« ⴳ ⵜⵡⵏⵏⴰⴹⵜ ⵜⴰⵖⵎⵙⴰⵏⵜ ⵜⴰⵎⴰⵢⵏⵓⵜ ⵜⴰⵎⴰⵜⴰⵢⵜ ⴷ ⵡⴰⵍⴳⵓⵔⵉⵜⵎⵏ ⴳ ⴷⴰ ⵣⵣⵉⴳⵉⵣⵏ ⵡⴰⵎⵓⵏⵏ, ⵉⵣⵎⵣⵏ ⵏ ⵜⵉⴷⵜ ⵜⴰⴷⵉⵎⵓⵇⵔⴰⵟⵉⵜ ⵉⴳⴰⵏ ⵉⵙⵜⴰⵢⵏ ⴰⵖⵓⵍⵏ ⴳⴰⵏ ⴰⵡⴷ ⵏⵉⵜⵏⵉ ⵉⵣⵎⵣⵏ ⵉⵎⵇⵔⴰⵏⵏ ⴳ ⴷⴰ ⵜⵜⵏⵢⵓⴷⴷⵓⵏⵜ ⵜⴽⵔⴽⴰⵙ ⴰⵔ ⵜⵜⵉⵍⵉⵏⵜ ⵜⵉⴷⴷⴰⵙ », ⴰⵢ ⵜⵏⵏⴰ ⵜⵏⵙⵙⵉⵅⴼⵜ ⵏ ⵓⴳⵔⴰⵡ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ ⴳ ⴽⵓⵜⵓⵏⵓ ⴰⵙⵙ ⵏ 11 ⵢⵓⵍⵢⵓⵣ 2025. ⵜⴰⵎⵓ ⴳ ⵜⵡⵓⵔⵉⵡⵉⵏ ⵏ ⵜⵉⵏⴰⵡⵜ ⵜⴰⴳⵔⴰⵖⵍⴰⵏⵜ ⵅⴼ « ⴰⵙⵍⴳⵏ ⴰⵙⵏⵖⵎⴰⵙ ⵏ ⵉⵙⵜⴰⵢⵏ ⴳ ⵓⵣⵎⵣ ⵏ ⵓⵎⵓⵟⵟⵓⵏ ⴷ ⵜⵉⵖⵉⵙⵜ ⵜⵉⵎⵍⵥⵉⵜ » ⵏⵏⴰ ⵜⵙⵏⵎⴰⵍⴰ ⵜⵎⵔⵙⵍⵜ ⵏ ⵓⵙⵍⴳⵏ ⵏ ⵓⵙⵏⵖⵎⵙ ⵏ ⴱⵉⵏⵉⵏ. ⵜⵙⴰⵡⵍ ⵎⴰⵙⵙⴰ ⵍⴰⵟⵉⴼⴰ ⴰⵅⴰⵔⴱⴰⵛ ⴷⵉⵖ ⴰⵔ ⵜⵜⵉⵏⵉ « ⵜⴻⵜⵜⵓⵙⵏⵓⵍⴼⴰⵏⵜ ⵜⴽⵔⴽⴰⵙ ⴰⵔ ⵜⵜⵎⵖⵓⵔⵜ ⵙ ⵉⵎⴰⵙⵙⵏ ⵏ ⵜⵉⵖⵉⵙⵜ ⵜⵉⵎⵍⵥⵉⵜ ⵢⴰⵖⵓⵍⵏ ⵉⵡⵀⵏ ⵉ ⵓⵙⵡⵓⵔⵉ, ⵜⵉⴽⵔⴽⴰⵙ ⴰⴷ ⴳⴰⵏⵜ ⵉⵎⵉⵣⵉ ⴰⵎⵓⵟⵟⵓⵏ ⴰⵅⴰⵜⴰⵔ ⵏⵏⴰ ⵏ ⵉⵇⵇⴰⵏ ⴰⴷ ⵉⵜⵜⵓⵙⵡⵓⴷⴷⵓ ⵉⵜⵜⵓⵃⴹⵓ, ⴰⴼⴰⴷ ⴰⴷ ⵏⴼⵔⴳ ⵉ ⵜⵣⴷⴳⵉ ⵏ ⵉⵙⵜⴰⵢⵏ, ⴷ ⵜⵎⵢⵉⵎⴰⵏⵜ ⵜⴰⴷⵉⵎⵓⵇⵔⴰⵟⵉⵜ ».

ⵜⴰⵎⵙⵜⴳⴳⴰⵔⵜ ⵜⴰⵎⵖⵔⴰⴱⵉⵜ ⵜⵖⵔⴰ ⵉⵡⵏⴰⵏ ⵏ ⵜⵉⵏⴰⵡⵜ ⴰⴷ, ⴳ ⵜⵕⵥⵎ ⵜⵉⵡⵓⵔⵉⵡⵉⵏ ⵏⵏⵙ ⵜⵏⵙⵙⵉⵅⴼⵜ ⵜⵉⵙ ⵙⵏⴰⵜ ⵏ ⵜⴳⴷⵓⴷⴰⵏⵜ ⵏ ⴱⵉⵏⵉⵏ, ⵎⴰⵙⵙⴰ ⵎⴰⵔⵢⴰⵎ ⵛⴰⴱⵉ ⵜⴰⵍⴰⵜⴰ, ⵉ ⵢⴰⵜ ⵜⵉⴳⴰⵡⵜ ⵜⴰⵎⴷⵔⴰⵡⵜ ⵜⴰⴼⵔⵉⵇⵜ ⴷ ⵢⴰⵜ ⵜⵎⵓⵖⵍⵉ ⵉⵛⵛⴰⵔⵏ ⴳ ⵓⵡⵜⵜⴰⵙ ⵏ ⵜⵏⴽⵔⴰ ⵙ ⵓⵎⵓⵟⵟⵓⵏ ⴷ ⵜⵉⵖⵉⵙⵜ ⵜⵉⵎⵍⵥⵉⵜ ⴳ ⵓⵎⵏⵉⴷ ⵏ ⵓⴱⵖⵓⵔ ⴰⵎⴰⵜⴰⵢ ⵏ ⵜⵎⵏⵥⴰⵡⵜ. ⵜⵏⵏⴰ ⴷⵉⵖ ⵉⵙ ⴷ ⵉⵡⵏⴰⵏ ⵏ ⵓⵎⵙⴳⵔⴰⵡ ⴰⵏⴰⵎⵓⵔ ⴰⵎⵣⵡⴰⵔⵓ ⵅⴼ ⵜⵉⵖⵉⵙⵜ ⵜⵉⵎⵍⵥⵉⵜ, ⵉⵜⵜⵓⵙⵏⵎⴰⵍⴰⵏ ⴰⵙⵙ ⵏ 1 ⵢⵓⵍⵢⵓⵣ 2025 ⴳ ⵕⵕⴱⴰⵟ ⵉⵜⵜⵓⵙⴽⵜⵉ ⴷ ⵉⵙ ⵜⵚⴽⴰ ⵜⵙⵟⵔⴰⵜⵉⵊⵉⵜ ⵏ ⵜⴳⵍⴷⵉⵜ ⴳ ⵢⵉⴳⵔ ⴰⴷ ⵅⴼ ⵓⴱⴰⴹ ⴰⵎⵓⵟⵟⵓⵏ, ⵜⴰⵖⴰⵔⴰ ⵜⴰⵜⵉⴽⵏⵓⵍⵓⵊⵉⵜ, ⴰⴷⴰⴼ ⴰⵏⴰⵎⵓⵏ ⵉⵡⴰⵜⵙⵏ ⵜⴰⵏⴽⵔⴰ ⵙ ⵜⵎⵏⵥⴰⵡⵜ ⵜⴰⴼⵔⵉⵇⵜ.

ⴳ ⵜⴳⵉⵔⴰ ⵏ ⵓⵡⵏⵏⵉ ⵏⵏⵙ ⵅⴼ « ⵜⵉⵖⵉⵙⵜ ⵜⵉⵎⵍⵥⵉⵜ ⴷ ⵉⵙⵜⴰⵢⵏ, ⴰⵡⵜⵜⵓ ⴰⵎⴰⵢⵏⵓ ⵏ ⵜⵎⵢⵉⵎⴰⵏⵜ ⵜⴰⴷⵉⵎⵓⵇⵔⴰⵟⵉⵜ », ⵜⵙⵙⵉⴽⵣ ⵜⵏⵙⵙⵉⵅⴼⵜ ⵏ ⵓⴳⵔⴰⵡ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ ⵉⵙ ⵎⴽ ⵉⴳⴰ ⵓⵙⴷⵓⵙ ⴷ ⵓⵙⴷⵖⵉ ⵏ ⵓⵙⴰⵜⵉ ⴰⵣⵔⴼⴰⵏ ⴷ ⵓⵙⵍⴳⴰⵏ ⵉⵙⵙⴰⵜⵉⵏ ⵜⵉⵡⵓⵔⵉⵡⵉⵏ ⵏ ⵉⵎⴰⵙⵙⵏ ⵉⵎⵓⵟⵟⵓⵏⵏ ⴷ ⵜⵉⵖⵉⵙⵜ ⵜⵉⵍⵎⵥⵉⵜ ⴳ ⵉⵎⵣⵉⵣⵣⵍⵏ ⵏ ⵉⵙⵜⴰⵢⵏ ⵉⵣⵓⵛⵛⵍⵏ ⵉ ⵓⴼⵔⴰⴳ ⵏ ⵜⵎⵢⵉⵎⴰⵏⵜ ⵜⴰⴷⵉⵎⵓⵇⵔⴰⵟⵉⵜ ⴳ ⵜⵎⵓⵔⴰ ⴰⴽⴽⵯ, ⴰⵢⴰ ⵉⵙⵓⵍ ⵉⴷⵔⵓⵙ. ⴰⵛⴽⵓ, ⴰⵢ ⵜⵏⵏⴰ : « ⴰⵎⵙⴰⵔⴰⵙ ⴰⴷⵙⵍⴰⵏ ⴳ ⵓⵙⵡⵉⵔ ⴰⴷ ⵉⴳⴰ ⴰⵙⵔⵔⵓⵙ ⴰⵙⵓⵍⴰⵏ ⵏ ⵜⵣⵎⵎⴰⵔ ⴷ ⵜⴼⴰⴷⵉⵡⵉⵏ ⵏⵏⴰ ⵏ ⵉⵇⵇⴰⵏⵏ - ⵜⵉⵍⴻⵍⵍⵉⵡⵉⵏ ⵜⵉⴷⵙⵍⴰⵏⵉⵏ, ⵜⴰⵣⵣⵓⵍⴰⵏⵜ ⵜⴰⵙⵏⵖⵎⴰⵙⵜ ⵉⵜⵜⵓⵙⵍⴳⵏⵏ ⴷ ⵡⵓⴹⵓⴼ ⴰⵜⵉⴽⵏⵓⵍⵓⵊⵉ - ⴳ ⵓⵡⵜⵜⴰⵙ ⵏ ⵓⵙⵉⵎⴰⵍ ⵏ ⵉⵎⵉⵣⴰ ⵉⵍⵍⴰⵏ ⴷⴰⵜ ⵜⵣⴷⴳⵉ ⵏ ⵓⵎⵙⴰⵡⴰⵍ ⴰⴳⴷⵓⴷⴰⵏ ⴷ ⵜⵉⴷⵜ ⵏ ⵉⵙⴳⵔⴰⵡⵏ ⵉⵙⵏⵖⵎⴰⵙⵏ ».

ⴰⵣⵎⵣⵣⵓ ⵢⴰⴷ ⵏⵏⴰ ⵉⵙⵏⵎⴰⵍⴰ ⵓⴳⵔⴰⵡ ⴰⵎⴰⵜⵜⴰⵢ ⵏ ⵓⵙⵍⵉⵥⵕ ⴷ ⵓⵎⵢⴰⵡⴰⴹ (HAAC) ⵏ ⵍⴱⵉⵏⵉⵏ, ⴳ ⵓⵙⴰⵜⵉ ⵏ ⵓⵖⴰⵡⴰⵙ ⵏ ⵜⵉⴳⴰⵡⵜ ⵏ ⵓⵥⵟⵟⴰ ⵏ ⵜⵎⵔⵙⴰⵍ ⵜⵉⴼⵔⵉⵇⵉⵏ ⵏ ⵓⵙⵍⴳⵏ ⵏ ⵓⵎⵢⴰⵡⴰⴹ. ⴰⵎⵙⴳⵔⴰⵡ ⴰⴷ ⵉⵙⵎⵓⵏ ⵉⴳⵏⵙⴰⵙⵏ ⵏ ⵙⵎⵎⵓⵙ ⴷ ⵎⵔⴰⵡ ⵏ ⵜⵎⵓⵔⴰ, ⵉⵍⵉⵏ ⴰⵡⴷ ⵉⵎⵙⵜⴳⴳⴰⵔⵏ ⵉⵅⴰⵜⴰⵔⵏ ⵉⵙⵔⵜⴰⵢ ⴷ ⵉⵙⵏⵖⵎⴰⵙⵏ ⴷ ⵉⴳⵎⴰⵎⵏ ⵏ ⵜⵙⵇⵇⵉⵎⵜ ⵏ ⵉⵙⵜⴰⵢⵏ ⵜⴰⵙⵉⵎⴰⵏⵜ ⵏ ⴱⵉⵏⵉⵏ.

ⵜⴰⵙⴳⴰ ⵏ ⵜⵏⵙⵙⵉⵅⴼⵜ, ⴰⴽⴰⴱⴰⵔ ⵏ ⵓⴳⵔⴰⵡ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ ⴳ ⵜⵉⵏⴰⵡⵜ ⴰⴷ ⵜⴰⴳⵔⴰⵖⵍⴰⵏⵜ ⴷⵉⴳⵙ ⴰⵡⴷ ⵎⴰⵙⵙ ⵊⴰⵄⴼⵕ ⴽⴰⵏⵙⵓⵙⵉ, ⴰⴳⵎⴰⵎ ⵏ ⵓⵙⵇⵇⵉⵎ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ, ⴷ ⵎⴰⵙⵙ ⵟⴰⵍⴰⵍ ⵚⴰⵍⴰⵃⴷⴷⵉⵏ, ⴰⵎⵙⵙⵓⴳⵓⵔ ⵏ ⵜⵖⴰⵡⵙⵉⵡⵉⵏ ⵜⵉⴼⵔⵉⵇⵉⵏ ⴷ ⵜⴳⵔⴰⵖⵍⴰⵏⵉⵏ ⵖⵓⵔ ⵜⵎⵔⵙⵍⵜ ⵜⴰⵎⵖⵔⴰⴱⵉⵜ.