ⵜⵙⴷⴷⵉⴷ ⵎⴰⵙⵙⴰ ⵍⴰⵟⵉⴼⴰ ⴰⵅⴰⵔⴱⴰⵛ, ⵜⴰⵏⵙⵙⵉⵅⴼⵜ ⵏ ⵓⴳⵔⴰⵡ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ, ⴷ ⵜⵏⵙⵙⵉⵅⴼⵜ ⵔⵅⵅⵓ ⵏ ⵓⵥⵟⵟⴰ ⵏ ⵜⵎⵔⵙⴰⵍ ⵜⵉⴼⵔⵉⵇⵉⵏ ⵏ ⵓⵙⵏⴰⵎ ⵏ ⵓⵎⵢⴰⵡⴰⴹ, ⵉⵙ “ⵜⴰⵎⴷⵔⴰⵡⵜ ⵏ ⵜⵎⵔⵙⴰⵍ ⵏ ⵓⵙⵏⴰⵎ ⵜⵉⴼⵔⵉⵇⵉⵏ ⴳ ⵓⵙⴷⵓⵙ ⵏ ⵓⵙⴳⵎⵉ ⵅⴼ ⵜⵏⵎⵓⵔⵉ ⵜⴰⵎⵓⵟⵟⵓⵏⵜ ⴷ ⵓⵙⵎⵓⵙⵙ ⵙ ⵉⵎⵙⴰⵔⴰⵙⵏ ⵏⵏⵙ ⴷ ⵓⵙⵡⵓⵔⵉ ⵏ ⵜⵙⵔⵜⴰⵢ ⵜⵉⴳⴷⵓⴷⴰⵏⵉⵏ ⵏ ⵜⵉⴷⵜ ⴳ ⵢⵉⴳⵔ ⴰⴷ, ⵉⴳⴰ ⴰⵣⵓⵛⵛⵍ ⴰⵎⵖⵉⵡⵍ”, ⵉⵡⵏⴰⵏ ⵏ ⵡⴰⵙⵙ ⵏ 12 ⴼⴱⵕⴰⵢⵕ 2023 ⴳ ⵜⵎⴷⵉⵏⵜ ⵏ ⵏⵢⴰⵎⵉ ⴳ ⵏⵏⵉⵊⵉⵔ.

ⵜⵔⵏⵓ ⵎⴰⵙⵙⴰ ⴰⵅⴰⵔⴱⴰⵛ ⵉⵡⵏⴰⵏ ⵏ ⵡⴰⵡⴰⵍ ⵏⵏⵙ ⴳ ⵜⵡⵓⵔⵉⵡⵉⵏ ⵏ ⵓⵎⵙⴳⵔⴰⵡ ⴰⵎⴰⴹⵍⴰⵏ ⵅⴼ ⵉⵎⵙⴰⵔⴰⵙⵏ ⵏ ⵓⵙⵏⴰⵎ ⵏ ⵜⵓⵎⴰⵢⵉⵏ ⵅⴼ ⵍⴰⵏⵜⵉⵔⵏⵉⵜ, ⵏⵏⴰ ⵉⵙⵏⵎⴰⵍⴰ ⵓⵙⵇⵇⵉⵎ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴳ ⵏⵏⵉⵊⵉⵔ ⴳ ⵓⵙⴰⵜⵉ ⵏ ⵜⴽⴰⵕⴹⴰ ⵏ ⵓⴱⵔⵉⴷ ⵏ ⵓⵥⵟⵟⴰ ⴰⴼⵔⴰⵏⴽⵓⴼⵓⵏ ⵏ ⵜⵎⵔⵙⴰⵍ ⵏ ⵓⵙⵏⴰⵎ ⵏ ⵉⵎⴰⵙⵙⵏ ⵏ ⵓⵙⵏⵖⵎⵙ, ⵉⵙ “ ⴰⵎⵙⴰⵔⴰⵙ ⵉⵍⵍⴰ ⴳ ⵓⵙⴱⵖⵙ ⵅⴼ ⵡⵓⵟⵓⴼ ⵏ ⵡⴰⵎⵓⵏ ⵉⵓ ⵜⴷⵍⵙⴰ ⵜⴰⵎⵓⵟⵟⵓⵏⵜ ⵏⵏⴰ ⵓⵔ ⵏⵖⵉⵢ ⴰⴷ ⵏⵙⵙⴳⵣⵉⵍ ⵖⴰⵙ ⴳ ⵓⵙⴳⵎⵉ ⵅⴼ ⵓⵙⵏⵖⵎⵙ, ⵏⵖ ⵜⴰⵎⵓⵖⵍⵉ ⵏⵏⵙ ⵖⴰⵙ ⵉⵙ ⵜⴳⴰ ⵜⴰⴷⵍⵙⴰ ⵜⴰⵏⵎⵍⴰⵏⵜ. ⴰⵛⴽⵓ ⴰⵙⴽⴽⵉⵏ ⵓⵔ ⵉⵣⴷⵉ ⵖⴰⵙ ⵙ ⵓⴼⵔⴰⴳ ⵏ ⵎⴷⴷⵏ ⴷ ⵡⴰⵎⵓⵏⵏ ⵎⴳⴰⵍ ⴰⵏⴰⵡⵏ ⵏ ⵓⵔⵡⴰⵢ ⴰⵖⵎⵙⴰⵏ, ⵎⴰⵛⴰ ⵉⵣⴷⵉ ⴰⵡⴷ ⴷ ⵜⵓⴽⴽⵉ ⵏⵏⵙⵏ ⵜⵉⵣⵎⵎⴰⵔ ⵜⵉⵣⵓⵛⵛⴰⵍ ⵏ ⵡⴰⴷⴰⴼ ⵖⵔ ⵜⵏⴰⴼⵓⵜⵉⵏ ⵉⴳⴳⵓⵜⵏ ⵏ ⵓⵎⵢⴰⵡⴰⴹ ⴰⵎⵓⵟⵟⵓⵏ”.

ⴳ ⵜⵙⴳⴰ ⵢⴰⴹⵏ, ⵜⵙⴷⴷⵉⴷ ⵜⵏⵙⵙⵉⵅⴼⵜ ⵏ ⵓⵥⵟⵟⴰ ⵏ ⵜⵎⵔⵙⴰⵍ ⵜⵉⴼⵔⵉⵇⵉⵏ ⵏ ⵓⵙⵏⴰⵎ ⵏ ⵓⵎⵢⴰⵡⴰⴹ ⵅⴼ ⵓⵎⵏⵏⵓⵖ ⵎⴳⴰⵍ ⵜⵓⵎⴰⵢⵉⵏ ⴳ ⵍⵍⴰⵏ ⵉⵎⵉⵣⵉⵢⵏ ⴰⴳⵓⵏⵙ ⵏ ⵓⵙⴰⵢⵔⴰⵔ ⴰⵎⵓⵟⵟⵓⵏ ⴰⵎⵎ ⵉⵏⵖⵎⵉⵙⵏ ⵏ ⵜⴽⵔⴽⴰⵙ, ⴰⵡⵏⵏⵉ ⵏ ⵓⴽⵙⴰⵏ, ⵜⵉⴽⵕⴹⵉ ⵉⵚⴽⴰⵏ ⵅⴼ ⵡⴰⵏⴰⵡ ⴰⵏⴰⵎⵓⵏ, ⵜⴰⵎⵙⵙⴰⵥⵓⵕⵜ, ⴰⵙⵅⵉⵜⵔ ⵙ ⵓⴱⵔⵙⵉⵡⴷ ⴷ ⵜⴽⵕⴹⵉ...ⴰⵜⴳ. ⵓⵔ ⵜⴳⵉ ⵖⴰⵙ ⵢⴰⵜ ⴳ ⵜⵡⵓⵔⵉⵏ ⵏ ⵜⵎⵔⵙⴰⵍ ⵏ ⵓⵙⵏⴰⵎ ⴳ ⵓⵎⵏⵥⴰⵡ; ⴰⵛⴽⵓ “ⵜⵉⵎⵔⵙⴰⵍ ⴰⴷ ⵜⴼⴽⴰ ⵜⴰⵖⴹⴼⵜ ⴰⵡⴷ ⵉ ⵓⴼⵔⴰⴳ ⵏ ⵜⴷⵍⵙⴰ ⴷ ⵓⵙⴷⵓⵙ ⵏ ⵓⵙⵏⵓⵍⴼⵓ ⴰⵙⵍⵉⵥⵕ ⴷ ⵓⵎⵓⵟⵟⵓⵏ ⴰⵏⴰⵎⵓⵔ ⴷ ⵓⵎⵏⵥⴰⵡ, ⴰⵢⴰ ⵉⴳⴰ ⵉⵙⵓⵔⵙⵏ ⵉⵙⵙⴽⵔⴰⵏ ⵜⴰⵙⵙⴰⵙⵜ ⴰⴳⵓⵏⵙ ⵏ ⵓⵙⴰⵢⵔⴰⵔ ⴰⵙⵏⵖⵎⴰⵙ ⴰⵎⴰⵢⵏⵓ ⵉⵡⵔⵉⵏ ⵉ ⵉⵡⵜⵜⴰ, ⵙ ⵓⴱⵔⵉⴷ ⵏ ⵓⵙⴼⵙⵔ ⵏ ⵜⵓⵎⴰⵢⵉⵏ ⴳ ⵜⵙⵉⵍⴰⵡⵉⵏ ⵜⵉⵎⵓⵟⵟⵓⵏⵉⵏ”.

ⵜⵙⴷⴷⵉⴷ ⴷⵉⵖ ⵎⴰⵙⵙⴰ ⵍⴰⵟⵉⴼⴰ ⴰⵅⴰⵔⴱⴰⵛ, ⵍⵍⵉⴳ ⵜⵙⴰⵡⵍ ⵙ ⵢⵉⵙⵎ ⵏ ⵜⵎⵔⵙⴰⵍ ⵜⵉⴼⵔⵉⵇⵉⵏ ⵏ ⵓⵙⵏⴰⵎ ⵏ ⵓⵙⵏⵖⵎⵙ ⵉⵡⵏⴰⵏ ⵏ ⵓⵙⵏⵓⴱⴳ ⵏⵏⴰ ⵙⵏ ⵉⵙⵙⴽⵔ ⵓⵏⵙⵙⵉⵅⴼ ⵏ ⵜⴳⴷⵓⴷⴰⵏⵜ ⵏ ⵏⵏⵉⵊⵉⵔ, ⵎⴰⵙⵙ ⵎⵓⵃⴰⵎⴷ ⴱⴰⵥⵓⵎ, ⵉⵙ ⵉⴳⴰ ⵓⵙⵓⵔⵙ ⵏⵏⴰ ⵏⵏⴰⵍⵏⵜ ⵜⵎⵔⵙⴰⵍ ⵏ ⵓⵙⵏⴰⵎ ⴳ ⵓⵎⵏⵥⴰⵡ ⴰⵙⵔⵓⵙ ⵏ ⵢⴰⵏ ⵓⵣⵓⵔⵜ ⵏ ⵓⵙⵏⴰⵎ ⵏⵏⴰ ⵉⴼⵔⵔⴳⵏ ⵉ ⵜⵍⴻⵍⵍⵉⵡⵉⵏ ⵜⵉⴷⵙⵍⴰⵏⵉⵏ ⴷ ⵓⵙⵏⵎⴰⵍⴰ ⴰⵎⴰⵜⴰⵢ, ⴷⴷⴰⵡ ⵓⵏⴳⵔⴰⵡ ⴰⵎⴰⵢⵏⵓ ⵏ ⵓⵎⵢⴰⵡⴰⴹ ⴰⵎⵓⵟⵟⵓⵏ ⴰⵎⴰⵜⴰⵢ.

ⵜⴰⵎⵓ ⴳ ⵓⴽⴰⴱⴰⵕ ⴰⵎⵖⵔⴰⴱⵉ ⴳ ⵓⵎⵙⴳⵔⴰⵡ ⴰⴷ ⴰⵎⴰⴹⵍⴰⵏ ⴰⵅⴰⵜⴰⵔ ⴳ ⴰⵎⵓⵏ ⴽⵉⴳⴰⵏ ⵏ ⵜⵎⵔⵙⴰⵍ ⵏ ⵓⵙⵏⴰⵎ ⵏ ⵓⵙⵏⵖⵎⵙ ⵉⵎⵙⵍⴰⴹⵏ ⵏ ⵓⵥⵟⵟⴰ ⴰⴼⵔⴰⵏⴽⵓⴼⵓⵏ ⴰⵡⴷ ⵎⴰⵙⵙⴰ ⴱⴰⴷⵉⵄⴰ ⵕⵕⴰⴹⵉ, ⵜⴰⴳⵎⴰⵎⵜ ⵏ ⵓⵙⵇⵇⵉⵎ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ, ⴷ ⵎⴰⵙⵙ ⵟⴰⵍⴰⵍ ⵚⴰⵍⴰⵃ ⴷⴷⵉⵏ, ⴰⵏⵙⵙⵉⵅⴼ ⵏ ⵜⴳⵣⵣⵓⵎⵜ ⵏ ⵜⵖⴰⵡⵙⵉⵡⵉⵏ ⵜⵉⴼⵔⵉⵇⵉⵏ ⴷ ⵜⴳⵔⴰⵖⵍⴰⵏⵉⵏ ⵉⵣⴷⵉⵏ ⴷ ⵓⴳⵔⴰⵡ ⴰⵎⴰⵜⵜⴰⵢ.