ⵜⵙⵏⵓⴱⴳ ⵎⴰⵙⵙⴰ ⵍⴰⵟⵉⴼⴰ ⴰⵅⴰⵔⴱⴰⵛ, ⵜⴰⵙⵍⵡⴰⵢⵜ ⵏ ⵓⴳⵔⴰⵡ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ, ⴰⵙⵙ ⵏ 22 ⵛⵜⴰⵎⴱⵉⵔ 2026 ⴳ ⵓⵙⵖⵉⵎ ⵏ ⵜⵎⵔⵙⵍⵜ, ⵢⴰⵏ ⵓⴽⴰⴱⴰⵕ ⵏ ⵓⵎⵓⵍⵍⵉ ⵏ ⵜⵎⵓⵔⴰ ⵜⴰⵄⵔⴰⴱⵉⵏ ⵎⵉ ⵉⵣⵡⴰⵔ ⵎⴰⵙⵙ ⵃⵓⵙⵙⵉⵏ ⴰⵍ ⵀⵉⵏⴷⴰⵡⵉ, ⴰⵎⴰⵔⵉ ⴰⵎⴰⵜⴰⵢ ⵡⵉⵙⵙ ⵙⵉⵏ ⵏ ⵓⵎⵓⵍⵍⵉ, ⴳ ⵓⵙⴰⵜⵉ ⵏ ⵜⵙⵎⵉⴳⵍⵜ ⵏ ⵜⵉⵏⵥⵉ ⵏ ⵉⵙⵜⴰⵢⵏ ⵓⵣⵔⵉⴼⵏ ⵏ 23 ⵛⵜⴰⵎⴱⵉⵔ 2026.
ⵉⵡⵏⴰⵏ ⵏ ⵓⵎⵙⴳⵔⴰⵡ ⴰⴷ, ⵜⵙⵎⵏⵉⴷ ⵎⴰⵙⵙⴰ ⴰⵅⴰⵔⴱⴰⵛ ⵜⴰⵙⵎⵉⴳⵍⵜ ⵜⴰⴷⵓⵙⵜⵓⵔⵉⵜ ⵏ ⵓⴳⵔⴰⵡ ⴰⵎⴰⵜⵜⴰⵢ ⴳ ⵢⵉⴳⵔ ⵏ ⵓⴹⵎⴰⵏ ⵏ ⵓⵣⵔⴰⴽ ⵏ ⵓⵡⵏⵏⵉ ⴰⵎⴰⴳⵓⵜ ⵏ ⵜⵎⵣⴰⵣⵉⵏ ⵏ ⵓⵙⵡⵉⵏⴳⵎ ⴷ ⵜⴰⵏⵏⴰⵢⵜ ⴳ ⵜⵏⵣⵡⴰⵢⵉⵏ ⴷ ⵉⵜⵉⵍⵉⴼⵉⵣⵢⵓⵏⵏ ⵉⴳⴷⵓⴷⴰⵏⵏ ⴷ ⵡⵓⵙⵍⵉⴳⵏ, ⴰⴳⵓⵏⵙ ⵏ ⵓⵣⵎⵣ ⵏ ⵉⵙⵜⴰⵢⵏ ⴷ ⴱⵕⵕⴰ ⵏⵏⵙ. ⵜⵏⵏⴰ ⵉⵙ ⵜⵡⴰⵜⵙ ⵜⵙⵎⵉⴳⵍⵜ ⵏⵏⵙ, ⴳ ⵡⵓⵍ ⵏⵏⵙ, ⴰⴼⵔⴰⴳ ⵏ ⵓⵣⵔⴼ ⵏ ⵉⵏⵎⵓⵔⵉⵏ ⴷ ⵜⵏⵎⵓⵔⵉⵏ ⴳ ⵡⴰⴷⴰⴼ ⵖⵔ ⴰⵙⵏⵖⵎⵙ ⴰⵎⵢⴰⵏⴰⵡ, ⴰⵎⵢⴰⵙ ⴰⵣⴷⴳⴰⵏ, ⵏⵏⴰ ⵉⵖⵉⵢⵏ ⴰⴷ ⵜⵏ ⵢⴰⴷⵊ ⴰⴷ ⵙⵙⴽⵔⵏ ⵢⴰⵜ ⵜⴰⵏⵏⴰⵢⵜ ⵙ ⵜⵍⴻⵍⵍⵉ ⵙⵡⵓⵔⵉⵏ ⴰⵣⵔⴼ ⵏⵏⵙ ⴳ ⵓⵙⵜⴰⵢ ⵙ ⵜⵖⴰⵔⴰⵙⵜ ⵉⴼⴰⵡⵏ.
ⵜⵙⵎⵏⵉⴷ ⴷⵉⵖ ⵜⵙⵍⵡⴰⵢⵜ ⵏ ⵓⴳⵔⴰⵡ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ ⵉⵎⵉⴽⴰⵏⵉⵣⵎⵏ ⵉⵙⵍⵓⴳⴰⵏⵏ ⵉⵙⵙⴰⵜⵉⵏ ⵜⴰⵎⴰⴳⵓⵜ ⵜⴰⵙⵔⵜⴰⵏⵜ ⴰⴳⵏⵙⵓ ⵏ ⵉⵎⴰⵙⵙⵏ ⵏ ⵓⵙⵏⵖⵎⵙ ⴰⵙⵍⵉⵥⵕ, ⵙ ⵉⵎⵥⵍⵉ ⵜⴰⵖⵜⴰⵙⵜ ⵏ ⵓⵙⵇⵇⵉⵎ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ ⵓⵟⵟⵓⵏ 50-26 ⵏ 16 ⵢⵓⵏⵢⵓ 2026, ⵉⵜⵜⵓⵥⵕⴳⵏ ⴳ ⵓⵖⵎⵉⵙ ⴰⵎⴰⴷⴷⵓⴷ ⵉⵣⴷⵉⵏ ⵙ ⵓⴹⵎⴰⵏ ⵏ ⵜⵎⴰⴳⵓⵜ ⵏ ⵓⵡⵏⵏⵉ ⴰⵙⵔⵜⴰⵏ ⴰⴳⵏⵙⵓ ⵏ ⵜⵏⴰⴼⵓⵜⵉⵏ ⵏ ⵓⵎⵢⴰⵡⴰⴹ ⴰⵙⵍⵉⵥⵕ ⵙ ⵓⵣⵎⵣⵣⵓ ⵏ ⵉⵙⵜⴰⵢⵏ ⵓⵣⵔⵉⴼⵏ ⵉⵎⴰⵜⴰⵢⵏ ⵏ 2026.
ⵜⵔⵏⵓ ⵜⵏⵏⴰ ⵉⵙ ⵜⴰⵖⵜⴰⵙⵜ ⴰⴷ, ⵉⵜⵜⵓⵙⵎⵀⵍⵏ ⵅⴼ ⵉⵎⵡⵓⵔⴰ ⵉⵙⵍⵉⵥⵕⵏ ⵉⴳⴷⵓⴷⴰⵏⵏ ⴷ ⵡⵓⵙⵍⵉⴳⵏ, ⵜⵙⵙⴰⵜⵉ ⵜⴰⴷⵓⵍⵉ ⵜⴰⵖⴰⵎⵙⴰⵏⵜ ⵉⵡⵏⴰⵏ ⵏ ⵓⵣⵎⵣ ⵏ ⵉⵙⵜⴰⵢⵏ ⵉⴽⴽⴰⵏ ⵙⴳ 15 ⵖⵓⵛⵜ ⴰⵔ 22 ⵛⵜⴰⵎⴱⵉⵔ 2026. ⵜⵙⵔⵙ ⵙ ⵉⵎⵥⵍⵉ ⵉⵍⵓⴳⵏⵏ ⵉⵣⴷⵉⵏ ⵙ ⵓⴱⵟⵟⵓ ⵏ ⵓⵣⵎⵣ ⵏ ⵓⵎⵣⴳⵉ ⴷ ⵓⵣⵎⵣ ⵏ ⵢⵉⵎⵥ ⵏ ⵡⴰⵡⴰⵍ, ⴷ ⵓⵙⵓⵎⵓ ⴳ ⵡⴰⴷⴰⴼ ⵖⵔ ⵉⵎⴰⵙⵙⵏ ⵏ ⵓⵙⵏⵖⵎⵙ ⴷ ⵉⵣⵓⵛⵛⴰⵍ ⵢⴰⴹⵏ ⵉⵣⵣⵓⵍⴰⵏⵏ ⵉⵣⴷⵉⵏ ⵙ ⵜⵎⵙⵖⴰⵔⵓⵜ, ⵙ ⵜⵔⴰⵡⵙⴰⵏⵜ ⵜⴰⵎⴰⵔⴰⵢⵜ ⴷ ⵜⵣⴷⴳⵉ ⵏ ⵓⵎⵙⴳⴷⴰⵍ ⴰⵎⵙⵜⴰⵢ. ⵜⴰⵖⵜⴰⵙⵜ ⴰⴷ ⵜⵙⵉⵎⴰⵍ ⴷⵉⵖ ⵉⵍⵓⴳⵏⵏ ⵉⵥⵍⵉⵏ ⵉⵣⴷⵉⵏ ⵙ ⵜⴷⵓⵍⵉ ⵏ ⵡⴰⵙⵙ ⵏ ⵓⵙⵜⴰⵢ.
ⴰⵎⵙⴳⵔⴰⵡ ⴰⴷ ⵢⵓⵏⴼ ⵉ ⴽⵉⴳⴰⵏ ⵏ ⵉⵎⵛⴰⵡⴰⵕⵏ ⵅⴼ ⵜⵖⴰⵡⵙⵉⵡⵉⵏ ⵉⵣⴷⵉⵏ ⵙ ⵓⵙⵎⴽⵍ ⴰⵖⴰⵎⵙⴰⵏ ⵏ ⵉⵙⵜⴰⵢⵏ. ⵙⵇⵙⴰⵏ ⴷⵉⵖ ⵉⴳⵎⴰⵎⵏ ⵏ ⵓⴽⴰⴱⴰⵕ ⵏ ⵓⵎⵓⵍⵍⵉ ⵏ ⵜⵎⵓⵔⴰ ⵜⴰⵄⵔⴰⴱⵉⵏ ⵅⴼ ⵜⵓⵎⴰⵢⵉⵏ ⵏⵏⴰ ⵉⵜⵜⵓⵣⵓⵣⵣⵔⵏ ⴳ ⵉⵥⴹⵡⴰⵏ ⵉⵏⴰⵎⵓⵏⵏ, ⵜⴰⴷⵓⵍⵉ ⵏⵏⴰ ⵙⵙⴽⵔⵏ ⵉⵎⴰⵙⵙⵏ ⵏ ⵓⵙⵏⵖⵎⵙ ⵉⴱⵕⵕⴰⵏⵉⵢⵏ, ⴷ ⵜⵎⵙⴰⵍⵉⵏ ⵜⵉⵎⴰⵢⵏⵓⵜⵉⵏ ⵜⵉⴷⵙⵍⴰⵏⵉⵏ ⵏⵏⴰ ⴷ ⵜⵉⵡⵉ ⵜⵖⵜⴰⵙⵜ ⵓⵟⵟⵓⵏ 50-26.
ⴳ ⵜⴳⵉⵔⴰ ⵏ ⵓⵎⵙⴳⵔⴰⵡ, ⵉⵙⵙⴽⵔ ⵓⴽⴰⴱⴰⵕ ⵢⴰⵏ ⵓⵔⵣⴰⴼ ⵉ ⵜⵎⵀⵍⴰ ⵏ ⵓⴹⴼⴼⵓⵕ ⵏ ⵉⵖⴰⵡⴰⵙⵏ ⴷ ⵜⵎⵀⵍⴰ ⵏ ⵉⵏⴳⵔⴰⵡⵏ ⵏ ⵓⵙⵏⵖⵎⵙ. ⵉⵔⵣⴰⴼⵏ ⴰ, ⵓⴷⵊⴰⵏ ⵜⵏ ⴰⴷ ⴰⴳⴳⵏ ⵅⴼ ⵉⵎⴰⵙⵙⵏ ⵏ ⵓⴹⴼⴼⵓⵕ ⵏ ⵜⵓⵎⴰⵢⵉⵏ ⵜⵉⵙⵍⵉⵥⵕⵉⵏ ⵉⵣⴷⵉⵏ ⵙ ⵉⵙⵜⴰⵢⵏ ⴷ ⵉⵎⴰⵙⵙⵏ ⵉⵜⵉⵇⵏⵉⵢⵏ ⵏⵏⴰ ⵉⵜⵜⵓⵙⴽⵔⵏ ⵉ ⵜⵡⵓⵔⵉ ⵢⴰⴷ.
ⴷⵉⴳⵙ ⴳ ⵓⴽⴰⴱⴰⵕ ⵏ ⵓⵎⵓⵍⵍⵉ ⵏ ⵜⵎⵓⵔⴰ ⵜⴰⵄⵔⴰⴱⵉⵏ, ⵎⴰⵙⵙ ⵃⵓⵙⵙⵉⵏ ⴰⵍ ⵀⵉⵏⴷⴰⵡⵉ (ⵄⵉⵕⴰⵇ), ⵎⴰⵙⵙⴰ ⵀⵉⴱⴰ ⵎⴰⵔⵃⴱ (ⵍⵓⴱⵏⴰⵏ), ⵜⴰⵙⵎⵣⴷⴰⵢⵜ ⵜⴰⵎⴰⵜⴰⵢⵜ ⵏ ⵜⵙⵎⵉⴳⵍⵉⵏ ⵏ ⵜⵉⵏⵥⵉ ⵏ ⵉⵙⵜⴰⵢⵏ ⵏ ⵓⵎⵓⵍⵍⵉ ⵏ ⵜⵎⵓⵔⴰ ⵜⴰⵄⵔⴰⴱⵉⵏ, ⴷ ⵎⴰⵙⵙ ⵎⴰⵃⵎⵓⴷ ⵍⵛⴰⵀⴰⵜ (ⵎⴰⵚⵕ) , ⴰⵎⵙⵜⴳⴳⴰⵔ ⴰⴳⵏⵙⵓ ⵏ ⵜⵣⵓⵏⵉ ⵏ ⵜⵖⴰⵡⵙⵉⵡⵉⵏ ⵜⵉⵎⵙⵜⴰⵢⵉⵏ ⵏ ⵓⵎⵓⵍⵍⵉ.
ⵃⴰⴹⵕⵏ ⴳ ⵓⵎⵙⴳⵔⴰⵡ ⴰⴷ, ⴳ ⵜⵙⴳⴰ ⵏ ⵓⴳⵔⴰⵡ ⴰⵎⴰⵜⵜⴰⵢ, ⵎⴰⵙⵙ ⴱⵏⵄⵉⵙⵙⴰ ⵄⵙⵍⵓⵏ, ⴰⵏⵎⵀⴰⵍ ⴰⵎⴰⵜⴰⵢ ; ⵎⴰⵙⵙ ⵄⴱⴷⵍⵊⵍⵉⵍ ⵍⵃⴰⵎⵎⵓⵎⵉ, ⴰⵏⵎⵀⴰⵍ ⴰⵎⴰⵜⴰⵢ ⵡⵉⵙⵙ ⵙⵉⵏ ; ⵎⴰⵙⵙ ⵎⴰⵀⴷⵉ ⵍⴰⵄⵕⵓⵙⵙⵉ ⵍⵉⴷⵔⵉⵙⵙⵉ, ⴰⵏⵎⵀⴰⵍ ⵏ ⵜⵖⵓⵔⵉⵡⵉⵏ ⵜⵉⵣⵔⴼⴰⵏⵉⵏ ; ⵎⴰⵙⵙ ⵏⴰⴷⵉⵔ ⵟⴰⵀⵉⵔ, ⴰⵏⵎⵀⴰⵍ ⵏ ⵓⴹⴼⴼⵓⵕ ⵏ ⵉⵖⴰⵡⴰⵙⵏ ; ⵎⴰⵙⵙⴰ ⵍⴰⵟⵉⴼⴰ ⵜⴰⵢⵀ, ⵜⴰⵏⵎⵀⴰⵍⵜ ⵏ ⵜⵖⵓⵔⵉⵡⵉⵏ ⴷ ⵜⵉⴳⵎⵉ ; ⵎⴰⵙⵙ ⴰⵎⵉⵏ ⵄⴰⵣⵣⵉⵎⴰⵏ, ⴰⵏⵎⵀⴰⵍ ⵏ ⵓⵎⵢⴰⵡⴰⵙ ⴰⴳⵔⴰⵖⵍⴰⵏ ; ⴷ ⵎⴰⵙⵙ ⵎⵓⵃⴰⵎⴷ ⵃⴰⴼⵉⴹⵉ, ⴰⵙⵎⵣⴷⴰⵢ ⵏ ⵓⴼⵔⴷⵉⵙ ⴳ ⵜⵎⵀⵍⴰ ⵏ ⵜⵖⵓⵔⵉⵡⵉⵏ ⵜⵉⵣⵔⴼⴰⵏⵉⵏ.
