⵙ ⴳ ⴹⴰⵕⵍⴱⵉⴹⴰ ⴷⴷⴰⵡ ⵓⵙⴳⵓⵎ ⵏ « ⴰⵙⵉⵍⵉⵢ ⵏ ⵓⵙⵉⴽⵙⵍ, ⵜⵉⵍⴰⵍⵜ ⵉ ⵓⵙⵏⵖⵎⵙ ? » ⵎⴰⵙⵙⴰ ⴰⵅⵔⴱⴰⵛ ⵜⵏⵏⴰ ⵉⵙⴷ ⵜⵉⵍⴰⵍⵜ ⵏ ⵓⵙⵏⵖⵎⵙ ⵓⵔ ⵏ ⵉⵇⵇⴰⵏ ⴰⴷ ⵉⴳ ⵖⴰⵙ ⵜⵉⵙⵉⵜ ⵜⴰⵎⵉⴽⴰⵏⵉⴽⵜ ⴳ ⴷⴰ ⵏⵜⵜⴰⵏⴰⵢ ⵜⵉⵍⴰⵡⵜ. « ⴰⵙⵏⵖⵎⵙ ⵉⵇⵇⴰⵏ ⵏ ⴰⴷ ⵖⵓⵔⵙ ⵜⵉⵍⵉ ⵜⵉⵍⴰⵍⵜ ⵜⴰⵎⵣⵡⴰⵔⵓⵜ ⴳ ⵜⵉⴳⵎⵉ ⵏ ⵜⴷⵍⵙⴰ ⵏ ⵓⵙⵉⴽⵙⵍ ⴳ ⵜⵓⵙⴽⴰ ⵏ ⵜⵡⵏⴳⵉⵎⵜ ⴳ ⵓⵢⵏⵏⴰ ⵉⵣⴷⵉⵏ ⴷ ⵡⵓⴷⴷⵓⵔ ⵏ ⵜⵎⵖⴰⵔⵜ ⴷ ⵉⵣⵔⴼⴰⵏ ⵏⵏⵙ ⵉⴷⵙⵍⴰⵏⵏ ».
ⵜⴰⵏⵙⵙⵉⵅⴼⵜ ⵏ ⵓⴳⵔⴰⵡ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ ⵜⴳⵔⴰ ⵜⵖⵓⵔⵉ ⵉ ⵉⵎⴰⵙⵙⵏ ⵏ ⵓⵙⵏⵖⵎⵙ ⴰⴼⴰⴷ ⴰⴷ ⵔⴰⵔⵏ ⵜⴰⵖⴹⴼⵜ ⵉ ⵓⴳⵍⴰⵎ, ⴰⵙⵎⵏⵉⴷ ⴷ ⵓⵙⴼⵙⵉ ⵏ ⵉⵎⵊⵕⵉⵢⵏ, ⵙ ⵓⵙⵙⴽⴰⵏ ⵙ ⵉⵡⴰⵍⵉⵡⵏ ⵏ ⵓⵣⵔⴰⴽ ⵏ ⵉⵎⵏⵣⴰⵢⵏ ⵏ ⵉⵣⵔⴼⴰⵏ ⴷ ⵜⴷⵉⵎⵓⵇⵕⴰⵟⵉⵢⵜ. ⵜⵥⵕⴰ ⵉⵙ ⵏ ⵉⵇⵇⴰⵏ ⴰⴷ « ⵜⵜⵓⴳⵏⵜ ⵜⵖⴰⵔⴰⵙⵉⵏ ⵜⵉⵎⴰⵢⵏⵓⵜⵉⵏ ⵉ ⵜⵉⴳⵎⵉ ⵏ ⵡⴰⵏⴰⵡⵏ ⵓⵎⵏⵉⴳⵏ ⴷ ⴰⴷ ⵜⵜⵓⵙⴽⵔⵏ ⵉⵏⴰⵡⵏ ⵏⵏⴰ ⵉⵣⵎⵔⵏ ⴰⴷ ⵕⵕⵥⵏ ⵙⴱⴷⴷⵏ ⴰⵙⵏⵓⵃⵢⵓ ⴰⴼⴰⴷ ⴰⴷ ⵏⴰⵡⵙ ⵓⴳⴰⵔ ⴳ ⵜⴷⵍⵙⴰ ⵏ ⵓⵙⵉⴽⵙⵍ ».
ⴷⴼⴼⵔ ⵜⵓⴽⴽⵉ ⵏⵏⵙ ⵏ ⴽⵔⴰ ⵏ ⵉⵎⴷⴰⵢⵜⵏ ⵏ ⵜⵓⵎⴰⵢⵜ ⵜⴰⵙⵍⵉⵥⵕⵜ ⵏ ⵓⵙⵏⵓⵃⵢⵓ ⴷ ⵡⵉⵏⵏⴰ ⵉⵙⵙⵉⵣⴷⵉⵔⵏ ⵙ ⵜⵎⵖⴰⵔⵜ, ⵎⴰⵙⵙⴰ ⴰⵅⵔⴱⴰⵛ ⵜⵙⵙⵎⵏⴷ ⵉⵡⵙ ⵏ ⵓⴳⵔⴰⵡ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ ⵉⴳⴰⵏ ⵜⵉⵎⵔⵙⵍⵜ ⵜⴰⴷⵓⵙⵜⵓⵔⵉⵢⵜ ⵜⴰⵏⵉⵎⴰⵏⵜ ⵏ ⵓⵙⵍⴳⵏ, ⴳ ⵜⵎⵜⵜⴰ ⵏ ⵜⵏⴽⵔⴰ ⵙ ⵜⴷⵍⵙⴰ ⵏ ⵓⵙⵉⴽⵙⵉⵍ ⴷ ⵓⵙⴱⴷⴷⵉ ⵏ ⵓⵙⵏⵓⵃⵢⵓ ⵉⵣⴷⵉⵏ ⴷ ⵡⴰⵏⴰⵡ. ⵜⵉⴳⴰⵡⵜ ⵏ ⵓⴳⵔⴰⵡ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ ⴷⴰ ⵜⵜⵓⴳⴰ ⵙ ⵜⵙⵎⵉⴳⵍⵉⵏ ⵏ ⵜⴰⵏⵏⴰⵢⵜ ⵅⴼ ⵉⵙⵏⵜⵉⵢⵏ ⴷ ⵉⵙⵓⵎⴰⵔ ⵏ ⵉⵙⵍⴳⵏⵏ ⵏⵏⴰ ⵙ ⵉⵜⵜⵓⵙⵓⵜⵔⵏ, ⵙ ⵜⵖⴰⵔⴰⵙⵜ ⵏ ⵜⵖⵜⴰⵙⵉⵏ ⵏⵖ ⵙ ⵜⵖⴰⵔⴰⵙⵜ ⵏ ⵉⵣⵎⴰⵣ ⵏⵏⴰ ⵖⵓⵔ ⵜⵍⵍⴰ ⵢⴰⵜ ⵜⴰⵏⵏⴰⵢⵜ ⵜⴰⴱⵉⴷⴰⵖⵓⵊⵉⵢⵜ. « ⴰⵡⵜⵜⴰⵙ ⵏ ⵓⴳⵔⴰⵡ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ ⵉⴳⴰ ⴰⴷ ⵉⵙⴷⵓⵙ ⵜⵉⵔⵙⴰⵍ ⵜⵉⵣⵣⵓⵍⴰⵏⵉⵏ ⴷ ⵢⵉⴳⵉⵜⵏ ⵉⵙⵏⵖⵎⴰⵙⵏ ⵉⵙⵙⵎⵖⵓⵔⵏ ⵜⴰⵎⵖⴰⵔⵜ ⴷ ⵉⵣⵔⴼⴰⵏ ⵏⵏⵙ ⵉⴷⵙⵍⴰⵏⵏ ».
ⵉⵏⴰⵡⵏ ⵢⴰⴹⵏ ⴳ ⵜⵙⵇⵇⴰⵢⵎⵓⵜ ⴰⴷ ⵏⵏⴰ ⵜⵙⵏⵎⴰⵍⴰ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴳⴰⵏ ⵡⵉⵏ ⵎⴰⵙⵙ ⵎⵉⴽⴰⵢⵉⵍ ⵉⵏⴳⵍⵉⴹⵓⵡ, ⴰⵎⵖⴰⵔ ⵏ ⵓⵎⴰⵔⵉ ⵏ ⵓⵙⵇⵇⵉⵎ ⵏ ⵓⵕⵓⴱⴱⴰ ⴳ ⵍⵎⵖⵔⵉⴱ, ⵎⴰⵙⵙⴰ ⵅⴰⴷⵉⵊⴰ ⴱⵓⵊⵏⴰⵡⵉ, ⵜⴰⵏⵙⵙⵉⵅⴼⵜ ⵏ ⵓⴳⵔⴰⵡ ⴰⵙⵉⴽⵙⵍ ⴷ ⵓⵎⵢⴰⵏⴰⵡ ⵏ 2ⵎ ⴷ ⴼⴰⵟⵉⵎⴰ ⵛⴰⵄⴱⵉ ⵜⴰⴳⵎⴰⵎⵜ ⵏ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⵉⴳⴰⵏ ⵜⴰⵏⴱⴹⴰⵡⵜ ⵏ ⵓⵎⴳⵔⴰⵡ ⴰⴷ.
