ⴳ ⵓⵙⴰⵜⵉ ⵏ ⵓⵏⵏⵓⵕⵥⵎ ⵏⵏⵙ ⵅⴼ ⵓⵎⴰⴹⴰⵍ ⴰⴽⴰⴷⵉⵎⵉ, ⵉⵙⵏⵓⴱⴳ ⵓⴳⵔⴰⵡ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ ⴰⵙⵙ ⵏ 31 ⵎⴰⵢⵓ, ⴳ ⵓⵙⵖⵉⵎ ⵏⵏⵙ, ⵢⴰⵏ ⵓⴽⴰⴱⴰⵕ ⵏ ⵉⵎⵃⴹⴰⵕⵏ ⵏ ⴳⵓⵍⴼ ⵓⵏⵉⵖⵉⵔⵙⵉⵜⵉ ⵏ ⴱⴰⵃⵕⴰⵢⵏ, ⵉⵡⵏⴰⵏ ⵏ ⵓⵔⵣⴰⴼ ⵏⵏⵙ ⵉ ⵍⵎⵖⵔⵉⴱ ⴳ ⵓⵙⴰⵜⵉ ⵏ ⵢⴰⵏ ⵓⵖⴰⵡⴰⵙ ⵏ ⵓⵙⵏⵉⴼⵍ ⴰⴱⵉⴷⴰⵖⵓⵊⵉ ⴰⴽⴷ ⴰⵙⵉⵏⴰⴳ ⴰⵎⴰⵜⵜⴰⵢ ⵏ ⵓⵙⵏⵖⵎⵙ ⴷ ⵓⵎⵢⴰⵡⴰⴹ ⵏ ⵕⵕⴱⴰⵟ.
ⵥⵕⴰⵏ ⵉⴳⵎⴰⵎⵏ ⵏ ⵓⴽⴰⴱⴰⵕ ⴰⴱⵃⴰⵔⴰⵢⵏⵉ ⴷ ⵡⵉⵏ ⵓⵙⵉⵏⴰⴳ ⴰⵎⴰⵜⵜⴰⵢ ⵏ ⵓⵙⵏⵖⵎⵙ ⴷ ⵓⵎⵢⴰⵡⴰⴹ ⵢⴰⵏ ⵓⵙⵎⵏⵉⴷ ⵏ ⵜⵙⵎⵉⴳⵍⵉⵏ, ⵜⵉⵎⴰⵙⴰⵢⵉⵏ, ⴰⵙⵏⵎⴰⵍⴰ ⴷ ⵜⵡⵓⵔⵉ ⵏ ⵓⴳⵔⴰⵡ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ ⵉⴳⴰⵏ ⵜⴰⵎⵔⵙⵍⵜ ⵜⴰⴷⵓⵙⵜⵓⵔⵉⵜ ⴰⵙⵏⵉⵎⴰⵏⵜ ⵢⵓⵙⵉⵏ ⴰⴳⴳⵯⴰ ⵏ ⵓⵙⵏⴰⵎ ⵏ ⵓⵙⵏⵖⵎⵙ ⴰⵙⵍⵉⵥⵕ ⴰⵎⵖⵔⴰⴱⵉ.
ⵜⵜⵓⵙⵏⵓⴱⴳⵏ ⴷⵉⵖ ⵉⵎⵃⴹⴰⵕⵏ ⵖⵓⵔ ⵎⴰⵙⵙⴰ ⵍⴰⵟⵉⴼⴰ ⴰⵅⴰⵔⴱⴰⵛ, ⵜⴰⵏⵙⵙⵉⵅⴼⵜ ⵏ ⵓⴳⵔⴰⵡ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ ⴰⴽⴷ ⵎⴰⵙⵙ ⴱⵏⵄⵉⵙⵙⴰ ⵄⴰⵙⵍⵓⵏ, ⴰⵏⵎⵀⴰⵍ ⴰⵎⴰⵜⴰⵢ ⵏⵏⴰ ⴳ ⵜⴳⵓⵔⵉ ⵏⵏⵙⵏ ⵏ ⵓⵙⵏⵓⴱⴳ, ⵙⵙⴽⵜⵉⵏ ⴷ ⵉⵙⴰⴳⵓⵎⵏ ⵉⵅⴰⵜⴰⵔⵏ ⵏ ⵜⵙⵎⵉⴳⵍⵜ ⵏ ⵓⴳⵔⴰⵡ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ ⴳ ⵓⵢⵏⵏⴰ ⵉⵣⴷⵉⵏ ⴷ ⵜⴳⵎⵉ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵡⴰⵜⵉⴳⵏ ⵉⴷⵉⵎⵓⵇⵕⴰⵟⵉⵢⵏ ⴰⴳⵓⵏⵙ ⵏ ⵜⵓⵎⴰⵢⵉⵏ ⵜⵉⵙⵍⵉⵥⵕⵉⵏ.
ⵉⵡⵏⴰⵏ ⵏ ⵓⵔⵣⴰⴼ ⵉ ⵉⴷⵖⴰⵔⵏ ⴷ ⵉⵙⵔⵓⵙⵏ ⵉⵜⵉⵇⵏⵉⵢⵏ ⵏ ⵜⵎⵔⵙⵍⵜ, ⵜⵜⵓⵙⵏⵖⵎⵙⵏ ⵉⵎⵃⴹⴰⵕ ⵅⴼ ⴽⵔⴰ ⵏ ⵉⵎⴰⵙⵙⵏ ⵉⵅⴰⵜⴰⵔⵏ ⵏ ⵓⵙⵏⴰⵎ ⵏ ⵉⵖⴰⵡⴰⵙⵏ ⵉⵙⵍⵉⵥⵕⵏ ⴰⵎⵎ ⵓⴹⴼⴼⵓⵕ ⴷ ⵓⵎⵙⴰⵏⵓⵏ ⵏ ⵉⵖⴰⵡⴰⵙⵏ. ⵜⵉⴳⴰⵡⵜ ⵏ ⵓⴳⵔⴰⵡ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ ⴳ ⵓⵢⵏⵏⴰ ⵉⵣⴷⵉⵏ ⴷ ⵉⵎⵣⴰⵣⵏ ⵏ ⵓⵡⵏⵏⵉ ⴳ ⵜⵏⵣⵡⴰⵢⵉⵏ ⴷ ⵉⵜⵉⵍⵉⴼⵉⵣⵢⵓⵏⵏ ⵉⴳⴷⵓⴷⴰⵏⵏ ⴷ ⵡⵓⵙⵍⵉⴳⵏ, ⴳ ⵉⵣⵎⵣⵏ ⵏ ⵉⵙⵜⴰⵢⵏ ⵏⵖ ⴱⵔⵔⴰ ⵏ ⵉⵣⵎⴰⵣ ⴰⴷ, ⴳⴰⵏ ⴰⴽⴽⵯ ⵉⵙⴳⵓⵎⵏ ⵏ ⵓⵔⵣⴰⴼ ⴰⴷ ⵏ ⵓⵏⵖⵎⵙ.
