ⵜⵎⵛⴰⵡⴰⵕ ⵜⵏⵙⵙⵉⵅⴼⵜ ⵏ ⵓⴳⵔⴰⵡ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ ⵎⴰⵙⵙⴰ ⵍⴰⵟⵉⴼⴰ ⴰⵅⴰⵔⴱⴰⵛ ⴰⵙⵙ ⵏ 26 ⵢⵏⵏⴰⵢⵔ 2022 ⴳ ⵓⵙⵖⵉⵎ ⵏ ⵜⵎⵔⵙⵍⵜ ⴰⴽⴷ ⵎⴰⵙⵙ ⵏⵉⵙⵟⵓⵕ ⴱⴰⵏⴽⵓⵎⵓⴽⵓⵏⵣⵉ, ⴰⵎⵙⵇⴰⴷ ⵏ ⵜⴳⴷⵓⴷⴰⵏⵜ ⵏ ⴱⵓⵔⵓⵏⴷⵉ ⴳ ⵍⵎⵖⵔⵉⴱ ⴷ ⵓⵏⵙⵙⵉⵅⴼ ⵉⴼⴼⵖⵏ ⵏ ⵜⵎⵔⵙⵍⵜ ⵏ ⵓⵙⵏⴰⵎ ⵏ ⵉⵙⵏⵖⵎⵉⵙⵏ, ⴰⵙⵇⵇⵉⵎ ⴰⵏⴰⵎⵓⵔ ⵏ ⵓⵎⵢⴰⵡⴰⴹ ⵏ ⵜⵎⵓⵔⵜ ⴰⴷ ⵏ ⵜⴼⵔⵉⵇⵜ ⵏ ⵍⵇⴱⵍⵜ.
ⴳ ⵓⵎⵛⴰⵡⴰⵕ ⴰⴷ, ⵜⵎⵍ ⵎⴰⵙⵙⴰ ⴰⵅⴰⵔⴱⴰⵛ ⵉⵙⴳⵓⵎⵏ ⵉⵅⴰⵜⴰⵔⵏ ⵏ ⵜⵎⵔⵉⵙⵜ ⵏ ⵓⴳⵔⴰⵡ ⴰⵎⴰⵜⵜⴰⵢ ⴳ ⵓⵢⵏⵏⴰ ⵉⵣⴷⵉⵏ ⴷ ⵓⵎⵢⴰⵡⴰⵙ ⴰⴽⴷ ⵜⵉⵎⵓⵔⴰ ⵜⵉⴼⵔⵉⵇⵉⵏ ⴰⵔ ⵜⵜⵉⵏⵉ ⵜⴰⵢⵔⵉ ⵏⵏⵙ ⵏ ⵓⵙⴷⵓⵙ ⵏ ⵉⵙⵏⵉⴼⵉⵍⵏ ⴰⴽⴷ ⵉⴽⵏⵉ ⵏⵏⵙ ⴰⴱⵓⵔⵓⵏⴷⵉ ⵅⴼ ⵉⵎⵏⵣⴰⵢⵏ ⵉⴷⵙⵍⴰⵏⵏ ⵏ ⵓⵙⵏⴰⵎ ⴰⵙⵏⵉⵎⴰⵏ ⵏ ⵓⵙⵏⵖⵎⵙ ⴳ ⵜⵍⵍⴰ ⵙ ⵉⵎⵥⵍⵉ ⵜⵏⴼⵔⵓⵜ ⵏ ⵜⵍⴻⵍⵍⵉ ⵏ ⵜⵎⴰⵎⴽⵜ ⵏ ⵜⵉⵔⵔⴰ ⵏ ⵉⵎⵡⵓⵔⴰⵏ ⴷ ⵓⵙⵙⴳⵎ ⵏ ⵜⵡⵓⵔⵉⵡⵉⵏ ⵜⵉⵣⵣⵓⵍⴰⵏⵉⵏ ⵉⵜⵜⵣⵔⴰⴽⵏ ⵉⵎⵏⵣⴰⵢⵏ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵡⴰⵜⵉⴳⵏ ⵉⴷⵉⵎⵓⵇⵕⴰⵟⵉⵢⵏ. ⵜⵎⵍ ⴷⵉⵖ ⵉ ⵓⴷⵉⴱⵍⵓⵎⴰⵙⵉ ⴰⴱⵓⵔⵓⵏⴷⵉ ⴽⵔⴰ ⵏ ⵜⵉⴳⴰⵡⵉⵏ ⵏ ⵓⵎⵢⴰⵡⴰⵙ ⵏⵏⴰ ⵉⵙⵙⴽⵔ ⵓⴳⵔⴰⵡ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ ⴳ ⵓⵢⵏⵏⴰ ⵉⵣⴷⵉⵏ ⴷ ⵉⵙⵎⵓⵜⵜⴳⵏ ⵉⵜⵉⵇⵏⵉⵢⵏ ⴷ ⵉⵙⵏⵉⴼⵉⵍⵏ ⵏ ⵢⵉⵔⵎⵏ ⴷ ⵜⵎⵓⵣⴰⵢⵜ ⵉⵣⴷⵉⵏ ⴷ ⵜⵏⴽⵔⴰ ⵙ ⵉⵎⴰⵙⵙⵏ ⵉⵕⵡⴰⵏ ⵏ ⵜⵎⵙⵙⴰⵏⵓⵏⵜ ⵏ ⵉⵖⴰⵡⴰⵙⵏ ⵉⵙⵍⵉⵥⵕⵏ ⴷ ⵓⴹⴼⴼⵓⵕ ⵏ ⵓⵡⵏⵏⵉ ⵏ ⵜⵎⴰⴳⵓⵜ ⵏ ⵓⵙⵡⵉⵏⴳⵎ ⴷ ⵜⴰⵏⵏⴰⵢⵜ ⴳ ⵜⵏⴰⴼⵓⵜⵉⵏ ⵏ ⵜⵏⵣⵡⴰⵢⵜ ⴷ ⵜⵉⵍⵉⴼⵉⵣⵢⵓⵏ.
ⵉⵙⵙⴽⵜⵉ ⴷ ⵓⵎⵙⵇⴰⴷ ⵏⵉⵙⵟⵓⵕ ⴱⴰⵏⴽⵓⵎⵓⴽⵓⵏⵣⵉ, ⴰⵎⵓⵙⵙⵓ ⵉⵕⵡⴰⵏ ⵉⵍⵍⴰⵏ ⴳⵔ ⵉⵣⴷⴰⵢⵏ ⵉⵍⵍⴰⵏ ⴳⵔ ⵜⴳⵍⴷⵉⵜ ⵏ ⵍⵎⵖⵔⵉⴱ ⴷ ⵜⴳⴷⵓⴷⴰⵏⵜ ⵏ ⴱⵓⵔⵓⵏⴷⵉ. ⵎⴰⵙⵙ ⴰⵎⵙⵇⴰⴷ ⵉⵍⵍⴰ ⵉⴳⴰ ⴰⵎⴰⵡⵙⴰⵙ ⵏ ⵓⵎⵢⴰⵡⴰⴹ ⴷ ⵓⵏⵎⵀⴰⵍ ⴰⵎⴰⵜⴰⵢ ⵏ ⵜⵏⵣⵡⴰⵢⵜ ⴷ ⵜⵉⵍⵉⴼⵉⵣⵢⵓⵏ ⴳ ⵜⵎⵓⵔⵜ ⵏⵏⵙ, ⵉⵙⵙⵉⵜⵎ ⴰⴷ ⵉⵅⵜⵔ ⵓⵎⵢⴰⵡⴰⵙ ⴰⴷ ⵖⵔ ⵉⴳⵔ ⵏ ⵓⵙⵏⴰⵎ ⵏ ⵓⵙⵏⵖⵎⵙ ⴳ ⵓⵣⵔⴰⴽ ⵏ ⵓⵙⵏⵉⵎⴰⵏ ⴰⵎⵔⵙⴰⵍ ⵏ ⵜⵎⵔⵙⴰⵍ ⵙ ⵙⵏⴰⵜ ⵉⵎⵓⵏⵏ ⴳ ⵓⴳⵓⵏⵙ ⵏ ⵓⵥⵟⵟⴰ ⴰⴼⵔⵉⵇⵉ ⴷ ⵓⴼⵕⵓⵏⴽⵓⴼⵓⵏⵉ ⵏ ⵉⵎⵙⵏⴰⵎⵏ ⵏ ⵓⵙⵏⵖⵎⵙ. ⴷⴼⴼⵉⵔ ⴰⵙⵏⵎⵍ ⵏⵏⵙ ⴰⵎⵖⴰⵡⵍ ⵏ ⵓⵣⵣⵉⴳⵣ ⵏ ⵜⵎⴷⵔⴰⵡⵉⵏ ⵏ ⵓⵙⵇⵇⵉⵎ ⴰⵏⴰⵎⵓⵔ ⵏ ⵓⵎⵢⴰⵡⴰⴹ ⵉⵜⵜⵓⵙⵔⵙⵏ ⴰⵙⴳⴳⵯⴰⵙ ⵏ 1992, ⵉⵏⵏⴰ ⵉⵙⴷ ⵉⵔⴰ ⴰⴷ ⵉⵙⵙⵓⵀⵏ ⵉⵎⵣⴷⴰⵢⵏ ⴳⵔ ⵓⴳⵔⴰⵡ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ ⴰⴽⴷ ⴰⵎⵖⴰⵔ ⴰⵎⴰⵢⵏⵓ ⵏ ⵓⵙⵇⵇⵉⵎ ⴰⵏⴰⵎⵓⵔ ⵏ ⵓⵎⵢⴰⵡⴰⴹ ⵏⵏⴰ ⵔⴰⴷ ⵉⵜⵜⵓⵙⵎⵎⴰ ⴳ ⵉⵎⴰⵍⴰⵙⵏ ⴰⴷ ⴷ ⵉⴷⴷⴰⵏ.
ⵃⴰⴹⵕⵏ ⵉ ⵉⵎⵛⴰⵡⴰⵕⵏ ⴰⴷ, ⵎⴰⵙⵙ ⵙⵜⴰⵏⵙⵉⵙⵍⴰⵙ ⵎⴰⵏⵉⵔⴰⴽⵉⵣⴰ, ⴰⵎⵛⵛⵉⵡⵕ ⴰⵎⵣⵡⴰⵔⵓ ⴳ ⵜⵎⵙⵇⴰⴷⵜ ⵏ ⴱⵓⵔⵓⵏⴷⵉ ⴷ ⵎⴰⵙⵙ ⵟⴰⵍⴰⵍ ⵚⴰⵍⴰⵃⴷⴷⵉⵏ, ⴰⵎⵙⵙⴰⵏⵓⵏ ⵏ ⵜⵖⴰⵡⵙⵉⵡⵉⵏ ⵜⵉⴼⵔⵉⵇⵉⵏ ⴷ ⵜⴳⵔⴰⵖⵍⴰⵏⵉⵏ ⵖⵓⵔ ⵓⴳⵔⴰⵡ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ.
