« ⵉⵔⵉⵎⵏ ⵏ ⵓⵙⵏⴰⵎ ⵏ ⵜⵙⵉⵍⴰⵡⵉⵏ ⵜⵉⵎⵓⵟⵟⵓⵏⵉⵏ ⵜⵉⵎⴰⵜⴰⵢⵉⵏ ⵉⵍⵍⴰⵏ, ⴳⴰⵏⵜ ⵢⴰⵏ ⵡⴰⵍⴰⵢ ⴰⵎⵇⵔⴰⵏ, ⵎⴰⵛⴰ ⵓⵔ ⴷ ⵉⵡⵉⵏ ⵉⴼⵙⵙⴰⵢⵏ ⵉ ⵜⵎⵓⴽⵔⵉⵙⵉⵏ ⴰⴽⴽⵯ ⵉⵍⵍⴰⵏ » ⴰⵢ ⵜⵏⵏⴰ ⵎⴰⵙⵙⴰ ⵍⴰⵟⵉⴼⴰ ⴰⵅⴰⵔⴱⴰⵛ, ⵜⴰⵏⵙⵙⵉⵅⴼⵜ ⵏ ⵓⴳⵔⴰⵡ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ ⵉⵡⵏⴰⵏ ⵏ ⵡⵓⵎⵓ ⵏⵏⵙ ⴳ ⵜⵉⵏⴰⵡⵜ ⵜⴰⴳⵔⴰⵖⵍⴰⵏⵜ ⵏⵏⴰ ⵜⵙⵏⵎⴰⵍⴰ ⵓⵙⵙⴰⵏ ⵏ 30 ⴷ 31 ⵎⴰⵕⵚ 2023 ⵜⵙⴷⴰⵡⵉⵜ ⵏ ⴽⵓⵍⵓⵎⴱⵢⴰ ⴳ ⵏⵢⵓⵢⵓⵕⴽ, ⴷⴷⴰⵡ ⵓⵙⴳⵓⵎ ⵏ « ⴰⵙⵏⴰⵎ ⵏ ⵜⵙⵉⵍⴰⵡⵉⵏ : ⴰⵙⵓⵔⴼ ⵏ ⵜⴼⵉⴽⴽⴰⵛ ».
ⴳ ⵜⴳⵓⵔⵉ ⵏⵏⵙ ⴷⴷⴰⵡ ⵓⵙⴳⵓⵎ ⵏ « ⵜⵉⵎⵔⴰⵔⵓⵜⵉⵏ ⵏ ⵉⵎⵙⵏⴰⵎⵏ ⴳ ⵜⵙⴳⴳⵯⵉⵏ ⵢⴰⴹⵏ ⵏ ⵓⵎⴰⴹⴰⵍ », ⵜⵏⵏⴰ ⵎⴰⵙⵙⴰ ⴰⵅⵔⴱⴰⵛ « ⵜⴰⵖⵢⴰⵙⵜ ⵏ ⵜⵓⵎⴰⵢⵉⵏ ⵙ ⵓⵢⵏⵏⴰ ⵙ ⵜⵜⵓⵙⵡⵓⵔⵉⵏⵜ ⵖⵓⵔ ⵜⵙⵉⵍⴰⵡⵉⵏ ⵜⵉⵎⵇⵔⴰⵏⵉⵏ ⴷⴰ ⵜⵙⵔⵓⵙ ⴽⵉⴳⴰⵏ ⵏ ⵜⵎⵓⴽⵔⵉⵙⵉⵏ : « ⵜⵉⵎⵙⵙⵏⵜⴰⵢ ⵜⵓⵙⵍⵉⴳⵉⵏ ⵉⴳⴰⵏ ⵜⵉⵙⴰⵍⵉⵡⵉⵏ ⵜⵉⵎⵓⵟⵟⵓⵏⵉⵏ ⵓⵔ ⵖⵉⵢⵏⵜ ⴰⴷ ⴳⵏⵜ ⵍⴱⵓⵍⵉⵙ ⵏ ⵉⵏⴰⵡⵏ ⴷ ⵓⵙⵏⴰⵎ ⵏ ⵡⴰⵡⴰⵍ ⴰⴳⴷⵓⴷⴰⵏ. ⴰⵔ ⵏⵙⵙⵓⵜⵓⵔ ⴳ ⵉⵡⴰⵏⴽⵏ ⴰⴷ ⵓⵔ ⵙⵡⵓⵜⵜⵓⵏ ⵜⵉⵍⴻⵍⵍⵉ ⵏ ⵓⵡⵏⵏⵉ ⴰⵔ ⵜⵙⵙⵓⵔⵓⴼ ⵜⵉⵎⵙⵙⵏⵜⵉⵢⵉⵏ ⵜⵓⵙⵍⵉⴳⵉⵏ ⴷ ⵜⵉⵏ ⵓⵙⵖⵏⵣⵉ ⴰⴷ ⵙⵙⴽⵔⵏⵜ ⴰⵢⴰⵏ ».
ⵙ ⵢⵉⵙⵉ ⵏ ⵓⵎⴷⵢⴰ ⵏ ⵜⵉⵖⵉⵙⵜ ⵜⵉⵎⵍⵥⵢⵜ, ⵜⵙⵙⴽⵏ ⴷⵉⵖ ⵎⴰⵙⵙⴰ ⴰⵅⴰⵔⴱⴰⵛ ⵉⵙ ⵏ ⵉⵇⵇⴰⵏ ⵉ ⵓⵙⵏⴰⵎ ⴰⴷ ⵉⵎⵓⵏ ⴰⴱⴷⴰ ⴷ ⵓⵖⵉⵡⵍ ⴰⵜⵉⴽⵏⵓⵍⵓⵊⵉ. « ⴰⵙⵎⵔⵙ ⵉⵜⵜⵎⵖⵓⵔⵏ ⵏ ⵜⵉⵖⵉⵙⵜ ⵜⵉⵎⵍⵥⵢⵜ ⴷⴰ ⴷ ⵉⵜⵜⴰⵡⵉ ⴽⵉⴳⴰⵏ ⵏ ⵉⵎⵉⵣⵉⵢⵏ. ⵉⴷ ⵡⴰⵍⴳⵓⵔⵉⵜⵎⵏ ⵉⵎⵖⴰⵡⴰⵙⵏ ⴷⴰ ⵜⵜⴰⵡⵉⵏ ⵖⵔ ⴰⴷⴷⴰⴷⵏ ⵏ ⵓⵙⵏⵓⵃⵢⵓ. ⵉⵍⵍⴰ ⴷⵉⵖ, ⴽⵉⴳⴰⵏ ⵏ ⵉⵎⵉⵣⵉ ⵏ ⵜⴹⵓⵙⵉ ⵏ ⵜⵍⴻⵍⵍⵉ ⵜⴰⵎⴷⴰⵏⵜ ⵏⵏⴰ ⴷ ⵢⵉⵡⵉ ⵡⵓⵇⵓⵏ ⴰⵍⴳⵓⵔⵉⵜⵎⵉ ⵏⵏⴰ ⵉⴳⴰ ⵓⵙⵡⵔⴽ ⵏ ⵜⵓⵎⴰⵢⵉⵏ ⵙ ⵓⵢⵏⵏⴰ ⵙ ⵜⵜⵓⵙⵡⵓⵔⵉⵏⵜ ⵜⵙⵉⵍⴰⵡⵉⵏ ⵜⵉⵎⵓⵟⵟⵓⵏⵉⵏ ». ⵜⵔⵏⵓ ⴰⵔ ⵜⵜⵉⵏⵉ : « ⵙ ⵓⴱⵔⵉⴷ ⵏ ⵜⵖⴰⵔⵉⵡⵉⵏ, ⵜⵉⵖⵉⵙⵜ ⵜⵉⵎⵍⵥⵢⵜ ⵏ ⵉⵎⴰⵍ ⵉⵇⵇⴰⵏ ⵏ ⴰⴷ ⵜⵔⴰⵔ ⵜⵖⴹⴼⵜ ⵉ ⵓⵎⵢⴰⵏⴰⵡ ⵏ ⵜⵉⴼⴼⵓⴳⵏⴰ ».
ⴳ ⵓⵢⵏⵏⴰ ⵉⵣⴷⵉⵏ ⴷ ⵜⵉⵖⵉⵢⵜ ⵏ ⴰⴷ ⵣⵔⵉⵏ ⵖⴼ ⵜⵎⵓⵔⴰ ⵢⴰⴽⴽⵯ ⵏ ⵓⵎⴰⴹⴰⵍ ⵉⵜⵙ ⵏ ⵉⴹⵕⵉⵙⵏ ⵉⵣⵔⴼⴰⵏⵏ ⴰⵎ ⵡⵉⵏ Digital Services Act ⵏⵏⴰ ⵉⵙⵔⵙ ⵡⴰⵎⵓⵏ ⵓⵕⵓⴱⴱⵉ, ⵜⵏⵏⴰ ⵜⵏⵙⵙⵉⵅⴼⵜ ⵏ ⵓⴳⵔⴰⵡ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ ⵉⵙ « ⵜⵉⵙⵉⵍⴰⵡⵉⵏ ⵏ ⵓⵙⵏⵖⵎⵙ ⵙⵡⵓⵔⵉⵏⵜ ⴳ ⵓⴳⴰⴷⴰⵣ ⴰⵎⴰⵜⴰⵢ ⴷ ⵡⵉⵏ ⵉⵡⵔⵉⵏ ⵏ ⵉⵡⵜⵜⴰ. ⵉⵇⵇⴰⵏ ⵏ ⵙ ⵓⵢⴰⴷ ⴰⴷ ⴰⵙⵉⵏⵜ ⵜⵉⵎⴰⵙⴰⵢⵉⵏ ⵏⵏⵙⵏⵜ, ⴰⵛⴽⵓ ⴳⴰⵏ ⵉⵎⵉⵣⴰⵢⵏ ⵉⵎⴰⵜⴰⵢⵏ ⴰⴳⵓⵏⵙ ⵏ ⵓⵙⴰⵢⵔⴰⵔ ⴰⴳⴷⵓⴷⴰⵏ ⴰⵎⵓⵟⵟⵓⵏ ».
ⵜⵉⵏⴰⵡⵜ ⴰⴷ ⵏⵏⴰ ⵜⵙⵏⵎⴰⵍⴰ ⵜⵙⴷⴰⵡⵉⵜ ⵏ ⴽⵓⵍⵓⵎⴱⵢⴰ, ⵃⴰⴹⵕⵏ ⴷⵉⴳⵙ ⵎⴰⵙⵙ ⵊⵓⵣⵉⴼ ⵙⵜⵉⴳⵍⵉⵜⵣ, ⵏⵏⴰ ⵖⵓⵔ ⵜⵍⵍⴰ ⵜⵙⵎⵖⵓⵔⵜ ⵏⵓⴱⵉⵍ ⴳ ⵜⴷⴰⵎⵙⴰ, ⵉⴳⵏⵙⴰⵙⵏ ⵏ ⵜⵎⵓⵔⴰ ⵏ ⵓⵔⵓⴱⴱⴰ, ⵉⴳⵏⵙⴰⵙⵏ ⵏ ⵍⵓⵏⵉⵙⴽⵓ, ⵉⵙⵍⵎⴰⴷⵏ ⵉⵎⵇⵔⴰⵏⵏ ⴷ ⵉⵎⵓⵣⴰⵢ ⵉⴳⵔⴰⵖⵍⴰⵏⵏ ⵏ ⵓⵎⵓⵟⵟⵓⵏ, ⵏ ⵜⵎⵔⵙⴰⵍ ⵏ ⵓⵙⵏⴰⵎ, ⵉⵎⴰⵣⵣⴰⵍⵏ ⵏ ⵡⴰⵎⵓⵏ ⵓⵖⵍⵉⵎ ⵏ ⴽⵉⴳⴰⵏ ⵏ ⵜⵎⵓⵔⴰ : ⵎⴰⵔⵉⴽⴰⵏ, ⵍⵀⵉⵏⴷ, ⴰⴼⵔⵉⵇⵉⵢⴰ ⵏ ⵓⵢⴼⴼⵓⵙ, ⵓⵙⵟⵕⴰⵍⵢⴰ, ⴱⵔⵉⵣⵉⵍ, ⴽⴰⵏⴰⴷⴰ, ⴽⵓⵍⵓⵎⴱⵢⴰ, ⵉⵏⴷⵓⵏⵉⵙⵢⴰ, ⵉⵕⵍⴰⵏⴷⴰ,… ⴰⴼⴰⴷ ⴰⴷ ⵎⵔⴰⵔⴰⵏ ⵙ ⵜⵖⴱⵉ ⴷ ⵓⵎⵢⴰⵏⴰⵡ ⵅⴼ ⴽⵉⴳⴰⵏ ⵏ ⵜⵖⴰⵔⴰⵙⵉⵏ ⴷ ⵢⵉⵔⵎⵏ ⵉⴳⵔⴰⵖⵍⴰⵏⵏ ⴳ ⵓⵢⵏⵏⴰ ⵉⵣⴷⵉⵏ ⴷ ⵓⵙⵏⴰⵎ ⵏ ⵜⵙⵉⵍⴰⵡⵉⵏ ⵜⵉⵎⵓⵟⵟⵓⵏⵉⵏ.
ⵜⵎⵓⵏ ⵎⴰⵙⵙⴰ ⴰⵅⴰⵔⴱⴰⵛ ⴰⴽⴷ ⴰⵎⵉⵏ ⵄⵣⵣⵉⵎⴰⵏ, ⴰⵏⵎⵀⴰⵍ ⵏ ⵜⵣⵓⵏⵉ ⵏ ⵓⵎⵢⴰⵡⴰⵙ ⴰⴳⵔⴰⵖⵍⴰⵏ ⴰⴳⵓⵏⵙ ⵏ ⵓⴳⵔⴰⵡ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ.
