ⵜⵙⵙⴳⵎⴹ ⵜⵙⵍⵡⴰⵢⵜ ⵏ ⵓⴳⵔⴰⵡ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ, ⵎⴰⵙⵙⴰ ⵍⴰⵟⵉⴼⴰ ⴰⵅⴰⵔⴱⴰⵛ, ⵏⵜⵜⴰⵜ ⴷ ⵓⵙⵍⵡⴰⵢ ⵏ ⵓⵙⴰⴹⴰⴼ ⴰⵏⴰⵎⵓⵔ ⵏ ⵓⵎⵢⴰⵡⴰⴹ (ONC) ⵏ ⵏⵉⵊⵉⵔ, ⵎⴰⵙⵙ ⵉⴱⵕⴰⵀⵉⵎ ⵎⴰⵏⵣⵓ ⴷⵉⴰⵍⵓ, ⴰⵙⵙ ⵏ 9 ⵢⵓⵏⵢⵓ 2026, ⴳ ⵓⵙⵖⵉⵎ ⵏ ⵓⴳⵔⴰⵡ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ ⴳ ⵕⵕⴱⴰⵟ, ⵢⴰⵜ ⵜⵎⵇⵇⵓⵏⵜ ⵏ ⵜⵎⴷⵔⴰⵡⵜ ⴳⵔ ⵙⵏⴰⵜ ⵜⵎⵔⵙⴰⵍ ⴰⴷ ⵏ ⵓⵙⵍⴳⵏ.

ⴰⵙⴳⵎⴹ ⵏ ⵜⵎⵇⵇⵓⵏⵜ ⵏ ⵓⴷⵔⴰⵡ ⵉⴳⴰ ⵜⵉⵔⴰⵜ ⵉⵛⵛⴰⵔⵏ ⴳⵔ ⵓⴳⵔⴰⵡ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ ⴷ ⵓⵙⴰⴹⴰⴼ ⴰⵏⵉⵊⵉⵔⵉ ⵅⴼ ⵓⵙⴷⵓⵙ ⵏ ⵓⵎⵢⴰⵡⴰⵙ ⵉⵎⵔⵙⴰⵍ ⴳⵔ ⵍⵎⵖⵔⵉⴱ ⴷ ⵏⵉⵊⵉⵔ ⴳ ⵢⵉⴳⵔ ⵏ ⵓⵏⴱⴰⴹ ⵏ ⵓⵙⴰⵢⵔⴰⵔ ⴰⵙⵖⵎⵙⴰⵏ, ⵙ ⵓⴱⵔⵉⴷ ⵏ ⵓⵙⵏⴼⵍ ⵏ ⵜⵎⵓⵣⴰⵢⵜ, ⴱⵟⵟⵓ ⵏ ⵢⵉⵔⵎⵏ ⵉⵖⵓⴷⴰⵏ ⴷ ⵓⵙⴷⵓⵙ ⵏ ⵜⵣⵎⵎⴰⵔ. ⴳ ⵓⵎⵏⴰⴹ ⵉⵜⵜⵓⵕⵛⵎⵏ ⵙ ⵉⵎⵓⵜⵜⵓⵢⵏ ⵉⵎⵓⵟⵟⵓⵏⵏ,  ⴷ ⵜⵓⴳⵜ ⵏ ⵉⵏⵖⵎⵉⵙⵏ ⵏ ⵜⴽⵔⴽⴰⵙ, ⵏ ⵉⵏⴰⵡⵏ ⵏ ⵓⴽⵙⴰⵏ ⴷ  ⵓⵎⵙⴽⵛⴰⵎ ⴰⵖⵎⵙⴰⵏ, ⵜⵓⵙⴰ ⴷ ⵜⵎⵇⵇⵓⵏⵜ ⴰⴷ ⵜⴰⴷⴷ ⵅⴼ ⵜⵉⵍⴰⵍⵜ ⵜⴰⴷⵙⵍⴰⵏⵜ ⵏ ⵉⵙⵍⴳⴰⵏⵏ ⵉⴼⵔⵉⵇⵏ ⴳ ⵓⴹⵎⴰⵏ ⵏ ⵢⴰⵏ ⵓⵙⴰⵢⵔⴰⵔ ⴰⵙⵖⵎⵙⴰⵏ ⵉⵍⴻⵍⵍⵉ, ⴰⵎⵙⵜⴳⴳⴰⵔ, ⴰⵎⴰⴳⵓⵜ ⴰⵣⵣⵓⵍⴰⵏ, ⴳ ⵜⵏⴰⴼⵓⵜ ⵏ ⵉⵏⵎⵓⵔⵉⵏ, ⴰⵙⴷⵓⵙ ⴰⴷⵉⵎⵓⵇⵕⴰⵟⵉ ⴷ ⵓⵙⵉⴷⴼ ⴰⴼⵔⵉⵇ. ⵙⵙⴽⵏⵏ ⵢⴰⵜ ⵜⴽⴰⵢⵍⴰⵍⵜ ⵉⵛⵛⴰⵔⵏ: ⴰⴷ ⴳⵏ ⴳ ⵓⵙⵍⴳⵏ, ⵓⵔ ⵉⴷ ⴰⵏⵎⵔⵉ, ⵎⴰⵛⴰ ⵢⴰⵜ ⵜⵔⵙⵍⵜ ⵏ ⵓⴼⵔⴰⴳ ⵏ ⵡⴰⵡⴰⵍ ⵏ ⵉⴳⴷⵓⴷⵏ, ⵏ ⵓⵏⴱⴰⴹ ⴰⵙⵖⵎⵙⴰⵏ ⴷ ⵓⵎⴽⴽⵏ ⵏ ⵜⴼⵔⵉⵇⵜ ⴳ ⵡⴰⵍⵍⴰⵙ ⵙⵔⵙ ⵉⵥⵍⵉⵏ.

ⵙ ⵓⵣⵎⵣⵣⵓ ⵢⴰⴷ, ⵜⵏⵏⴰ ⵎⴰⵙⵙⴰ ⵍⴰⵟⵉⴼⴰ ⴰⵅⴰⵔⴱⴰⵛ ⵉⵙ “ⵜⴰⵎⵇⵇⵓⵏⵜ-ⴰⵙⴰⵜⵉ ⵉⴼⴽⴰ ⵢⴰⵏ ⵓⵙⴰⵢⵔⴰⵔ ⴰⴷⵙⵍⴰⵏ ⵉ ⵓⵙⴷⵓⵙ ⵏ ⵜⵣⵎⵎⴰⵔ ⴷ ⵓⵙⵎⵖⵔ ⵏ ⵜⵙⵓⴳⴰⵔ ⵏ ⵉⵙⵍⴳⴰⵏⵏ ⵏ ⵓⵙⵏⵖⵎⵙ, ⵜⴰⴼⴰⴷⴰ ⵜⴰⵙⵓⵖⵏⵜ ⵉ ⵢⵉⵡⴹ ⵙ ⵉⵡⵜⵜⴰⵙⵏ ⵏ ⵉⵇⵇⴰⵏⵏ, ⵉ ⵉⵏⵎⵓⵔⵉⵏ ⵉⵎⵖⵔⴰⴱⵉⵢⵏ, ⵉⵏⵉⵊⵉⵔⵉⵢⵏ ⴷ ⵉⴼⵔⵉⵇⵏ ⴰⴽⴽⵯ, ⴳ ⵓⴼⵔⴰⴳ ⵏ ⵉⵣⵔⴼⴰⵏ ⵏⵏⵙⵏ ⵉⵙⵏⵖⵎⴰⵙⵏ ⴰⴳⵓⵏⵙ ⵏ ⵢⴰⵜ ⵜⵡⵏⵏⴰⴹⵜ ⵜⴰⵙⵖⵎⵙⴰⵏⵜ ⵉⵜⵜⵓⵕⵛⵎⵏ ⵙ ⵜⵎⵓⵟⵟⵓⵏⵜ ⵉⵜⵜⵎⵖⵓⵔⵏ ⴷ ⵓⵎⵎⵏⴳⴰⵔ ⴰⵅⴰⵜⴰⵔ ⵏ ⵜⵙⴰⵍⵉⵡⵉⵏ ⵜⵉⵎⵇⵔⴰⵏⵉⵏ ⵜⵉⵎⵓⵟⵟⵓⵏⵉⵏ ⴳ ⵡⴰⴷⴰⴼ ⵖⵔ ⴰⵏⵖⵎⵉⵙ”.

ⴳ ⵜⵙⴰⴳⴰ ⵏⵏⵙ, ⵉⵙⴰⵡⵍ ⵓⵙⵍⵡⴰⵢ ⵏ ⵜⵎⵔⵙⵍⵜ ⵜⴰⵏⵉⵊⵉⵔⵉⵜ ⵅⴼ ⵜⵉⴷⵜ ⵏ ⵓⵎⵢⴰⵡⴰⵙ ⴰⵎⵖⵔⴰⴱⵉ-ⴰⵏⵉⵊⵉⵔⵉ ⴳ ⵢⵉⴳⵔ ⵏ ⵓⵙⵍⴳⵏ ⵏ ⵓⵙⵏⵖⵎⵙ, ⵉⵙⵙⴽⵜⵉ ⴷ ⵜⵓⵎⵙⵉⵙⵜ ⵏ ⵜⵎⵔⵙⵉⵡⵉⵏ ⵏ ⵉⵙⵍⴳⴰⵏⵏ ⵙ ⵙⵉⵏ ⴳ ⵓⵢⵏⵏⴰ ⵉⵣⴷⵉⵏ ⵙ ⵓⴼⵔⴰⴳ ⵏ ⵡⴰⴱⴰⴹ ⵉⵙⵏⵖⵎⴰⵙ ⵏ ⵜⵎⵏⵥⴰⵡⵜ ⵜⴰⴼⵔⵉⵇⵜ ⴷⴰⵜ ⵜⵉⵔⵏⵉ ⵏ ⵉⵎⴰⵣⵣⴰⵍⵏ ⵉⵎⵓⵟⵟⵓⵏⵏ ⵉⵎⴰⵜⴰⵢⵏ.

ⵜⴰⴼⵓⴳⵍⴰ ⵏ ⵓⵙⴳⵎⴹ ⵜⵜⵓⵙⴽⵔ ⵙ ⵓⵣⵎⵣⵣⵓ ⵏ ⵓⵔⵣⴰⴼ ⵏ ⵜⵡⵓⵔⵉ ⵏⵏⴰ ⵜⵙⵙⴽⵔ ⵜⵎⵔⵙⵍⵜ ⵜⴰⵏⵉⵊⵉⵔⵉⵜ ⵉ ⵓⴳⵔⴰⵡ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ, ⴰⵙⵙ ⵏ 8 ⴰⵔ 11 ⵢⵓⵏⵢⵓ 2026, ⵙ ⵢⴰⵏ ⵓⴽⴰⴱⴰⵔ ⴰⵎⵇⵔⴰⵏ, ⵜⴰⵎⵔⵙⵍⵜ ⵜⴰⵏⵉⵊⵉⵔⵉⵜ ⵜⴰⵎⴰⵢⵏⵓⵜ ⵏ ⵓⵙⵍⴳⵏ ⵜⵜⵓⵙⴽⵔ ⴳ ⵛⵜⴰⵎⴱⵉⵔ 2025, ⵜⵓⵎⵥ ⴰⴷⵖⴰⵔ ⵏ ⵓⵙⵇⵇⵉⵎ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ. ⵉⵎⵛⴰⵡⴰⵔⵏ ⵉⵙⵉⵏⵔⴰⵏ ⴳⵔ ⵜⵎⵔⵙⴰⵍ ⴰⴷ, ⵜⵜⵓⵙⴽⵔⵏ ⵙ ⵜⵎⴷⵔⴰⵡⵜ ⵏ ⵓⵏⵎⵀⴰⵍ ⴰⵎⴰⵜⴰⵢ ⵏ ⵓⴳⵔⴰⵡ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ, ⵎⴰⵙⵙ ⴱⵏⵄⵉⵙⵙⴰ ⵄⴰⵙⵍⵓⵏ, ⴷ ⴽⵉⴳⴰⵏ ⵏ ⵉⵏⵎⵀⴰⵍⵏ ⴷ ⵉⵙⴰⵜⵉⵢⵏ ⵏ ⵜⵎⵔⵙⵍⵜ ⵜⴰⵎⵖⵔⴰⴱⵉⵢⵜ. ⵉⵎⵛⴰⵡⴰⵔⵏ ⴰⴷ ⵉⵡⵉⵏ ⴷ ⵅⴼ ⵉⵎⵓⵜⵜⵓⵢⵏ ⵏ ⵜⵡⵏⵏⴰⴹⵜ ⵜⴰⵙⵖⵎⵙⴰⵏⵜ ⵜⴰⴼⵔⵉⵇⵜ ⴷ ⵉⵎⵓⵜⵜⵓⵢⵏ ⵙ ⵓⵎⴰⵜⴰ, ⴰⵎⵙⴰⵙⴰ ⵏ ⵓⵙⵍⴳⵏ ⵉ ⵉⵎⵓⵜⵜⵓⵢⵏ ⵏⵏⴰ ⴷ ⵢⵉⵡⵉ ⵓⵎⵓⵟⵟⵓⵏ ⴷ ⵓⴼⵔⴰⴳ ⵏ ⵓⴱⴰⴹ ⴰⵙⵖⵎⵙⴰⵏ ⵏ ⵜⵎⵓⵔⴰ ⵜⵉⴼⵔⵉⵇⵉⵏ.

ⵉⵜⵜⵓⵙⵏⵓⴱⴳ ⵓⴽⴰⴱⴰⵕ ⴰⵏⵉⵊⵉⵔⵉ ⴰⵡⴷ ⵖⵓⵔ ⵉⵎⵙⵜⴳⴳⴰⵔ ⴷ ⵉⵎⴰⵔⴰⵏ ⵏ ⵀⵉⵜ ⵕⴰⴷⵢⵓ ⴳ ⵕⵕⴱⴰⵟ ⴷ ⴰⵡⴷ ⵖⵓⵔ ⵜⵉⵍⵉⴼⵉⵣⵢⵓⵏ RMI-Medi 1  ⴳ ⵟⴰⵏⵊⴰ.

ⴰⴽⴰⴱⴰⵕ ⵏ ⵜⵎⵔⵙⵍⵜ ⵜⴰⵏⵉⵊⵉⵔⵉⵜ ⴷⵉⴳⵙ ⵎⴰⵙⵙ ⵉⴱⵕⴰⵀⵉⵎ ⵎⴰⵏⵣⵓ ⴷⵉⴰⵍⵍⵓ, ⴰⵙⵍⵡⴰⵢ, ⵎⴰⵙⵙ ⴱⵓⴱⵉ ⵙⴰⵍⵉⴼⵓ, ⴰⴳⵎⴰⵎ ⵏ ⵓⵙⵉⵏⴰⵏ, ⵎⴰⵙⵙ ⵓⵙⵎⴰⵏ ⴳⴰⵔⴱⴰ, ⵉⵎⴰⵔⵉ ⴰⵎⴰⵜⴰⵢ, ⵎⴰⵙⵙⴰ ⵎⴰⵔⵉ ⵕⵓⵥ ⵡⵉⵍⵢⴰⵎ ⵜⴰⵎⴰⴽⵍⵓ, ⵜⴰⵏⵎⵀⴰⵍⵜ ⵏ ⵜⵎⴰⴳⵓⵜ, ⴷ ⵎⴰⵙⵙ ⴰⴱⴷⵓⵍⴰⵢ ⴽⴰⵏⵏⵉ, ⴰⵏⵎⵀⴰⵍ ⴰⵜⵉⵇⵏⵉ.