ⵉⵙⵙⴽⵔ ⵓⵏⵎⵀⴰⵍ ⴰⵎⴰⵜⴰⵢ ⵏ ⵓⵙⵏⵖⵎⵙ ⵏ ⴳⴰⵎⴱⵢⴰ, ⵎⴰⵙⵙ ⵢⵓⵙⵓⴼⴰ ⵊⵓⴱⵉ, ⴰⵙⵙ ⵏ ⵓⵙⵉⵎⵡⴰⵙ 1 ⵎⴰⵕⵚ 2024,  ⵢⵓⴰⵏ ⵓⵔⵣⴰⴼ ⵏ ⵜⵡⵓⵔⵉ ⵉ ⵓⴳⵔⴰⵡ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ ⵙ ⵓⵙⵏⵓⴱⴳ ⵏ ⵎⴰⵙⵙⴰ ⵍⴰⵟⵉⴼⴰ ⴰⵅⴰⵔⴱⴰⵛ, ⵜⴰⵏⵙⵙⵉⵅⴼⵜ ⵏ ⵜⵎⵔⵙⵍ ⵜⴰⵎⵖⵔⴰⴱⵉⵢⵜ ⵏ ⵓⵙⵍⴳⵏ ⵢⵓⵙⵉⵏ ⴰⴳⴳⵯⴰ ⵏ ⵓⵙⵍⴳⵏ ⵏ ⵓⵎⵢⴰⵡⴰⴹ ⴰⵙⵍⵉⵥⵕ. ⴳ ⵓⵡⵜⵜⴰⵙ ⵏ ⵓⵙⵙⵏⵜⵉ ⵏ ⵢⴰⵜ ⵜⴷⵉⵏⴰⵎⵉⵜ ⵏ ⵓⵎⵔⴰⵔⴰ ⴷ ⵓⵎⵛⴰⵡⴰⵕ ⴳⵔ ⵙⵏⴰⵜ ⵜⵎⵔⵙⴰⵍ ⵏ ⵓⵙⵍⴳⵏ, ⴰⵔⵣⴰⴼ ⴰⴷ ⵉⴳⴰⵏ ⴰⵎⵣⵡⴰⵔⵓ ⴳ ⵡⴰⵏⴰⵡ ⵏⵏⵙ ⴳⵔ ⵍⵎⵖⵔⵉⴱ ⴷ ⴳⴰⵎⴱⵢⴰ, ⵉⴳⴰ ⵢⴰⵏ ⵓⵣⵎⵣⵣⵓ ⵏ ⵓⵙⵎⵏⵉⴷ ⵏ ⵜⵎⵥⵍⵉⵡⵉⵏ ⵏ ⴽⵓ ⵜⵎⵔⵙⵍⵜ ⴳ ⵓⵢⵏⵏⴰ ⵉⵣⴷⵉⵏ ⴷ ⵡⴰⵏⴰⵡⵏ ⵏ ⵓⵙⵍⴳⵏ ⴰⵙⵍⵉⵥⵕ ⴳ ⵜⵎⵓⵔⴰ ⵙ ⵙⵏⴰⵜ ⴰⴼⴰⴷ ⴰⴷ ⵜⵜⵓⵢⴰⴽⵣⵏ ⵉⵙⵇⵙⵉⵜⵏ ⵏ ⵓⴱⵖⵓⵔ ⵉⵛⵛⴰⵔⵏ ⴷ ⵅⴼ ⵏ ⵉⵇⵇⴰⵏ ⴰⴷ ⵚⴽⵓⵏⵜ ⵜⵎⴷⵔⴰⵡⵉⵏ ⵏ ⵉⵎⴰⵍ.

ⵉⵎⵛⴰⵡⴰⵕⵏ ⵉⵜⵜⵓⵙⴽⵔⵏ ⴳ ⵓⵙⵖⵉⵎ ⵏ ⵓⴳⵔⴰⵡ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ ⴳ ⵕⵕⴱⴰⵟ, ⴰⵎⵓⵏ ⴷⵉⴳⵙⵏ ⴰⵡⴷ ⵎⴰⵙⵙ ⴱⵏⵄⵉⵙⵙⴰ ⵄⴰⵙⵍⵓⵏ, ⴰⵏⵎⵀⴰⵍ ⴰⵎⴰⵜⴰⵢ, ⵎⴰⵙⵙ ⵍⵎⵀⴷⵉ ⵄⵕⵓⵚⵉ ⵉⴷⵔⵉⵙⵙⵉ, ⴰⵏⵎⵀⴰⵍ ⵏ ⵜⵣⵓⵏⵉ ⵏ ⵜⵔⵣⵉⵡⵉⵏ ⵜⵉⵣⵔⴼⴰⵏⵉⵏ ⴷ ⵎⴰⵙⵙ ⵟⴰⵍⴰⵍ ⵚⴰⵍⴰⵃⴷⴷⵉⵏ, ⴰⵎⴰⵙⴰⵢ ⵏ ⵜⵖⴰⵡⵙⵉⵡⵉⵏ ⵜⵉⴼⵔⵉⵇⵉⵏ ⴰⴳⵓⵏⵙ ⵏ ⵜⵎⵔⵙⵍⵜ ⵜⴰⵎⵖⵔⴰⴱⵉⵢⵜ. ⵉⵎⵛⴰⵡⴰⵕⵏ ⴰⴷ ⵉⵡⵉⵏ ⴷ ⵅⴼ ⵓⵙⴰⵜⵉ ⴰⵣⵔⴼⴰⵏ ⵉⵥⵍⵉⵏ ⵙ ⵓⵙⵏⵖⵎⵙ ⴰⵙⵍⵉⵥⵕ, ⵜⴰⵙⵎⵉⴳⵍⵜ ⴷ ⵓⵣⵣⵉⴳⵣ ⵏ ⵜⵡⵏⵏⴰⴹⵜ ⵏ ⵜⵡⵓⵔⵉ ⵏ ⵉⵙⵍⴳⴰⵏⵏ ⴰⴳⵓⵏⵙ ⵏ ⵓⵎⵏⴰⴹ ⵏ ⵓⵎⵔⵡⵉ ⵉⵍⵍⴰⵏ ⴳ ⵓⵙⴰⵢⵔⴰⵔ ⴰⵙⵏⵖⵎⴰⵙ ⴰⵎⴰⵜⴰⵢ. ⵉⵎⵛⵉⵡⴰⵕ ⴰⴷ ⵉⵡⵉⵏ ⴷ ⴰⵡⴷ ⵅⴼ ⵜⵎⴷⵔⴰⵡⵜ ⵏ ⵜⵎⵔⵙⴰⵍ ⵏ ⵓⵙⵍⴳⵏ ⵏ ⵓⵙⵏⵖⵎⵙ ⵉⵣⴷⵉⵏ ⵙ ⵜⵏⴽⵔⴰ ⵏ ⵜⴷⵍⵙⴰ ⵏ ⵉⵣⵔⴼⴰⵏ ⵏ ⵓⵎⴷⴰⵏ ⴷ ⵓⵙⴷⵓⵙ ⵏ ⵡⴰⵜⵉⴳⵏ ⵉⴷⵉⵎⵓⵇⵕⴰⵟⵉⵢⵏ ⴰⴳⵓⵏⵙ ⵏ ⵡⴰⵎⵓⵏⵏ.

ⵉⵡⵏⴰⵏ ⵏ ⵉⵙⵏⵉⴼⵉⵍⵏ ⴰⴷ, ⵉⵏⵏⴰ ⵎⴰⵙⵙ ⵢⵓⵙⵓⴼⴰ ⵊⵓⴱⵉ ⵉⵙ ⵉⵔⵎ ⵏ ⵍⵎⵖⵔⵉⴱ ⵉⴳⴰ ⵢⴰⵏ ⵓⵖⴱⴰⵍⵓ ⵉⵀⵢⵢⴰⵏ ⵏ ⵓⵙⵡⵉⵏⴳⵎ ⵉ ⵜⵏⵎⴰⵍⴰⵢⵜ ⵏⵏⵙ ⴰⵛⴽⵓ PURA ⵜⴳⴰ ⵢⴰⵜ ⵜⵏⵎⴰⵍⴰⵢⵜ ⵢⵓⴳⴳⴰⵏ ⵅⴼ ⴽⵉⴳⴰⵏ ⵏ ⵢⵉⴳⵔⴰⵏ ⵏ ⵓⵡⴰⵏⴽ ⴰⴳⴰⵎⴱⵉ ⵢⵓⵙⵉⵏ ⴰⴳⴳⵯⴰ ⵏ ⵓⵙⵍⴳⵏ ⵏ ⴽⵉⴳⴰⵏ ⵏ ⵜⵙⴳⴳⵯⵉⵏ ⵜⵉⴳⴷⵓⴷⴰⵏⵉⵏ ⴷ ⵓⵣⵣⵉⴳⵣ ⵏ ⵢⵉⴳⵔ ⵏ ⵓⵙⵏⵖⵎⵙ ⵉⵇⵇⴰⵏ ⵜ ⵉⵏ ⵢⵉⵡⵙ ⵏ ⵢⴰⵏ ⵓⵙⵍⴳⵏ ⴰⵎⵓⵣⴰⵢ.

ⵉⵡⵏⴰⵏ ⵏ ⵓⵎⵙⴳⵔⴰⵡ ⴰⴷ, ⵜⴼⴽⴰ ⴰⵡⴰⵍ ⵎⴰⵙⵙⴰ ⵍⴰⵟⵉⴼⴰ ⴰⵅⴰⵔⴱⴰⵛ ⵉⴳⴰⵏ ⴷⵖⵉ ⴰⵅⴷ ⵜⴰⵏⵙⵙⵉⵅⴼⵜ ⵏ ⵓⵥⵟⵟⴰ ⵏ ⵜⵎⵔⵙⴰⵍ ⵜⵉⴼⵔⵉⵇⵉⵏ ⵏ ⵓⵙⵍⴳⵏ ⵏ ⵓⵎⵢⴰⵡⴰⴹ ⵉ ⵢⵉⴽⵏ ⵏⵏⵙ ⴰⴳⴰⵎⴱⵉ ⵏ ⴰⴷ ⵉⵙⵙⴽⵔ ⵓⴳⵔⴰⵡ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ ⵜⴰⵎⵙⵙⵓⵎⴰⵏⵜ ⴰⴼⴰⴷ ⴰⴷ ⵉⵙⵡⵓⵔⵉ ⴳ ⵓⴱⵔⵉⴷ ⵏ ⵓⵎⵢⴰⵡⴰⵙ ⴰⵙⵉⵏⵔⴰⵍ. ⵜⵙⵙⵓⵜⵔ PURA ⴳ ⴰⴷ ⵢⴰⵎⵓ ⴳ ⵜⴰⵡⵊⴰ ⵎⵇⵇⵓⵔⵏ ⵏ ⵉⵎⵙⵏⴰⵎⵏ ⵉⴼⵔⵉⵇⵏ, ⵉⵎⵓⵏⵏ ⴰⴳⵓⵏⵙ ⵏ ⵓⵙⴰⵜⵉ ⵏ RIARC ⴰⴼⴰⴷ ⴰⴷ ⴹⵎⵏⵏ ⵉⵣⵔⴼⴰⵏ ⵏ ⵉⵏⵎⵓⵔⵉⵏ ⵏ ⵜⵎⵏⵥⴰⵡⵜ ⴳ ⵢⴰⵏ ⵓⵙⴰⵢⵔⴰⵔ ⴰⴳⴷⵓⴷⴰⵏ ⴰⵙⵏⵖⵎⴰⵙ ⴰⵎⴰⴳⵓⵜ, ⴳ ⵜⵍⵍⴰ ⵜⵖⴰⵔⴰ ⴷ ⵜⴼⵍⵙⵜ.