ⴳ ⵡⴰⵡⴰⵍ ⵏⵏⵙ ⴳ ⵜⵉⵏⵎⵍ ⵜⴰⵏⴰⵎⵓⵔⵜ ⵜⴰⵎⴰⵜⵜⴰⵢⵜ ⵏ ⵓⵙⵡⵓⴷⴷⵓ ⴳ ⵕⵕⴱⴰⵟ ⵅⴼ ⵓⵙⴳⵓⵎ ⵏ “ ⴰⵙⴰⵢⵔⴰⵔ ⴰⵙⵏⵖⵎⴰⵙ ⵉⴳⴰⵏ ⴰⵙⴰⵢⵔⴰⵔ ⴰⴳⴷⵓⴷⴰⵏ: ⵉⵎⵙⴰⵔⴰⵙⵏ ⵏ ⵓⵙⵍⴳⵏ, ⵏ ⵜⵍⴻⵍⵍⵉ ⴷ ⵓⴼⵔⴰⴳ ⵏ ⵓⴱⵖⵓⵔ ⴰⵎⴰⵜⴰⵢ”, ⵜⵏⵏⴰ ⵎⴰⵙⵙⴰ ⵍⴰⵟⵉⴼⴰ ⴰⵅⴰⵔⴱⴰⵛ, ⵜⴰⵙⵍⵡⴰⵢⵜ ⵏ ⵓⴳⵔⴰⵡ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ, ⵉⵙ ⵉⵎⵓⵜⵜⵓⵢⵏ ⵏ ⵓⵙⴰⵢⵔⴰⵔ ⴰⴳⴷⵓⴷⴰⵏ ⴰⵙⵍⵉⵥⵕ ⴷⴷⴰⵡ ⵜⴰⵙⵙⴰⵙⵜ ⵏ ⵓⵎⵓⵟⵟⵓⵏ ⴳⴰⵏ ⴰⵙⵙⴰ ⵢⴰⵏ ⵓⵎⵙⴰⵔⴰⵙ ⴰⵅⴰⵜⴰⵔ ⵏ ⵜⴷⵉⵎⵓⵇⵕⴰⵟⵉⵜ, ⵏ ⵜⵎⴰⴳⵓⵜ ⴷ ⵓⵙⴷⵓⵙ ⴰⵏⴰⵎⵓⵏ ⵏ ⵡⴰⴱⴰⴹ ⴰⴷⵍⵙⴰⵏ.
ⵜⵙⵙⴽⵔ ⵎⴰⵙⵙⴰ ⴰⵅⵔⴱⴰⵛ ⵉⵏⴳⵣⴰⵏ ⵉⴷⵙⵍⴰⵏⵏ ⵏⵏⴰ ⴷ ⵢⵉⵡⵉ ⵓⵎⵓⵟⵟⵓⵏ, ⵙ ⵉⵎⵥⵍⵉ, ⴳⴰⵔ ⴰⵙⵉⴽⵙⵍ ⵏ ⵡⴰⴷⴰⴼ ⵖⵔ ⴰⵏⵖⵎⵉⵙ, ⴰⵙⴷⴷⵔⴼ ⵏ ⵓⵣⵎⵣ ⴰⵖⵎⵙⴰⵏ, ⵜⵉⵅⵉⵜⵔⵜ ⵏ ⵜⵙⴰⵍⵉⵡⵉⵏ ⵜⵉⵎⵓⵟⵟⵓⵏⵉⵏ ⴰⵍⵍⵉⴳ ⴳⴰⵏⵜ ⵉⵡⵔⵉⴽⵏ ⴳ ⵓⵙⴰⵢⵔⴰⵔ ⴰⴳⴷⵓⴷⴰⵏ ⴷ ⵜⵕⵓⵥⵉ ⵉⵜⵜⵎⵖⵓⵔⵏ ⵏ ⵉⴳⴷⵓⴷⵏ. ⵜⵙⵙⴽⵏ ⵉⵎⵓⵜⵜⵓⵢⵏ ⵏⵏⴰ ⵢⵉⵡⵉⵏ ⵖⵔ ⵜⵅⵉⵜⵔⵜ ⵏ ⴳⴰⵔ ⴰⵏⵖⵎⵉⵙ, ⵜⵕⵕⵥ ⴰⵙⵏⵖⵎⵙ ⴰⵣⵣⵓⵍⴰⵏ ⵜⵙⵔⵙ ⵜⵉⵎⵥⵍⵉⵡⵉⵏ ⵜⵉⵎⴰⵢⵏⵓⵜⵉⵏ ⴷ ⵜⵓⵣⵔⵉⴼⵜ ⵏ ⵡⴰⵡⴰⵍ ⴰⴳⴷⵓⴷⴰⵏ.
ⵜⵏⵏⴰ ⵜⵙⵍⵡⴰⵢⵜ ⵏ ⵓⴳⵔⴰⵡ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ ⵉⵙ ⵉⵍⵍⴰ ⴳ ⵜⵎⵓⵔⵜ ⵏⵏⵖ ⵢⴰⵏ ⵢⵉⴽⵣ ⴰⴳⵔⴰⵡⴰⵏ ⵏ ⵉⵙ ⵏ ⵜⵇⵇⴰⵏ ⵢⴰⵜ ⵜⵎⵢⴰⴷⴰⵙⵜ ⵜⴰⵎⴰⵢⵏⵓⵜ ⵏ ⵓⵙⵍⴳⵏ. ⵜⴰⵎⵢⴰⴷⴰⵙⵜ ⴰⴷ, ⴰⵢ ⵜⵏⵏⴰ, ⵉⵇⵇⴰⵏ ⵏ ⴰⴷ ⵜⵜⵓⵚⴽⵓ ⵅⴼ ⵢⴰⵜ ⵜⵎⵔⴰⵔⵓⵜ ⵎⴰⴳⴰⵍ ⵉⵏⵖⵎⵉⵙⵏ ⵏ ⵜⴽⵔⴽⴰⵙ, ⴰⵙⴷⵓⵙ ⵏ ⵓⵙⵏⵖⵎⵙ ⵉⵏⵎⵏ ⴷ ⵓⴱⵖⵓⵔ ⴰⵎⴰⵜⴰⵢ ⴷ ⵓⵙⵍⵉⵥⵕ ⴰⴳⴷⵓⴷⴰⵏ ⴷ ⴰⵡⴷ ⵜⵉⴳⵎⵉ ⵏ ⵜⵎⵓⵙⵏⵉ ⵜⴰⵙⵖⵎⵙⴰⵏⵜ ⴷ ⵜⵎⵓⵟⵟⵓⵏⵜ.
ⴳ ⵜⴳⵉⵔⴰ, ⵜⵏⵏⴰ ⵎⴰⵙⵙⴰ ⴰⵅⴰⵔⴱⴰⵛ ⵉⵙ ⵏ ⵉⵇⵇⴰⵏ ⴰⴷ ⵉⵜⵜⵓⴳ ⵓⵎⵓⵟⵟⵓⵏ ⵢⴰⵜ ⵜⵔⵙⵍⵜ ⵏ ⵜⴳⵎⵉ ⵜⴰⴷⴰⵎⵙⴰⵏⵜ ⴷ ⵜⵏⴰⵎⵓⵏⵜ ⵉⵙⵎⵓⵏⵏ ⵜⴰⵜⵔⴰⵔⵜ ⵜⴰⵎⵓⵟⵟⵓⵏⵜ, ⴰⴱⵖⵓⵔ ⴰⵎⴰⵜⴰⵢ, ⴰⵏⴱⴰⴹ ⴰⴷⵍⵙⴰⵏ ⴷ ⵓⵙⴷⵓⵙ ⵏ ⵜⴷⵉⵎⵓⵇⵕⴰⵟⵉⵜ.
ⵉⵏⴰⵡⵏ ⵏ “ⵊⵓⴷⵉ ⵉⵏⵙⴰ” ⵉⵜⵜⵓⵣⵎⵎⴻⵎ ⴳ ⵜⴰⵢⵔⵉ ⵏ ⵍⵉⵏⵙⴰ ⴰⴷ ⵜⴰⵡⵙ ⴳ ⵓⵙⴷⵓⵙ ⵏ ⵢⴰⵏ ⵓⵙⴰⵢⵔⴰⵔ ⵏ ⵓⵙⵡⵉⵏⴳⵎ ⴰⵙⵟⵕⴰⵜⵉⵊⵉ, ⵏ ⵓⵎⵙⴰⵡⴰⵍ ⴰⵎⵔⵙⴰⵍ ⴷ ⵓⴱⵟⵟⵓ ⵏ ⵢⵉⵔⵎⵏ ⵉⵣⴷⵉⵏ ⵙ ⵉⵎⵙⵓⵔⵙⵏ ⵉⵅⴰⵜⴰⵔⵏ ⵏ ⵜⵉⴳⴰⵡⵜ ⵜⴰⴳⴷⵓⴷⴰⵏⵜ. ⵜⴰⵙⵓⵜⵍⵜ ⴰⴷ ⵏ ⵜⵡⵓⵔⵉ ⵜⴳⴰ ⵢⴰⵜ ⵜⵙⵉⵍⴰ ⵏ ⵓⵎⵙⴰⵡⴰⵍ ⵉⵙⵎⵓⵏⵏ ⵡⵉⵏⵏⴰ ⵖⵓⵔ ⵜⵍⵍⴰ ⵜⵖⵜⵙⵜ ⵜⴰⴳⴷⵓⴷⴰⵏⵜ, ⵉⵎⴰⵙⴰⵢⵏ ⵉⵙⵔⵜⴰⵏⵏ, ⵉⵎⵓⵣⴰⵢ ⵉⵏⴰⵎⵓⵔⵏ ⴷ ⵉⴳⵔⴰⵖⵍⴰⵏⵏ, ⵉⵙⵍⵎⴰⴷⵏ ⴷ ⵉⵎⵔⵣⴰ ⴷ ⵉⵙⴰⵜⵉⵏ ⵉⵅⴰⵜⴰⵔⵏ ⵏ ⵓⵙⵡⵓⴷⴷⵓ.
