ⵢⴰⵎⵓ ⵓⴳⵔⴰⵡ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ ⴳ ⵓⵎⵓⵍⵍⵉ ⵡⵉⵙⵙ ⵙⴰ ⴷ ⵙⵏⴰⵜ ⵜⵎⵔⴰⵡⵉⵏ ⵏ ⵓⵙⴼⵙⵔ ⴰⴳⵔⴰⵖⵍⴰⵏ ⵏ ⵜⵥⵕⵉⴳⵜ ⴷ ⵓⴷⵍⵉⵙ, ⵏⵏⴰ ⵉⵜⵜⵓⵙⵏⵎⴰⵍⴰⵏ ⴷⴷⴰⵡ ⵢⵉⵡⵉⵣ ⵏ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⵎⴷ ⵡⵉⵙⵙ ⵙⴹⵉⵙ ⵕⴱⴱⵉ ⴰⴷ ⵜ ⵉⵙⵙⵔⵏⵓ, ⵙⴳ 2 ⴰⵔ 12 ⵢⵓⵏⵢⵓ 2022 ⴳ ⵕⵕⴱⴰⵟ.
ⵉⵥⵍⵉ ⵓⴳⵔⴰⵡ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ ⵢⴰⵏ ⵡⴰⵏⵙⴰ ⵉ ⵓⵎⵢⴰⵡⴰⴹ ⴷ ⵓⵙⵏⵎⵍ ⵙ ⵓⵔⵎⵎⵓⵙ ⵏ ⵓⵙⵍⴳⵏ ⵏ ⵉⵖⴰⵡⴰⵙⵏ ⵉⵙⵍⵉⵥⵕⵏ ⴷ ⵓⵙⵏⵎⵍ ⵏ ⵜⵎⵙⴽⴰⵏⵉⵏ ⵉⵙⵙⵉⴽⵉⵣⵏ ⵜⵉⵥⵍⴰⵢⵉⵏ ⴷ ⵜⵙⵎⴳⴰⵍⵉⵏ ⵏ ⵜⵎⵔⵙⵍⵜ, ⴳ ⵓⵙⴰⵜⵉ ⵏ ⵜⵎⵙⵙⵏⵜⴰⵢⵜ ⵏⵏⵙ ⴳ ⵓⵣⵓⵣⵣⵔ ⵏ ⵜⴷⵍⵙⴰ ⵏ ⵜⵓⵙⵙⵏⴰ ⵜⴰⵙⵖⵎⵙⴰⵏⵜ ⴷ ⵓⵙⴷⵓⵙ ⵏ ⵓⵏⵏⵓⵕⵥⵎ ⵓⴳⴰⵔ ⵅⴼ ⵉⵏⵎⵓⵔⵉⵏ.
ⵉⵙⵏⵓⴱⴳ ⵡⴰⵏⵙⴰ ⵉⵡⵏⴰⵏ ⵏ ⵡⵓⵙⵙⴰⵏ ⵏ ⵓⵙⴼⵙⵔ ⴽⵉⴳⴰⵏ ⵏ ⵜⵙⵉⵡⴰⵔ ⴳ ⵓⴱⴰⵖⵓⵔ ⵏ ⵉⵏⵍⵎⴰⴷⵏ ⵏ ⵜⵎⵔⵙⴰⵍ ⵜⵉⵏⵎⵍⴰⵏⵉⵏ ⴷ ⵉⵏⵍⵎⴰⴷⵏ ⵏ ⵜⵙⴷⴰⵡⵉⵏ ⵙ ⵡⴰⴳⴳⴰⵢ ⴷ ⵓⵙⵡⵓⴷⴷⵓ ⵏ ⵉⵙⴰⵜⴰⵢⵏ ⵏ ⵓⴳⵔⴰⵡ ⴰⵎⴰⵜⵜⴰⵢ. ⵙⵙⵉⵡⴹⵏⵜ ⵜⵙⵉⵡⴰⵔ ⴰⴷ ⵉ ⵉⵏⵍⵎⴰⴷⵏ ⴽⵉⴳⴰⵏ ⵏ ⵉⵙⴳⵓⵎⵏ ⵉⵣⴷⵉⵏ ⵙ ⵜⵎⴰⵙⴰⵢⵉⵏ ⵏ ⵓⴳⵔⴰⵡ ⴰⵎⴰⵜⵜⴰⵢ ⴳ ⵓⵙⴼⵔⴽ ⵙ ⵜⵓⵙⵙⵏⴰ ⵜⴰⵙⵖⵎⵙⴰⵏⵜ ⴷ ⵓⵎⵢⴰⵡⴰⴹ ⴷ ⵓⴹⵎⴰⵏ ⵏ ⵓⵣⵔⴰⴽ ⵏ ⵜⵓⵎⴰⵢⵉⵏ ⵜⵉⵙⵍⵉⵥⵕⵉⵏ ⵉ ⵉⵎⵏⵣⴰⵢⵏ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵡⴰⵜⵉⴳⵏ ⵉⴷⵉⵎⵓⵇⵕⴰⵟⵉⵢⵏ ⴷ ⵜⵎⴰⴳⵓⵜ ⵏ ⵓⵡⵏⵏⵉ ⵅⴼ ⵜⵎⵣⴰⵣⵉⵏ ⵏ ⵓⵡⵏⴳⵉⵎ ⴷ ⵜⴰⵏⵏⴰⵢⵜ, ⴷ ⵓⵙⴱⴷⴷⵉ ⵏ ⵉⵏⵖⵎⵉⵙⵏ ⵏ ⵜⴽⵔⴽⴰⵙ ⴷ ⵓⵡⵏⵏⵉ ⵏ ⵓⴽⵙⴰⵏ ⴷ ⵓⵙⴷⵓⵙ ⵏ ⵓⵎⵢⴰⵏⴰⵡ ⴰⴷⵍⵙⴰⵏ ⴷ ⵡⵓⵜⵍⴰⵢ. ⵎⵢⴰⵖⵏ ⴰⵍⵜⵓ ⵉⵏⵣⵔⴰⴼ ⵏ ⵓⵙⴼⵙⵔ ⴷ ⵉⵙⴰⵜⵉⵢⵏ ⵏ ⵓⴳⵔⴰⵡ ⴰⵎⴰⵜⵜⴰⵢ ⴳ ⵓⵢⵏⵏⴰ ⵉⵣⴷⵉⵏ ⴷ ⵉⵙⵇⵙⵉⵜⵏ ⵏⵏⵙⵏ ⵅⴼ ⵜⵎⵙⴰⵔⵉⵏ ⵏ ⵜⵎⴰⵔⴰⵢⵜ ⵏ ⵜⵎⵔⵙⵍⵜ ⴳ ⵉⵎⵉⵥⴰⵕ ⵉⵎⵢⴰⵖⵏ ⴷ ⵜⴼⵍⵡⵉⵏ ⵏ ⵓⵙⵏⵖⵎⵙ ⴷ ⵡⴰⴳⴳⴰⵢ ⵅⴼ ⵜⵥⵕⵉⴳⵉⵏ ⵏ ⵓⴳⵔⴰⵡ ⴰⵎⴰⵜⵜⴰⵢ ⴳ ⵜⵍⵍⴰ ⴰⵡⴷ ⵜⴰⵏⴰⴹⵜ ⵜⴰⵙⴳⵯⵙⴰⵏⵜ ⵏ ⵜⵎⵔⵙⵍⵜ, ⵜⴰⵖⵓⵔⵉ ⵏⵏⴰ ⵉⵙⵙⴽⵔ ⵓⴳⵔⴰⵡ ⴰⵎⴰⵜⵜⴰⵢ ⵅⴼ ⵓⵙⵎⴽⵍ ⴰⵖⵎⵙⴰⵏ ⵏ ⵜⵎⵙⴰⵔⵜ ⵏ ⵓⴽⵕⴰⴹ ⵎⴳⴰⵍ ⵜⵉⵎⵖⴰⵔⵉⵏ, ⴰⵎⴰⵏⴰⵔ “ⴰⵙⴱⴷⴷⵉ ⵏ ⴳⴰⵔ ⴰⵙⵏⵖⵎⵙ” ⴷ ⵓⵎⴰⵏⴰⵔ “ⴰⵙⵡⵓⵔⵉ ⵏ ⵍⴰⵏⵜⵉⵔⵏⵉⵜ ⴳ ⵜⴼⵍⵙⵜ” ⵏⵏⴰ ⵙⵙⴽⵔⵏ ⵉⴳⵔⴰⵡⵏ ⵏ ⵜⵡⵓⵔⵉ ⴷ ⵉⴼⴼⵖⵏ ⴰⴳⵓⵏⵙ ⵏ ⵓⵙⵇⵇⵉⵎ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ.
ⴳ ⵓⵙⴰⵜⵉ ⵏ ⵓⵙⵡⵓⵔⵉ ⵏ ⵜⵎⵇⵇⵓⵏⵜ ⵏⵏⵙ ⵉⵍⵍⴰⵏ ⴳ ⵓⵍⵖⵓ ⵏ ⵎⵕⵕⴰⴽⵛ ⵉ ⵓⵎⵏⵏⵓⵖ ⵎⴳⴰⵍ ⵜⵉⴽⵕⴷⵉ ⵏ ⵜⵎⵖⴰⵔⵉⵏ, ⵏⵏⴰ ⵜⵙⵙⴳⵎⴹ ⵍⴰⵍ ⵏ ⵡⴰⴷⴷⵓⵔ ⴰⴳⵍⴷⴰⵏ ⵜⴰⴳⵍⴷⵓⵏⵜ ⵜⴰⵎⵇⵕⴰⵏⵜ ⵍⴰⵍⵍⴰ ⵎⵔⵢⴰⵎ ⴰⵙⵙ ⵏ 08 ⵎⴰⵕⵚ 2020, ⵉⵙⵏⵎⴰⵍⴰ ⵓⴳⵔⴰⵡ ⴰⵎⴰⵜⵜⴰⵢ ⵢⴰⵜ ⵜⵙⴰⵡⵔⵜ ⵉ ⵓⴱⴰⵖⵓⵔ ⵏ ⵉⵎⵥⵢⴰⵏⵏ ⴷ ⵉⵄⵔⵔⵉⵎⵏ ⴰⵙⵙ ⵏ ⵓⵙⵉⴹⵢⴰⵙ 11 ⵢⵓⵏⵢⵓ, ⴰⵡⵜⵜⴰⵙ ⵏⵏⵙ ⵜⵉⴳⵎⵉ ⵏ ⵓⴼⵔⴰⴽ ⴰⵎⵣⵖⴰⵏ ⵖⵓⵔ ⵉⵎⵥⵢⴰⵏⵏ ⴷⴰⵜ ⵜⵓⵎⴰⵢⵉⵏ ⵜⵉⵙⵏⵖⵎⴰⵙⵉⵏ ⵉⵙⵙⵉⵣⴷⵉⵔⵏ ⵙ ⵜⵎⵖⴰⵔⵜ.
ⵉⵡⵏⴰⵏ ⵏ ⵜⵡⵓⵔⵉⵡⵉⵏ ⵏ ⵜⵙⴰⵡⵔⵜ ⴰ, ⵓⵔⵎⵏ ⵉⵎⴷⵔⴰⵡⵏ ⵜⵉⵣⵎⵎⴰⵔ ⵏⵏⵙⵏ ⵅⴼ ⵜⵉⴹⴰⴼ ⴷ ⵓⵙⵡⵓⵜⵜⵓ ⵏ ⴽⵔⴰ ⵏ ⵜⴰⵏⵏⴰⵢⵉⵏ ⵜⵓⵔⵙⵉⵍⵉⵏ ⵉⵚⴽⴰⵏ ⵅⴼ ⵡⴰⵏⴰⵡ ⴳ ⵜⵓⵎⴰⵢⵉⵏ ⵜⵉⵙⵏⵖⵎⴰⵙⵉⵏ, ⴷ ⵓⵙⵃⵓⵕⵕⵛ ⵏ ⵉⵙⵇⵙⵉⵜⵏ ⵏⵏⵙⵏ ⴷ ⵜⵎⵙⴽⴰⵔⵉⵏ ⵏⵏⵙⵏ ⴳ ⵓⵡⵜⵜⴰⵙ ⵏ ⵓⵙⴳⵎⵉ ⵏ ⵜⴼⵔⴽⴰ ⵏⵏⵙⵏ ⵜⴰⵎⵙⵖⴰⵏⵜ ⴷⴰⵜ ⵜⴳⵓⵔⵉⵡⵉⵏ ⴷ ⵜⵡⵍⴰⴼⵉⵏ ⴷ ⵜⴱⵔⴰⵜⵉⵏ ⵉⵙⵙⵉⵣⴷⵉⵔⵏ ⵙ ⵜⵎⵖⴰⵔⵜ, ⴳ ⵓⵙⵉⵜⵎ ⵏ ⵓⵙⵙⵉⴷⵔ ⵏ ⵜⴷⵍⵙⴰ ⵏ ⵓⵙⵉⴽⵙⵍ ⴳⵔ ⵉⵔⴳⴰⵣⵏ ⴷ ⵜⵎⵖⴰⵔⵉⵏ ⵖⵔ ⵉⵎⵥⵢⴰⵏⵏ.
