ⵣⵓⵏⴷ ⵉⵙⴳⴳⵯⴰⵙⵏ ⵉⵣⵔⵉⵏ, ⵢⴰⵎⵓ ⵓⴳⵔⴰⵡ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ ⴳ ⵓⵎⵣⵉⵣⵣⵍ  ⴰⵎⴰⴹⵍⴰⵏ ⵏ 16 ⵏ ⵡⵓⵙⵙⴰⵏ ⵏ ⵜⵡⵓⵔⵉⵡⵉⵏ ⵎⴳⴰⵍ ⵜⵉⴽⵕⴹⵉⵡⵉⵏ ⵉⵜⵜⵓⴳⴰⵏ ⵉ ⵜⵎⵖⴰⵔⵉⵏ ⴷ ⵜⵛⵉⵔⵔⴰⵜⵉⵏ, ⵏⵏⴰ ⵜⵙⵙⵏⵜⵉ ⵜⵙⵏⵎⴰⵍⴰⵢⵜ ⵏ ⵜⵎⵓⵔⴰ ⵉⵎⵓⵏⵏ ⵉⵥⵍⵉⵏ ⵙ ⵜⵎⵖⴰⵔⵉⵏ.
ⵜⴰⵙⵓⵜⵍⵜ ⵏ ⵓⵙⴳⴳⵯⴰⵙ  2025 ⵜⴻⵜⵜⵓⵙⴽⵔ ⴷⴷⴰⵡ ⵓⵙⴳⵓⵎ ⵏ “ⴰⴷ ⵏⵎⵓⵏ ⴰⴽⴽⵯ ⴰⴼⴰⴷ ⵏⵙⴱⴷⴷ ⵜⵉⴽⵕⴹⵉⵡⵉⵏ ⵜⵉⵎⵓⵟⵟⵓⵏⵉⵏ ⵉⵜⵜⵓⵙⴽⴰⵔⵏ ⵉ  ⵜⵎⵖⴰⵔⵉⵏ ⴷ ⵜⵛⵉⵔⵔⴰⵜⵉⵏ”, ⵜⴰⵙⵓⵜⵍⵜ ⴰⴷ, ⵜⵓⵙⴰ ⴷ ⴰⴷ ⵜⵙⴼⴰⵡ ⵅⴼ ⵜⵅⵉⵜⵔⵜ ⵏ ⵜⴽⵕⴹⵉⵡⵉⵏ ⵉⵜⵜⵓⴳⴰⵏ ⴳ ⵜⵡⵏⵏⴰⴹⵉⵏ ⵜⵉⵎⵓⵟⵟⵓⵏⵉⵏ ⴰⵔ  ⵜⵔⵣⵣⵓ ⴰⴷ ⵜⵙⵉⴷⵎⵔ ⵉ ⵜⵎⵓⴽⵔⵉⵙⵉⵏ ⴰⴷ ⵙ ⵡⵓⴷⵎ ⴰⵎⴳⵔⴰⵡ ⴰⵏⴰⴳⵔⴰⵡ.
ⵜⴰⵎⵣⵉⵣⵣⵍⵜ ⴰⴷ ⵜⴰⴳⵔⴰⵖⵍⴰⵏⵜ, ⵉⵜⵜⵓⴳⴰⵏ ⴽⵓ ⴰⵙⴳⴳⵯⴰⵙ ⴳⵔ 25 ⵏⵓⵡⴰⵏⴱⵉⵔ , ⴰⵙⵙ ⴰⴳⵔⴰⵖⵍⴰⵏ ⵉ ⵡⵓⴽⵓⵙ ⵏ ⵜⴽⵕⴹⵉ ⵉⵜⵜⵓⴳⴰⵏ ⵉ ⵜⵎⵖⴰⵔⵉⵏ, ⴷ ⵡⴰⵙⵙ ⵏ 10 ⴷⵓⵊⴰⵏⴱⵉⵔ, ⴰⵙⵙ ⴰⴳⵔⴰⵖⵍⴰⵏ ⵏ ⵉⵣⵔⴼⴰⵏ ⵉⵏⴼⴳⴰⵏⵏ, ⴷⴰ ⵉⵙⵎⵓⵙⵙⵓ ⵜⵉⵎⵔⵙⴰⵍ ⵜⵉⴳⴷⵓⴷⴰⵏⵉⵏ, ⴰⵙⵏⵖⵎⵙ, ⴰⵎⵓⵏ ⵓⵖⵔⵉⵎ ⴷ ⵉⵎⴷⵔⴰⵡⵏ ⵉⴳⵔⴰⵖⵍⴰⵏⵏ.
ⵓⵎⵓ ⵏ ⵓⴳⵔⴰⵡ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ ⴳ ⵜⵙⵏⵜⴰⵢⵜ ⴰⴷ ⵜⴰⵎⴰⴹⵍⴰⵏⵜ ⵉⵜⵜⵓⵣⵎⵎⴻⵎ ⴳ ⵜⵎⵔⵉⵙⵜ ⵏⵏⵙ ⵜⴰⵙⵓⵍⴰⵏⵜ ⵜⴰⵙⴳⴰ ⵏ ⵓⵙⴽⵉⵍ ⴰⵏⵎⵓⵔⵉ ⴷ ⵓⵎⵏⵏⵓⵖ ⵎⴳⴰⵍ ⵜⴰⵍⵖⵉⵡⵉⵏ ⴰⴽⴽⵯ ⵏ ⵓⵙⵏⵓⵃⵢⵓ, ⵙ ⵓⵎⵙⴰⵙⴰ ⴷ ⵓⵢⵏⵏⴰ ⵉⵍⵍⴰⵏ ⴳ ⵜⵙⵎⵉⴳⵍⵜ ⵏⵏⵙ ⵜⴰⴷⵓⵙⵜⵓⵔⵉⵜ ⴷ ⴳ ⵓⵙⴰⵜⵉ ⵓⵣⵔⵉⴼ ⵉⵙⵡⵓⴷⴷⵓⵏ ⴰⵎⵢⴰⵡⴰⴹ ⴰⵙⵍⵉⵥⵕ ⴳ ⵍⵎⵖⵔⵉⴱ.
ⴳ ⵓⵙⴰⵜⵉ ⵢⴰⴷ, ⵢⴰⵎⵓ ⵓⴳⵔⴰⵡ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ ⴳ ⵜⵡⵓⵔⵉ ⵢⴰⴷ ⵜⴰⴳⵔⴰⵖⵍⴰⵏⵜ “ⵖⵎⴰⵜ ⴰⵎⴰⴹⴰⵍ ⵙ ⵓⵍⵜⵛⵉⵏⵉ” ⵙ ⵓⵙⴽⴰⵏ ⵏ ⵉⴽⵍⴰⵏ ⵏ ⵜⵎⵣⵉⵣⵣⵍⵜ ⴳⵔ ⵜⵎⵔⵙⴰⵍ ⵏⵏⵙ ⵏ ⵉⵙⴼⴽⴰ ⴷ ⵜⴱⵔⴰⵜⵉⵏ ⵏ ⵓⵙⵎⵓⵙⵙⵓ ⵅⴼ ⵜⴰⵍⵖⵉⵡⵉⵏ, ⵜⵉⵎⵏⵜⴰⵍ ⴷ ⵜⵓⵙⵓⵔⵉⵏ ⵏ ⵜⴽⵕⴹⵉⵡⵉⵏ ⵉⵜⵜⵓⴳⴰⵏ ⵉ ⵜⵎⵖⴰⵔⵉⵏ, ⵙ ⵓⵎⴰⵜⴰ ⴰⵡⴷ ⵜⵉⴽⵔⴹⵉⵡⵉⵏ ⵉⵜⵜⵓⴳⴰⵏ ⵙ ⵓⴱⵔⵉⴷ ⵏ ⵓⵙⴰⵢⵔⴰⵔ ⴰⵎⵓⵟⵟⵓⵏ.
ⴰⴳⵔⴰⵡ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ, ⴰⵎⵣⵔⴰⴽ ⵏ ⵜⵙⵎⵉⴳⵍⵜ ⵏⵏⵙ ⵏ ⵓⵙⵏⴰⵎ ⴰⵙⵉⵎⴰⵏ, ⴷⴰ ⵉⵙⵙⴽⴰⵔ ⴽⵓ ⵜⵉⴽⴽⵍⵜ ⴽⵉⴳⴰⵏ ⵏ ⵜⵡⵓⵔⵉⵡⵉⵏ ⵉⵡⴰⵜⵙⵏ ⴰⵙⵎⵖⵔ ⵙ ⵓⵙⵎⴽⵍ ⴰⵖⵎⵙⴰⵏ ⴰⵎⵣⵔⴰⴽ ⵏ ⵉⵣⵔⴼⴰⵏ ⵉⴷⵙⵍⴰⵏⵏ ⵏ ⵜⵎⵖⴰⵔⵉⵏ ⵙ ⵓⴱⵔⵉⴷ ⵏ :
-    ⴰⵙⴽⴰⵔ ⵏ ⵓⵙⵇⵇⵉⵎ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ ⵉ ⵢⴰⵏ ⵓⵙⴰⵜⵉ ⴰⵍⵓⴳⴰⵏ ⵉⵣⴷⵉⵏ ⵙ ⵓⵙⴽⵉⵍ ⴷ ⵓⵎⵏⵏⵓⵖ ⵎⴳⴰⵍ ⵜⵉⵡⵍⴰⴼⵉⵏ ⵜⵉⵙⵏⴰⵡⴰⵢⵉⵏ ⵏ ⵡⴰⵏⴰⵡⵏ ⴰⴳⵓⵏⵙ ⵏ ⵓⵙⵏⵖⵎⵙ ;
-    ⴰⵙⵎⴽⵍ ⵏ ⵜⵙⵏⵏⵉⵔⴰⵣ ⴷ ⵓⵙⵕⴰⴹ ⴰⵏⵉⵎⴰⵏ ⵉⵣⴷⵉⵏ ⵙ ⵜⵓⵎⴰⵢⵉⵏ ⵜⵉⵙⵏⵖⵎⴰⵙⵉⵏ ⴳ ⵜⵍⵍⴰ ⵜⵕⵓⵥⵉ ⵏ ⵓⵙⴽⵉⵍ ⵏ ⵡⴰⵏⴰⵡⵏ ⵏⵖ ⴷⴰ ⵙⵏⵢⵓⴷⴷⵓⵏ ⵜⵉⵡⵍⴰⴼⵉⵏ ⵜⵉⵎⵙⵙⵉⵣⴷⵉⵔ ;
-    ⵜⴰⵏⴽⵔⴰ ⵙ ⵉⵎⴰⵙⵙⵏ ⵏ ⵓⴹⴼⴼⵓⵕ ⵏ ⵓⵙⵓⵎⵓ ⵏ ⵡⴰⵏⴰⵡ ⴰⴳⵓⵏⵙ ⵏ ⵓⵙⵏⵖⵎⵙ ⴰⵙⵍⵉⵥⵕ ;
-    ⴰⵙⴽⴰⵔ ⵏ ⵜⵖⵓⵔⵉⵡⵉⵏ ⵜⵉⵙⴳⵓⵎⴰⵏⵉⵏ, ⵙ ⵉⵎⵥⵍⵉ ⵜⵉⵏⵏⴰ ⵉⵣⴷⵉⵏ ⵙ ⵓⵙⵎⴽⵍ ⴰⵙⵖⵎⵙⴰⵏ ⵏ ⵜⴽⵕⴹⵉⵡⵉⵏ ⵉⵜⵜⵓⴳⴰⵏ ⵉ ⵜⵎⵖⴰⵔⵉⵏ ⴷ ⵓⵙⵎⴷⵢⴰ ⵏ ⵜⵎⵖⴰⵔⵉⵏ ⴳ ⵓⵙⵓⵙⵙⵏ ⴰⵙⵍⵉⵥⵕ ;
-    ⴰⵙⵢⴰⴼⵓ ⵏ ⵜⵔⵙⴰⵍ ⵏ ⵜⵓⵎⴰⵢⵉⵏ ⵏ ⵓⵙⵎⵓⵙⵙⵓ, ⵣⵓⵏⴷ ⵉⴼⵉⴷⵢⵓⵜⵏ “ⴰⵙⵎⴷⵢⴰ ⵏ ⵜⵎⵖⴰⵔⵉⵏ ⴰⴳⵓⵏⵙ ⵏ ⵉⵏⵖⵎⵉⵙⵏ ⴳ ⵍⵎⵖⵔⵉⴱ: ⵉⵎⵙⴰⵔⴰⵙⵏ ⵏ ⵓⵙⴽⵉⵍ ⴰⵏⵎⵓⵔⵉ ⴷ ⵡⴰⴷⴰⴼ ⴰⴷⵉⵎⵓⵇⵕⴰⵟⵉ” ;
-    ⴰⵙⵏⵎⴰⵍⴰ ⵏ ⵜⵙⴰⵡⵔⵉⵏ ⵏ ⵉⵔⵉⵔⵉ ⴷ ⵓⵙⵡⵉⵏⴳⵎ ⵉⵙⵎⵓⵏⵏ ⵉⴳⵏⵙⴰⵙ ⵏ ⵜⵎⵔⵙⴰⵍ ⵜⵉⵏⴰⵎⵓⵔⵉⵏ, ⵜⵉⵣⵓⵏⵉⵏ ⵜⵉⵎⴰⵡⵙⴰⵙⵉⵏ, ⵉⵏⵖⵎⴰⵙⵏ, ⵉⵎⴰⵙⴰⵢⵏ ⵏ ⵜⵉⵔⵔⴰ ⴷ ⵜⵏⵣⵡⴰⵢⵉⵏ ⴷ ⵉⵜⵉⵍⵉⴼⵉⵣⵢⵓⵏⵏ ⵉⴳⴷⵓⴷⴰⵏⵏ ⴷ ⵡⵓⵙⵍⵉⴳⵏ, ⵉⵡⵔⵉⴽⵏ ⵏ ⵡⴰⵎⵓⵏ ⵓⵖⵔⵉⵎ ⴷ ⵉⵎⵓⵣⴰⵢ ⴳ ⵢⵉⴳⵔ ⵏ ⵓⵎⵓⵟⵟⵓⵏ.

ⵙ ⵜⵎⴷⵔⴰⵡⵜ ⵏⵏⵙ ⴳ ⵜⵎⵣⵉⵣⵣⵍⵜ ⴰⴷ ⵜⴰⵎⴰⴹⵍⴰⵏⵜ ⴷ ⵜⵡⵓⵔⵉⵡⵉⵏ ⵏⵏⵙ ⵜⵉⵙⴳⵯⵙⴰⵏⵉⵏ, ⵢⴰⴷⴷ ⵓⴳⵔⴰⵡ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ ⵅⴼ ⵜⵎⵔⵉⵙⵜ ⵏⵏⵙ ⴳ ⵜⵏⴽⵔⴰ ⵙ ⵢⴰⵏ ⵓⵙⴰⵢⵔⴰⵔ ⴰⵙⵖⵎⵙⴰⵏ ⴳ ⵉⵍⵍⴰ ⵍⴰⵎⴰⵏ, ⵉⵜⵜⵣⵔⴰⴽⵏ ⴰⵙⴽⵉⵍ ⴰⵏⵎⵓⵔⴰⵏ, ⴰⵔ ⵉⵙⵙⴽⴰⵔ ⴳ ⵓⴼⵔⴰⴳ ⵏ ⵓⵣⵔⴼ ⴳ ⵓⵏⵖⵎⵉⵙ ⴰⵎⴰⵖⵓⴷ ⴰⵙⴽⴽⵉⵏ ⴰⴷⵙⵍⴰⵏ ⵏ ⵓⵙⵏⴰⵎ ⴷ ⵓⵙⵍⴳⵏ ⴰⵙⵖⵎⵙⴰⵏ ⴳ ⵍⵎⵖⵔⵉⴱ.