ⴰⵣⵣⵉⴳⵣ ⵏ ⵡⴰⵏⴰⵡ ⴰⴷⴰⵎⵙⴰⵏ ⵏ ⵓⵙⵏⵖⵎⵙ ⴰⵙⵍⵉⵥⵕ ⴷ ⵜⵖⴰⵔⴰⵙⵉⵏ ⵏ ⵜⴰⵎⵓⵏⵜ ⴰⴽⴷ ⴰⵣⵣⵉⴳⵣ ⴰⴷ, ⵙⴳ ⵖⵓⵔ ⵉⵎⵙⵏⴰⵎⵏ ⴷ ⵙⴳ ⵖⵓⵔ ⵉⵏⴱⴰⴹⵏ ⵉⴳⴷⵓⴷⴰⵏⵏ, ⵍⵍⴰⵏ ⴳ ⵡⵓⵍ ⵏ ⵉⵎⵙⴰⵡⴰⵍⵏ ⵉⵜⵜⵓⴳⴰⵏ ⴰⵙⵙ ⵏ 22 ⴼⴱⵕⴰⵢⵕ 2022 ⴳ ⵕⵕⴱⴰⵟ ⴳⵔ ⵉⵎⴰⵙⴰⵢⵏ ⵏ ⵓⴳⵔⴰⵡ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ ⴷ ⵓⴽⴰⴱⴰⵕ ⴰⵎⵇⵔⴰⵏ ⵏ ⵓⴳⵔⴰⵡ ⴰⵎⴰⵜⵜⴰⵢ ⵏ ⵜⵖⴰⵎⵙⴰ ⴷ ⵓⵙⵍⵉⵥⵕ ⵏ ⵜⴳⴷⵓⴷⴰⵏⵜ ⵜⴰⵏⵙⵍⵎⵜ ⵏ ⵎⵓⵕⵉⵟⴰⵏⵉⵢⴰ.
ⴰⴽⴰⴱⴰⵕ ⴰⵎⵓⵕⵉⵟⴰⵏⵉ ⵏⵏⴰ ⵉⵏⵙⵙⵉⵅⴼ ⵎⴰⵙⵙ ⵃⵓⵙⵙⵉⵏ ⵡⴰⵍⴷ ⵎⴷⴷⵓ ⵉⵍⵍⴰ ⴷⵉⴳⵙ ⵎⴰⵙⵙ ⵙⵉⴷ ⴰⵀⵎⴰⴷ ⵡⴰⵍⴷ ⴷⵛⵛⴰⵖ ⴷ ⵎⴰⵙⵙ ⵙⵉⴷⵉ ⵎⵓⵃⴰⵎⴷ ⵡⴰⵍⴷ ⵎⵓⵃⴰⵎⴷ ⵍⵎⴰⵀⴷⵉ, ⴰⵎⵣⵡⴰⵔⵓ ⵉⴳⴰ ⴰⵎⴰⵔⴰ ⴰⵎⴰⵜⴰⵢ ⵏ ⵓⴳⵔⴰⵡ ⴰⵎⴰⵜⵜⴰⵢ ⵏ ⵜⵖⴰⵎⵙⴰ ⴷ ⵓⵙⵍⵉⵥⵕ ⵏ ⵜⴳⴷⵓⴷⴰⵏⵜ ⵜⴰⵏⵙⵍⵎⵜ ⵏ ⵎⵓⵕⵉⵟⴰⵏⵉⵢⴰ ⵡⵉⵙⵙ ⵙⵉⵏ ⵉⴳⴰ ⴰⴳⵎⴰⵎ ⵏ ⵓⵙⵇⵇⵉⵎ, ⵔⵣⴼⵏ ⵙⴳ 22 ⴰⵔ 25 ⴼⴱⵕⴰⵢⵕ ⵢⴰⵏ ⵓⵔⵣⴰⴼ ⵏ ⵜⵡⵓⵔⵉ ⴳ ⵍⵎⵖⵔⵉⴱ ⵙ ⵓⵙⵏⵓⴱⴳ ⵏ ⵎⴰⵙⵙⴰ ⵍⴰⵟⵉⴼⴰ ⴰⵅⴰⵔⴱⴰⵛ, ⵜⴰⵏⵙⵙⵉⵅⴼⵜ ⵏ ⵓⴳⵔⴰⵡ ⴰⵎⴰⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ.
ⴳ ⵓⴳⵔⴰⵡ ⵜⵏ ⵉⵣⴷⵉⵏ, ⴳ ⵢⴰⵎⵓ ⴰⵡⴷ ⵎⴰⵙⵙ ⴱⵏⵄⵉⵙⵙⴰ ⴰⵙⵍⵓⵏ, ⴰⵏⵎⵀⴰⵍ ⴰⵎⴰⵜⴰⵢ ⵏ ⵓⴳⵔⴰⵡ ⴰⵎⴰⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ, ⴽⵉⴳⴰⵏ ⵏ ⵉⵙⴳⵓⵎⵏ ⴰ ⵅⴼ ⵙⴰⵡⵍⵏ, ⵙ ⵉⵎⵥⵍⵉ ⴰⵣⵣⵉⴳⵣ ⵏ ⵓⴳⵔⴰⵡ ⴰⵎⴰⵜⵜⴰⵢ ⵏ ⵜⵖⴰⵎⵙⴰ ⴷ ⵓⵙⵍⵉⵥⵕ ⵏ ⵜⴳⴷⵓⴷⴰⵏⵜ ⵜⴰⵏⵙⵍⵎⵜ ⵏ ⵎⵓⵕⵉⵟⴰⵏⵉⵢⴰ ⴳ ⵓⵢⵏⵏⴰ ⵉⵣⴷⵉⵏ ⴷ ⵜⵎⵔⵙⵉ ⵜⴰⵎⵔⵙⴰⵍⵜ ⴷ ⵓⵙⵏⵎⴰⵍⴰ ⵏ ⵜⵙⵎⴳⴰⵍⵉⵏ ⵏⵏⵙ, ⵉⵙⵇⵙⵉⵜⵏ ⵉⵎⴰⵢⵏⵓⵜⵏ ⴳ ⵓⵖⴰⵡⴰⵙ ⵏ ⵙⵏⴰⵜ ⵜⵎⵔⵙⴰⵍ ⴰⴷ ⵏ ⵓⵙⵏⴰⵎ, ⴷ ⵜⵖⴰⵔⴰⵙⵉⵏ ⵏ ⵓⵙⵎⵓⵙⵙ ⵏ ⵓⵎⵢⴰⵡⴰⵙ ⴳⵔⴰⵙⵏⵜ.
ⵜⵉⵎⵔⵙⴰⵍ ⵏ ⵓⵙⵏⴰⵎ ⵙ ⵙⵏⴰⵜ ⵉⴷⵙⵏⵜ ⵥⵕⴰⵏⵜ ⴰⴷⴷⴰⴷ ⵏ ⵓⵙⵡⵓⵔⵉ ⵏ ⵓⵖⴰⵡⴰⵙ ⵏ ⵓⵎⵙⵙⴰⵏⵓⵏ ⵏ ⵉⵖⴰⵡⴰⵙⵏ ⵉⵙⵍⵉⵥⵕⵏ, ⵏⵏⴰ ⵉⵙⵙⴽⵔ ⵓⴳⵔⴰⵡ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ ⵜⴼⴽ ⵜ ⵉ ⵜⵎⵔⵙⵍⵜ ⵏ ⵎⵓⵕⵉⵟⴰⵏⵉⵢⴰ ⵙⴳ 2013.
ⴳ ⵜⵙⴳⴰ ⴰⵢⴰⴹⵏ, ⵜⵙⵙⴽⵏ ⵎⴰⵙⵙⴰ ⴰⵅⴰⵔⴱⴰⵛ ⵜⴰⵎⴰⵔⴰⵢⵜ ⵏ ⵓⵥⵟⵟⴰ ⵏ ⵜⵎⵔⵙⴰⵍ ⵜⵉⴼⵔⵉⵇⵉⵏ ⵏ ⵓⵙⵏⴰⵎ ⴷ ⵓⵎⵢⴰⵡⴰⴹ, ⵜⵙⵙⴽⵏ ⵉ ⵉⴽⵏⵉ ⵏⵏⵙ ⴰⵎⵓⵕⵉⵟⴰⵏⵉ ⵜⵉⵖⵜⴰⵙⵉⵏ ⵜⵉⴷⵙⵍⴰⵏⵉⵏ ⵏⵏⴰ ⵉⵜⵜⵓⵢⴰⵙⵉⵏ ⴳ ⵓⵙⵏⵎⴰⵍⴰ ⴰⵎⴳⴳⴰⵔⵓ ⵏ ⵓⴳⵔⴰⵡ ⵏ ⵓⵙⵡⴰⵍⴰ ⵏ ⵜⵙⵉⵍⴰ ⵢⴰⴷ ⵜⴰⵎⵏⵥⴰⵡⵜ ⵉⵜⵜⵓⴳⴰⵏ ⴳ ⵢⴰⵡⵓⵏⴷⵉ ⵉⵎⴰⵍⴰⵙ ⵉⵣⵔⵉⵏ, ⴷ ⴳ ⵎⴰ ⴷ ⵢⵓⵙⴰⵏ, ⴰⴳⵔⴰⵡ ⵏ ⵉⵏⵙⵙⵉⵅⴼⵏ ⵏ ⵜⵎⵔⵙⴰⵍ ⵏ ⵓⵙⵏⴰⵎ ⴷ ⵓⵎⵢⴰⵡⴰⴹ ⵏ ⵜⴼⵔⵉⵇⵜ ⵏⵏⴰ ⵔⴰⴷ ⵢⵉⵍ ⴳ ⵍⵎⵖⵔⵉⴱ ⴳ ⵓⵙⴳⴳⵯⴰⵙ ⴰⴷ 2022.
ⵉⵏⵙⵙⵉⵅⴼⵏ ⵙ ⵙⵉⵏ, ⵎⵙⴰⵡⴰⵍⵏ ⴷⵉⵖ ⵅⴼ ⵉⵙⵇⵙⵉⵜⵏ ⵉⵅⴰⵜⴰⵔⵏ ⵉⵍⵍⴰⵏ ⴳ ⵓⵖⴰⵡⴰⵙ ⵏ ⵉⵥⴹⵡⴰⵏ ⵢⴰⴹⵏ ⵏ ⵓⵎⵢⴰⵡⴰⵙ ⴷ ⵓⵙⵏⴰⵎ ⴳ ⴳⴰⵏ ⵉⴳⵎⴰⵎⵏ ⴰⵎⵎ ⵓⵥⵟⵟⴰ ⴰⴼⵔⴰⵏⴽⵓⴼⵓⵏⵉ, ⴰⵥⵟⵟⴰ ⴰⴳⵔⴰⴽⴰⵍ ⵏⵖ ⴷⵉⵖ ⴰⵙⴳⵔⴰⵡ ⵏ ⵉⵎⵙⵏⴰⵎⵏ ⵉⵙⵍⵉⵥⵕⵏ ⵏ ⵜⵎⵓⵔⴰ ⵜⵉⴳⵎⴰⵎⵉⵏ ⵏ ⵓⵙⵏⵎⴰⵍⴰ ⵏ ⵓⵎⵢⴰⵡⴰⵙ ⴰⵏⵙⵍⵎ.
ⴰⵖⴰⵡⴰⵙ ⵏ ⵓⵔⵣⴰⴼ ⵏ ⵓⴽⴰⴱⴰⵕ ⴰⵎⵓⵕⵉⵟⴰⵏⵉ ⴷⵉⴳⵙ ⴷⵉⵖ ⵉⴳⵔⴰⵡⵏ ⵏ ⵜⵡⵓⵔⵉ ⴰⴽⴷ ⵜⵉⵏⵎⵀⴰⵍⵉⵏ ⵜⵉⵣⵣⵓⵍⴰⵏⵉⵏ ⵏ ⵓⴳⵔⴰⵡ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ, ⴰⴼⴰⴷ ⴰⴷ ⵔⵣⵓⵏ ⵅⴼ ⵡⴰⵏⴰⵡ ⵏ ⵓⵙⵏⴰⵎ ⵏ ⵓⵙⵍⵉⵥⵕ ⴰⵎⵖⵔⴰⴱⵉ ⴳ ⵡⵓⴷⵎⴰⵡⵏ ⵏⵏⵙ ⵜⵉⵎⵔⵙⴰⵍⵉⵏ, ⵜⵉⵣⵔⴼⴰⵏⵉⵏ, ⵜⵉⵎⵡⵓⵔⵉⵏ ⴷ ⵜⵉⵇⵏⵉⵢⵉⵏ . ⴰⴽⴰⴱⴰⵕ ⵏ ⵓⴳⵔⴰⵡ ⴰⵎⴰⵜⵜⴰⵢ ⵏ ⵜⵖⴰⵎⵙⴰ ⴷ ⵓⵙⵍⵉⵥⵕ ⵏ ⵜⴳⴷⵓⴷⴰⵏⵜ ⵜⴰⵏⵙⵍⵎⵜ ⵏ ⵎⵓⵕⵉⵟⴰⵏⵉⵢⴰ ⵔⴰⴷ ⵉⵎⵛⴰⵡⴰⵕ ⴷⵉⵖ ⴷ ⵎⴰⵙⵙ ⵙⴰⵍⵉⵎ ⵛⵉⵅ, ⴰⵏⵎⵀⴰⵍ ⴰⵎⴰⵜⴰⵢ ⵏ ⵜⴷⴰⴱⵓⵜ ⵜⵉⵙⵙ ⵙⵏⴰⵜ, ⴳ ⵢⴰⵏ ⵓⵔⵣⴰⴼ ⵏⵏⴰ ⵔⴰⴷ ⵉⵙⵙⴽⵔ ⵉ ⵓⵙⵇⵇⵉⵎ ⵏ ⵜⴷⴰⴱⵓⵜ ⴰⴷ . ⴰⵎⵍⴰⵍⴰ ⵢⴰⴷ ⵔⴰⴷ ⴷⵉⴳⵙ ⵉⵜⵜⵓⵙⴽⵏ ⵢⵉⵔⵎ ⵏ ⵓⵎⵡⵓⵔⵉ ⴰⴳⴷⵓⴷⴰⵏ ⴳ ⵓⵢⵏⵏⴰ ⵉⵣⴷⵉⵏ ⴷ ⵓⵎⵛⴰⵛⴽⴰ ⴷ ⵉⵙⵏⵉⴼⵉⵍⵏ ⵉⵅⴰⵜⴰⵔⵏ ⵉⵜⵜⵓⵢⴰⵙⵙⵏⵏ ⴳ ⵢⵉⴳⵔ ⵏ ⵓⵙⵏⵖⵎⵙ.
