ⵉⵙⵙⴽⵔ ⵢⴰⵏ ⵓⴽⴰⴱⴰⵕ ⴰⵎⵇⵔⴰⵏ ⵏ ⵓⵙⵇⵇⵉⵎ ⴰⵏⴰⵎⵓⵔ ⵏ ⵓⵙⵏⴰⵎ ⵏ ⵓⵙⵍⵉⵥⵕ ⵏ ⵙⵉⵏⵉⴳⴰⵍ, ⵏⵏⴰ ⵎⵉ ⵉⵣⵡⴰⵔ ⵓⵏⵙⵙⵉⵅⴼ ⵏⵏⵙ ⵎⴰⵙⵙ ⴱⴰⴱⴰⴽⴰⵔ ⴷⵉⵢⴰⴳⵏ, ⵢⴰⵏ ⵓⵣⵔⴰⴼ ⵏ ⵜⵡⵓⵔⵉ ⴳ ⵍⵎⵖⵔⵉⴱ ⵙ ⵓⵙⵏⵓⴱⴳ ⵏ ⵜⵏⵙⵙⵉⵅⴼⵜ ⵏ ⵓⴳⵔⴰⵡ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ, ⵎⴰⵙⵙⴰ ⵍⴰⵟⵉⴼⴰ ⴰⵅⵔⴱⴰⵛ.

ⵢⵓⵏⴼ ⵓⵔⵣⴰⴼ ⴰⴷ ⵉ ⵜⴳⵔⴰⵡⵉⵏ ⵏ ⵜⵎⵔⵙⴰⵍ ⵏ ⵓⵙⵏⴰⵎ ⵙ ⵙⵏⴰⵜ ⴰⴷ ⵙⵙⴽⵔⵏⵜ ⴽⵉⴳⴰⵏ ⵏ ⵜⵖⵉⵎⴰ ⵏ ⵜⵡⵓⵔⵉ ⵉⵥⵍⵉⵏ ⵙ ⵓⵎⴰⵜⴰ ⵉ ⵜⵖⴰⵡⵙⵉⵡⵉⵏ ⵏ ⵓⵣⵣⵉⴳⵣ ⵏ ⵉⵎⵙⵡⵓⵔⴰ ⵏ ⵓⵙⵏⵖⵎⵙ ⴷⴷⴰⵡ ⵓⵎⵓⵜⵜⵢ ⴰⵎⵓⵟⵟⵓⵏ ⵏ ⵓⵎⵢⴰⵡⴰⴹ, ⵏ ⵓⵙⵖⵓⴷⵓ ⵏ ⵡⴰⵍⵍⴰⵍⵏ ⵏ ⵢⵉⵡⵙ ⵉ ⵜⵎⵙⴰⵔⵉⵏ ⵜⵉⵏⴰⵎⵓⵏⵉⵏ ⴰⴳⵓⵏⵙ ⵏ ⵓⵙⵏⵖⵎⵙ, ⵏⵖ ⴷⵉⵖ, ⴰⴹⴼⴼⵓⵕ ⵏ ⵓⵣⵣⵉⴳⵣ ⴰⴷⴰⵎⵙⴰⵏ ⵏ ⵢⵉⴳⵔ ⴰⵙⵍⵉⵥⵕ.

ⴳ ⵉⵙⵏⵉⴼⵉⵍⵏ ⴰⴷ ⴳ ⵢⴰⵎⵓ ⵎⴰⵙⵙ ⴱⵏⵄⵉⵙⵙⴰ ⴰⵙⵍⵓⵏ, ⴰⵏⵎⵀⴰⵍ ⴰⵎⴰⵜⴰⵢ, ⴷ ⴽⵉⴳⴰⵏ ⵏ ⵉⵏⵎⵀⴰⵍⵏ ⴷ ⵉⵙⴰⵜⵉⵏ ⵏ ⵓⴳⵔⴰⵡ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ, ⵎⴰⵙⵙⴰ ⵍⴰⵟⵉⴼⴰ ⴰⵅⵔⴱⴰⵛ ⴷ ⵎⴰⵙⵙ ⴱⴰⴱⴰⴽⴰⵔ ⴷⵉⵢⴰⴳⵏ, ⴰⴷⴷⵏ ⵅⴼ ⵓⵎⵢⴰⵡⴰⵙ ⴷ ⵓⵙⴷⵓⵙ ⵏ ⵜⵙⵓⴳⴰⵔ ⵉⵣⴷⵉⵏ ⴷ ⵓⴹⴼⴼⵓⵕ ⵏ ⵉⵖⴰⵡⴰⵙⵏ ⵉⵙⵍⵉⵥⵕⵏ. ⴳ ⵓⵢⴰⴷ, ⵜⵙⵙⵔⵖⵓⴷ ⵜⵏⵙⵙⵉⵅⴼⵜ ⵏ ⵜⵎⵔⵙⵍⵜ ⵜⴰⵎⵖⵔⴰⴱⵉⵢⵜ ⵉⴽⵏⵉ ⵏⵏⵙ ⴰⵙⵉⵏⵉⴳⴰⵍⵉ ⵅⴼ ⵜⵎⵓⵣⴰⵢⵜ ⴷ ⵜⵓⵙⵙⵏⴰ ⵏⵏⴰ ⵙⵙⴽⵏⵏ ⵉⵙⴰⵜⵉⵏ ⵏ ⵓⵙⵇⵇⵉⵎ ⴰⵏⴰⵎⵓⵔ ⵏ ⵓⵙⵏⴰⵎ ⵏ ⵓⵙⵍⵉⵥⵕ ⵏ ⵙⵉⵏⵉⴳⴰⵍ ⴳ ⵓⵢⵏⵏⴰ ⵉⵣⴷⵉⵏ ⴷ ⵢⵉⵡⵙ ⴳ ⵉⵖⴰⵡⴰⵙⵏ ⵉⵙⵍⵉⵥⵕⵏ ⵙ ⵜⵖⴰⵔⴰⵙⵜ ⵏ ⵓⵖⴰⵡⴰⵙ ⴰⵎⵖⵔⴰⴱⵉ ⵏ ⵢⵉⵡⵙ HACA Media Solutions ⵏⵏⴰ ⵉⵙⵙⴽⵔ ⵓⴳⵔⴰⵡ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ ⵜⴼⴽ ⴰⵙⵡⵓⵔⵉ ⵏⵏⵙ ⵉ ⵜⵎⵔⵙⵍⵜ ⵏ ⵙⵉⵏⵉⴳⴰⵍ ⵙⴳ ⵓⵙⴳⴳⵯⴰⵙ ⵏ 2014.

ⴳ ⵜⵙⴳⴰ ⵢⴰⴹⵏ, ⵎⴰⵙⵙⴰ ⵍⴰⵟⵉⴼⴰ ⴰⵅⵔⴱⴰⵛ ⴷ ⵎⴰⵙⵙ ⴷⵉⵢⴰⴳⵏ, ⵉⴳⴰⵏ ⵜⴰⵎⵣⵡⴰⵔⵓⵜ, ⵜⴰⵎⴰⵔⴰⵜ ⵏ ⵓⵏⵙⵙⵉⵅⴼ ⵏ ⵓⵥⵟⵟⴰ ⵏ ⵜⵎⵔⵙⴰⵍ ⵜⵉⴼⵔⵉⵇⵉⵏ ⵏ ⵓⵙⵏⴰⵎ ⵏ ⵓⵎⵢⴰⵡⴰⴹ ⴷ ⵡⵉⵙⵙ ⵙⵉⵏ ⴰⵏⵙⵙⵉⵅⴼ ⵏ ⵜⵙⵉⵍⴰ ⵏ ⵉⵏⵙⵏⴰⵎⵏ ⵏ ⵓⵙⵍⵉⵥⵕ ⵏ ⵜⵎⵓⵔⴰ ⵜⵉⵏⴳⵎⴰⵎⵉⵏ ⵏ UEMOA ⴷ ⵡⵉⵏ ⵖⵉⵏⵢⴰ, ⵎⵛⴰⵡⴰⵕⵏ ⴳ ⵓⵢⵏⵏⴰ ⵉⵣⴷⵉⵏ ⴷ ⵜⵎⵙⴰⵔⵉⵏ ⵜⵉⵎⵇⵔⴰⵏⵉⵏ ⵉⵍⵍⴰⵏ ⴳ ⵜⵎⵙⵙⴽⵜⵉⵢⵉⵏ ⵏ ⵓⵎⵢⴰⵡⴰⵙ ⵏ ⵜⵉⵙⵉⵍⴰⵡⵉⵏ ⵏ ⵓⵙⵏⴰⵎ ⵏⵏⴰ ⴳ ⴳⴰⵏ ⵉⵎⵙⵍⴰⴹⵏ ⴰⵔ ⴷⵉⴳⴳⵙⵏ ⵜⵜⵎⵓⵙⵓⵏ ⵣⵓⵏⴷ ⴰⵥⵟⵟⴰ ⴰⴼⵔⵉⵇⵉ, ⴰⵥⵟⵟⴰ ⴰⴼⵕⴰⵏⴽⵓⴼⵓⵏⵉ ⵏⵖ ⴰⵙⴳⵔⴰⵡ ⵏ ⵉⵎⵙⵏⴰⵎⵏ ⵉⵙⵍⵉⵥⵕⵏ ⵏ ⵜⵎⵓⵔⴰ ⵜⵉⴳⵎⴰⵎⵉⵏ ⵏ ⵓⵙⴷⵓⵙ ⵏ ⵓⵎⵢⴰⵡⴰⵙ ⴰⵏⵙⵍⵎ.

ⴳ ⵓⵣⵔⴰⴼ ⵏⵏⵙ ⵖⵔ ⵍⵎⵖⵔⵉⴱ, ⵉⵙⴰⵡⵍ ⴷⵉⵖ ⵓⵏⵙⵙⵉⵅⴼ ⵏ ⵓⵙⵇⵇⵉⵎ ⴰⵏⴰⵎⵓⵔ ⵏ ⵓⵙⵏⴰⵎ ⵏ ⵓⵙⵍⵉⵥⵕ ⵏ ⵙⵉⵏⵉⴳⴰⵍ ⴰⴽⴷ ⵎⴰⵙⵙ ⴼⴰⵢⵚⵍ ⵍⵄⵔⴰⵢⵛⵉ, ⴰⵏⵙⵙⵉⵅⴼ ⴰⵏⵎⵀⴰⵍ ⴰⵎⴰⵜⴰⵢ ⵏ ⵉⴳⵊⴷⵉ ⴰⵙⵍⵉⵥⵕ ⴰⴳⴷⵓⴷⴰⵏ. ⵉⵎⵙⵜⴳⴳⴰⵔⵏ ⴰⴷ ⵙ ⵙⵉⵏ ⵎⵔⴰⵔⴰⵏ ⴰⵙⵡⵉⵏⴳⵎ ⵙ ⵓⵣⵎⵣⵣⵓ ⵢⴰⴷ ⵅⴼ ⵜⵖⴰⵔⴰⵙⵉⵏ ⵏ ⵓⵎⵛⴰⵛⴽⴰ ⵏ ⵜⵏⴰⴼⵓⵜ ⵜⴰⴳⴷⵓⴷⴰⵏⵜ ⵏ ⵕⴰⴷⵢⵓ ⴷ ⵜⵉⵍⵉⴼⵉⵣⵢⵓⵏ ⵉ ⵉⵙⵏⴼⵍⵏ ⵉⵅⴰⵜⴰⵔⵏ ⵏⵏⴰ ⵉⵥⵕⴰ ⵢⵉⴳⵔ ⴰⵖⵎⵙⴰⵏ ⴷ ⵅⴼ ⵜⵏⵥⵕⵉⵏ ⵜⵉⵎⵇⵔⴰⵏⵉⵏ ⵏⵏⴰ ⴷ ⵜⵙⵍⵍⵡⴰ  ⵜⵡⵏⵏⴰⴹⵜ ⵜⴰⵜⵉⴽⵏⵓⵍⵓⵊⵉⵜ ⵏ ⵓⵙⵏⵖⵎⵙ ⴷ ⵓⵎⵢⴰⵡⴰⴹ. ⵙ ⵓⵣⵎⵣⵣⵓ ⵏ ⵓⵣⵔⴰⴼ ⴰⴷ, ⵉⵙⵎⵏⴷ ⵎⴰⵙⵙ ⵍⵄⵔⴰⵢⵛⵉ ⵉⵔⵎ ⵏ ⵜⵎⵙⵙⵓⵔⵜ ⵜⴰⵏⴰⵎⵓⵔⵜ ⵏ ⵕⴰⴷⵢⵓ ⴷ ⵜⵉⵍⵉⴼⵉⵣⵢⵓⵏ ⴳ ⵓⵢⵏⵏⴰ ⵉⵣⴷⵉⵏ ⴷ ⵜⵉⴳⵎⵉ ⵏ ⵜⵙⵉⵍⵉⵡⵉⵏ ⵜⵉⵎⵓⵟⵟⵓⵏⵉⵏ ⵏⵏⴰ ⵉⵜⵜⴹⴰⵙⵏ ⵙ ⵉⵎⵥⵍⵉ ⴰⴳⴷⵓⴷ ⵎⵥⵥⵉⵢⵏ.

ⴰⴽⴰⴱⴰⵕ ⴰⵙⵉⵏⵉⴳⴰⵍⵉ ⵏⵏⴰ ⵉⵏⵙⵙⵉⵅⴼ ⵎⴰⵙⵙ ⴱⴰⴱⴰⴽⴰⵔ ⴷⵉⵢⴰⴳⵏ, ⵉⵍⵍⴰ ⴷⵉⵖ ⴷⵉⴳⵙ ⴰⵡⴷ ⵎⴰⵙⵙⴰ ⵎⴰⵔⵉ ⵏⴷⵉⵢⴰⵢ ⵏⴳⵓⵎ, ⵜⴰⵎⴰⵔⴰⵢⵜ ⵜⴰⵎⵥⵍⵉⵜ ⵏ ⵜⵎⵔⵙⵍⵜ ⴷ ⵎⴰⵙⵙⴰ ⵏⴰⴷⵉⴽ ⵡⴰⵏ, ⵜⴰⵎⵙⵜⴳⴳⴰⵔⵜ ⵏ ⵜⵏⴰⴼⵓⵜ ⵏ ⵢⵉⵡⵙ.