ⵍⵍⴰⵏ ⴳ ⵓⵙⵇⵇⵉⵎ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ ⵜⵥⴰ ⵏ ⵉⵎⵍⵜⴰⵖⵏ. ⵜⴰⵏⵙⵙⵉⵅⴼⵜ ⴷ ⴽⵓⵥ ⵏ ⵉⴳⵎⴰⵎⵏ ⴷⴰ ⵜⵏ ⵉⵜⵜⵙⵙⵎⵓ ⴱⴰⴱ ⵏ ⵡⴰⴷⴷⵓⵔ ⴷ ⵙⵉⵏ ⵉⴳⵎⴰⵎⵏ ⴷⴰ ⵜⵏ ⵉⵜⵜⵙⵎⵎⵓ ⵓⵏⵙⵙⵉⵅⴼ ⵏ ⵜⵏⴱⴰⴹⵜ, ⵔⵏⵓ ⵢⴰⵙ ⵙⵉⵏ ⵉⴳⵎⴰⵎⵏ ⴷⴰ ⵜⵏ ⵉⵜⵜⵙⵎⵎⵓ ⵓⵏⵙⵙⵉⵅⴼ ⵏ ⵓⵙⵇⵇⵉⵎ ⵉⵎⵓⵔⴰ ⵏ ⵓⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵛⵉⵡⴰⵕ. ⴷⴰ ⵜⵜⴳⴰⵍⵍⴰⵏ ⴰⴽⴽⵯ ⴷⴰⵜ ⵏ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵅⴼ ⵓⵙⴽⵔ ⵏ ⵜⵙⵎⴳⴰⵍⵉⵏ ⵏⵏⵙⵏ ⵙ ⵜⵣⴷⴳⵉ ⴷ ⵜⵎⵢⵉⵎⴰⵏⵜ, ⴷ ⵓⵙⵡⵓⵔⵉ ⵏⵏⵙ ⵙ ⵜⵔⴰⵡⵙⴰⵏⵜ ⴷ ⵡⵓⵖⵓⴷ.

 

ⵜⵉⵙⵎⵉⴳⴰⵍ ⵏ ⵓⵙⵇⵇⵉⵎ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ ⴳⴰⵏⵜ : ⵜⴰⵎⵓⵣⴰⵢⵜ, ⴰⵎⵛⴰⵡⴰⵕ ⴷ ⵓⵎⵍⴰⵢ ⵏ ⵜⴰⵏⵏⴰⵢⵜ, ⴷ ⵜⵙⵎⴳⴰⵍ ⵏ ⵓⵙⵏⴰⵎ ⴷ ⵓⵙⵍⴳⵏ ⴷ ⵜⵙⵎⴳⴰⵍ ⵏ ⵓⵎⴰⵜⵔ ⵏ ⵓⵙⵎⵖⵔ.

 

ⴰⴼⴰⴷ ⴰⴷ ⵜⵍⴽⵎ ⴰⵡⵜⵜⴰⵙ ⴰⴷ, ⴷⴰ ⵉⵙⵡⵓⵔⵉ ⵓⵙⵇⵇⵉⵎ ⴰⵎⴰⵜⵜⴰⵢ ⵜⵉⵥⵍⴰⵢⵉⵏ ⴰⴷ, ⵙ ⵓⵢⵏⵏⴰ ⵓⵔ ⵉⵎⵣⴰⵔⴰⵢⵏ ⴷ ⵜⵥⵍⴰⵢⵉⵏ ⵏ ⵜⵏⴱⴰⴹⵉⵏ ⴷ ⵉⴳⵔⴰⵡⵏ ⵢⴰⴹⵏ ⵙ ⵓⵢⵏⵏⴰ ⵉⵎⵓⵏⵏ ⴷ ⵉⴹⵕⵉⵚⵏ ⵓⵣⵔⵉⴼⵏ ⵏⵏⴰ ⵙ ⴷⴰ ⵏⵙⵡⵓⵔⵉ :

 

1. ⵉⵎⵥ ⵏ ⵉⵙⵓⵜⵓⵔⵏ ⵏ ⵜⵓⵔⴰⴳⵉⵏ ⴷ ⵜⵙⵎⵉⴳⴰⵍⵉⵏ ⴷ ⵜⵙⴳⵓⵔⵉⵏ ⵉⵣⴷⵉⵏ ⴷ ⵢⵉⴳⵔ ⵏ ⵓⵎⵢⴰⵡⴰⴹ ⴰⵙⵍⵉⵥⵕ ⴷ ⵜⵓⴽⴽⵉ ⵏ ⵜⵓⵔⴰⴳⵉⵏ ⴷ ⵜⵙⵎⵉⴳⴰⵍⵉⵏ ⵙ ⵓⵢⵏⵏⴰ ⵉⵍⵍⴰⵏ ⴳ ⵉⴹⵕⵉⵚⵏ ⵓⵣⵔⵉⴼⵏ ⴷ ⵉⵙⵏⵎⴰⵍⴰⵏ ⵏⵏⴰ ⵙ ⴷⴰ ⵏⵙⵡⵓⵔⵉ ⴳ ⵓⴱⴰⵔⴰⵣ. ⴷⴰ ⵜⵜⵓⵖⵔⴰⵏ ⵉⵙⵓⵜⵓⵔⵏ, ⵜⵜⵓⵙⵉⵡⴹ ⵜⵖⵜⵙⵜ ⵉ ⵡⵉⵏⵏⴰ ⵉⵙⵙⵓⵜⵔⵏ ⵜⵓⵔⴰⴳⵉⵏ ⴷ ⵜⵙⵎⵉⴳⴰⵍⵉⵏ ⴳ ⵓⵣⵎⵣ ⵓⵔ ⵉⵣⵔⵉⵏ (03) ⴽⵔⴰⴹ ⵡⴰⵢⵓⵔⵏ ⴷⴼⴼⴻⵔ ⴰⵙⵙ ⴳ ⵜⵜⵓⵢⴰⵎⵥⵏ ⵉⵙⵓⵜⵓⵔⵏ, ⴷⴰ ⴰⵙ ⵜⵜⵓⵔⵏⵓ ⵎⴽ ⵏ ⵉⵇⵇⴰⵏ ⴽⵕⴰⴹ ⵡⴰⵢⵓⵔⵏ ⵢⴰⴹⵏ ⴳ ⵓⵢⵏⵏⴰ ⵉⵣⴷⵉⵏ ⴷ ⵜⵓⵔⴰⴳⵉⵏ, ⴷⴰ ⵉⵙⵏⵖⵎⵉⵙ ⵓⴳⵔⴰⵡ ⴰⵎⴰⵜⵜⴰⵢ ⵜⴰⵏⴱⴰⴹⵜ ⵢⵓⴳⴳⴰⵏ ⵅⴼ ⵓⵎⵢⴰⵡⴰⴹ ⴷ ⵓⴳⴷⵓⴷ ⵙ ⵜⵓⵔⴰⴳⵉⵏ ⴰⴽⴽⵯ ⴷ ⵜⵙⵎⵉⴳⴰⵍⵉⵏ ⵏⵏⴰ ⵉⴼⴽⴰ ;

 

2. ⵜⵓⴽⴽⵉ ⵏ ⵜⵓⵔⴰⴳⵉⵏ ⵏ ⵓⵙⵡⵓⵔⵉ ⵏ ⵜⵎⵣⴰⵣⵉⵏ ⵏ ⵕⵕⴰⴷⵢⵓ ⵏⵏⴰ ⵜⵥⵍⵉ ⵜⵙⵏⵓⵔⴰⵢⵜ ⵜⴰⵏⴰⵎⵓⵔⵜ ⵏ ⵉⵜⵉⵇⵏⵉⵢⵏ ⵏ ⵓⵎⵢⴰⵡⴰⴹ ⵙ ⵓⵢⵏⵏⴰ ⵉⵍⵍⴰⵏ ⴳ ⵜⵡⵏⴰⵖⵜ ⵜⴰⵏⴰⵎⵓⵔⵜ ⵏ ⵉⵙⵏⴰⴳⴰⵔⵏ ⵉ ⵢⵉⴳⵔ ⵏ ⵓⵎⵢⴰⵡⴰⴹ ⴰⵙⵍⵉⵥⵕ, ⴰⴼⴰⴷ ⴰⴷ ⵉⵍⴽⵎ ⴰⵡⵜⵜⴰⵙ ⴰⴷ, ⴷⴰ ⵉⵙⵙⴽⴰⵔ ⵓⴳⵔⴰⵡ, ⴰⴷⴷⴰⵢ ⵏ ⵉⵇⵇⴰⵏ,  ⵢⴰⵜ ⵜⵙⵇⵇⵉⵎⵜ ⵏ ⵓⵣⴷⴰⵢ ⴷ ⵉⴳⵔⴰⵡⵏ ⵉⵎⴰⵜⵜⴰⵢⵏ ⵢⴰⴹⵏ ⵉⵜⵜⵓⵙⵎⴰⴳⵍⵏ ⵙ ⵜⵎⵙⵙⵓⴳⵓⵔⵜ ⵏ ⵓⵡⵍⴰⴼ ⵏ ⵜⵎⵣⴰⵣⵉⵏ ⴷ ⵜⵉⴹⴰⴼ ⵏⵏⵙ ;

 

3. ⴰⴱⵔⵔⵃ ⵙ ⵉⵙⴱⴷⴰⴷⵏ ⵉⵣⵔⴼⴰⵏⵏ ⴷ ⵉⵜⵉⵇⵏⵉⵢⵏ ⵏ ⵓⵙⵖⴰⵍ ⴷ ⵓⴹⴼⴼⵓⵕ ⵏ ⵉⵖⴰⵡⴰⵙⵏ  ⵏ ⵉⵎⵣⵓⵛⵛⵍⵏ ⵏ ⵓⵎⵢⴰⵡⴰⴹ ⴰⵙⵍⵉⵥⵕ ;

 

4. ⴰⴹⴼⴼⵓⵕ ⵏ ⵡⴰⵜⵉⴳ ⵏ ⵓⵣⵔⴰⴽ ⵏ ⵜⵡⵓⵔⵉⵡⵉⵏ ⵜⵉⵎⴰⵢⵏⵓⵜⵉⵏ ⴳ ⵢⵉⴳⵔ ⵏ ⵓⵎⵢⴰⵡⴰⴹ ⴰⵙⵍⵉⵥⵕ ⵉ ⵉⵙⴱⴷⴰⴷⵏ ⵉⴳⵔⴰⵖⵍⴰⵏⵏ ⵏ ⵜⵜⵉⵍⵉⴼⵉⵣⵢⵓⵏ ⴰⵎⵓⵟⵟⵓⵏ ;

 

5. ⴰⵙⵖⵣⵏ ⵏ ⵓⵍⵓⴳ ⵏ ⵡⴰⴳⴳⵯⴰⵜⵏ ⵉⵥⵍⵉⵏ ⵙ ⵜⵎⵙⵙⵓⵔⵉⵏ ⵜⵉⵏⴰⵎⵓⵔⵉⵏ ⵏ ⵓⵎⵢⴰⵡⴰⴹ ⴰⵙⵍⵉⵥⵕ, ⴰⵔ ⵢⴰⴽⴽⴰ ⴷⴰⵜ ⵏ ⵓⵙⵖⵣⵏ ⵜⴰⵏⵏⴰⵢⵉⵏ ⴰⴽⴽⵯ ⵏⵏⴰ ⵉⵥⵕⴰ ⵉⵙ ⴳⴰⵏⵜ ⵜⵓⴱⵖⵉⵔⵉⵏ ;

 

6. ⵜⵉⴹⴰⴼ ⵏ ⵓⵣⵔⴰⴽ ⵏ ⵉⵍⵓⴳⵏⵏ ⵏ ⵓⵡⵏⵏⵉ ⴰⵏⵎⴰⴳⵓⵜ ⵅⴼ ⵉⵎⵣⴰⵣⵏ ⵏ ⵜⵡⵏⴳⵉⵎⵜ ⴷ ⵜⴰⵏⵏⴰⵢⵜ ⵜⴳⴰ ⵜⵙⵔⵜⴰⵏⵜ ⵏⵖ ⵜⴰⵏⴰⵎⵓⵏⵜ ⵏⵖ ⵜⴰⴷⵎⵙⴰⵏⵜ ⵏⵖ ⵜⴰⴷⵍⵙⴰⵏⵜ, ⴰⴳⵓⵏⵙ ⵏ ⵉⵎⴰⵙⵙⵏ ⵏ ⵓⵎⵢⴰⵡⴰⴹ ⴰⵙⵍⵉⵥⵕ ⵙ ⵓⵣⵔⴰⴽ ⵏ ⵓⵙⵓⵎⵓ ⴰⵎⵓⵔⴰⵏ ⴷ ⵓⵎⵢⴰⵙ ⴷ ⵓⴳⵏⵙⴻⵙ ⴷ ⵓⵎⵢⴰⵏⴰⵡ ⴷ ⵡⴰⵔ ⴰⴽⵡⴰⵛ ⴳ ⵓⵢⵏⵏⴰ ⵉⵣⴷⵉⵏ ⴷ ⵉⵎⵓⵍⵍⵉⵢⵏ ⵉⵙⵔⵜⴰⵏⵏ ⵏⵖ ⵉⵏⵎⵓⵍⵍⴰ ⵏⵖ ⵜⵉⵎⵙⵎⵓⵏⵉⵏ ⵉⵙⵡⵓⵔⵉⵏ ⴳ ⵜⵖⴰⵡⵙⴰ ⵜⴰⵎⴰⵜⴰⵢⵜ. ⴰⴼⴰⴷ ⴰⴷ ⵉⵍⴽⵎ ⴰⵡⵜⵜⴰⵙ ⴰⴷ, ⴷⴰ ⵉⵜⵜⴰⵣⵏ ⵓⴳⵔⴰⵡ ⴽⵓ ⴽⵕⴰⴹ ⵡⴰⵢⵓⵔⵏ ⵉ ⵓⵏⵙⵙⵉⵅⴼ ⵏ ⵜⵏⴱⴰⴹⵜ ⴷ ⵓⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵏⵎⵓⵔⴰ ⴷ ⵉⵎⴰⵙⴰⵢⵏ ⵏ ⵉⵎⵓⵍⵍⵉⵢ ⵉⵙⵔⵜⵉⵢⵏ ⴷ ⵜⵏⵎⴰⵍⴰⵢⵉⵏ ⵏ ⵜⵏⵎⵓⵍⵍⴰ ⴷ ⵜⵎⵚⵕⵉⵢⵉⵏ ⵜⵉⵣⵣⵓⵍⴰⵏⵉⵏ ⴷ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵓⵙⵇⵇⵉⵎ ⴰⴷⵎⵙⴰⵏ ⴷ ⵓⵏⴰⵎⵓⵏ ⴷ ⵡⵉⵏ ⵜⵡⵏⵏⴰⴹⵜ ⵜⴰⵏⵎⵎⴰⵍⵜ ⵏ ⵏ ⵓⵣⵎⵣ ⵏⵏⴰ ⵜⵙⵉⴽⴽ  ⵜⴳⵓⵔⵉ ⵏ ⵉⵎⴰⵣⵣⴰⵍⵏ ⵉⵙⵔⵜⴰⵏⵏ ⴷ ⵉⵏⵎⴰⵍⵍⴰⵏⵏ ⴷ ⵉⵣⵓⵍⴰⵏⵏ ⴷ ⵡⵉⵏⵏⴰ ⵉⵜⵜⴰⵣⵣⴰⵍⵏ ⴳ ⵜⵎⵙⵎⵓⵏⵉⵏ ⴰⴳⵓⵏⵙ ⵏ ⵉⵖⴰⵡⴰⵙⵏ ⵏ ⵕⵕⴰⴹⵢⵓ ⴷ ⵜⵜⵉⵍⵉⴼⵉⵣⵢⵓⵏ. ⵉⵖⵉⵢ ⵙ ⵓⵢⴰⴷ ⴰⴷ ⵉⴼⴽ ⵜⴰⵏⵏⴰⵢⵉⵏ ⴰⴽⴽⵯ ⵏⵏⴰ ⵉⵥⵕⴰ ⵉⵙ ⴳⴰⵏⵜ ⵜⵓⴱⵖⵉⵔⵉⵏ ⵉⵙⵙⵉⵙⵏ ⵜⵏⵜ ⵉ ⵓⴳⴷⵓⴷ ;

 

7. ⴰⴳⴳⴰⵢ  ⵅⴼ ⵓⵣⵔⴰⴽ ⵏ ⵉⴹⵕⵉⵚⵏ ⵓⵣⵔⵉⴼⵏ ⴷ ⵉⵙⵏⵎⴰⵍⵏ ⵉⵣⴷⵉⵏ ⴷ ⵓⵙⵡⵓⵔⵉ ⵏ ⵉⵎⴰⵙⵙⵏ ⵏ ⵓⵎⵢⴰⵡⴰⴹ ⴰⵙⵍⵉⵥⵕ ⴰⴳⴷⵓⴷⴰⵏ ⴳ ⵓⵣⵎⵣ ⵏ ⵉⵎⵣⵉⵣⵣⵍⵏ ⵉⵙⵜⴰⵢⵏ ⴷ ⵓⵙⵖⴰⵍ ⵏ ⵜⴰⵏⵏⴰⵢⵜ ;

 

8.  ⴰⴳⴳⴰⵢ ⵅⴼ ⵓⵛⵛⵉⵍ ⵏ ⵡⴰⵍⵍⴰⵍⵏ ⴷ ⵉⵎⵣⵓⵛⵛⵍⵏ ⵏ ⵓⵎⵢⴰⵡⴰⴹ ⴰⵙⵍⵉⵥⵕ ⵙ ⵉⴹⵕⵉⵚⵏ ⵓⵣⵔⵉⴼⵏ ⴷ ⵉⵙⵏⵎⴰⵍⵏ ⵏⵏⴰ ⴷⴰ ⵉⵜⵜⵓⵙⵡⵓⵔⵉⵏ ⴳ ⵢⵉⴳⵔ ⵏ ⵓⵙⵓⵙⵙⵏ, ⴰⴼⴰⴷ ⴰⴷ ⵉⵍⴽⵎ ⴰⵡⵜⵜⴰⵙ ⴰⴷ, ⴷⴰ ⵉⵙⵡⵓⵔⵉ ⵓⵙⵇⵇⵉⵎ, ⵙ ⵉⵎⴰⵙⵙⵏ ⴰⴽⴽⵯ ⵉⵖⵓⴷⴰⵏ, ⴰⴳⴳⴰⵢ ⵅⴼ ⵓⴱⵔⵉⴷ ⵏ ⵓⵙⵖⵉⵡⵙ ⵏ ⵜⵙⵓⵔⵉⴼⵉⵏ ⵏ ⵓⵙⵓⵙⵙⵏ ⵏⵏⴰ ⵅⴼ ⵓⴳⴳⴰⵏ ⵉⴳⵔⴰⵡⵏ ⵏ ⵓⵎⵢⴰⵡⴰⴹ ⴰⵙⵍⵉⵥⵕ ⵉⵣⴷⵉⵏ ⴷ ⵢⵉⴳⵔ ⴰⵎⴰⵜⵜⴰⵢ ⵏⵖ ⵡⵏⵏⴰ ⵉⵙⴱⵖⵔⵏ ⴳ ⵓⵙⵢⴰⴼⴰ, ⴰⵢⵏⵏⴰ ⵉⵔⴰ ⵉⴳ ⵜ ⴳ ⵢⵉⴳⵔ ⴰⴷ ;

 

9. ⴰⵙⵓⴼⵖ ⵏ ⵉⵣⵎⴰⵣ ⵅⴼ ⵡⵓⵏⵓⴼⵏ ⵏⵏⴰ ⵙⵙⴽⵔⵏ ⵉⵎⵣⵓⵛⵛⵍⵏ ⵏ ⵓⵎⵢⴰⵡⴰⴹ ⴰⵙⵍⵉⵥⵕ, ⵏⵖ ⴰⵙⵎⵏⵉⴷ ⵏ ⵉⵙⵓⵎⴰⵔ ⴳ ⵓⵢⵏⵏⴰ ⵢⴰⵖⵉⵍⵏ ⵉⵣⵎⴰⵣ ⵉ ⵜⵏⴱⴰⴹⵜ ⵜⴰⴳⴷⵓⴷⴰⵏⵜ ⵜⴰⵎⵥⵍⴰⵢⵜ, ⵙ ⵓⵢⵏⵏⴰ ⵉⵍⵍⴰⵏ ⴳ ⵓⵣⵔⴰⴼ ⵏⵏⴰ ⴷⴰ ⵉⵜⵜⵓⵙⵡⵓⵔⵉⵏ ⴷ ⵓⵍⵓⴳ ⵏ ⵡⴰⴳⴳⵯⴰⵜⵏ ⵏ ⵉⵎⵣⵓⵛⵛⴰⵍⵏ.

 

 

ⴳ ⵜⵡⵓⵔⵉⵡⵉⵏ ⴷⵉⵖ ⵏ ⵓⵙⵇⵇⵉⵎ ⴰⵎⴰⵜⴰⵢ, ⵙ ⵓⴱⵔⵉⴷ ⵏ ⵓⵙⵓⵎⵔ ⴷ ⵓⵎⵛⴰⵡⴰⵕ, ⵜⵉⵎⵙⴽⵉⵔⵉⵏ ⴰⴷ :

 

1. ⴰⵙⵙⴽⴰⵏ ⵏ ⵜⴰⵏⵏⴰⵢⵜ ⴳ ⴽⵓ ⵜⴰⵎⵙⴰⵍⵜ ⵏⵏⴰ ⵙ ⵉⵜⵜⵓⴼⴽⴰⵏ ⵙⴳ ⵖⵓⵔ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⴳ ⵓⵢⵏⵏⴰ ⵉⵣⴷⵉⵏ ⴷ ⵢⵉⴳⵔ ⵏ ⵓⵎⵢⴰⵡⴰⴹ ⴰⵙⵍⵉⵥⵕ ;

 

2. ⴰⵙⵙⴽⴰⵏ ⵏ ⵜⴰⵏⵏⴰⵢⵜ ⵉ ⵜⵏⴰⴱⴹⵜ ⴷ ⵓⴱⵕⵍⴰⵎⴰⵏ ⴳ ⴽⵓ ⵜⴰⵎⵙⴰⵍⵜ ⵏⵏⴰ ⵙ ⵢⵓⵣⵏ ⵓⵏⵙⵙⵉⵅⴼ ⵏ ⵜⵏⴰⴱⴹⵜ ⵏⵖ ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵍⴱⵕⵍⴰⵎⴰⵏ, ⴳ ⵓⵢⵏⵏⴰ ⵉⵣⴷⵉⵏ ⴷ ⵢⵉⴳⵔ ⵏ ⵓⵎⵢⴰⵡⴰⴹ ⴰⵙⵍⵉⵥⵕ ;

 

3. ⴰⵙⵙⴽⴰⵏ ⵏ ⵜⴰⵏⵏⴰⵢⵜ ⵙ ⵛⵛⵉⵍ ⵉ ⵓⵏⵙⵙⵉⵅⴼ ⵏ ⵜⵏⴱⴰⴹⵜ  ⴳ ⵓⵢⵏⵏⴰ ⵉⵣⴷⵉⵏ ⴷ ⵉⵙⵏⵜⵉⵢⵏ ⵉⵣⵔⴼⴰⵏⵏ ⵏⵖ ⵉⵙⵏⵜⵉⵢⵏ ⵉⵣⵔⴼⴰⵏⵏ ⵉⵣⴷⵉⵏ ⴷ ⵢⵉⴳⵔ ⵏ ⵓⵎⵢⴰⵡⴰⴹ ⴰⵙⵍⵉⵥⵕ, ⴷⴰⵜ ⵏ ⴰⴷ ⵜⵜⵓⵙⵎⵏⴷⵏ ⵉ ⵓⵙⵇⵇⵉⵎ ⵏ ⵜⵏⴱⴰⴹⵜ ;

 

4. ⴰⵙⵙⴽⴰⵏ ⵏ ⵜⴰⵏⵏⴰⵢⵜ ⵙ ⵛⵛⵉⵍ ⵉ ⵓⵏⵙⵙⵉⵅⴼ ⵏ ⵓⴱⵕⵍⴰⵎⴰⵏ ⴳ ⵓⵢⵏⵏⴰ ⵉⵣⴷⵉⵏ ⴷ ⵉⵙⵓⵎⴰⵔ ⵏ ⵉⵣⵔⴼⴰⵏ ⵉⵣⴷⵉⵏ ⴷ ⵢⵉⴳⵔ ⵏ ⵓⵎⵢⴰⵡⴰⴹ ⴰⵙⵍⵉⵥⵕ, ⴷⴰⵜ ⵏ ⴰⴷ ⵜⵜⵓⵙⵎⵏⴷⵏ ⵉ ⵓⵙⵇⵇⵉⵎ ⵉⵥⵍⵉⵏ ⵙ ⵓⵢⴰⴷ ;

 

ⵉⵍⵍⴰ ⵅⴼ ⵓⵙⵇⵇⵉⵎ ⴰⵎⴰⵜⵜⴰⵢ ⴰⴷ ⵉⵙⵙⴽⵏ ⵜⴰⵏⵏⴰⵢⵜ ⵏⵏⵙ ⴳ ⵓⵢⵏⵏⴰ ⵉⵣⴷⵉⵏ ⵉⵙⵏⵜⵉⵢⵏ ⴷ ⵉⵙⵓⵎⴰⵔ ⴷ ⵜⵎⵙⴰⵔⵉⵏ ⵏⵏⴰ ⵙ ⵉⵜⵜⵓⵢⴰⵣⵏⵏ ⴳ ⵢⴰⵜ ⵜⵉⵔⵎⵜ ⵓⵔ ⵉⵣⵔⵉⵏ ⵙⴹⵉⵚ ⵜⵎⵔⴰⵡⵉⵏ (60) ⵏ ⵡⵓⵙⵙⴰⵏ ⵙⴳ ⵡⴰⵙⵙ ⵏⵏⴰ ⴳ ⵜⵏⵜ ⵢⵓⵎⵥ, ⵉⵖⵉⵢ ⵎⵛ ⵏ ⵉⵇⵇⴰⵏ, ⴰⴷ ⵉⵙⵙⵓⵜⵔ ⵙⴳ ⵜⵎⵏⴰⴹⵜ ⵜⴰⵎⵏⵜⴰⵢⵜ ⴰⴷ ⵜⵙⵙⵖⵣⵉⴼ ⵜⵉⵔⵎⵜ ⴰⴷ ⵙ ⵜⴰⵢⴹ ⵓⵔ ⵉⵣⵔⵉⵏ ⴽⵕⴰⴹⵜ ⵜⵎⵔⴰⵡⵉⵏ (30) ⵏ ⵡⵓⵙⵙⴰⵏ ⵎⴰⵛⴰ ⵉⵇⵇⴰⵏ ⵏ ⴰⴷ ⵜⵜⵓⵙⴽⵏⵏⵜ ⵜⵎⵏⵜⵉⵍⵉⵏ ⵏ ⵓⵢⴰⵏ ⴷⴰⵜ ⴰⴷ ⵜⵣⵔⵉ ⵜⵉⵔⵎⵜ ⵜⴰⵎⵣⵡⴰⵔⵓⵜ. ⵎⵛ ⵓⵔ ⵉⵏⵏⵉ ⵓⵙⵇⵇⵉⵎ ⴰⵎⴰⵜⵜⴰⵢ ⵜⴰⵏⵏⴰⵢⵜ ⵏⵏⵙ ⴰⴳⵓⵏⵙ ⵏ ⵜⵉⵔⴰⵎ ⴰⴷ, ⴷⴰ ⵏⵜⵜⵉⵙⵉⵏ ⵉⵙ ⵓⵔ ⵉⴼⴽⵉ ⴰⵡⴷ ⵢⴰⵜ ⵜⵖⴹⴼⵜ ⵉ ⵉⵙⵓⵎⴰⵔ ⴷ ⵜⵎⵙⴰⵔⵉⵏ ⴰⴷ.

 

ⵎⴰⵛⴰ, ⵎⵛ ⵉⵣⴷⵉ ⵓⵙⴽⴽⵉⵏ ⴷ ⴽⵔⴰ ⵏ ⵡⴰⵏⴰⵡ ⵉⵣⵔⴱⵏ, ⵖⵉⵢⵏⵜ ⵜⵎⵏⴰⴹⵉⵏ ⵜⵉⵎⵏⵜⴰⵢⵉⵏ ⴰⴷ ⵙⵙⵓⵜⵔⵏⵜ ⵙⴳ ⵓⵙⵇⵇⵉⵎ ⴰⵎⴰⵜⵜⴰⵢ ⴰⴷ ⵉⵙⵙⴽⵏ ⵜⴰⵏⵏⴰⵢⵜ ⵏⵏⵙ ⴰⴳⵓⵏⵙ ⵏ ⵢⴰⵜ ⵜⵉⵔⵎⵜ ⴳⵣⵣⵓⵍⵏ, ⴷⴰ ⵉⵜⵜⵓⵢⵉⵏⵉ ⵓⵣⵎⵣ ⵏⵏⵙ ⴳ ⵢⴰⵜ ⵜⴱⵔⴰⵜ ⵏⵏⴰ ⵙ ⵉⵜⵜⵓⵢⴰⵣⴰⵏⵏ.

ⵉⵖⵉⵢ ⵓⴳⵔⴰⵡ ⴰⵎⴰⵜⵜⴰⵢ, ⴰⴷ ⵉⴼⴽ ⵜⴰⵙⵏⵜⴰⵢⵜ ⵏⵏⵙ, ⵙ ⵜⴰⵏⵏⴰⵢⵉⵏ ⴷ ⵉⵙⵓⵎⴰⵔ ⵏⵏⵙ ⴳ ⵓⵢⵏⵏⴰ ⵉⵣⴷⵉⵏ ⴷ ⵜⵖⴰⵡⵙⵉⵡⵉⵏ ⵢⵓⴳⵍⵏ ⵙ ⵉⴳⵔ ⵏ ⵜⵥⵍⴰⵢⵜ ⵏ ⵓⴳⵔⴰⵡ ⴰⵎⴰⵜⵜⴰⵢ ;

 

5. ⴰⵙⵎⵏⵉⴷ ⵏ ⴽⵓ ⴰⵙⵓⵎⵔ ⵏⵖ ⴰⵙⵖⵍⴼ ⵉ ⵜⵏⴱⴰⴹⵜ ⴳ ⵓⵢⵏⵏⴰ ⵉⵣⴷⵉⵏ ⴷ ⵉⵙⵏⵉⴼⵉⵍⵏ ⵓⵣⵔⵉⴼⵏ ⵏⵖ ⴰⵙⵏⵎⴰⵍⴰⵏ ⵏⵏⴰ ⵜⵛⵛⵉⵍ ⵜⴳⵎⵉ ⵏ ⵜⵉⴽⵏⵓⵍⵓⵊⵉⵜ ⴷ ⵜⴷⴰⵎⵙⴰ ⴷ ⵡⴰⵎⵓⵏ ⴷ ⵜⴷⵍⵙⴰ ⴳ ⵜⵡⵓⵔⵉⵡⵉⵏ ⵉ ⵜⵡⵓⵔⵉⵡⵉⵏ ⵏ ⵢⵉⴳⵔ ⵏ ⵓⵎⵢⴰⵡⴰⴹ ⴰⵙⵍⵉⵥⵕ.