ⴳ ⵓⵙⴰⵜⵉ ⵏ ⵜⵙⵔⵜⵉⵜ ⵏⵏⵙ ⵏ ⵓⵏⵏⵓⵕⵥⵎ ⵅⴼ ⵓⵎⴰⴹⴰⵍ ⴰⴽⴰⴷⵉⵎⵉ, ⵉⵙⵏⵓⴱⴳ ⵓⴳⵔⴰⵡ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ ⴰⵙⵙ ⵏ 10 ⴼⴱⵕⴰⵢⵕ 2026, ⵢⴰⵏ ⵓⴳⵔⴰⵡ ⵏ ⵉⵙⵍⵎⴰⴷⵏ ⴷ ⵉⵏⵍⵎⴰⴷⵏ ⵏ ⵎⴰⵚⵟⵉⵔ “ⴰⵙⵏⵖⵎⵙ ⴷ ⵜⵎⵓⵙⵏⵉⵡⵉⵏ ⵜⵉⵏⴼⴳⴰⵏⵉⵏ” ⵏ ⵜⵙⴷⴰⵡⵉⵜ ⵃⴰⵙⵙⴰⵏ ⵡⵉⵙⵙ ⵙⵉⵏ ⵏ ⴹⴰⵔⵍⴱⵉⴹⴰ.
ⵓⴳⴰⵔ ⵏ ⵢⴰⵏ ⵓⵔⵣⴰⴼ ⴰⴷⵓⵙⵜⵓⵔⵉ, ⴰⵎⵙⴳⵔⴰⵡ ⴰⴷ ⵉⴼⴽⴰ ⴰⵣⵎⵣ ⵉ ⵓⵙⵏⵉⴼⵍ ⴰⵎⴰⴱⵖⵓⵔ ⴳⵔ ⵉⵣⵣⵓⵍⴰⵏⵏ ⵉⵙⵏⵖⵎⴰⵙⵏ  ⵏ ⵓⵙⴽⴽⴰ ⴷ ⵉⵎⵔⵣⴰ ⴷ ⵉⵎⵙⵜⴳⴳⴰⵔⵏ ⵏ ⵓⵙⵍⴳⵏ ⴰⵙⵍⵉⵥⵕ. ⴰⵎⵓⵏ ⵉⵎⵃⴹⴰⵕⵏ ⴳ ⵉⵙⵎⵏⵉⴷⵏ ⵅⴼ ⵜⵙⵎⵉⴳⵍⵉⵏ ⴷ ⵉⵎⵉⴽⴰⵏⵉⵣⵎⵏ ⵏ ⵜⵡⵓⵔⵉ ⵏ ⵓⴳⵔⴰⵡ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ ⵙ ⵉⵎⵥⵍⵉ ⴳ ⵓⵢⵏⵏⴰ ⵉⵣⴷⵉⵏ ⵙ ⵓⵙⵡⵓⴷⴷⵓ ⵏ ⵉⵖⴰⵡⴰⵙⵏ, ⵙ ⵓⵙⴼⵙⵢ ⴰⵣⵔⴼⴰⵏ, ⵙ ⵡⴰⴳⴳⴰ ⴰⵜⵉⴽⵏⵓⵍⵓⵊⵉ, ⵙ ⵓⵙⵍⴳⵏ ⵏ ⵜⵓⵎⴰⵢⵉⵏ ⴷ ⵓⵙⵏⵓⵍⴼⵓ ⴰⵎⵙⵍⴳⴰⵏ.
ⵜⵉⵏⵥⴰⵕ ⵜⵉⵎⵉⵔⴰⵏⵉⵏ ⵏ ⵓⵙⵍⴳⵏ ⴳ ⵓⵣⵎⵣ ⴰⵎⵓⵟⵟⵓⵏ, ⴰⴼⵔⴰⴳ ⵏ ⵜⵎⴰⴳⵓⵜ, ⴰⵎⵏⵏⵓⵖ ⵎⴳⴰⵍ ⵜⴰⵏⵏⴰⵢⵉⵏ ⵜⵓⵔⵙⵉⵍⵉⵏ ⵜⵜⵓⵎⵙⴳⴰⴷⴰⵍⵏⵜ ⴳ ⵓⴱⵔⵉⴷ ⵏ ⵓⵎⵢⴰⵖ ⴳⵔ ⵉⵎⵃⴹⴰⵕⵏ ⴰⴽⴷ ⵉⵙⴰⵜⵉⵢⵏ ⵏ ⵓⴳⵔⴰⵡ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ.
ⵉⵙⵏⵉⴼⵉⵍⵏ ⴰⴷ ⵙⵙⵉⵡⴹⵏ ⵖⵔ ⵓⵙⴽⴰⵏ ⵏ ⵜⵉⵍⴰⵍⵜ ⵏ ⵓⵙⵍⴳⵏ ⴳ ⵓⵙⴷⵓⵙ ⵏ ⵓⵙⴰⵢⵔⴰⵔ ⴰⵖⵎⵙⴰⵏ ⴰⵎⵣⵔⴰⴽ ⵏ ⵉⵣⵔⴼⴰⵏ ⵉⵏⴼⴳⴰⵏⵏ ⴷ ⵡⴰⵜⵉⴳⵏ ⵉⴷⵉⵎⵓⵇⵕⴰⵟⵉⵢⵏ.
ⵉⵜⵜⵓⵙⵏⵓⴱⴳ ⵓⴳⵔⴰⵡ ⵏ ⵜⵙⴷⴰⵡⵉⵜ ⵏ ⴹⴰⵔⵍⴱⵉⴹⴰ, ⵖⵓⵔ ⵎⴰⵙⵙⴰ ⵍⴰⵟⵉⴼⴰ ⴰⵅⴰⵔⴱⴰⵛ, ⵜⴰⵏⵙⵙⵉⵅⴼⵜ ⵏ ⵓⴳⵔⴰⵡ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ ⴷ ⵎⴰⵙⵙ ⴱⵏⵄⵉⵙⵙⴰ ⵄⴰⵙⵍⵓⵏ, ⴰⵏⵎⵀⴰⵍ ⴰⵎⴰⵜⴰⵢ. ⵉⵜⵜⵓⵙⵏⵖⵎⵙ ⵓⴳⵔⴰⵡ ⵏ ⵜⵙⴷⴰⵡⵉⵜ ⵅⴼ ⴽⵉⴳⴰⵏ ⵏ ⵉⴷⵔⵉⵣⵏ ⵏ ⵜⵉⵍⴰⵍⵜ ⵏ ⵓⵎⵙⵍⴳⴰⵏ ⴳ ⵢⵉⴳⵔ ⵏ ⵓⵙⴷⵓⵙ ⵏ ⵢⴰⵏ ⵓⵙⴰⵢⵔⴰⵔ ⴰⵖⵎⵙⴰⵏ ⴰⵎⵣⵔⴰⴽ ⵏ ⵉⵣⴻⵔⴼⴰⵏ ⵉⵏⴼⴳⴰⵏⵏ ⴷ ⵡⴰⵜⵉⴳⵏ ⵉⴷⵉⵎⵓⵇⵕⴰⵉⵢⵏ.
ⴰⵔⵣⴰⴼ ⴰⴷ ⴷ ⵉⵙⵏⵉⴼⵉⵍⵏ ⴰⴷ ⵜⵜⵓⵣⵎⵎⴻⵎⵏ ⴷⵉⵖ ⴳ ⵜⵣⵎⵎⴰⵔ ⵏ ⵓⴳⵔⴰⵡ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ ⴳ ⵢⵉⴳⵔ ⵏ ⵜⵏⴽⵔⴰ ⵙ ⵓⵙⴳⵎⵉ ⵅⴼ ⵓⵙⵏⵖⵎⵙ ⴷ ⵉⵏⵖⵎⵉⵙⵏ ⴷ ⵓⵙⵎⵓⵙⵙⵓ ⵅⴼ ⵉⵎⵙⵓⵔⵙⵏ ⵉⵎⵖⴰⵔⵉⵡⵏ ⴷ ⵉⵏⴰⵎⵓⵏⵏ ⵉⵣⴷⵉⵏ ⵙ ⵜⵡⵏⵏⴰⴹⵜ ⵜⴰⵖⴰⵎⵙⴰⵏⵜ ⵏ ⵓⵏⵎⵓⵔⵉ.