ⵉⴹⴼⴰⵕ ⵓⴳⵔⴰⵡ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ ⵜⵉⴳⵎⵉⵡⵉⵏ ⵉⵣⴷⵉⵏ ⵙ ⵓⴹⴼⴼⵓⵕ ⴰⵏⵣⵔⴰⴼ ⴳ ⵜⵎⵙⴰⵔⵜ ⵏ “ⵓⵙⵍⵍⵡⵉ ⵏ ⵓⵣⵏⵏⵉⵔ ⴰⵎⴰⵔⵓⵔ, ⴰⵇⵥⵥⵕ ⵉ ⵜⴰⵣⵣⵉⵜ ⵉⵎⴷⴰⵏ ⴷ ⵓⵣⵓⵣⵣⵔ ⵏ ⵉⵏⵖⵎⵉⵙⵏ ⵏ ⵜⴽⵔⴽⴰⵙ ⵉⵡⵏⴰⵏ ⵏ ⵡⵓⵎⵓ ⴳ ⵢⴰⵏ ⵓⵙⴰⵢⵙ ⴰⵏⵣⵡⴰⵢ”.

ⵙ ⵜⵔⵓⵔⵉ ⵏ ⵜⵖⴹⴼⵜ ⵉ ⵓⵎⵏⵣⴰⵢ ⵏ ⵜⴰⵖⴰⵍⵜ ⵏ ⵜⵉⵣⵣⴷⴳⴰ ⵉⵜⵜⵉⵏⵉⵏ ⵉⵙ ⵉⴳⴰ ⵓⵎⵓⵔⴷⵓ ⵏⵖ ⵏ ⴽⵔⴰ ⵏ ⵓⵣⵏⵏⵉⵔ ⴰⵎⵣⴷⴰⴳ ⴰⵔ ⴰⴷⴷⴰⵢ ⵜⵙⵙⵖⵥⵏ ⵜⵖⵜⴰⵙⵜ ⵜⵓⵣⵔⵉⴼⵜ ⴰⵏⴽⴰⴹ ⵏⵏⵙ, ⴷⴰ ⵉⵙⵙⴽⵜⴰⵢ ⵓⴳⵔⴰⵡ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ ⴽⵔⴰ ⵏ ⵉⵎⵏⵣⴰⵢ ⵉⵙⵙⴰⵜⵉⵏ ⵜⵉⵏⴰⴼⵓⵜⵉⵏ ⵏ ⵜⵏⵣⵡⴰⵢⵜ ⴷ ⵓⵜⵉⵍⵉⴼⵉⵣⵢⵓⵏ ⵙ ⵉⵎⵥⵍⵉ ⴳ ⵓⵙⴰⵜⵉ ⵏ ⵜⵎⵙⵜⴳⴳⴰⵔⵜ ⵅⵉⴼⵙ ⵉⵍⵍⴰⵏ ⴳ ⵢⵉⴳⵔ ⵏ ⵓⴼⵔⴰⴳ ⵅⴼ ⵜⵏⴼⵔⵓⵜ ⵏ ⵉⵏⵎⵓⵔⵉⵏ. ⵉⵎⵏⵣⴰⵢ ⴰⴷ ⵉⵚⴽⴰⵏ ⵅⴼ ⵜⴼⵍⵙⴰⴼⵜ ⵏ ⵜⵡⵏⴳⵉⵎⵜ ⵏ ⵜⵎⵏⴹⴰⵡⵜ, ⵅⴼ ⵉⵍⵓⴳⵏⵏ ⵓⵣⵔⵉⴼⵏ ⴷ ⵉⵎⵙⵏⴰⵎⵏ ⵉⵣⵣⵉⴳⵉⵣⵏ ⴷ ⵓⵙⵎⵓⵜⵜⵔ ⴰⵙⵍⵓⴳⵏ ⵉⵜⵜⵓⵙⴽⵔⵏ ⵙ ⵜⵉⴳⴰⵡⵜ ⵏ ⵜⵏⴱⴰⴹⵜ ⵜⴰⵎⴰⵜⵜⴰⵢⵜ ⴳ ⵢⵉⴳⵔ ⴰⴷ, ⵓⵔ ⴷⴰ ⵜⵜⴹⴰⵙⵏ ⵉ ⵜⵍⴻⵍⵍⵉ ⵏ ⵜⵖⴰⵔⴰⵙⵜ ⵏ ⵜⵉⵔⵔⴰ ⵏ ⵉⵎⵡⵓⵔⴰ ⵉⵙⵍⵉⵥⵕⵏ. ⵙ ⵜⵏⵎⴳⵍⴰ, ⴰⵣⵔⴰⴽ ⵏ ⵉⵎⵏⵣⴰⵢ ⴰⴷ ⴷⴰ ⵉⵜⵜⴰⵡⵙ ⴳ ⵓⴼⵔⴰⴳ ⵏ ⵜⵍⴻⵍⵍⵉ ⵢⴰⴷ ⵉⴳⴰⵏ ⵜⴰⵔⵙⵍⵜ ⵏ ⵜⵡⵓⵔⵉ ⵜⴰⵙⵏⵖⵎⴰⵙⵜ ⴷ ⵓⵣⵔⴼ ⴳ ⵓⵏⵖⵎⵉⵙ.

ⵅⴼ ⵓⵢⴰⴷ, ⴷⴰ ⵉⵜⵜⵉⵥⵉⵕ ⵓⴳⵔⴰⵡ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ ⵉⵙ “ⵜⵓⵚⴽⴰ ⵙ ⵓⴱⵔⵉⴷ ⵏ ⵓⵏⵣⵔⴰⴼ ⵉ ⵓⵎⵏⵣⴰⵢ ⵏ ⵜⵎⵙⵜⴳⴳⴰⵔⵜ ⵏ ⵜⵉⵔⵔⴰ ⵉ ⵜⵏⴰⴼⵓⵜⵉⵏ ⵜⵉⵏⵣⵡⴰⵢⵉⵏ ⴷ ⵜⵍⴼⴰⵣⵉⵏ ⴷ ⵓⵣⵓⵛⵛⵍ ⵏ ⵡⵓⴹⵓⴼ ⵏ ⵉⵎⵣⴳⵉ, ⵓⵔ ⵉⴳⵉ ⵢⴰⵏ ⵓⵡⵜⵜⴰⵙ ⵙ ⵢⵉⵎⴰⵏ ⵏⵏⵙ. ⵎⴰⵛⴰ ⵉⴳⴰ ⵢⴰⵏ ⵡⴰⵍⵍⴰⵍ ⵏ ⵓⴼⵔⴰⴳ ⵏ ⵓⵣⵔⴼ ⵏ ⵓⵏⵎⵓⵔⵉ, ⴰⵎⵙⵙⴼⵍⴷ ⴷ ⵓⵎⴰⵏⵏⴰⵢ, ⴳ ⵡⴰⴷⴰⴼ ⵖⵔ ⵜⵓⵎⴰⵢⵉⵏ ⵉⵙⵏⵖⵎⴰⵙⵉⵏ ⵉⵡⴳⴳⴹⵏ, ⵉⵍⴰⵏ ⵜⴰⵏⴼⵔⵓⵜ ⴷ ⵍⴰⵎⴰⵏ; ⴰⵢⴰ ⵓⵔ ⵉⵎⴳⴰⵍ ⴷ ⵓⵎⵏⵣⴰⵢ ⵏ ⵜⵍⴻⵍⵍⵉ ⵏ ⵓⵎⵢⴰⵡⴰⴹ ⴰⵙⵍⵉⵥⵕ ⴷ ⵜⵍⴻⵍⵍⵉ ⵏ ⵓⵙⵜⴰⵢ ⵏ ⵉⵎⵡⵓⵔⴰ ⴳ ⵢⵉⴳⵔ ⵏ ⵜⵎⴰⵎⴽⵜ ⵏ ⵓⵙⵎⵓⵙⵙⵓ ⴷ ⵡⵉⵏ ⵜⵙⵢⴰⴼⵓⵜ ⵏ ⵉⵖⴰⵡⴰⵙⵏ”.

ⵢⵓⴳⴳⴰ ⵓⴳⵔⴰⵡ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ ⴽⵓ ⵢⴰⵙⵙ ⵅⴼ ⵓⴹⵎⴰⵏ ⵏ ⵓⵣⵔⴰⴽ ⵏ ⵜⵓⵍⵍⵓⵖⵜ ⴷ ⵜⵣⴷⴳⵉ ⵏ ⵓⵏⵖⵎⵉⵙ ⴷ ⵡⵉⵏ ⵉⵖⴰⵡⴰⵙⵏ, ⴳ ⵓⵙⵡⵉⵔ ⵏ ⵜⵓⵎⴰⵢⵜ ⵏ ⵜⵉⵔⵔⴰ ⵉⵜⵜⵓⵙⵢⴰⴼⵓⵏ ⴷ ⵉⵜⵜⵓⵙⵎⵏⵉⴷ ⵖⵓⵔ ⵉⵣⵣⵓⵍⴰⵏⵏ ⵏ ⵓⵕⴰⴷⵢⵓ ⴷ ⵓⵜⵉⵍⵉⴼⵉⵣⵢⵓⵏ, ⴷ ⴳ ⵓⵙⵡⵉⵔ ⵏ ⵓⵙⵎⵓⵜⵜⵔ ⴷ ⵓⵣⵓⵣⵣⵔ ⵏ ⵜⵓⴳⴳⵉⵡⵉⵏ ⵏ ⵉⵏⵎⵓⵔⵉⵏ. ⴰⵡⵜⵜⴰⵙ ⴰⵎⴳⴳⴰⵔⵓ ⵏ ⵜⵉⴳⴰⵡⵜ ⵏ ⵓⵎⵙⵏⴰⵎ ⴰⴷⴷⴰⵢ ⵢⵓⴷⴼ ⴰⴼⴰⴷ ⴰⴷ ⵉⵔⴰⵔ ⵜⴰⵖⴹⴼⵜ ⵉ ⵢⵉⵡⵉ ⵖⵔ ⴰⵣⴳⴰⵍ ⵏ ⵓⵎⵙⵙⴼⵍⴷ ⵏⵖ ⴰⵎⴰⵏⵏⴰⵢ ⴳ ⵓⵢⵏⵏⴰ ⵉⵣⴷⵉⵏ ⵙ ⵜⵉⴷⵜ ⵏ ⵓⵏⵖⵎⵉⵙ ⵉⵜⵜⵓⵣⵓⵣⵣⵔⵏ, ⴷ ⵜⵎⴰⴳⵉⵜ ⴷ ⵜⵖⴰⵔⴰ ⵏ ⵎⴷⴷⵏ ⵏⵏⴰ ⵙ ⵉⵜⵜⵓⵙⴽⵔ ⵓⵎⵙⴰⵡⴰⵍ ⵉⴳⴰ ⴰⵙⵅⵉⵜⵔ ⵏ ⵓⴱⵖⵓⵔ ⵏ ⵢⴰⵏ ⵓⵏⵖⵎⵉⵙ ⵉⵍⴰⵏ ⴰⵜⵉⴳ ⴷ ⵉⵎⵙⴰⵙⴰⵏ ⴷ ⵜⵖⴰⵔⴰ ⵜⴰⵣⵣⵓⵍⴰⵏⵜ.

ⴷⴰ ⵉⵙⵙⴽⵜⴰⵢ ⵓⴳⵔⴰⵡ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ ⵉⵙ ⵉⵎⵏⵣⴰⵢ ⴷ ⵓⵙⵡⵓⴷⴷⵓ ⵏ ⵓⵙⵏⴰⵎ ⴰⵏⵉⵎⴰⵏ ⵙ ⵓⵢⵏⵏⴰ ⵉⵜⵜⵓⴰⵔⴰⵏ ⴳ ⵉⵍⵓⴳⵏ ⵏ ⵡⴰⴳⴳⵯⴰⵜⵏ ⵏ ⵉⵎⵡⵓⵔⴰ ⵉⵙⵍⵉⵥⵕⵏ ⵓⵔ ⴳⵉⵏ “ⴰⵟⵕⵕⵃ ⵏ ⵓⵙⵍⴳⵏ”. ⵉⵎⵏⵣⴰⵢ ⴰⴷ ⴳⴰⵏ ⵉⵎⴰⵙⵙⵏ ⵉⵎⵇⵔⴰⵏⵏ ⴳⵔ ⵡⵉⵢⴰⴹ ⴳ ⵓⵙⴷⵓⵙ ⵏ ⵜⴷⵍⵙⴰ ⵏ ⵓⵙⵍⴳⵏ.

ⵅⴼ ⵓⵢⴰⴷ, ⴷⴰ ⵉⵙⵙⴱⵖⴰⵙ ⵓⴳⵔⴰⵡ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ ⵉⵎⵡⵓⵔⴰ ⵉⵙⵍⵉⵥⵕⵏ ⴰⴷ ⵙⵅⵉⵜⵔⵏ ⵜⵉⵣⵎⵎⴰⵔ ⵏⵏⵙⵏ ⴳ ⵢⵉⴳⵔ ⴰⴷ, ⴰⴼⴰⴷ ⴰⴷ ⵏⵙⵙⴳⵎ ⵢⴰⵏ ⵓⵙⵡⵓⵔⵉ ⴰⵙⵏⵖⵎⴰⵙ ⴰⵎⵙⵜⴳⴳⴰⵔ ⵏⴰⵡⵙ ⴳ ⵓⵙⵡⵓⵜⵜⵓ ⵏ ⵜⵓⵙⵓⵔⵜ ⵏ ⴽⵔⴰ ⵏ ⵜⵉⴳⵉⵡⵉⵏ ⵓⵔ ⵉⵖⵓⴷⴰⵏ ⴳ ⵓⵙⴰⵢⵔⴰⵔ ⴰⵎⵓⵟⵟⵓⵏ ⵏⵏⴰ ⵙⵓⵍ ⵓⵔ ⵉⵜⵜⵓⵙⵍⴳⵉⵏ ⴰⵔ ⴷ ⵜⵜⴰⵡⵉⵏ ⴽⵔⴰ ⵏ ⵜⵉⴽⴽⴰⵍ ⵜⵉⵏⵍⴽⴰⵎⵉⵏ ⵜⵉⵏⵎⵉⵣⵉⵜⵉⵏ ⴰⴳⵓⵏⵙ ⵏ ⵓⵙⴰⵢⵔⴰⵔ ⵏ ⵜⵉⵍⴰⵡⵜ.

ⴷⴰ ⵉⵜⵜⴰⵏⵏⴰⵢ ⵓⴳⵔⴰⵡ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ ⵉⵙⴷ ⴰⵙⵎⴽⵜⵉ ⵏ ⵉⵎⵏⵣⴰⵢ ⴷ ⵜⵓⵖⵓⵍⵉⵏ ⵏ ⵓⵙⵡⵓⵔⵉ ⴰⵏⵣⵡⴰⵢ ⴷ ⵓⵜⵍⴼⴰⵣ ⴰⵎⵙⵜⴳⴳⴰⵔ ⵉⵍⵍⴰ ⴳ ⵜⵎⵉⴳⵍⵉⵏ ⵜⵉⴱⵉⴷⴰⵖⵓⵊⵉⵏ ⵏⵏⵙ ⴰⵔ ⵜⵏ ⵉⵙⵙⵡⵓⵔⵉ ⵙ ⵓⵙⵎⵎⵓⴷ ⵏⵉⵜⵏⵉ ⴷ ⵜⵙⵓⴳⴰⵔ ⵏⵏⵙ ⵜⵉⵙⵍⵓⴳⴰⵏⵉⵏ. ⵜⴰⵙⵎⵉⴳⵍⵜ ⵓⵔ ⵉⵔⵡⴰⵙⵏ ⵜⵉⴱⵖⵓⵔⵉⵏ ⵏ ⵜⵎⵔⵙⴰⵍ ⵢⴰⴹⵏ, ⵎⵉ ⵉⴳⴰ ⵓⵡⵜⵜⴰⵙ ⴰⴷ ⵜⵙⴷⵓⵙ ⵜⴰⴼⵍⵙⵜ ⵏ ⵉⵏⵎⵓⵔⵉⵏ ⴳⵔⴰⵙⵏ ⴷ ⵓⵙⵏⵖⵎⵙ.