“ⵍⵎⵖⵉⴱ ⵢⵓⴽⵣ ⵉⵙ ⵏ ⵉⵇⵇⴰⵏ ⵉ ⵓⵙⵍⴳⵏ ⴰⵎⵓⵟⵟⵓⵏ ⴰⴷ ⵓⵔ ⵉⴳ ⵜⵉⴼⵉⴽⴽⴰⵛ ⴷⴰⵜ ⵓⵙⵏⵓⵍⴼⵓ ⴰⵜⵉⴽⵏⵓⵍⵓⵊⵉ ⵏⵖ ⴰⴷ ⵉⵙⵡⵓⵜⵜⵓ ⵜⵉⵍⴻⵍⵍⵉⵡⵉⵏ ⵜⵉⴷⵙⵍⴰⵏⵉⵏ. ⵉⵇⵇⴰⵏ ⴰⴷ ⵉⵙⴷⵓⵙ ⵜⵉⵙⵓⵙⵖⵜ, ⵜⵉⵎⵉⵜⴰⵔ ⵏ ⵉⵙⴰⴳⵎⵏ ⵏ ⵉⵏⵖⵎⵉⵙⵏ ⴷ ⵜⵎⵙⵜⴳⴳⴰⵔⵜ ⵏ ⵜⵙⴰⵍⵉⵡⵉⵏ ⵜⵉⵎⵓⵟⵟⵓⵏⵉⵏ”.
ⵙ ⵡⴰⵡⴰⵍ ⴰⴷ ⵉⵙ ⵜⴰⴷⴷ ⵎⴰⵙⵙⴰ ⵍⴰⵟⵉⴼⴰ ⴰⵅⵔⴱⴰⵛ, ⵜⴰⵙⵍⵡⴰⵢⵜ ⵏ ⵓⴳⵔⴰⵡ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ, ⵜⴰⵏⵏⴰⵢⵜ ⵏ ⵜⴳⵍⴷⵉⵜ ⵏ ⵍⵎⵖⵔⵉⴱ ⵉⵡⵏⴰⵏ ⵏ ⵜⵉⵏⴰⵡⵜ ⵜⴰⴳⵔⴰⵖⵍⴰⵏⵜ ⵏⵏⴰ ⵉⵙⵏⵎⴰⵍⴰ ⴳ ⴰⴱⵉⴷⵊⴰⵏ ⵓⵥⵟⵟⴰ ⵏ ⵜⵎⵔⵙⴰⵍ ⵜⵉⴼⵔⵉⵇⵉⵏ ⵏ ⵓⵙⵍⴳⵏ ⴷ ⵓⵎⵢⴰⵡⴰⴹ, ⵏⵜⵜⴰ ⴷ ⵓⵥⵟⵟⴰ ⴰⴼⵔⴰⵏⴽⵓⴼⵓⵏⵉ ⵏ ⵉⵙⵍⴳⴰⵏⵏ ⵏ ⵓⵙⵏⵖⵎⵙ, ⵅⴼ ⵓⵙⴳⵓⵎ: “ⵜⵉⵖⵉⵙⵜ ⵜⵉⵎⵍⵥⵉⵜ, ⵉⵥⴹⵡⴰⵏ ⵉⵏⴰⵎⵓⵏⵏ ⴷ ⵜⵍⴻⵍⵍⵉ ⵏ ⵓⵎⵢⴰⵡⴰⴹ: ⵉⵎⵙⵓⵔⴰⵙ ⵏ ⵓⵙⵍⴳⵏ”.
ⵜⵏⵏⴰ ⵎⴰⵙⵙⴰ ⴰⵅⴰⵔⴱⴰⵛ ⵉⵙ ⵉⵣⴷⵉ ⵍⵎⵖⵔⵉⴱ ⴷ ⵢⴰⵏ ⵓⵙⴰⵢⵔⴰⵔ ⴰⵎⵓⵟⵟⵓⵏ ⵉⵏⵏⵓⵕⵥⵎⵏ, ⵉⵜⵜⵓⵚⴽⴰⵏ ⵅⴼ ⵜⵍⴻⵍⵍⵉ ⵏ ⵓⵡⵏⵏⵉ, ⴰⵙⵍⵍⵡⵉ ⴷ ⵜⵍⴻⵍⵍⵉ ⵏ ⵓⴳⴰⴷⴰⵣ. ⵜⵙⵙⴽⵜⵉ ⴷ ⵉⵙ ⴷⴰ ⵉⵜⵜⵏⵏⴰⵍ ⵉⵎⵣⵉⵣⵣⵍⵏ ⵏ ⵉⵅⵔⵔⵉⵇⵏ ⵉⵅⴰⵜⴰⵔⵏ, ⵜⴰⴳⵍⴷⵉⵜ ⵜⵇⵇⵉⵎⴰ ⴰⵀⴰ ⵜⵣⵔⴽ ⵜⵉⵍⴻⵍⵍⵉ ⵏ ⵍⵉⵏⵜⵉⵔⵏⵉⵜ.
ⵙ ⵓⵢⵏⵏⴰ ⵜⵏⵏⴰ, ⴰⴼⵔⴰⴳ ⵏ ⵜⵍⴻⵍⵍⵉ ⵏ ⵓⵡⵏⵏⵉ ⴳ ⵓⵣⵎⵣ ⵏ ⵓⵎⵓⵟⵟⵓⵏ ⴷⴰ ⵉⵜⵜⵏⵏⴰⵍ ⵙⵏⴰⵜ ⵜⵎⵓⴽⵔⵉⵙⵉⵏ: ⵜⵉⵏ ⵉⵣⴷⴰⵢⵏ ⴳⵔ ⵓⵡⴰⵏⴽ ⴷ ⵓⵙⵏⵖⵎⵙ ⴷ ⵓⵏⵎⵓⵔⵉ, ⵎⴰⵛⴰ ⴷⵉⵖ ⴰⵡⴷ ⴳ ⵜⴳⵉⵔⴰ ⵢⴰⴷ, ⵜⵓⵚⴽⵉⵡⵉⵏ ⵜⵉⵎⵓⵟⵟⵓⵏⵉⵏ ⵉⵙⵡⵓⴷⴷⵓⵏ ⴰⴷⴰⴼ ⵖⵔ ⵉⵏⵖⵎⵉⵙⵏ ⴰⵔ ⵙⵙⵓⴷⵓⵏ ⴰⵎⵙⴳⴷⴰⵍ ⴰⴳⴷⵓⴷⴰⵏ.
ⵜⵏⵏⴰ ⵜⵙⵍⵡⴰⵢⵜ ⵏ ⵓⴳⵔⴰⵡ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ ⵉⵙ ⴰⵙⵉⴽⵉ ⵏ ⵜⵙⵓⵙⵖⵜ ⵅⴼ ⵓⵥⵓⵕ ⵏ ⵜⵓⵎⴰⵢⵉⵏ ⵉⴳⴰ ⵉⵎⵉⵣⵉ ⵉ ⵜⵍⴻⵍⵍⵉ ⵏ ⵓⵙⵜⴰⵢ ⵏ ⵉⵏⵎⵓⵔⵉⵏ ⴷ ⵓⵣⵔⴼ ⵏⵏⵙ ⴳ ⵢⴰⵏ ⵓⵙⵏⵖⵎⵙ ⵉⵣⴷⴷⵉⴳⵏ. ⵙ ⵓⵢⴰⴷ, ⵜⵖⵔⴰ ⵉ ⵜⵙⴰⵍⵉⵡⵉⵏ ⵜⵉⵎⵇⵔⴰⵏⵉⵏ ⵜⵉⵎⵓⵟⵟⵓⵏⵉⵏ ⴰⴼⴰⴷ ⴰⵙⵉⵏⵜ ⵜⴰⵎⵙⵜⴳⴳⴰⵔⵜ ⵏⵏⵙⵜ ⴳ ⵓⵢⵏⵏⴰ ⵉⵣⴷⵉⵏ ⵙ ⵓⵎⵏⵏⵓⵖ ⵎⴳⴰⵍ ⵉⵅⵔⵔⵉⵇⵏ. “ⵜⵉⵙⴰⵍⵉⵡⵉⵏ ⵖⵓⵔⵙⵏⵜ ⴰⵍⵍⴰⵍⵏ ⵉⵜⵇⵏⵉⵢⵏ ⴰⴼⴰⴷ ⵙⵎⴰⴳⵉⵏⵜ ⴷ ⴰⴼⴰⴷ ⴽⴽⵙⵏⵜ ⴰⴷⴰⴼ ⵏ ⵉⴷⵔⵉⵎⵏ ⴷ ⵉⴽⴽⴰⵏ ⴰⵙⵓⵙⵙⵏ ⴳ ⵉⴷⴳⴳⵏ, ⵏⵖ ⵜⵓⵎⴰⵢⵉⵏ ⵉⵜⵜⵎⵖⵓⵔⵏ ⵙ ⵉⵅⵔⵔⵉⵇⵏ, ⵙ ⵡⵓⴼⵓⵔ ⵏ ⵜⵎⵓⵙⵜ ⵜⴰⵙⵖⵎⵙⴰⵏⵜ ⵏⵖ ⵜⴰⵍⵖⵉⵡⵉⵏ ⴰⴽⴽⵯ ⵢⴰⴹⵏ ⵏ ⵓⵙⵙⴼⵔⵖ ⵏ ⵉⵏⵖⵎⵉⵙⵏ”, ⴰⵢ ⵜ ⵜⵔⵏⴰ ⵜⵏⵏⴰ.
ⵢⵓⴽⵣ ⵓⴳⵔⴰⵡ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ ⵉⵙ ⵓⴽⵓⵙ ⵏ ⵉⴷⵔⵉⵎⵏ ⵉ ⵉⴷⴳⴳⵏ ⵏ ⵉⵅⵔⵔⵉⵇⵏ ⵉⴳⴰ ⴰⵙⵙⴰ ⵢⴰⵜ ⵜⵔⵙⵍⵜ ⵜⴰⴷⵙⵍⴰⵏⵜ ⵉ ⵓⵙⵙⵉⵣⴷⴳ ⵏ ⵓⵙⴰⵢⵔⴰⵔ ⴰⵙⵖⵎⵙⴰⵏ, ⴱⵍⴰ ⵓⴽⵓⵙ ⵏ ⵜⵍⴻⵍⵍⵉ ⵏ ⵓⵡⵏⵏⵉ ⵏⵖ ⵜⵉⵍⴻⵍⵍⵉ ⵜⴰⴷⴰⵎⵙⴰⵏⵜ.
ⵜⵉⵏⴰⵡⵜ ⵏ ⴰⴱⵉⴷⵊⴰⵏ ⵜⵙⵎⵓⵏ ⴰⵜⵜⴰⵢⵏ ⵏ ⵙⵉⵎⵔⴰⵡ ⵏ ⵜⵎⵔⵙⴰⵍ ⵏ ⵓⵙⵍⴳⵏ ⵜⵉⴼⵔⵉⵇⵉⵏ ⴷ ⵜⴼⵔⴰⵏⴽⵓⴼⵓⵏⵉⵏ ⴷ ⴰⵡⴷ ⵉⴳⵏⵙⴰⵙⵏ ⵏ ⵜⵙⴰⵍⵉⵡⵉⵏ ⵜⵉⴷⵙⵍⴰⵏⵉⵏ ⵜⵉⵎⵓⵟⵟⵓⵏⵉⵏ, ⴳ ⵓⵡⵜⵜⴰⵙ ⵏ ⵓⴹⴼⴼⵓⵕ ⵏ ⵓⵎⵛⴰⵡⴰⵕ ⵅⴼ ⵓⵙⵍⴳⵏ ⴰⵎⵢⴰⵙ ⵉⵎⵓⵏⵏ ⴷ ⵉⵎⵓⵜⵜⵓⵢⵏ ⵏⵏⴰ ⴷ ⵜⵉⵡⵉ ⵜⵉⵖⵉⵙⵜ ⵜⵉⵎⵍⵥⵉⵜ ⴳ ⵢⵉⴳⵔ ⵏ ⵓⵙⵏⵖⵎⵙ.
ⵜⵣⵡⴰⵔ ⵎⴰⵙⵙⴰ ⴰⵅⵔⴱⴰⵛ ⵉ ⵢⴰⵏ ⵓⴽⴰⴱⴰⵕ ⴰⵎⵖⵔⴰⴱⵉ ⴳ ⵉⵍⵍⴰ ⵎⴰⵙⵙ ⵢⴰⵙⵉⵔ ⵖⵓⵔⴱⴰⵍ ⴷ ⵎⴰⵙⵙⴰ ⴼⴰⵟⵉⵎⴰ ⴱⴰⵕⵓⴷⵉ, ⵉⴳⵎⴰⵎⵏ ⵏ ⵓⵙⵇⵇⵉⵎ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ, ⴷ ⵎⴰⵙⵙ ⵟⴰⵍⴰⵍ ⵚⴰⵍⴰⵃⴷⴷⵉⵏ, ⴰⵎⵙⵡⵓⴷⴷⵓ ⵏ ⵜⵖⴰⵡⵙⵉⵡⵉⵏ ⵜⵉⴼⵔⵉⵇⵉⵏ ⴷ ⵜⴳⵔⴰⵖⵍⴰⵏⵉⵏ ⵖⵓⵔ ⵓⴳⵔⴰⵡ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ.
