“ⴰⵏⵖⵎⵉⵙ ⵏ ⵜⴽⵔⴽⴰⵙ ⵢⵉⵡⴷ ⴷⵖⵉ ⵢⴰⵜ ⵜⵉⵣⵉ ⵏ ⵡⴰⵟⵟⴰⵏ ⴰⵎⵇⵔⴰⵏ ⴰⵖⵣⵓⵔⴰⵏ. ⵉⵣⴷⵉ ⴷ ⴽⵉⴳⴰⵏ ⵏ ⵢⵉⴳⵔⴰⵏ ⵢⴰⵖⵓⵍ ⵉⴳⴰ ⵢⴰⵏ ⴳ ⵉⵎⴰⵙⵙⵏ ⵏ ⵓⴽⵛⵛⵓⵎ ⴰⵙⵔⵜⴰⵏ ⴰⵎⴰⴹⵍⴰⵏ” ⴰⵢ ⵜⵏⵏⴰ ⵎⴰⵙⵙⴰ ⵍⴰⵟⵉⴼⴰ ⴰⵅⴰⵔⴱⴰⵛ, ⵜⴰⵏⵙⵙⵉⵅⴼⵜ ⵏ ⵓⴳⵔⴰⵡ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ -ⵀⴰⴽⴰ- ⵉⵡⵏⴰⵏ ⵏ ⵡⵓⵖⵔⵉⵡ ⵏ ⵓⵏⵏⵓⵕⵥⵎ ⵏⵏⴰ ⵉⵜⵜⵓⴳⴰⵏ ⴰⵙⵙ ⵏ 8 ⴷⵓⵊⴰⵎⴱⵉⵔ 2023 ⴳ ⵜⵙⴷⴰⵡⵉⵜ ⵏ ⵙⵉⴷⵉ ⵎⵓⵃⵎⴷ ⴱⵏⵄⴱⴷⵍⵍⴰⵀ ⵏ ⴼⴰⵙ ⴳ ⵓⵙⴳⵓⵎ ⵏ “ⴰⵙⵏⵖⵎⵙ ⵏ ⵜⴽⵔⴽⴰⵙ ⴳ ⵓⵣⵎⵣ ⵏ ⵜⴰⵙⵙⴰⵙⵜ, ⴰⵎⴷⵢⴰ ⵏ ⵓⵏⴷⵓⴷⵉ ⵏ ⵍⵃⵓⵣ”
ⵜⵏⵏⴰ ⴷⵉⵖ ⵎⴰⵙⵙⴰ ⴰⵅⴰⵔⴱⴰⵛ ⵉⵙ “ⴰⵙⵏⵖⵎⵙ ⵏ ⵜⴽⵔⴽⴰⵙ ⵉⴳⴰ ⴷⵖⵉ ⵢⴰⵜ ⵜⵡⴰⵖⵉⵜ ⵢⵓⴷⴼⵏ ⴳ ⵜⵡⵏⵏⴰⴹⵜ ⵏ ⵓⵎⵢⴰⵡⴰⴹ ⴰⵎⴰⵜⴰⵢ ⴰⵔ ⵜⵜⵎⵖⵓⵔ ⵜⵓⵎⴰⵏ ⴰⴷ ⴳ ⵓⵣⵎⵣ ⵏ ⵜⴰⵙⵙⴰⵙⵜ. ⴰⵔ ⵜⵉⴽⴽⵉ ⵅⴼ ⵓⵢⴰⴷ ⴽⵉⴳⴰⵏ ⵏ ⵉⵎⴷⵢⴰⵜⵏ ⵏ ⵓⵙⵏⵖⵎⵙ ⵏ ⵉⵅⵔⵔⵉⵇⵏ ⵏⵏⴰ ⵉⵍⵍⴰⵏ ⴳ ⵜⵡⴰⵖⵉⵜ ⵏ ⵓⵏⴷⵓⴷⵉ ⵏ ⵍⵃⵓⵣ. ⵜⵏⵏⴰ ⵎⴰⵙⵙⴰ ⴰⵅⴰⵔⴱⴰⵛ ⵉⵙ ⵜⵉⴹⴰⴼ ⵏ ⵉⵏⵎⵓⵔⵉⵏ ⵏ ⵜⵉⵏ ⵜⵏⴱⴰⴹⵜ ⵜⴰⴳⴷⵓⴷⴰⵏⵜ, ⴷ ⵉⵎⵏⵣⴰⵢⵏ ⵏ ⵓⵎⵢⴰⵡⴰⵙ ⵉⵙⵎⵓⵏⵏ ⵉⵎⵖⵔⴰⴱⵉⵢⵏ ⴰⴽⴷ ⴰⵙⵎⵓⵙⵙⵓ ⵏ ⵉⵎⴰⵙⵙⵏ ⵏ ⵓⵙⵏⵖⵎⵙ ⴰⴳⴷⵓⴷⴰⵏ ⴷ ⵡⵓⵙⵍⵉⴳ ⵓⵡⵙⵏⵜ ⴳ ⵓⵙⵙⴷⵔⵙ ⵏ ⵜⵓⵙⵓⵔⵜ ⵏ ⵓⵏⵢⵓⴷⴷⵓ - ⵙ ⵓⴼⵔⴰⴽ ⵏⵖ ⵜⴰⵅⴰⵍⵜ- ⵏ ⵉⵏⵖⵎⵉⵙⵏ ⵏ ⵜⴽⵔⴽⴰⵙ ⴷ ⵡⵉⵏⵏⴰ ⵉⵜⵜⴰⵍⵙⵏ ⵜⴰⴽⵏⴷⴰⵡⵜ.
ⵜⵏⵏⴰ ⵎⴰⵙⵙⴰ ⴰⵅⴰⵔⴱⴰⵛ ⵉⵙ ⵜⴳⴰ ⵜⵓⵎⴰⵏⵜ ⵏ ⵓⵙⴽⵔⴽⵙ ⴳ ⵉⵏⵖⵎⵉⵙⵏ ⵢⴰⵜ ⵜⵏⵥⵕⵉⵜ ⵜⴰⵎⵇⵔⴰⵏⵜ ⵖⵓⵔ ⵉⵎⵙⵏⴰⵎⵏ ⴰⵛⴽⵓ ⵉⵇⵇⴰⵏ ⵜⵏ ⵉⵏ ⴰⴷ ⵙⵡⵓⴷⴷⵓⵏ ⵢⴰⵜ ⵜⵎⵓⴽⵔⵉⵙⵜ ⵎⵇⵇⵓⵔⵏ : ⴰⵎⵏⵏⵓⵖ ⵎⴳⴰⵍ ⴰⵏⵖⵎⵉⵙ ⵏ ⵜⴽⵔⴽⴰⵙ ⴱⵍⴰ ⴰⴷ ⵟⵟⴰⵙⵏ ⵜⵉⵍⴻⵍⵍⵉ.
ⴷⴼⴼⵉⵔ ⵏ ⴰⴷ ⵜⵙⵙⴽⵏ ⵜⵉⵍⴰⵍⵜ ⵏ ⵓⴳⵔⴰⵡ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ ⴳ ⵓⵎⵏⵏⵖ ⵏⵏⵙ ⵎⴳⴰⵍ ⵉⵏⵖⵎⵉⵙⵏ ⵏ ⵜⴽⵔⴽⴰⵙ ⴷ ⵜⵔⵡⵉⵏⵉⵏ ⵢⴰⴹⵏ ⵏ ⵓⵙⵏⵖⵎⵙ, ⵜⵏⵏⴰ ⵉⵙ ⴰⵎⵏⵏⵓⵖ ⵎⴳⴰⵍ ⵜⵉⵡⵓⵔⵉⵡⵉⵏ ⵏ ⵓⵙⴽⵉⵔⴽⵙ ⵅⴼ ⵜⵡⵏⴳⵉⵎⵉⵏ ⴷ ⵜⴰⵏⵏⴰⵢⵉⵏ ⵉⵇⵇⴰⵏ ⵜⵏ ⵢⴰⵜ ⵜⵙⵟⵕⴰⵜⵉⵊⵉⵜ ⵉⵖⵉⵢⵏ ⴰⴷ ⵉⵙⵍⵍⵡⵓ, ⵉⵖⵉⵢⵏ ⴰⴷ ⵉⵙⵎⵓⵏ ⵜⴰⵡⵓⵔⵉ ⵜⴰⴳⴷⵓⴷⴰⵏⵜ ⴷ ⵡⴰⴷⴰⴼ ⵏ ⵉⵏⵎⵓⵔⵉⵏ ⴷ ⵉⵎⴰⵣⵣⴰⵍⵏ ⵓⵖⵔⵉⵎⵏ . « ⴰⵙⵙⴽⵏ ⴷ ⵓⵙⵡⵓⵔⵉ ⵏ ⵜⵙⵔⵜⵉⵜ ⵜⴰⴳⴷⵓⴷⴰⵏⵜ ⴳ ⵢⵉⴳⵔ ⴰⴷ ⵓⵔ ⵜⵖⵉⵢ ⴰⴷ ⵜⵍⴽⵎ ⴱⵍⴰ ⵜⴰⵎⴰⵙⴰⵢⵜ ⵏ ⵜⵙⴷⴰⵡⵉⵜ ⴷ ⵢⵉⵡⵙ ⵏ ⵏ ⵢⵉⴳⵔⴰⵏ ⵉⵎⴰⵙⵙⴰⵏⵏ ⵙ ⵉⵎⵥⵍⵉ ⴳ ⵓⵢⵏⵏⴰ ⵉⵣⴷⵉⵏ ⵙ ⵜⵏⴽⵔⴰ ⵏ ⵓⵔⵣⵣⵓ ⴰⴽⴰⴷⵉⵎⵉ ⴳ ⵢⵉⴳⵔ ⵏ ⵓⵎⵏⵏⵓⵖ ⵎⴳⴰⵍ ⵉⵏⵖⵎⵉⵙⵏ ⵏ ⵜⴽⵔⴽⴰⵙ, ⵡⵉⵏ ⵓⵎⵢⴰⵡⴰⴹ ⴰⵎⵓⵟⵟⵓⵏ ⴷ ⵓⵙⵓⵙⵢⵓⵍⵓⵊⵉ ⵏ ⵓⵙⵏⵖⵎⵙ, ⵔⵏⵓ ⵢⴰⵙ ⴰⵡⴷ ⵉⴳⵔ ⵏ ⵓⵙⴳⵎⵉ ⵅⴼ ⵓⵙⵏⵖⵎⵙ ⴷ ⵡⵉⵏ ⵓⵎⵓⵟⵟⵓⵏ » ⴰⵢⴰ ⴰⵢ ⵜⵔⵏⴰ ⵎⴰⵙⵙⴰ ⴰⵅⴰⵔⴱⴰⵛ.
ⵃⴰⴹⵕⵏ ⵉ ⵡⵓⵖⵔⵉⵡ ⴰⴷ ⵏ ⵓⵏⵏⵓⵕⵥⵎ ⴳ ⵜⵙⴷⴰⵡⵉⵜ ⵏ ⵎⵓⵃⴰⵎⴷ ⴱⵏ ⵄⴱⴷⵍⵍⴰⵀ, ⵎⴰⵙⵙ ⵎⵓⵚⵟⴰⴼⴰ ⵍⵊⴰⵄⵍⵉ, ⵏ ⵉⵏⴱⴷⴰⴷⵏ ⵏ ⵉⵙⵍⵎⴰⴷⵏ ⵏ ⵜⵖⵉⵡⴰⵏⵉⵏ ⴷ ⵜⵉⵏⵎⴰⵍ ⵜⵉⵎⴰⵜⵜⴰⵢⵉⵏ ⵏ ⵜⵎⴷⵉⵏⵜ, ⵉⵏⵖⵎⴰⵙⵏ ⴷ ⴽⵉⴳⵏⴰ ⵏ ⵉⵎⵙⴷⴰⵡⵏ ⵏ ⵉⵎⵔⵣⴰ ⵏ ⵜⵙⴰⴷⴰⵡⵉⵜ ⴰⴷ.
