ⵜⵙⵏⵓⴱⴳ ⵜⵏⵙⵙⵉⵅⴼⵜ ⵏ ⵓⴳⵔⴰⵡ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ ⴰⵙⵙ ⵏ 5 ⵢⵓⵍⵢⵓⵣ 2022 ⴳ ⵓⵙⵖⵉⵎ ⵏ ⵜⵎⵔⵙⵍⵜ, ⵎⴰⵙⵙⴰ ⴽⴰⵕⵎⵉⵏ ⵎⵓⵕⵜ-ⴳⵓⵎⵉⵣ, ⵜⴰⵎⵇⵔⴰⵏⵜ ⵏ ⵓⵙⵉⵔⴰ ⵏ ⵓⵙⵇⵇⵉⵎ ⵏ ⵓⵕⵓⴱⴱⴰ ⴳ ⵍⵎⵖⵔⵉⴱ. ⵉⵡⵏⴰⵏ ⵏ ⵓⵎⵙⴳⵔⴰⵡ ⴰⴷ, ⵜⵙⵎⵏⴷ ⵎⴰⵙⵙⴰ ⴰⵅⵔⴱⴰⵛ ⵉ ⵎⴰⵙⵙⴰ ⴳⵓⵎⵉⵣ ⵜⴰⵙⵎⴳⵍⵜ ⴷ ⵉⵎⴰⵙⴰⵢⵏ ⵉⵙⴷⵙⵍⴰⵏⵏ ⵏ ⵓⴳⵔⴰⵡ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ ⵉⴳⴰⵏ ⵜⴰⵎⵔⵙⵍⵜ ⵜⴰⴷⵓⵙⵜⵓⵔⵉⵢⵜ ⵜⴰⵏⵉⵎⴰⵏⵜ ⵢⵓⵙⵉⵏ ⴰⴳⴳⵯⴰ ⵏ ⵓⵙⵏⴰⵎ ⵏ ⵓⵎⵢⴰⵡⴰⴹ ⴰⵙⵍⵉⵥⵕ ⵉⴳ ⴰⵍⵜⵓ ⴰⵎⵙⴷⴰⵢ ⴰⵎⵔⵙⴰⵍ ⵉⵙⵡⵓⵔⵉⵏ ⴳ ⵓⴱⵔⵉⴷ ⴰⵎⵇⵔⴰⵏ ⵏ ⵓⵙⴷⵓⵙ ⵏ ⵡⴰⵜⵉⴳⵏ ⵉⴷⵉⵎⵓⵇⵕⴰⵟⵉⵢⵏ ⴷ ⵜⴷⵍⵙⴰ ⵏ ⵉⵣⵔⴼⴰⵏ ⵏ ⵓⵎⴷⴰⵏ ⴰⴳⵓⵏⵙ ⵏ ⵡⴰⵎⵓⵏ ⴰⵎⵖⵔⴰⴱⵉ.

ⵅⴼ ⵓⵢⴰⴷ, ⵜⵙⴷⵓⵙ ⵉⵡⵏⵏⵉ ⵏⵏⵙ ⵙ ⴽⵉⴳⴰⵏ ⵏ ⵉⵎⴷⵢⴰⵜⵏ ⵏ ⵜⵖⵜⴰⵙⵉⵏ ⵏ ⵓⵙⵇⵇⵉⵎ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ ⵉⵣⴷⵉⵏ ⴷ ⵓⵙⵉⴽⵙⵍ ⵏ ⵡⴰⵏⴰⵡ ⴷ ⵓⵙⴱⴷⴷⵉ ⵏ ⵜⵡⵍⴰⴼⵉⵏ ⵜⵓⵣⴷⵉⵔⵉⵏ ⵉⵣⴷⵉⵏ ⴷ ⵜⵎⵖⴰⵔⵉⵏ ⴰⴳⵓⵏⵙ ⵏ ⵜⵓⵎⴰⵢⵉⵏ ⵜⵉⵙⵏⵖⵎⴰⵙⵉⵏ ⵜⵉⵙⵍⵉⵥⵕⵉⵏ, ⴷ ⵓⵣⵔⴰⴽ ⵏ ⵜⵎⴰⵜⴰⵔⵜ ⵏ ⵜⵣⴷⴳⵉ ⴷ ⵜⵓⴷⵔⵜ ⵉⵥⵍⵉⵏ, ⴷ ⵓⵎⵏⵏⵓⵖ ⵎⴳⴰⵍ ⵉⵡⵏⵏⵉⵜⵏ ⵏ ⵓⵙⵏⵓⵃⵢⵓ… ⴰⵜⴳ. ⵜⵉⴳⴰⵡⵜ ⵏ ⵓⴳⵔⴰⵡ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ ⴳ ⵓⵢⵏⵏⴰ ⵢⴰⵖⵓⵍⵏ ⴰⵙⵡⵓⴷⴷⵓ ⵏ ⵓⵎⵢⴰⵏⴰⵡ ⵏ ⵓⵡⵏⵏⵉ ⴳ ⵓⵣⵎⵣ ⵏ ⵉⵙⵜⴰⵢⵏ ⴰⵎⵎ ⴳ ⵓⵣⵎⵣ ⴳ ⵓⵔ ⵍⵍⵉⵏ ⵉⵙⵜⴰⵢⵏ ⴳⴰⵏ ⵉⵙⴳⵓⵎⵏ ⵏⵏⴰ ⵅⴼ ⵙⴰⵡⵍⵏ ⴳ ⵓⵙⴳⵔⴰⵡ ⴰⴷ.

ⴳ ⵜⵙⴳⴰ ⵏⵏⵙ, ⵎⴰⵙⵙⴰ ⴽⴰⵕⵎⵉⵏ ⵎⵓⵕⵜ-ⴳⵓⵎⵉⵣ, ⵜⵙⵙⵎⵖⵓⵔ ⵜⴰⵡⵓⵔⵉ ⵏ ⵓⴳⵔⴰⵡ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ ⴳ ⵜⵉⴳⴰⵡⵜ ⵜⵉⵏⵎⵏⴰⴹⵉⵏ ⵏ ⵓⵙⵇⵇⵉⵎ ⵏ ⵓⵕⵓⴱⴱⴰ ⵉⵣⴷⵉⵏ ⴷ ⴽⵉⴳⴰⵏ ⵏ ⵉⵙⴳⵓⵎⵏ ⴳ ⵉⵍⵍⴰ ⵓⵙⵙⴳⵎ ⵏ ⵡⴰⵜⵉⴳⵏ ⵏ ⵓⵎⵢⴰⵏⴰⵡ ⴷ ⵜⵍⴻⵍⵍⵉ ⵏ ⵓⵡⵏⵏⵉ, ⵙ ⵜⵖⴰⵔⴰⵙⵜ ⵏ ⵜⵎⵙⵉⵔⵜ ⵏ ⴳ ⵓⴱⴰⵖⵓⵔ ⵏ ⵉⵣⵣⵓⵍⴰⵏⵏ ⵏ ⵓⵙⵏⵖⵎⵙ ⴷ ⵜⵖⴷⵎⵜ, ⵏⵏⴰ ⵉⵙⵙⵏⵜⵉ ⴳ ⵓⵙⴰⵜⵉ ⵏ ⵜⵔⵎⴷⵔⴰⵡⵜ ⵏ ⵓⵏⵎⴰⵍⴰ ⵏ ⵓⵙⵇⵇⵉⵎ ⵏ ⵓⵕⵓⴱⴱⴰ ⴰⴽⴷ ⵍⵎⵖⵔⵉⴱ.

ⵜⴰⵎⵇⵔⴰⵏⵜ ⵏ ⵓⵙⵉⵔⴰ ⵏ ⵓⵙⵇⵇⵉⵎ ⵏ ⵓⵕⵓⴱⴱⴰ ⴳ ⵍⵎⵖⵔⵉⴱ ⵜⵙⵙⵉⴽⵣ ⵜⴰⵢⵔⵉ ⵏⵏⵙ ⵏ ⵓⵙⵡⵓⵔⵉ ⵏ ⵓⴳⵔⴰⵡ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ, ⵙ ⵉⵎⵥⵍⵉ ⴰⵢⵏⵏⴰ ⵉⵣⴷⵉⵏ ⴷ ⵓⵙⵙⴳⵎ ⵏ ⵜⵎⴰⴳⵓⵜ ⴷ ⵓⵙⵙⵓⵎⵓ ⴷ ⵓⵙⵉⴽⵙⵍ ⴳⵔ ⵜⵎⵖⴰⵔⵜ ⴷ ⵓⵔⴳⴰⵣ. ⵜⵏⵏⴰ ⴰⵍⵜⵓ ⵉⵙ ⵜⵖⵉⵢ ⴰⴷ ⵜⵕⵥⵎ ⴰⴽⴷ ⵓⴳⵔⴰⵡ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ ⵉⵎⵏⵉⴷⵏ ⵏ ⵓⵙⵅⵉⵜⵔ ⵏ ⵓⵎⵢⴰⵡⴰⵙ ⴰⴽⴷ ⵜⴰⵎⵔⵙⵍⵜ ⵏ ⵓⵙⵏⴰⵎ ⵜⴰⵎⵖⵔⴰⴱⵉⵜ ⴳ ⵓⵎⵏⵉⴷ ⴰⵏⵎⵏⴰⴹ.

ⴷⴰ ⵉⵜⵜⴰⵎⵓ ⵓⴳⵔⴰⵡ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ ⴽⵓ ⵜⵉⴽⴽⵍⵜ ⴳ ⵜⵉⴳⴰⵡⵉⵏ ⴷ ⵉⵎⵙⴰⴳⴰⵔⵏ ⴷ ⵉⴳⵔⴰⵡⵏ ⵏⵏⴰ ⵉⵙⵙⴽⴰⵔ ⵓⵙⵇⵇⵉⵎ ⵓⵕⵓⴱⴱⵉ, ⴳ ⵓⵙⴰⵜⵉ ⵏ ⵓⵎⵢⴰⵡⴰⵙ ⵉⵥⵍⵉⵏ ⵏ ⵓⵎⴳⴳⴰⵔⵓ ⵢⴰⴷ ⴰⴽⴷ ⵜⴰⴳⵍⴷⵉⵜ ⵏ ⵍⵎⵖⵔⵉⴱ ⵍⵓⵎⴰⵕ ⴳ ⵓⵙⴰⵜⵉ ⵏ ⵓⵖⴰⵡⴰⵙ ⵏ ⵓⵢⴼⴼⵓⵙ.