ⵜⴻⵜⵜⵓⵙⵏⵓⴱⴳ ⵜⵏⵙⵙⵉⵅⴼⵜ ⵏ ⵓⴳⵔⴰⵡ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ, ⵎⴰⵙⵙⴰ ⵍⴰⵟⵉⴼⴰ ⴰⵅⴰⵔⴱⴰⵛ, ⴰⵙⵙ ⵏ 03 ⴽⵜⵓⴱⵕ 2023, ⵖⵓⵔ ⵎⴰⵙⵙ ⵖⴰⵣⴰⵍⵉ ⵄⴰⵜⵎⴰⵏⵉ, ⴰⵏⵙⵙⵉⵅⴼ ⵏ ⵜⴰⵎⵓⵏⵜ ⵏ ⵜⴳⵣⵉⵔⵉⵏ ⵏ ⵍⵇⵓⵎⵓⵕ ⵉⴳ ⴰⵡⴷ ⴰⵏⵙⵙⵉⵅⴼ ⴷⵖⵉ ⵏ ⵜⴰⵎⵓⵏⵜ ⵜⴰⴼⵔⵉⵇⵜ.
ⵉⵡⵏⴰⵏ ⵏ ⵓⵙⵏⵓⴱⴳ ⴰⴷ, ⵉⵜⵜⵓⵙⴽⵔⵏ ⴳ ⵉⵖⵔⵎ ⴰⵏⵙⵙⵉⵅⴼ « ⵜⵉⴳⵎⵎⵉ ⵏ ⵜⵓⵎⵔⵜ » ⴳ ⵜⵎⵏⵥⵥⵓⵏⵜ ⵎⵓⵕⵓⵏⵉ, ⵉⵙⵙⵎⵖⵓⵔ ⵓⵏⵙⵙⵉⵅⴼ ⵖⴰⵣⴰⵍⵉ ⵄⵜⵎⴰⵏⵉ ⵙ ⵓⵣⴳⴳⵓⵔ ⴰⵎⵏⵥⴰⵡ ⵏ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵄⵃⵎⴷ ⵡⵉⵙⵙ ⵙⴹⵉⵙ, ⵉⵙⵙⵎⵖⵓⵔ ⴰⵡⴷ ⵙ ⵉⵣⴷⴰⵢⵏ ⵉⵕⵡⴰⵏ ⴷⴳ ⵜⵎⵓⵔⴰ ⵙ ⵙⵏⴰⵜ ⴷ ⵓⵎⵢⴰⵡⴰⵙ ⵉⵍⵍⴰⵏ ⴳⵔⴰⵙⵏⵜ. ⴷⴼⴼⵉⵔ ⴰⵢⴰ, ⵉⵏⵏⴰ ⵓⵏⵙⵙⵉⵅⴼ ⵏ ⵜⴳⵣⵉⵔⵉⵏ ⵏ ⵍⵇⵓⵎⵓⵕ ⵜⴰⵏⵎⵎⵉⵔⵜ ⵏⵏⵙ ⵉ ⵜⴳⵍⴷⵉⵜ ⵏ ⵍⵎⵖⵔⵉⴱ ⵉⵙⵙⴱⵖⵙ ⵙ ⵓⵙⵎⵓⵙⵙⵓ ⵏ ⵓⴳⵔⴰⵡ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ ⵉ ⵜⵎⵓⵣⴰⵢⵜ ⵏⵏⵙ ⴷ ⵢⵉⵔⵎ ⵏⵏⵙ ⴳ ⵓⵙⴷⵓⵙ ⵏ ⵓⴳⵔⴰⵡ ⵏ ⵓⵙⵍⴳⵏ ⴰⵇⵓⵎⵓⵕⵉ, ⴰⵙⵇⵇⵉⵎ ⴰⵏⴰⵎⵓⵔ ⵏ ⵜⵖⴰⵎⵙⴰ ⴷ ⵓⵙⵏⵖⵎⵙ ⴰⵙⵍⵉⵥⵕ, ⵏⵏⴰ ⵉⵙⵙⵏⵜⵉⵏ ⵢⴰⵏ ⵓⵖⴰⵡⴰⵙ ⴰⵅⴰⵜⴰⵔ ⵏ ⵓⵙⵜⵔⴰⵔ ⴷ ⵓⵙⵎⵓⵜⵜⴳ ⴰⵣⵣⵓⵍⴰⵏ. ⵉⵏⵏⴰ ⴷⵉⵖ ⴳ ⵓⵢⵏⵏⴰ ⵉⵣⴷⵉⵏ ⵙ ⵓⵢⴰⴷ, ⴰⵙⴷⵓⵙ ⵏⵏⵙ ⴱⵟⵟⵓ ⵏ ⵢⵉⵔⵎⵏ ⵏⵏⴰ ⵔⴰⴷ ⵉⵙⵎⵔ ⴰⵙⵍⴳⵏ ⵉⵙⴷⵓⵙ ⴰⵎⵢⴰⵡⴰⴹ ⴰⴳⴷⵓⴷⴰⵏ ⴷ ⵜⵡⵓⵔⵉⵡⵉⵏ ⵜⵉⵖⴰⵎⵙⴰⵏⵉⵏ ⵏⵏⴰ ⵉⵜⵜⴰⵜⴳⵏ ⵉ ⵡⴰⵜⵉⴳⵏ ⵏ ⵜⵓⴷⵔⵜ ⵜⴰⵎⴷⵔⴰⵡⵜ ⴷ ⵓⵎⵙⵓⵔⴼ ⴷ ⵜⴳⵎⵉ ⵜⴰⵏⴰⵎⵓⵏⵜ.
ⵉⵡⵏⴰⵏ ⵏ ⵓⵙⵏⵓⴱⴳ ⴰⴷ ⵏⵏⴰ ⴳ ⵉⵃⴰⴹⵕ ⴰⵡⴷ ⵎⴰⵙⵙ ⴰⴱⵓⴱⴽⵔⵉ ⴱⵡⴰⵏⴰ, ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⴰⵏⴰⵎⵓⵔ ⵏ ⵜⵖⴰⵎⵙⴰ ⴷ ⵓⵙⵏⵖⵎⵙ ⴰⵙⵍⵉⵥⵕ, ⴷ ⵎⴰⵙⵙ ⴱⵏⵄⵉⵙⵙⴰ ⵄⴰⵙⵍⵓⵏ, ⴰⵏⵎⵀⴰⵍ ⴰⵎⴰⵜⴰⵢ ⵏ ⵓⴳⵔⴰⵡ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ, ⴷ ⵎⴰⵙⵙ ⴷⵔⵉⵙⵙ ⵄⴰⵍⴰⵡⵉ, ⴰⵏⴱⴷⴰⴷ ⵅⴼ ⵜⵡⵓⵔⵉⵡⵉⵏ ⴳ ⵜⵎⵙⵇⴰⴷⵜ ⵜⴰⵎⵖⵔⴰⴱⵉⵢⵜ ⴳ ⵎⵓⵕⵓⵏⵉ, ⴷ ⵎⴰⵙⵙ ⵟⴰⵍⴰⵍ ⵚⴰⵍⴰⵃ ⴷⴷⵉⵏ, ⴰⵎⴰⵙⴰⵢ ⵏ ⵜⵖⴰⵡⵙⵉⵡⵉⵏ ⵜⵉⴼⵔⵉⵇⵉⵏ ⴳ ⵓⴳⵔⴰⵡ ⴰⵎⴰⵜⵜⴰⵢ, ⵜⴰⴷⴷ ⵜⵏⵙⵙⵉⵅⴼⵜ ⵏ ⵓⴳⵔⴰⵡ ⵏ ⵓⵙⵍⴳⵏ ⴰⵎⵖⵔⴰⴱⵉ ⵉⵙ ⴰⵙⵅⵉⵜⵔ ⵏ ⵓⵎⵢⴰⵡⴰⵙ ⴰⵙⵉⵏⵔⴰⵏ ⴳⵔ ⵍⵎⵖⵔⵉⴱ ⴷ ⵜⴰⵎⵓⵏⵜ ⵏ ⵜⴳⵣⵉⵔⵉⵏ ⵏ ⵍⵇⵓⵎⵓⵕ ⴳ ⵢⵉⴳⵔ ⵏ ⵓⵙⵍⴳⵏ ⴰⵏⵉⵎⴰⵏ ⵏ ⵓⵙⵏⵖⵎⵙ ⵉⴳⴰ ⵓⵎⵓ ⵉⵕⵡⴰⵏ ⴳ ⵜⴷⵉⵏⴰⵎⵉⵜ ⵉⵀⵢⵢⴰⵏ ⵉⵍⵍⴰⵏ ⴳ ⵓⵎⵢⴰⵡⴰⵙ ⵢⴼⴼⵓⵙ-ⵢⴼⴼⵓⵙ ⵏⵏⴰ ⵉⵙⵙⵓⵜⵔ ⴰⵔ ⵜ ⵉⵙⵙⴷⵓⵙ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⵎⴷ ⵡⵉⵙⵙ ⵙⴹⵉⵙ ⴳ ⵜⵏⴰⴼⵓⵜ ⵏ ⵜⴼⵔⵉⵇⵜ ⵉⴷⵓⵙⵏ ⵉⵎⵓⵏⵏ. ⴰⵔ ⵜⵙⵙⵉⴽⵉⵣ ⵎⴰⵙⵙⴰ ⴰⵅⴰⵔⴱⴰⵛ ⵉⵙ « ⴰⵙⵔⵓⵙ ⵏ ⵢⴰⵏ ⵓⵎⵢⴰⵡⴰⵙ ⵓⵎⵀⵉⵍ ⴳⵔ ⵓⴳⵔⴰⵡ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ ⴷ ⵓⵙⵇⵇⵉⵎ ⴰⵏⴰⵎⵓⵔ ⵏ ⵜⵖⴰⵎⵙⴰ ⴷ ⵓⵙⵏⵖⵎⵙ ⴰⵙⵍⵉⵥⵕ ⵔⴰⴷ ⵉⵕⵥⵎ ⴰⴱⵔⵉⴷ ⵉ ⵓⵙⴷⵓⵙ ⵏ ⵢⵉⵔⵎ ⵏ ⵜⵎⵓⵔⴰ ⵙ ⵙⵏⴰⵜ ⴳ ⵢⵉⴳⵔ ⵏ ⵓⵙⵍⴳⵏ ⵏ ⵓⵙⵏⵖⵎⵙ ⵙ ⵉⵎⵥⵍⵉ ⴳ ⵓⵢⵏⵏⴰ ⵉⵣⴷⵉⵏ ⴷ ⵓⵙⴳⵎ ⵏ ⵜⵣⵎⵎⴰⵔ ⵏ ⵓⴳⵔⴰⵡ ⵏ ⵓⵙⵍⴳⵏ, ⴰⵙⵙⵎⵖⵔ ⵏ ⵢⵉⴽⵉ ⴰⵣⵣⵓⵍⴰⵏ, ⴰⵎⵙⴰⵙⴰ ⴳⵔ ⵜⵡⵏⵏⴰⴹⵜ ⵜⴰⵎⵓⵟⵟⵓⵏⵜ ⵜⴰⵎⴰⵢⵏⵓⵜ ⵏ ⵓⵙⵏⵖⵎⵙ ⴷ ⵓⵙⴷⵓⵙ ⵏ ⵓⵣⵔⴼ ⵏ ⵓⵏⵎⵓⵔⵉ ⴳ ⵓⵙⵏⵖⵎⵙ ⵉⵕⵡⴰⵏ ⵏ ⵜⵉⴷⵜ ».
ⵙ ⵓⵙⵎⵣⵣⵓ ⵢⴰⴷ, ⵜⵙⵎⵏⴷ ⵎⴰⵙⵙⴰ ⴰⵅⴰⵔⴱⴰⵛ ⵙ ⵓⵖⵉⵡⵍ ⵉ ⵓⵏⵙⵙⵉⵅⴼ ⵖⴰⵣⴰⵍⵉ ⵄⴰⵜⵎⴰⵏⵉ, ⵏⵏⴰ ⵉⴳⴰⵏ ⴰⵏⵙⵙⵉⵅⴼ ⴷⵖⵉ ⵏ ⵜⴰⵎⵓⵏⵜ ⵜⴰⴼⵔⵉⵇⵜ ⵜⴰⵡⵓⵔⵉ ⵏ ⵓⵥⵟⵟⴰ ⵏ ⵉⴳⵔⴰⵡⵏ ⵉⴼⵔⵉⵇⵏ ⵏ ⵓⵙⵍⴳⵏ ⵏ ⵓⵎⵢⴰⵡⴰⴹ. ⵍⵍⵉⴳ ⵜⴳⴰ ⵜⴰⵏⵙⵙⵉⵅⴼⵜ ⵏ ⵜⵙⵉⵍⴰ ⵢⴰⴷ ⵜⴰⴼⵔⵉⵇⵜ ⵏ ⵉⴳⵔⴰⵡⵏ ⵏ ⵓⵙⵍⴳⵏ, ⵜⵙⵙⴽⵜⵉ ⵙ ⵉⵛⴰⵕⵉⴹⵏ ⵉⵅⴰⵜⴰⵔⵏ ⵏ ⵜⴽⴰⵕⴹⴰ ⵏ ⵓⴱⵔⵉⴷ ⵏ ⵓⵥⵟⵟⴰ ⴳ ⵉ ⵉⵙⴳⴳⵯⴰⵙⵏ 2023-2024, ⴷ ⵉⵙⴰⵔⵎⵏ ⵏ ⵓⵙⵡⵉⵏⴳⵎ ⴰⵅⴰⵜⴰⵔ ⵏⵏⴰ ⵉⵜⵜⵓⵙⵔⵙⵏ ⴳ ⵓⵙⵡⵉⵔ ⵏ ⵓⵎⵏⵥⴰⵡ ⴳ ⵢⵉⴳⵔ ⵏ ⵓⵙⵍⴳⵏ ⵏ ⵓⵙⵏⵖⵎⵙ ⴰⵙⵍⵉⵥⵕ ⴷ ⵓⵎⵓⵟⵟⵓⵏ. ⵙ ⵓⵢⴰⴷ, ⵜⵙⵙⴽⵏ ⴰⵙⵉⵔⵎ ⵏ ⵓⵥⵟⵟⴰ ⴳ ⵡⵓⵎⵓ ⵉⵕⵡⴰⵏ ⴳ ⵓⵙⴷⵓⴷ ⵏ ⵡⴰⴷⴷⴰⴷ ⵏ ⵉⵎⴰⵙⵙⵏ ⴷ ⵜⵣⵎⵎⴰⵔ ⴷ ⵜⵙⵉⵎⴰⵏⵜ ⵏ ⵉⴳⵔⴰⵡⵏ ⵏ ⵓⵙⵍⴳⵏ ⵉⴼⵔⵉⵇⵏ ⴰⴼⴰⴷ ⴰⴷ ⵜⵙⵡⵓⵔⵉ ⵙ ⵢⴰⵜ ⵜⵖⴰⵔⴰⵙⵜ ⵉⵕⵡⴰⵏ ⴳ ⵓⴱⵖⵓⵔ ⵏ ⵓⵙⴷⵓⵙ ⵏ ⵉⵏⴳⵔⴰⵡⵏ ⵉⵙⵏⵖⵎⴰⵙⵏ ⵉⴷⵖⵔⴰⵏⵏ ⴷ ⵉⵏⴰⵎⵓⵔⵏ ⴷ ⵜⵓⵚⴽⴰ ⵏ ⵜⵙⵉⵎⴰⵏⵜ ⵜⴰⵙⵏⵖⵎⴰⵙⵜ ⵜⴰⴼⵔⵉⵇⵜ.