ⴳ ⵓⵏⵎⴰⵍⴰ ⵏ ⵉⵙⵜⴰⵢⵏ ⵓⵣⵔⵉⴼⵏ ⵉⵎⴰⵜⴰⵢⵏ ⵏ 23 ⵛⵜⴰⵎⴱⵉⵔ 2026, ⵉⵙⵙⵓⴼⵖ ⴷ ⵓⴳⵔⴰⵡ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ, ⵉⴳⴰⵏ ⵜⴰⵙⴳⴰ ⵜⴰⴷⵙⵍⴰⵏⵜ ⵏ ⵓⵎⵜⵜⵉⵡ ⴰⵎⵔⵙⴰⵍ ⵢⵓⴳⴳⴰⵏ ⵅⴼ ⵜⵣⴷⴳⵉ ⵏ ⵉⵙⵜⴰⵢⵏ, ⵜⴰⵙⴳⴰ ⵏ ⵜⵎⵔⵙⴰⵍ ⵢⴰⴹⵏ ⵉⵜⵜⵓⵡⴰⵜⵙⵏ, ⵉⵙⵙⵓⴼⵖ ⴷ ⵉⵣⵓⵣⵣⵔ ⵢⴰⵏ ⵓⵎⴰⵏⴰⵔ ⵉ ⵓⵙⵎⵏⵉⴷ, ⵙ ⵢⴰⵜ ⵜⵖⴰⵔⴰⵙⵜ ⵉⵡⵀⵏⵏ, ⵉⵎⵏⵣⴰⵢ, ⵉⵍⵓⴳⵏⵏⴷ ⵉⵎⵉⴽⴰⵏⵉⵙⵎⵏ ⵏⵏⴰ ⵉⵙⵙⴰⵜⵉⵏ ⴰⵡⵏⵏⵉ ⴰⵎⴰⴳⵓⵜ ⴰⵙⵔⵜⴰⵏ ⴰⴳⵓⵏⵙ ⵏ ⵓⵙⵏⵖⵎⵙ ⴰⵙⵍⵉⵥⵕ, ⴳ ⵓⵣⵎⵣ ⵏ ⵉⵙⵜⴰⵢⵏ ⵏⵖ ⴱⵔⵔⴰ ⵏ ⵓⵣⵎⵣ ⵏ ⵉⵙⵜⴰⵢⵏ.
ⵉⵙⵎ ⵏⵏⵙ « ⴰⵎⴰⵏⴰⵔ ⵏ ⵓⴳⵔⴰⵡ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ ⵉ ⵢⵉⴽⵣ ⵏ ⵜⵎⴰⴳⵓⵜ ⵏ ⵓⵡⵏⵏⵉ ⴳ ⵜⵏⵣⵡⴰⵢⵜ ⴷ ⵓⵜⵉⵍⵉⴼⵉⵣⵢⵓⵏ ». ⵜⴰⵔⴰⵖⵜ ⴰⴷ ⴷⴰ ⵜⵙⵎⵏⵉⴷ ⵙ ⵉⵎⵥⵍⵉ ⵜⵉⵔⵙⴰⵍ ⵜⵉⴷⵓⵙⵜⵓⵔⵉⵏ ⴷ ⵜⵣⵔⴼⴰⵏⵉⵏ ⵏ ⵓⴹⵎⴰⵏ ⴰⴷ ⴷ ⵜⵖⴰⵔⴰⵙⵉⵏ ⵏ ⵓⵙⵡⵓⵔⵉ ⵏⵏⵙ : ⴰⵣⵎⵣ ⵏ ⵜⵉⵔⵎⵜ ⵏ ⵉⵙⵜⴰⵢⵏ, ⴰⴱⵟⵟⵓ ⵏ ⵓⵣⵎⵣ ⵏ ⵉⵎⵣⴳⵉ ⴳⵔ ⵉⴽⴰⴱⴰⵕⵏ ⵉⵙⵔⵜⴰⵏⵏ, ⵉⵍⵓⴳⵏⵏ ⵉⵣⵔⵉⵏ ⵅⴼ ⵉⵖⴰⵡⴰⵙⵏ ⵏ ⵜⵎⵣⴰⵣⵣⵍⵜ ⵜⴰⵎⵙⵜⴰⵢⵜ ⵜⴰⵎⴰⴷⴷⵓⴷⵜ ⴷ ⵡⴰⵙⵙ ⵏ ⵓⵙⵜⴰⵢ, ⴰⵎⴰⵜⵜⵉⵡ ⵏ ⵓⴹⴼⴼⵓⵕ ⵏⵏⴰ ⵉⵙⵙⴽⵔ ⵓⴳⵔⴰⵡ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ ⵉⵡⵏⴰⵏ ⵏ ⵜⵣⵣⵉⴳⵣⵜ ⵏ ⵉⵙⵜⴰⵢⵏ.
ⵜⵙⵜⵉ ⵜⵏⵜⴰⵎⵜ ⴰⴷ ⵢⴰⵏ ⵓⴷⵖⴰⵔ ⵉⵥⵍⵉⵏ ⵉ ⵉⵍⵓⴳⵏⵏ ⵉⵎⴰⵢⵏⵓⵜⵏ ⵏ ⵜⵖⵜⴰⵙⵜ ⵓⵟⵟⵓⵏ 50-26 ⵏ ⵓⵙⵇⵇⵉⵎ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ, ⵉⵜⵜⵓⵎⵙⴰⵙⴰⵏ ⴼⵍⵍⴰⵙ ⴰⵙⵙ ⵏ 16 ⵢⵓⵏⵢⵓ 2026, ⵉⵣⴷⵉⵏ ⵙ ⵓⵎⵏⵏⵓⵖ ⵎⴳⴰⵍ ⵉⵏⵖⵎⵉⵙⵏ ⵏ ⵜⴽⵔⴽⴰⵙ ⴷ ⵓⵙⴰⵜⵉ ⵏ ⵜⵓⵎⴰⵢⵉⵏ ⵜⵉⵎⵙⵜⵉⵢⵉⵏ ⵏⵏⴰ ⵉⵜⵜⵓⵙⴽⵔⵏ ⵙ ⵉⵎⴰⵙⵙⵏ ⵏ ⵜⵉⵖⵉⵙⵜ ⵜⵉⵎⵍⵥⵉⵜ. ⵉⵍⵓⴳⵏⵏ ⴰⴷ ⴷⴰ ⵜⵜⵔⴰⵔⴰⵏ ⵅⴼ ⵜⵏⵥⵕⵉⵏ ⵜⵉⵎⴰⵢⵏⵓⵜⵉⵏ ⵏⵏⴰ ⴷ ⵢⵉⵡⵉ ⵓⵏⵢⵓⴷⴷⵓ ⵏ ⵉⵅⵕⵕⵉⵇⵏ ⴷ ⵓⵙⵡⵓⵔⵉ ⵏ ⵜⴽⵏⴷⴰⵡⵜ ⵏ ⵜⵉⵖⵉⵙⵜ ⵜⵉⵎⵍⵥⵉⵜ ⴳ ⵓⵣⵎⵣ ⵏ ⵉⵙⵜⴰⵢⵏ.
ⵔⵏⵓ ⵉ ⵜⵖⴰⵔⴰⵙⵉⵏ ⵏ ⵓⴱⵟⵟⵓ ⵏ ⵓⵣⵎⵣ ⵏ ⵉⵎⵣⴳⵉ ⴷ ⵢⵉⵎⵥ ⵏ ⵡⴰⵡⴰⵍ ⴷ ⵉⵍⵓⴳⵏⵏ ⵉⵜⵜⵓⵙⵎⴽⴰⵍⵏ ⴳ ⵢⵉⴳⵔ ⵏ ⵜⵏⵓⵎⵉ ⴷ ⵜⵔⴰⵡⵙⴰⵏⵜ, ⴰⵎⴰⵏⴰⵔ ⴰⴷ ⴷⴰ ⵉⵙⵙⴽⵜⴰⵢ ⵉⵣⵓⵛⵛⵍⵏ ⵏ ⵓⵎⵙⵍⴳⵏ ⵉⵣⴷⵉⵏ ⵙ ⵓⵙⵎⴷⵢⴰ ⵏ ⵜⵎⵖⴰⵔⵉⵏ, ⵏ ⵉⵄⵔⵔⵉⵎⵏ, ⵏ ⵉⵎⵖⵔⴰⴱⵉⵢⵏ ⵏ ⵓⵎⴰⴹⴰⵍ ⴷ ⵎⴷⴷⵏ ⵉⵍⵍⴰⵏ ⴳ ⴽⵔⴰ ⵏ ⵡⴰⴷⴷⴰⴷ ⵏ ⵜⵉⵎⵎⵓⵄⴹⵕⵜ ⴰⴳⵓⵏⵙ ⵏ ⵉⵖⴰⵡⴰⵙⵏ ⵉⵎⵙⵜⴰⵢⵏ.
ⴰⵙⵡⵉⵏⴳⵎ ⴰⴷⵙⵍⴰⵏ ⵏⵏⴰ ⵉⵙⵏⵢⵓⴷⴷⵓ ⵓⵎⴰⵏⴰⵔ ⴰⴷ ⵉⴳⴰ ⵉⵙ ⴷ ⵜⴰⵎⴰⴳⵓⵜ ⵓⵔ ⵜⴳⵉ ⵖⴰⵙ ⵢⴰⵏ ⵓⴹⵎⴰⵏ ⵉⵜⵜⵓⴼⴽⴰⵏ ⵉ ⵉⵎⴰⵣⵣⴰⵍⵏ ⵉⵙⵔⵜⴰⵏⵏ. ⵜⴳⴰ ⵣⵡⴰⵔ ⵢⴰⵜ ⵜⵙⴳⴰ ⴳ ⵓⵣⵔⴼ ⵏ ⵓⴳⴷⵓⴷ ⴳ ⵉⵏⵖⵎⵉⵙⵏ ⵉⵎⵢⴰⵏⴰⵡⵏ, ⵉⵎⵢⴰⵙⵏ ⴳ ⵜⵍⵍⴰ ⵜⵎⵢⴰⵎⴰⵏⵜ, ⵉⵜⵜⴰⵡⵉⵏ ⵖⵔ ⵢⵉⵙⵉ ⵏ ⵢⴰⵜ ⵜⵖⵜⴰⵙⵜ ⵙ ⵜⵍⴻⵍⵍⵉ ⴷ ⵢⴰⵏ ⵓⵙⵡⵓⵔⵉ ⵉⴼⴰⵡⵏ ⵉ ⵓⵣⵔⴼ ⵏ ⵓⵙⵜⴰⵢ.
ⵙ ⵓⴱⵔⵉⴷ ⵏ ⵜⵙⵏⵜⴰⵢⵜ ⴰⴷ, ⵉⵔⴰ ⵓⴳⵔⴰⵡ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ ⴰⴷ ⵉⵙⵙⵉⴽⵣ ⵓⴳⴰⵔ ⵜⵉⵍⴰⵍⵜ ⵏ ⵓⵙⵍⴳⵏ ⴰⵙⵍⵉⵥⵕ ⴰⴳⵓⵏⵙ ⵏ ⵓⵎⴰⵜⵜⵉⵡ ⴰⵎⵔⵙⴰⵍ ⵉⵜⵜⴰⵡⵙⵏ ⴳ ⵓⵖⵣⴰⵏ, ⴳ ⵜⵎⵙⴼⴰⵡⵜ ⴷ ⵜⵣⴷⴳⵉ ⵏ ⵜⵣⵣⵉⴳⵣⵜ ⵏ ⵉⵙⵜⴰⵢⵏ.
ⵜⴰⵙⵎⵉⴳⵍⵜ ⴰⴷ ⵓⵔ ⵜⴱⵉⴷⴷ ⵖⴰⵙ ⴳ ⵜⵎⵣⴰⵣⵣⵍⵜ ⵜⴰⵎⵙⵜⴰⵢⵜ. ⴰⴹⴼⴼⵓⵕ ⵏ ⵜⵎⴰⴳⵓⵜ ⵏ ⵓⵡⵏⵏⵉ ⵏⵏⴰ ⵉⵜⵜⴹⵎⴰⵏ ⵓⴳⵔⴰⵡ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ ⵉⵣⴷⵉ ⴰⵡⴷ ⵙ ⵓⵙⵏⵖⵎⵙ ⴰⵙⵍⵉⵥⵕ ⴰⴳⴷⵓⴷⴰⵏ ⴷ ⵜⵏⵣⵡⴰⵢⵉⵏ ⴷ ⵉⵜⵉⵍⵉⴼⵉⵣⵢⵓⵏⵏ ⵓⵙⵍⵉⴳⵏ. ⵎⴰ ⵉⵍⴰ ⵓⵙⴳⴳⵯⴰⵙ, ⴷⴰ ⵜⵜⴹⵎⴰⵏ ⵜⵎⵔⵙⵍⵜ ⴰⴹⴼⴼⵓⵕ ⵏ ⵓⵙⵎⴷⵢⴰ ⵏ ⵉⵎⴰⵣⵣⴰⵍⵏ ⵉⵙⵔⵜⴰⵏⵏ, ⵉⵏⵎⴰⵍⵍⴰⵢⵏ, ⵉⵣⵣⵓⵍⴰⵏⵏ ⴷ ⵉⵎⵙⵎⵓⵏⵏ ⴰⴳⵓⵏⵙ ⵏ ⵉⵖⴰⵡⴰⵙⵏ ⵏ ⵓⵙⵏⵖⵎⵙ ⴷ ⵓⵎⵙⴳⴷⴰⵍ ⵉⵣⴷⵉⵏ ⵙ ⵜⵎⵙⴰⵍⵉⵏ ⵏ ⵓⴱⴰⵖⵓⵔ ⴰⵎⴰⵜⴰⵢ. ⵉⵡⵏⴰⵏ ⵏ ⵓⵣⵎⵣ ⵏ ⵉⵙⵜⴰⵢⵏ, ⴰⵎⴰⵜⵜⵉⵡ ⴰⴷ ⴰⵙⵓⵍⴰⵏ ⴷⴰ ⵉⵜⵜⵓⵙⴷⵓⵙ ⴰⴼⴰⴷ ⵉⵎⵓⵏ ⴷ ⵜⵎⵖⵔ ⵏ ⵓⵎⵙⴳⴷⴰⵍ ⴰⴳⴷⵓⴷⴰⵏ ⴰⴽⴷ ⵉⵣⵓⵛⵛⵍⵏ ⵉⵥⵍⵉⵏ ⵏⵏⴰ ⵉⵣⴷⵉⵏ ⵙ ⵜⴰⵏⵢⵓⵜ ⵜⴰⵎⵙⵜⴰⵢⵜ.
ⵜⴰⵏⵜⴰⵎⵜ ⴰⴷ ⵉⵜⵜⵓⵥⵕⴳⵏ ⵙ ⵜⵓⵜⵍⴰⵢⵜ ⵜⴰⵄⵔⴰⴱⵜ, ⵙ ⵜⵎⴰⵣⵉⵖⵜ, ⵙ ⵜⴼⵕⴰⵏⵙⵉⵙⵜ ⴷ ⵜⵏⴳⵍⵉⵣⵜ, ⵉⵜⵜⵓⵙⵔⵙ ⵉ ⵓⴳⴷⵓⴷ, ⵉ ⵉⵎⴰⵙⵙⵏ ⴰⴽⴽⵯ ⵏ ⵓⵙⵏⵖⵎⵙ, ⵉ ⵉⴽⴰⴱⴰⵕⵏ ⵉⵙⵔⵜⴰⵏⵏ, ⵉ ⵡⴰⵎⵓⵏ ⵓⵖⵔⵉⵎ ⴷ ⵉⵎⵏⵥⴰ ⵉⵏⴰⵎⵓⵔⵏ ⴷ ⵉⴳⵔⴰⵖⵍⴰⵏⵏ ⵏ ⵉⵙⵜⴰⵢⵏ, ⵙ ⵓⵢⴰⴷ, ⵉⴹⴼⴰⵕ ⵓⴳⵔⴰⵡ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ ⵢⴰⵏ ⵜⵎⵢⴰⴷⴰⵙⵜ ⵏ ⵜⵎⵙⴼⴰⵡⵜ, ⵏ ⵜⴱⵉⴷⴰⵖⵓⵊⵉⵜ ⴷ ⵜⴰⵎⵓⵏⵜ.
ⵜⴰⵡⵓⵔⵉ ⵢⴰⴷ ⵏ ⵓⵙⵉⵙⵙⵏ ⴷⴰ ⵉⵙⵙⴽⴰⵏ ⵉⵙ ⵜⵓⵙⵙⵏⴰ ⵏ ⵉⵍⵓⴳⵏⵏ ⵉⵙⵡⵓⵔⵉⵏ ⵜⴰⵎⵓⵖⵍⵉ ⵜⴰⵙⵍⵉⵥⵕⵜ ⵖⵓⵔ ⵉⵏⵎⵓⵔⵉⵏ ⴷ ⵉⵣⵣⵓⵍⴰⵏⵏ ⵏ ⵓⵙⵏⵖⵎⵙ ⵜⴳⴰ ⵢⴰⵏ ⵓⵎⵙⴽⴰⵔ ⵏ ⵜⵎⵢⵉⵎⴰⵏⵜ. ⴷⴰ ⵜⵜⴰⵡⵉ ⵖⵔ ⵢⴰⵜ ⵜⵏⵎⵓⵔⵉ ⵉⵜⵜⵎⵓⵙⵓⵏ, ⵉⴼⴰⵡⵏ, ⴰⵔ ⵜⵙⵙⴱⵖⴰⵙ ⵉⵜⵉⵍⵉⴼⵉⵣⵢⵓⵏⵏ ⴷ ⵜⵏⵣⵡⴰⵢⵉⵏ ⴰⴷ ⴰⵙⵉⵏⵜ ⵜⴰⵎⵙⵜⴳⴳⴰⵔⵜ ⵏⵏⵙⵏ ⴳ ⵓⵢⵏⵏⴰ ⵉⵣⴷⵉⵏ ⵙ ⵓⴹⵎⴰⵏ ⵏ ⵢⴰⵏ ⵓⵙⵏⵖⵎⵙ ⴰⵎⵙⵜⴰⵢ ⴰⵎⴰⴳⵓⵜ, ⵉⵕⵡⴰⵏ ⴰⵔ ⵉⵣⵔⵔⴽ ⴰⵣⵓⵛⵛⵍ ⴰⴷⵉⵎⵓⵇⵕⴰⵟⵉ.
ⴰⵎⴰⵏⴰⵔ ⵉⵍⵍⴰ ⵅⴼ ⵓⵙⵉⵜ ⵏ ⵓⴳⵔⴰⵡ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ :
www.haca.ma.