ⴳ ⵓⵙⴰⵜⵉ ⵏ ⵓⵙⴷⵓⵙ ⵏ ⵉⵣⴷⴰⵢⵏ ⵏ ⵓⵎⵢⴰⵡⴰⵙ ⴳⵔ ⵜⵎⵔⵙⴰⵍ ⵜⵉⴼⵔⵉⵇⵉⵏ ⵏ ⵓⵙⵍⴳⵏ ⵏ ⵓⵙⵏⵖⵎⵙ, ⵜⵙⵙⴽⵔ ⵜⵙⵍⵡⴰⵢⵜ ⵏ ⵓⴳⵔⴰⵡ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ, ⵎⴰⵙⵙⴰ ⵍⴰⵟⵉⴼⴰ ⴰⵅⴰⵔⴱⴰⵛ, ⵓⵙⵙⴰⵏ ⵏ 25 ⴷ 26 ⵎⴰⵕⵙ 2026, ⵢⴰⵏ ⵓⵔⵣⴰⴼ ⵏ ⵜⵡⵓⵔⵉ ⵖⵔ ⵏⵉⵢⴰⵎⵉ, ⵙ ⵜⵖⵓⵔⵉ ⵏ ⵎⴰⵙⵙ ⵎⴰⵏⵣⵓ ⴷⵉⵢⴰⵍⵓ, ⴰⵙⵍⵡⴰⵢ ⵏ ⵓⵙⴰⴹⴰⴼ ⴰⵏⴰⵎⵓⵔ ⵏ ⵓⵎⵢⴰⵡⴰⴹ (ONC) ⴳ ⵏⵉⵊⵉⵔ.
ⵢⵓⵙⴰ ⴷ ⵓⵔⵣⴰⴼ ⴰⴷ ⴳ ⵜⴷⵉⵏⴰⵎⵉⵜ ⵏ ⵓⵙⴷⵓⵙ ⵏ ⵓⵎⵢⴰⵡⴰⵙ ⴰⵙⵉⵏⵔⴰⵏ ⵉⵍⵍⴰⵏ ⴳⵔ ⵓⴳⵔⴰⵡ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ ⴷ ⵓⵙⴰⴹⴰⴼ ⴰⵏⴰⵎⵓⵔ ⴰⵏⵉⵊⵉⵔⵉ, ⵜⴰⵎⵔⵙⵍⵜ ⵜⴰⵎⴰⵢⵏⵓⵜ ⵜⴰⵏⵉⵊⵉⵔⵉⵜ ⵢⵓⴳⴳⴰⵏ ⵅⴼ ⵓⵙⵍⴳⵏ ⵏ ⵓⵙⵏⵖⵎⵙ, ⴷ ⵉⵍⵓⵍⴰⵏ ⴳ ⵡⴰⵢⵓⵔ ⵏ ⵛⵜⴰⵎⴱⵉⵔ 2025 ⴳ ⵓⴷⵖⴰⵔ ⵏ ⵓⵙⵇⵇⵉⵎ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ.
ⵉⵡⵏⴰⵏ ⵏ ⵓⵔⵣⴰⴼ ⵏⵏⵙ ⵉ ⵏⵢⴰⵎⵉ, ⵜⴰⵎⵓ ⵜⵙⵍⵡⴰⵢⵜ ⵎⴰⵙⵙⴰ ⵍⴰⵟⵉⴼⴰ ⴰⵅⴰⵔⴱⴰⵛ ⴳ ⵢⴰⵏ ⵓⴳⵉⵡⵔ ⴷ ⵓⵙⵍⵡⴰⵢ ⵏ ⵓⵙⵇⵇⵉⵎ ⴰⵎⵛⵛⵉⵡⵕ ⵏ ⵜⵓⵚⴽⴰ, (ⴰⴱⵕⵍⴰⵎⴰⵏ ⵉⵏⴽⵍⵉ) ⵎⴰⵙⵙ ⵎⴰⵎⴰⴷⵓ ⴷⵊⵉⵏⴳⴰⵔⵉ ⵏⵜⵜⴰ ⴷ ⵓⵎⴰⵡⵙⴰⵙ ⴰⵎⵣⵡⴰⵔⵓ, ⵎⴰⵙⵙ ⵄⵍⵉ ⵎⴰⵃⵎⴰⵏ ⵍⴰⵎⵉⵏ ⵣⵉⵏ, ⴰⵢⴰ ⵉⴳⴰ ⵜⴰⵎⴰⵜⴰⵔⵜ ⵏ ⵓⵙⵙⵎⵖⵔ ⵏ ⵜⵏⴱⴰⴹⵜ ⵜⴰⵏⵉⵊⵉⵔⵉⵢⵜ ⵙ ⵜⵙⵎⵉⴳⵍⵜ ⴰⴷ ⵜⴰⵎⵔⵙⴰⵍⵜ.
ⵉⵎⵛⴰⵡⴰⵕⵏ ⴳⵔ ⵙⵏⴰⵜ ⵜⵎⵔⵙⴰⵍ ⵏ ⵓⵙⵍⴳⵏ ⵉⵡⵉⵏ ⴷ ⵅⴼ ⵜⵎⵙⴰⵍⵉⵏ ⵎⵉ ⵖⵓⵔ ⵉⵍⵍⴰ ⵓⴱⵖⵓⵔ ⵉⵛⵛⴰⵔⵏ ⵉⵣⴷⵉⵏ ⴷ ⵉⵎⵓⵜⵜⵓⵢⵏ ⵏ ⵜⵡⵏⵏⴰⴹⵜ ⵜⴰⵖⴰⵎⵙⴰⵏⵜ, ⵙ ⵉⵎⵥⵍⵉ ⴰⵙⵏⴰⵎ ⵏ ⵜⵙⵎⵉⴳⵍⵉⵏ ⴷ ⵉⵎⴰⵙⵙⵏ ⵏ ⵓⵙⵍⴳⵏ ⵉ ⵉⵎⵓⵜⵜⵓⵢⵏ ⵏⵏⴰ ⴷ ⵢⵉⵡⵉ ⵓⵎⵓⵟⵟⵓⵏ, ⴷ ⵜⵉⵍⴰⵍⵜ ⵏ ⵜⵏⴰⴼⵓⵜ ⵜⴰⴳⴷⵓⴷⴰⵏⵜ ⵜⴰⵙⵍⵉⵥⵕⵜ ⴳ ⵓⴼⵔⴰⴳ ⵏ ⵡⴰⴱⴰⴹ ⴰⵖⵎⵙⴰⵏ ⵏ ⵜⵎⵓⵔⴰ ⵜⵉⴼⵔⵉⵇⵉⵏ, ⴷ ⵉⵎⵉⴽⴰⵏⵉⵣⵎⵏ ⵏ ⵓⵎⵏⵏⵓⵖ ⵎⴳⴰⵍ ⵉⵏⵖⵎⵉⵙⵏ ⵏ ⵜⴽⵔⴽⴰⵙ.
ⴳ ⵜⵙⴳⴰ ⵢⴰⴹⵏ, ⵜⵙⵙⴳⵎⴹ ⵎⴰⵙⵙⴰ ⴰⵅⴰⵔⴱⴰⵛ ⵏⵜⵜⴰⵜ ⴷ ⵎⴰⵙⵙ ⵉⴱⵕⴰⵀⵉⵎ ⵎⴰⵏⵣⵓ ⴷⵉⵢⴰⵍⵓ ⵙ ⵓⵣⵎⵣⵣⵓ ⵢⴰⴷ, ⵢⴰⵜ ⵜⵎⵢⴰⵇⵇⴰⵏⵜ ⵉⵣⴷⵉⵏ ⵙ ⵓⵙⵔⵔⵓⵙ, ⴳ ⵡⴰⵎⵎⴰⵙ ⵏ ⵓⵙⵡⵓⴷⴷⵓ ⵏ ⵓⵙⴰⴹⴰⴼ ⴰⵏⴰⵎⵓⵔ ⴰⵏⵉⵊⵉⵔⵉ, ⵏ ⵜⵙⵏⵖⵍⵜ ⵉⵜⵜⵓⵙⴷⵖⵉⵏ ⵏ ⵓⴼⵙⴰⵢ ⴰⵜⵉⴽⵏⵓⵍⵓⵊⵉ HMS+ (ⵀⴰⴽⴰ ⵎⵉⴷⵢⴰ ⵙⵓⵍⵓⵛⵏⵙ),  ⵏⵏⴰ ⵙⵙⴽⵔⵏ ⵉⵎⴰⵙⵙⴰⵏⵏ ⵏ ⵓⴳⵔⴰⵡ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ. ⴰⴼⵙⴰⵢ ⴰⴷ ⵉⵜⵜⵓⵡⴰⴽⵣ ⴳ ⵢⵉⴳⵔ ⴰⴳⵔⴰⵖⵍⴰⵏ ⵉⵙ ⵉⴳⴰ ⵉⵎⴰⵙⵙⵏ ⵉⵕⵡⴰⵏ ⵏ ⵓⵙⵡⵓⴷⴷⵓ ⴷ ⵓⴹⴼⴼⵓⵕ ⵏ ⵉⵖⴰⵡⴰⵙⵏ ⵉⵙⵍⵉⵥⵕⵏ.
ⴳ ⵓⵖⴰⵡⴰⵙ ⴰⴳⵜⵉⵔⴰⵏ, ⵉⵡⵉⵏ ⴷ ⵉⵎⵛⴰⵡⴰⵕⵏ ⵅⴼ ⵜⵅⵉⵜⵔⵜ ⵏ ⵜⵡⵓⵔⵉ ⵏ ⵜⵎⵓⵔⴰ ⵏ ⵜⴼⵔⵉⵇⵜ ⴰⴳⵓⵏⵙ ⵏ ⵓⵥⵟⵟⴰ ⵏ ⵜⵎⵔⵙⴰⵍ ⵜⵉⴼⵔⵉⵇⵉⵏ ⵏ ⵓⵙⵍⴳⵏ ⵏ ⵓⵎⵢⴰⵡⴰⴹ, ⴷ ⵓⴱⴰⵖⵓⵔ ⴰⵙⵜⵔⴰⵜⵉⵊⵉ ⵏ ⵓⵎⵙⴰⵡⴰⵍ ⵉⵍⵍⴰⵏ ⴳⵔ ⵓⵥⵟⵟⴰ ⵢⴰⴷ ⴷ ⵜⵙⴰⵍⵉⵡⵉⵏ ⵜⵉⵎⵇⵔⴰⵏⵉⵏ ⵜⵉⵎⵓⵟⵟⵓⵏⵉⵏ ⵜⵉⴳⵔⴰⵖⵍⴰⵏⵉⵏ, ⵙ ⵉⵎⵥⵍⵉ ⴳ ⵢⵉⴳⵔ ⵏ ⵓⴼⵔⴰⴳ ⵏ ⵉⵣⵔⴼⴰⵏ ⴳ ⵉⴼⵉⵍⵉ ⵏ ⵉⵎⵙⵡⵓⵔⴰ ⵉⴼⵔⵉⵇⵏ.
ⴰⵖⴰⵡⴰⵙ ⵏ ⵓⴽⴰⴱⴰⵕ ⴰⵎⵖⵔⴰⴱⵉ ⴳ ⵏⵉⵢⴰⵎⵉ ⴷⵉⴳⵙ ⴰⵡⴷ ⴰⵔⵣⴰⴼ ⵏ ⵉⵎⵡⵓⵔⴰ ⵉⵙⵍⵉⵥⵕⵏ ⵉⵏⵉⵊⵉⵔⵉⵢⵏ ⵉⵣⴷⵉⵏ ⵙ ⵢⵉⴳⵔ ⴰⴳⴷⵓⴷⴰⵏ ⴷ ⵡⵓⵙⵍⵉⴳ.
ⵉⵡⵏⴰⵏ ⵏ ⵓⵔⵣⴰⴼ ⴰⴷ, ⵜⵎⵓⵏ ⵜⵙⵍⵡⴰⵢⵜ ⵏ ⵓⴳⵔⴰⵡ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ ⴰⴽⴷ ⵎⴰⵙⵙ ⵏⴰⴷⵉⵔ ⵟⴰⵀⵉⵔ, ⴰⵏⵎⵀⴰⵍ ⵏ ⵜⵣⵓⵏⵉ ⵏ ⵓⴹⴼⴼⵓⵕ ⵏ ⵉⵖⴰⵡⴰⵙⵏ, ⴷ ⵎⴰⵙⵙ ⵟⴰⵍⴰⵍ ⵚⴰⵍⴰⵃⴷⴷⵉⵏ, ⴰⵎⵙⵡⵓⴷⴷⵓ ⵏ ⵜⵖⴰⵡⵙⵉⵡⵉⵏ ⵜⵉⴼⵔⵉⵇⵉⵏ ⴷ ⵜⴳⵔⴰⵖⵍⴰⵏⵉⵏ.