“ ⴳ ⵓⵙⴳⵓⵎ ⵏ ⵜⵉⴹⴰⴼ ⵏ ⵡⵓⵖⵓⴷ ⵏ ⵜⵣⵣⵉⴳⵣⵜ ⵏ ⵉⵙⵜⴰⵢⵏ, ⵜⵉⵍⴰⵍⵜ ⵏ ⵓⵙⵍⴳⴰⵏ ⵏ ⵓⵙⵏⵖⵎⵙ ⵓⵔ ⵏ ⵉⵇⵇⴰⵏ ⴰⴷ ⵜⴳ ⵖⴰⵙ ⴰⵙⵡⵓⴷⴷⵓ ⵏ ⵓⵣⵎⵣ ⵏ ⵡⴰⵡⴰⵍ ⵏ ⵉⵎⵏⴽⴰⴷⵏ”, ⴰⵢ ⵜⵏⵏⴰ ⴰⵙⵙ ⵏ 21 ⵎⴰⵢⵢⵓ 2024 ⴳ ⵏⵡⴰⴽⵛⵓⵟ ⵜⵏⵙⵙⵉⵅⴼⵜ ⵏ ⵓⴳⵔⴰⵡ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ ⴳ ⵓⵎⴳⵔⴰⵡ ⴰⴳⵔⴰⵖⵍⴰⵏ ⵏⵏⴰ ⵉⵙⵏⵎⴰⵍⴰ ⵓⴳⵔⴰⵡ ⴰⵎⴰⵜⵜⴰⵢ ⵏ ⵜⵏⵖⵎⵙⵜ ⴷ ⵓⵙⵍⵉⵥⵕ ⵏ ⵎⵓⵕⵉⵟⴰⵏⵢⴰ ⴷⴷⴰⵡ ⵓⵙⴳⵓⵎ “ⴰⵙⵍⴳⵏ ⴷ ⵜⵣⵣⵉⴳⵣⵜ ⵏ ⵉⵙⵜⴰⵢⵏ”. ⴳ ⵜⴳⵓⵔⵉ ⵏⵏⵙ ⵉⵡⵏⴰⵏ ⵏ ⵜⴳⵉⵡⵔⵜ ⵏ ⵓⵏⵏⵓⵕⵥⵎ ⵏ ⵜⵉⵏⴰⵡⵜ ⴰⴷ ⴳ ⴰⵎⵓⵏ ⵉⵙⵍⴳⴰⵏⵏ ⵏ ⵓⵙⵏⵖⵎⵙ ⵏ 11 ⵏ ⵜⵎⵓⵔⴰ ⵜⵉⴼⵔⵉⵇⵉⵏ, ⵜⵏⵏⴰ ⵎⴰⵙⵙⴰ ⴰⵅⴰⵔⴱⴰⵛ ⵉⵙ “ⵓⴳⴰⵔ ⵏ ⵓⵙⵙⴰⵏⵓⵏ ⵏ ⵓⵙⵏⵖⵎⵙ ⵉⵡⵏⴰⵏ ⵏ ⵉⵙⵜⴰⵢⵏ ⴷ ⵜⵙⵢⴰⴼⵓⵜ ⵏ ⵉⵍⵓⴳⵏⵏ ⵉ ⵜⴷⵓⵍⵉ ⵜⴰⵙⵏⵖⵎⴰⵙⵜ, ⴰⵙⵍⴳⴰⵏ ⵖⵓⵔⵙ ⵢⴰⵜ ⵜⵎⵙⵜⴳⴳⴰⵔⵜ ⵜⴰⴷⵙⴰⵍⵏⵜ ⴷⴰⵜ ⵓⵢⴰⴷ, ⵜⴳⴰ ⴰⴷ ⵉⵙⴷⵓⵙ ⵜⴰⵎⴰⴳⵓⵜ ⵜⴰⴳⵓⵏⵙⴰⵏⵜ ⴷ ⵜⵉⵏ ⴱⵕⵕⴰ ⵏ ⵓⵙⵏⵖⵎⵙ ⴷ ⴰⴷ ⵉⴹⵎⵏ ⵙ ⵡⵓⴷⵎ ⴰⵙⵓⵍⴰⵏ ⴰⴷⴰⴼ ⵏ ⵉⵏⵎⵓⵔⵉⵏ ⵖⵔ ⵜⵓⵎⴰⵢⵉⵏ ⵜⵉⵙⵏⵖⵎⴰⵙⵉⵏ ⵜⵉⵎⴰⴳⵓⵜⵉⵏ”.
ⴳ ⵜⵙⴳⴰ ⵢⴰⴹⵏ, ⵜⵙⴰⵡⵍ ⵅⴼ ⵜⵅⵉⵜⵔⵜ ⵏ ⵓⵎⵛⴽⵛⴰⵎ ⴰⴱⵕⵕⴰⵏⵉ ⴷ ⵜⵉⴳⵎⵉ ⵏ ⵜⵎⵙⴽⴰⵔⵉⵏ ⵏ ⵜⴽⵔⴽⴰⵙ ⵉⴳⴰⵏ ⴰⵍⵍⴰⵍ ⵏ ⵉⵎⵏⵖⵉ, ⵜⵏⵏⴰ ⵜⵏⵙⵙⵉⵅⴼⵜ ⵏ ⵓⵙⵍⴳⵏ ⴰⵎⵖⵔⴰⴱⵉ ⵉⵙ ⵜⴰⵎⵓⴽⵔⵉⵙⵜ ⴰⴷ ⵜⴰⵎⴰⴹⵍⴰⵏⵜ ⵜⵎⵇⵇⵓⵔ ⴽⵉⴳⴰⵏ ⴳ ⵜⵎⵓⵔⴰ ⵏ ⵜⴼⵔⵉⵇⵜ, ⴰⵛⴽⵓ “ⵔⵏⵓ ⵉ ⵓⵎⵙⴽⵛⴰⵎ ⴰⴱⵕⵕⴰⵏⵉ ⵉⵎⵉⵣⴰⵏ ⵉ ⵜⵎⵏⵜⵉ ⴷ ⵜⵏⴼⵔⵓⵜ ⵏ ⵜⵎⵓⵔⴰ ⴷ ⵜⵎⵏⵥⴰⵡⵜ ⵙ ⵓⵎⴰⵜⴰ, ⵏⵏⴰ ⵉⵍⵍⴰⵏ ⵙ ⴽⵉⴳⴰⵏ ⵏ ⵉⵎⵏⵏⵓⵖⵏ ⴳⵔ ⵜⵎⵓⵔⴰ ⵜⵉⴼⵔⵉⵇⵉⵏ ⵏⵏⴰ ⵉⵜⵜⴰⵡⵖⵏ ⵙ ⵉⵏⵖⵎⵉⵙⵏ ⵏ ⵜⴽⵔⴽⴰⵙ ⴷ ⵉⵏⴰⵡⵏ ⵏ ⵓⴽⵙⴰⵏ ⴳ ⵜⵏⴰⴼⵓⵜ ⵏ ⴱⵟⵟⵓ, ⵏ ⵓⵛⵔⵔⴳ ⴰⵥⵓⵕⴰⵏ, ⴷ ⵜⵉⵟⵟⵓⵔⴼⴰ ⵜⴰⵙⴳⴰⴷⵜ... ⴰⵜⴳ.”
ⵜⵙⴰⵡⵍ ⵎⴰⵙⵙⴰ ⴰⵅⴰⵔⴱⴰⵛ ⴳ ⵓⵎⴳⵔⴰⵡ ⴰⴷ ⴰⵡⴷ ⵙ ⵢⵉⵙⵎ ⵏ ⵜⵏⵙⵙⵉⵅⴼⵜ ⵏ ⵓⵥⵟⵟⴰ ⵏ ⵜⵎⵔⵙⴰⵍ ⵜⵉⴼⵔⵉⵇⵉⵏ ⵏ ⵓⵙⵍⴳⵏ ⵏ ⵓⵎⵢⴰⵡⴰⴹ, ⵜⵖⵔⴰ ⵉ ⵓⵙⴷⵓⵙ ⵏ ⵜⵙⵓⴳⴰⵔ ⴷ ⵜⵙⵉⵎⴰⵏⵜ ⵏ ⵉⵎⵙⵍⴳⵏⵏ ⵏ ⵜⵎⵏⵥⴰⵡⵜ ⴰⴼⴰⴷ ⴰⴷ ⵏⵏⴰⵍⵏ ⴰⵎⵎⵔⵡⵉ ⴰⵎⴰⵢⵏⵓ ⵏ ⵉⵏⵖⵎⵉⵙⵏ ⵏⵏⴰ ⴷ ⵢⵉⵡⵉ ⵓⵙⵏⵉⴼⵍ ⴰⵎⵓⵟⵟⵓⵏ ⵏ ⵓⵎⵢⴰⵡⴰⴹ. ⵜⵙⵙⴽⵜⵉ ⴷ ⵙ ⵉⵎⵥⵍⵉ ⵜⵉⵙⵎⵉⴳⵍⵉⵏ ⵜⵉⵎⵇⵔⴰⵏⵉⵏ ⵏ ⵉⵎⵙⵍⴳⵏⵏ ⵏ ⵓⵙⵏⵖⵎⵙ ⵉⵣⴷⵉⵏ ⵙ ⵜⵓⵙⵓⵔⵉⵏ ⵜⵉⴷⵉⵎⵓⵇⵔⴰⵟⵉⵢⵉⵏ, ⵜⵉⴷⵍⵙⴰⵏⵉⵏ ⴷ ⵜⵏⴰⵎⵓⵏⵉⵏ ⵏ ⵓⵙⵡⵓⵔⵉ ⵉⵜⵜⵎⵖⵓⵔⵏ, ⵉⵎⵎⵔⵡⵉⵏ ⴷ ⵡⴰⵔ ⴰⵙⵍⴳⵏ ⵏ ⵜⵉⵖⵉⵙⵜ ⵜⵉⵎⵍⵥⵉⵜ ⵙ ⵉⵎⵥⵍⵉ, ⴰⴳⵓⵏⵙ ⵏ ⵜⵓⵎⴰⵢⵉⵏ ⵜⵉⵙⵏⵖⵎⴰⵙⵉⵏ ⴷ ⵉⵡⵏⴰⵏ ⵏ ⵓⵎⵣⵉⵣⵣⵍ ⵏ ⵉⵙⵜⴰⵢⵏ.
ⵉⵡⵏⴰⵏ ⵏ ⵓⵙⴳⵔⴰⵡ ⴰⴷ, ⵜⵎⵓⵏ ⵎⴰⵙⵙⴰ ⴰⵅⴰⵔⴱⴰⵛ ⴷ ⵎⴰⵙⵙ ⵟⴰⵍⴰⵍ ⵚⴰⵍⴰⵃⴷⴷⵉⵏ, ⴰⵎⴰⵙⴰⵢ ⵏ ⵜⵖⴰⵡⵙⵉⵡⵉⵏ ⵜⵉⴳⵔⴰⵖⵍⴰⵏⵉⵏ ⴷ ⵜⴼⵔⵉⵇⵉⵏ ⴷ ⵎⴰⵙⵙⴰ ⴼⴰⵟⵉⵎⴰ ⵥⴰⵀⵕⴰ ⵎⵓⴷⴷⵏ, ⵜⴰⵎⴰⵙⴰⵢⵜ ⵢⵓⴳⴳⴰⵏ ⵅⴼ ⵜⵙⵎⵉⴳⵍⵜ ⵖⵓⵔ ⵓⵏⵎⵀⴰⵍ ⴰⵎⴰⵜⴰⵢ ⵏ ⵓⴳⵔⴰⵡ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ.
