“ⵉⵕⵥⵎ ⵓⵙⴰⵢⵔⴰⵔ ⴰⵎⵓⵟⵟⵓⵏ ⵉⵎⵏⵉⴷⵏ ⵉⵎⴰⵢⵏⵓⵜⵏ ⵉ ⵓⵙⵍⵍⵡⵓ ⴰⴷⵉⵎⵓⵇⵕⴰⵟⵉ ⴷ ⵓⵙⵔⵜⴰⵏ ⵎⴰⵛⴰ ⵓⵔ ⵉⴹⵎⵉⵏ ⴰⵡⵏⵏⵉ ⵏ ⵜⵎⴰⴳⵓⵜ ⵏ ⵜⴰⵏⵏⴰⵢⵜ ⵓⵔ ⵉⵜⵜⵓⴹⵎⵉⵏ ⵙ ⵜⵎⴰⵎⴽⵜ ⵏ ⵓⵙⵓⵎⵓ ⴷ ⵜⵙⵓⵙⵖⵜ”, ⴰⵢ ⵜⵏⵏⴰ ⵜⵏⵙⵉⵅⴼⵜ ⵏ ⵓⴳⵔⴰⵡ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ, ⵎⴰⵙⵙⴰ ⵍⴰⵟⵉⴼⴰ ⴰⵅⴰⵔⴱⴰⵛ ⴰⵙⵙ ⵏ ⵓⵙⵉⵏⴰⵙ 5 ⵎⴰⵕⵚ 2024 ⴳ ⴱⵕⴰⵢⴰ. ⴰⵡⴰⵍ ⵏⵏⵙ ⵢⵓⵙⴰ ⴷ ⴳ ⵓⵙⴰⵜⵉ ⵏ ⵜⵡⵓⵔⵉⵡⵉⵏ ⵏ ⵜⵉⵏⴰⵡⵜ ⵜⴰⴳⵔⴰⵖⵍⴰⵏⵜ ⵏⵏⴰ ⵜⵙⵏⵎⴰⵍⴰ ⵜⵏⴱⴰⴹⵜ ⵏ ⵓⵙⵍⴳⵏ ⴷ ⵓⵎⵢⴰⵡⴰⴹ ⴰⵏⴰⵎⵓⵏ ⵏ ⵉⵅⴼ ⴰⵣⴳⵣⴰ ⴷⴷⴰⵡ ⵓⵙⴳⵓⵎ ⵏ “ⵜⵉⵏⵥⴰⵕ ⵏ ⵓⵙⵏⴰⵎ ⴷ ⵜⵏⴽⵔⴰ ⵙ ⵜⵎⴰⴳⵓⵜ ⴳ ⵓⵙⵏⵖⵎⵙ”, ⵜⵏⵏⴰ ⴷⵉⵖ ⵉⵙ “ⵉⵎⴰⵙⵙⵏ ⴷ ⵜⵎⵙⵜⴰⵍ ⵏ ⵓⵙⵍⴳⵏ ⵏ ⵜⵓⵎⴰⵢⵉⵏ ⵉⵜⵜⵓⵙⵡⵓⵔⵉⵏ ⴳ ⵜⵙⵉⵍⴰⵡⵉⵏ ⵜⵉⵎⴰⵜⴰⵢⵉⵏ ⵏ ⵓⵙⵏⵖⵎⵙ ⴰⵏⴰⵎⵓⵏ ⴷⴰ ⵜⵜⴰⵡⵉⵏⵜ ⵙ ⵓⵎⴰⵜⴰ ⵖⵔ ⵜⵉⴱⴰⵡⵜ ⵏ ⵜⵎⴰⴳⵓⵜ ⵏ ⵜⴰⵏⵏⴰⵢⵜ. ⴰⵎⴷⵢⴰ ⴰⵎⵢⵓⴼ ⵉⴳⴰ ⵜ ⵡⵉⵏ ⵉⵏⴰⵡⴰⵢⵏ ⵓⵔ ⵉⵜⵜⵓⵇⴱⵉⵍⵏ ⵏⵏⴰ ⴷⴰ ⵙⵙⴽⴰⵔⵏⵜ ⵜⵙⵉⵍⴰⵡⵉⵏ ⴰⴼⴰⴷ ⴰⴷ ⵙⵍⴳⵎⵏⵜ ⵓⵟⵟⵓⵏⵏ ⵏ ⴽⵉⴳⴰⵏ ⵏ ⵉⵎⵙⵡⵓⵔⴰ ⴷ ⴽⵉⴳⴰⵏ ⵉⵙⵏⵖⵎⵙⵏ ⵉⵣⵣⵓⵍⴰⵏⵏ ⴰⵛⴽⵓ ⵙⴰⵡⵍⵏ ⴰⵔ ⵜⵜⵉⵏⵉⵏ ⵜⴰⵏⵏⴰⵢⵉⵏ ⵏⵏⵙⵏ ⵅⴼ ⵉⵎⵏⵖⵉ ⵏ ⵉⵙⵕⴰⵢⵉⵍ ⵅⴼ ⵖⴰⵣⵣⴰ”.

ⵜⵙⵙⴽⵜⵉ ⵜⵏⵙⵙⵉⵅⴼⵜ ⵏ ⵓⴳⵔⴰⵡ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ ⴳ ⵜⵙⴳⴰ ⵢⴰⴹⵏ ⵉⵙ “ⴰⵙⴰⵢⵔⴰⵔ ⴰⵎⵓⵟⵟⵓⵏ, ⵓⵔ ⵉⵜⵜⵓⵙⵍⴳⵏ ⵙ ⵜⵖⴰⵔⴰⵙⵜ ⵉⵖⵓⴷⴰⵏ, ⵉⴳⴰ ⴰⵎⴰⵡⴰⵢ ⵏ ⵉⵎⵉⵣⴰⵏ ⵉⵜⵜⵓⵡⴰⵍⴰⵙⵏ ⵏ ⵓⵎⵎⵔⵡⵉ ⵉⵡⵏⴰⵏ ⵏ ⵓⵣⵣⵉⴳⵣ ⵏ ⵉⵙⵜⴰⵢⵏ”. ⴰⴼⴰⴷ ⴰⴷ ⵏⴻⵏⵏⴰⵍ ⴰⵙⵓⵔⵙ ⴰⴷ, ⵜⵙⵓⵎⵔ ⵎⴰⵙⵙⴰ ⴰⵅⴰⵔⴱⴰⵛ ⴽⵔⴰ ⵏ ⵜⵉⴳⴰⵡⵉⵏ, “ⵉ ⵓⵙⵡⵓⵔⵉ ⵉⵕⵡⴰⵏ ⵏ ⵜⴷⵉⵎⵓⵇⵕⴰⵟⵉⵜ ⵏ ⵡⴰⵎⵓⵏⵏ, ⵜⵇⵇⴰⵏ ⵏ ⵜⵏⴽⵔⴰ ⵜⴰⵣⵣⵓⵍⴰⵏⵜ ⴷ ⵓⵙⴷⵓⵙ ⵏ ⵓⵙⵏⵖⵎⵙ ⴰⴽⵍⴰⵙⵉⴽⵉ, ⴰⴼⴰⴷ ⴰⴷ ⴰⵍⵙⵏ ⴳ ⵜⵉⵍⴰⵍⵜ ⵏⵏⵙⵏ ⵏ ⵓⵙⵎⵓⵜⵜⴳ ⵏ ⵜⴰⵏⵏⴰⵢⵉⵏ ⵙ ⵓⴱⵔⵉⴷ ⵏ ⵓⵎⵙⴳⴷⴰⵍ ⴰⴳⴷⵓⴷⴰⵏ ⴰⵎⴰⴳⵓⵜ ⴷ ⵜⵍⴻⵍⵍⵉ ⵏ ⵜⴰⵏⵏⴰⵢⵜ”.

ⵜⵉⵡⵓⵔⵉⵡⵉⵏ ⵏ ⵜⵉⵏⴰⵡⵜ ⴰⴷ ⴳ ⴰⵎⵓⵏ ⵉⵏⵙⵙⵉⵅⴼⵏ ⵏ ⵜⵎⵔⵙⴰⵍ ⵏ ⵓⵙⵍⴳⵏ ⵏ ⵓⵙⵏⵖⵎⵙ ⵏ 12 ⵏ ⵜⵎⵓⵔⴰ ⵜⵉⴼⵔⵉⵇⵉⵏ ⵉⵙⴰⵡⴰⵍⵏ ⵜⴰⵏⴳⵍⵉⵣⵜ, ⵜⴰⴱⵕⵜⵇⵉⵙⵜ, ⵜⴰⵄⵔⴰⴱⵜ ⴷ ⵜⴼⵕⴰⵏⵙⵉⵙⵜ ⵙⴰⵡⵍⵏ ⵅⴼ ⴽⵉⴳⴰⵏ ⵉⵙⵇⵙⵉⵜⵏ ⵉⵅⴰⵜⴰⵔⵏ ⴰⵎ ⵜⵎⵓⴽⵔⵉⵙⵜ ⵏ ⵓⴹⵎⴰⵏ ⵏ ⵜⵎⴰⴳⵓⵜ ⴰⴳⵓⵏⵙ ⵏ ⵓⵙⵏⵖⵎⵙ ⴳ ⵉⵣⵎⵣⵏ ⵏ ⵉⵙⵜⴰⵢⵏ, ⵏⵖ ⴷⵉⵖ ⵜⵉⵍⴰⵍⵜ ⵏ ⵓⵙⵍⴳⵏ ⴳ ⵓⵢⵏⵏⴰ ⵉⵣⴷⵉⵏ ⴷ ⵓⴹⵎⴰⵏ ⵏ ⵜⵎⴰⴳⵓⵜ ⴷ ⵜⵎⵢⴰⵏⴰⵡⵜ ⴰⴳⵓⵏⵙ ⵏ ⵓⵙⵏⵖⵎⵙ ⴳ ⵓⴽⵓⴷ ⴰⵎⵓⵟⵟⵓⵏ.

ⵜⴰⵙⵓⵜⵍⵜ ⵏ ⵓⵏⵏⵓⵕⵥⵎ ⵏ ⵜⵉⵏⴰⵡⵜ ⴳ ⵜⵙⴰⵡⵍ ⴰⵡⴷ ⵎⴰⵙⵙⴰ ⴰⵅⴰⵔⴱⴰⵛ ⵙ ⵢⵉⵙⵎ ⵏ ⵜⵏⵙⵙⵉⵅⴼⵜ ⵏⵏⵙ ⵉ ⵓⵥⵟⵟⴰ ⵏ ⵜⵎⵔⵙⴰⵍ ⵜⵉⴼⵔⵉⵇⵉⵏ ⵏ ⵓⵙⵍⴳⵏ ⵏ ⵓⵎⵢⴰⵡⴰⴹ, ⵜⵜⵓⵙⴽⵔ ⴳ ⵓⵙⵖⵉⵎ ⵏ ⵜⴰⵎⵓⵏⵜ ⵜⴰⵏⴰⵎⵓⵔⵜ ⵏ ⵉⵅⴼ ⴰⵣⴳⵣⴰ ⵙ ⵓⵃⵉⴹⵕ ⵏ ⵓⵏⵙⵙⵉⵅⴼ ⵏ ⵓⴳⵔⴰⵡ ⵎⴰⵙⵙ ⵓⵙⵟⵉⵍⵉⵏⵓ ⵟⴰⴼⴰⵔⵉⵙ ⴽⵓⵔⵔⵉⵢⴰ ⴷ ⴽⵉⴳⴰⵏ ⵏ ⵉⴱⵕⵍⴰⵎⴰⵏⵉⵢⵏ ⴷ ⵉⵎⵙⵜⴳⴳⴰⵔⵏ ⵉⵙⵔⵜⴰⵏⵏ. ⵜⵉⵏⴰⵡⵜ ⵜⴰⵎⵣⵡⴰⵔⵓⵜ ⵅⴼ ⵓⵙⴳⵓⵎ « ⴰⵙⵍⴳⵏ ⵏ ⵓⵙⵏⵖⵎⵙ ⴷ ⵜⵎⴰⴳⵓⵜ ⴷ ⵜⵍⴻⵍⵍⵉ ⵏ ⵜⵏⵖⵎⴰⵙⵜ » ⵉⵏⵏⴰ ⵜⵜ ⵎⴰⵙⵙ ⵊⵓⵔⵊ ⴽⴰⵕⵍⵓⵚ ⴼⵓⵏⵙⵉⴽⴰ, ⴰⵏⵙⵙⵉⵅⴼ ⵉⵣⵔⵉⵏ ⵏ ⵜⴳⴷⵓⴷⴰⵏⵜ ⵏ ⵉⵅⴼ ⴰⵣⴳⵣⴰ.

ⵜⴰⵙⴳⴰ ⵏ ⵜⵏⵙⵙⵉⵅⴼⵜ, ⵢⴰⵎⵓ ⴳ ⵓⴽⴰⴱⴰⵕ ⵏ ⵓⴳⵔⴰⵡ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ ⴰⴳⵓⵏⵙ ⵏ ⵜⵉⵏⴰⵡⵜ ⵏ ⴱⵕⴰⵢⴰ ⴰⵡⴷ ⵎⴰⵙⵙ ⵟⴰⵍⴰⵍ ⵚⴰⵍⴰⵃⴷⴷⵉⵏ, ⴰⵎⴰⵙⴰⵢ ⵏ ⵜⵖⴰⵡⵙⵉⵡⵉⵏ ⵜⵉⴼⵔⵉⵇⵉⵏ ⴷ ⵎⴰⵙⵙ ⵕⴰⴱⵉⵄ ⵚⵔⵖⵉⵏⵉ, ⴰⵙⴰⵜⵉ ⴰⵎⴰⵜⵜⴰⵢ ⴳ ⵜⵣⵓⵏⵉ ⵏ ⵜⵖⵓⵔⵉⵡⵉⵏ ⴷ ⵜⵉⴳⵎⵉ.