ⴷⴼⴼⵉⵔ ⴰⵏⴷⵓⴷⵉ ⵏ 8 ⵛⵜⴰⵎⴱⵉⵔ ⴰⵎⴳⴳⴰⵔⵓ, ⵉⵙⵙⴽⵔ  ⵓⴳⵔⴰⵡ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ ⵢⴰⵏ ⵓⵎⵣⵉⵣⵣⵍ ⵉⵥⵍⵉⵏ ⵏ ⵓⵙⵖⴰⵍ ⴷ  ⵜⵎⴳⴳⵉⵡⵙⵜ ⵜⴰⵜⵉⵇⵏⵉⵜ ⴰⴼⴰⴷ ⴰⴷ ⵉⵙⵜⵍ ⴰⴷⴰⵙⵉⵍ ⵏ ⵜⵕⵓⵥⵉⵡⵉⵏ ⵏⵏⴰ ⵢⵉⵡⴹⵏ ⵉⵎⴰⵙⵙⵏ ⵏ ⵓⵣⵓⵣⵣⵔ ⵅⴼ ⵜⴷⵓⵍⵉ ⵜⴰⵏⵣⵡⴰⵢⵜ ⵉⴼ-ⵉⵎ ⴷ ⵜⴷⵓⵍⵉ ⵜⴰⵜⵍⴼⴰⵣⵜ ⵜⴰⵎⵓⵟⵟⵓⵏⵜ ⵜⴰⵏⴰⴽⴰⵍⵜ (TNT) ⴰⴳⵓⵏⵙ ⵏ ⵜⵎⵏⴰⴹⵉⵏ ⴰⴷ.

ⵜⴰⵡⵓⵔⵉ ⵢⴰⴷ, ⵔⴰⴷ ⵜⵜ ⵙⵙⴽⵔⵏ ⵉⵜⵉⵇⵏⵉⵢⵏ ⴷ ⵉⵏⵎⴰⵜⴰⵔⵏ ⵉⵎⵙⴳⵉⵍⵍⵏ ⵏ ⵜⵎⵔⵙⵍⵜ ⵏ ⵓⵙⵍⴳⵏ, ⵜⴰⵎⵀⵍⵜ ⴰⴷ ⵏ ⵓⵙⵉⴹⵏ ⴷ ⵡⴰⴽⴰⵣ ⵉⵜⵜⵓⵙⵏⵎⴰⵍⴰⵏ ⴳⵔ 18 ⴷ 27 ⵛⵜⴰⵎⴱⵉⵔ 2023, ⵜⴻⵜⵜⵓⵙⴽⵔ ⴳ 15 ⵏ ⵡⴰⵎⵎⴰⵙⵏ ⵏ ⵓⵣⵓⵣⵣⵔ ⵉⵍⵍⴰⵏ ⴳ ⵜⵎⴷⵉⵏⵉⵏ ⴷ ⵉⴷⵖⴰⵔⵏ ⵏ ⵙⵅⵓⵕ ⵕⵃⴰⵎⵏⴰ, ⵎⵕⵕⴰⴽⵛ (ⵓⴽⴰⵢⵎⴷⵏ), ⵎⵥⵓⴹⴰ, ⵉⵎⵉ ⵏ ⵜⴰⵏⵓⵜ, ⴰⵔⴳⴰⵏⴰ, ⴰⵙⴽⴰⵍ, ⴰⴳⴰⴷⵉⵔ ⵓⴼⵍⵍⴰ, ⵜⴰⵔⵓⴷⴰⵏⵜ (ⵜⴰⵣⵎⵎⵓⵔⵜ), ⵓⵍⴰⴷ ⴱⵕⵕⵃⵉⵍ, ⴰⵡⵍⵓⵥ, ⵜⴰⵍⵉⵡⵉⵏ, ⵜⴰⵣⵏⴰⵅⵜ, ⵡⴰⵔⵣⴰⵣⴰⵜ, ⵜⴰⵍⴰⵜ ⵏ ⵢⴰⵄⵇⵓⴱ ⴷ ⴷⵎⵏⴰⵜ.

ⵙⵙⴽⵔⵏⵜ ⵜⵔⴰⴱⴱⵓⵜⵉⵏ ⵏ ⵓⴳⵔⴰⵡ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ ⵢⴰⵜ ⵜⵏⵎⵎⴰⵍⵜ ⵏ ⵜⴷⵓⵍⵉ ⵜⴰⵏⵣⵡⴰⵢⵜ ⵉⴼⵉⵎ ⵜⴰⵖⵣⵉ ⵏ ⵢⴰⵏ ⵓⵖⴰⵔⴰⵙ ⵏ 2010 ⵏ ⵉⴽⵉⵍⵓⵎⵉⵜⵔⵏ ⴷ ⵜⵏⵎⵎⴰⵍⵜ ⵏ ⵜⴷⵓⵍⵉ ⵏ TNT ⴳ ⴽⵓ ⵜⴰⵎⵏⴰⴹⵜ ⵉⵜⵜⵓⵡⴰⵜⵙⵏ.

ⴳ ⵜⴳⵉⵔⴰ ⵏ ⵜⵎⵣⴰⵣⵣⵍⵜ ⴰⴷ, ⴽⵉⴳⴰⵏ ⵏ ⵜⵔⴳⴰⵍⵉⵏ ⴰⵢ ⵉⵜⵜⵓⵙⵔⵙⵏ.

-      ⴳ ⵉⴹⵖⴰⵔⵏ ⵏ ⵓⵣⵓⵣⵣⵔ ⵉⵜⵜⵓⴳⵉⵡⵙⵏ, ⴽⵉⴳⴰⵏ ⵏ ⵜⵓⵚⴽⵉⵡⵉⵏ ⴰⵢ ⴽⴽⴰⵏ ⵉⴼⵅⵙⴰ ⵏⵖ ⵕⵕⵥⴰⵏⵜ. ⴰⵛⴽⵓ ⵏⵎⴰⵍⴰⵏⵜ ⴽⵉⴳⴰⵏ ⵉ ⵡⴰⵎⵎⴰⵙ ⵏ ⵓⵏⴷⵓⴷⵉ, ⴰⵎⵎⴰⵙ ⵏ ⵓⵣⵓⵣⵣⵔ ⵏ ⵜⴰⵍⴰⵜ ⵏ ⵢⵄⵇⵓⴱ ⵙ ⵓⵎⴷⵢⴰ ⴰⵢ ⵕⵕⵥⴰⵏ ⴽⵉⴳⴰⵏ ⵙ ⵉⵎⵥⵍⵉ ⴳ ⵓⵙⵡⵉⵔ ⵏ ⵓⵏⴳⵔⴰⵡ ⵏ ⵉⵎⵣⴳⵉⵡⵏ ⵏ ⵓⵣⵓⵣⵣⵓⵔ ⵏ TNT. ⴰⵢⴰ ⵢⵓⴷⵊⴰ ⵉⵎⴰⵙⴰⵢⵏ ⵏ ⵉⵎⴰⵙⵙⵏ ⴰⴷ, ⴰⴷ ⵙⵏⴼⵍⵏ ⵉⵎⵣⴳⵉⵡⵏ ⵉⵕⵕⵥⴰⵏ ⵙ ⵡⵉⵢⴰⴹ ⵏ ⵜⴰⵍⵉⵍⵜ. ⵙ ⵓⵢⴰ, ⵔⴰⴷ ⴹⵎⵏⵏ ⵜⴰⵙⵓⵍⵜ ⵏ ⵢⵉⵎⵥ ⵏ ⵉⵜⵉⵍⵉⴼⵉⵣⵢⵓⵏⵏ ⵉⴳⴷⵓⴷⴰⵏⵏ ⵙ ⵓⴱⵔⵉⴷ ⴰⵀⵉⵔⵜⵣⵉ ⴰⵡⴰⴽⴰⵍ ⴳ ⵓⵙⵡⵉⵔ ⵏ ⵓⴷⵖⴰⵔ ⴰⴷ ⵏⵏⴰ ⵉⵕⵕⵥⴰ ⴽⵉⴳⴰⵏ ⵓⵏⴷⵓⴷⵉ ⵏ 08 ⵛⵜⴰⵎⴱⵉⵔ.

-      ⴳ ⵓⵢⵏⵏⴰ ⵉⵣⴷⵉⵏ ⴷ ⵜⵏⴰⴼⵓⵜⵉⵏ ⵜⵉⵏⵣⵡⴰⵢⵉⵏ ⵙ ⵉⴼ-ⵉⵎ, ⴰⵎⵣⵉⵣⵣⵍ ⵏ ⵓⵙⵖⴰⵍ ⵉⵜⵜⵓⵙⴽⵔⵏ ⴷⴰ ⵉⵙⵙⴽⴰⵏ ⵉⵙ ⵜⴰⴷⵓⵍⵉ ⵜⴰⵏⵣⵡⴰⵢⵜ ⵓⵔ ⵜⴻⵜⵜⵓⴹⴰⵙ ⵙ ⵓⵎⴰⵜⴰ ⵎⵇⵇⴰⵔ ⵉⵅⴰⵜⵔ ⵓⵏⴷⵓⴷⵉ. ⵉⵎⴰⵙⵙⵏ ⵏ ⵓⵣⵓⵣⵣⵔ ⵏ ⵜⵏⴰⴼⵓⵜⵉⵏ ⵜⵉⵏⵣⵡⴰⵢⵉⵏ ⵜⵉⵏⴰⵎⵓⵔⵉⵏ, ⵜⵉⴳⴷⵓⴷⴰⵏⵉⵏ ⴷ ⵜⵓⵙⵍⵉⴳⵉⵏ, ⵓⵔ ⵜⵏ ⵜⵟⵟⴰⵚ ⵜⵕⵓⵥⵉ ⵏⵏⴰ ⵉⵖⵉⵢⵏ ⴰⴷ ⵉⵙⴱⴷⴷ ⵉⵎⵥ ⵏ ⵉⵕⴰⴷⵢⵓⵜⵏ ⵉⴼ-ⵉⵎ ⵖⵓⵔ ⵉⵏⵎⵓⵔⵉⵏ.

-      ⴳ ⵓⵎⵏⴰⴹ ⵏ ⵓⵖⵉⵡⵍ ⴷ ⵜⴰⵙⵙⴰⵙⵜ ⵜⴰⵎⵇⵔⴰⵏⵜ ⵏⵏⴰ ⵉⴳⴰ ⵓⵏⴷⵓⴷⵉ ⵏ 8 ⵛⵜⴰⵎⴱⵉⵔ, ⵜⴰⵙⵓⵍⵜ ⵏ ⵜⵏⴰⴼⵓⵜ ⵏ ⵓⵣⵓⵣⵣⵔ ⴰⵏⵣⵡⴰⵢ ⴷ ⵓⵙⵍⵉⵥⵕ ⵜⵜⵓⴹⵎⵏⵏ ⵙ ⴽⵉⴳⴰⵏ ⵏ ⵉⵎⴰⵙⵙⵏ, ⵙ ⵉⵎⵥⵍⵉ ⴰⵙⵔⵔⵓⵙ ⵏ ⴽⵉⴳⴰⵏ ⵏ ⵉⵎⵙⵙⵉⴼⴹⵏ ⵉ ⴽⵓ ⵢⴰⵜ ⴳ ⵜⵏⴰⴼⵓⵜⵉⵏ ⵜⵉⵙⵍⵉⵥⵕⵉⵏ ⵏⵏⴰ ⵉⵙⵡⵓⵔⵉⵏ ⴳ ⵜⵎⵏⴰⴹⵜ.

ⴳ ⵓⵢⵏⵏⴰ ⵉⵣⴷⵉⵏ ⴷ ⵓⵢⴰⴷ, ⴳ ⵉⵙⴳⴳⵯⴰⵙⵏ ⴰⴷ ⵉⵎⴳⴳⵓⵔⴰ, ⵜⴻⵜⵜⵓⵙⴽⵔ ⵜⵣⵎⵎⴰⵔⵜ ⵜⴰⵅⴰⵜⴰⵔⵜ ⵙⴳ ⵖⵓⵔ ⵓⴳⵊⴷⵉ ⴰⴳⴷⵓⴷⴰⵏ ⵏ ⵓⵙⵍⵉⵥⵕ ⴷ ⵉⵎⵡⵓⵔⴰ ⵓⵙⵍⵉⴳⵏ ⴰⴼⴰⴷ ⴰⴷ ⵙⵅⵉⵜⵔⵏ ⵜⴰⴷⵓⵍⵉ ⵜⴰⵙⵍⵉⵥⵕⵜ ⴳ ⵜⵎⵏⴰⴹⵉⵏ ⵢⴰⴳⴳⵓⴳⵏ. ⴰⴼⴰⴷ ⴰⴷ ⵜⵙⵎⵓⵙⵙ ⴰⵙⵓⵎⵓ ⴰⵡⴰⴽⴰⵍ ⴳ ⵓⵢⵏⵏⴰ ⵉⵣⴷⵉⵏ ⴷ ⵜⴷⵓⵍⵉ ⵜⴰⵏⵣⵡⴰⵢⵜ, ⵉⵙⵓⵍ ⵓⵙⵇⵇⵉⵎ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ ⵢⵓⴳⴳⴰ ⵅⴼ ⵓⵙⵙⵓⵊⴷ ⵉ ⵉⵎⵡⵓⵔⴰ ⵓⵙⵍⵉⴳⵏ ⵉⵙⴰⴳⴰⵎⵏ ⵏⵏⴰ ⵏ ⵉⵇⵇⴰⵏⵏ ⴰⴼⴰⴷ ⴰⴷ ⵜⵏ ⵉⵙⵙⴱⵖⵙ ⴰⴷ ⴷⵍⵏ ⵜⵉⵎⵏⴰⴹⵉⵏ ⵢⴰⴳⴳⵓⴳⵏ.

-      ⵉⵏⵎⴰⵜⴰⵔⵏ ⵏ ⵓⴳⵔⴰⵡ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ ⵉⵡⴹⵏ ⴰⴷ ⵙⵖⵍⵏ ⵉⵡⵏⴰⵏ ⵏ ⵓⵎⵣⴰⵣⵣⴰⵍ ⴰⴷ ⵏ ⵓⵙⵜⴰⵍ, ⵉⵊⵎⵉⵍⵏ ⵏⵏⴰ ⴷ ⵢⵉⵡⵉ ⵓⵎⵙⴰⵙⴰ ⵏ ⵜⴷⵓⵍⵉ ⴳⵔ ⵉⵙⵓⵔⵙⵏ ⵏ ⵓⵣⵓⵣⵣⵔ ⵉⵍⵍⴰⵏ ⴳ ⵉⴷⵔⴰⵔⵏ ⵎⵇⵇⵓⵔⵏ (ⵓⴽⴰⵢⵎⴷⵏ, ⴰⵙⴽⴰⵍ, ⴰⵔⴳⴰⵏⴰ ⴷ ⵜⴰⵣⵎⵎⵓⵔⵜ ⵙ ⵓⵎⴷⵢⴰ) ⴷ ⵉⵙⵔⵓⵙⵏ ⵉⵍⵍⴰⵏ ⴳ ⵜⵎⵉⵣⴰⵔ ⵜⵉⴼⴰⵔⴰⵏⵉⵏ ⵏⵖ ⵜⵉⵎⴷⵉⵏⵉⵏ (ⵎⵥⵓⴹⴰ, ⵉⵎⵉ ⵏ ⵜⴰⵏⵓⵜ, ⴰⵡⵍⵓⵥ, ⵜⴰⵍⵉⵡⵉⵏ, ⵜⴰⵣⵏⴰⵅⵜ, ⵜⴰⵍⴰⵜ ⵏ ⵢⵄⵇⵓⴱ ⴷ ⴷⵎⵏⴰⵜ, ⴰⵜⴳ) ⵉⵍⵍⴰⵏ ⴳ ⵜⵎⵏⴰⴹⵉⵏ ⵏ ⵍⴰⵟⵍⴰⵙ ⴰⵎⵥⵢⴰⵏ ⴷ ⵍⴰⵟⵍⴰⵙ ⴰⵎⵇⵔⴰⵏ.

ⴳⵔ ⵉⵙⵍⵎⴷⵏ ⵢⴰⴹⵏ ⴳ ⵓⵙⴰⵢⵙ ⵏⵏⴰ ⴷ ⵜⵙⵙⵓⴼⵖ ⵜⵙⵎⵉⴳⵍⵜ ⴰⴷ ⵉⴳⴰ ⴱⵟⵟⵓ ⵏ ⵜⵓⵚⴽⵉⵡⵉⵏ ⵏ ⵓⵣⵓⵣⵣⵔ ⵏ ⵜⵙⵏⵓⵔⴰⵢⵜ ⵜⴰⵏⴰⵎⵓⵔⵜ ⵏ ⵓⵏⵣⵡⵉ ⴷ ⵓⵜⵉⵍⵉⴼⵉⵣⵢⵓⵏ ⴰⴽⴷ ⵉⵎⵡⵓⵔⴰ ⵓⵙⵍⵉⴳⵏ ⵏ ⵜⵏⵣⵡⴰⵢⵜ ⴷ ⵓⵜⵉⵍⵉⵥⵕⵉ ⵉⴳⴰ ⵢⴰⵏ ⵓⴱⵖⵓⵔ ⵉ ⵉⵏⵎⵓⵔⵉⵏ ⵉⵎⵖⵔⴰⴱⵉⵢⵏ ⵉⵙⵡⵓⵔⵉⵏ ⵉⵎⴰⵙⵙⵏ ⵏ ⵓⵙⵏⵖⵎⵙ ⵉⴳ ⴷⵉⵖ ⵓⵎⵄⵉⵏ ⴳ ⵓⴹⵎⴰⵏ ⵏ ⵡⴰⴷⴰⴼ ⵖⵔ ⵉⵏⵖⵎⵉⵙⵏ ⴳ ⵓⵣⵎⵣ ⵏ ⵜⴰⵙⵙⴰⵙⵉⵏ ⵜⵉⴼⴰⵔⴰⵏⵉⵏ ⴳ ⵡⴰⴷⴷⴰⴷ ⵏ ⵓⵖⵉⵡⵍ.