ⵜⵕⵥⵎ ⵎⴰⵙⵙⴰ ⵍⴰⵟⵉⴼⴰ ⴰⵅⴰⵔⴱⴰⵛ, ⵜⴰⵏⵙⵙⵉⵅⴼⵜ ⵏ  ⵓⴳⵔⴰⵡ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ ⴰⵎⵖⴰⵔⴰⴱⵉ, ⵏⵜⵜⴰⵜ ⴷ ⵢⵉⴽⵏ ⵏⵏⵙ ⴰⵇⵓⵎⵓⵕⵉ ⵎⴰⵙⵙ ⴰⴱⵓⴱⴽⵔ ⴱⵓⵡⴰⵏⴰ, ⴰⵙⵙ ⵏ 05 ⴽⵜⵓⴱⵔ 2023 ⴳ ⵜⵎⴰⵥⵓⵏⵜ ⵎⵓⵔⵓⵏⵉ, ⴰⵎⵎⴰⵙ ⴰⵎⴰⵢⵏⵓ ⵏ ⵡⴰⴹⴰⴼ ⴷ ⵓⴹⴼⴼⵓⵕ ⵏ ⵉⵖⴰⵡⴰⵙⵏ ⵉⵙⵍⵉⵥⵕⵏ ⵉⵥⵍⵉⵏ ⵙ ⵓⵙⵇⵇⵉⵎ ⴰⵏⴰⵎⵓⵔ ⵏ ⵜⵖⴰⵎⵙⴰ ⴷ ⵓⵙⵏⵖⵎⵙ ⴰⵙⵍⵉⵥⵕ ⴳ ⵜⴰⵎⵓⵏⵜ ⵏ ⵜⴳⵣⵔⵉⵏ ⵏ ⵍⵇⵓⵎⵓⵕ.

ⵜⵥⵍⵉ ⵜⴼⵓⴳⵍⴰ ⵏ ⵓⵕⵥⵥⵓⵎ ⵓⵏⵚⵉⴱ ⵙ ⵜⵉⵍⵉⵜ ⵏ ⵓⵎⴰⵡⵙⴰⵙ ⵏ ⵓⴳⵏⵙⵓ ⴷ ⵓⵙⵏⵖⵎⵙ ⴷ ⴰⵔⴰⵎⵎⴰⵙ ⵏ ⵜⵎⵙⵙⵓⴳⵓⵔⵜ ⵜⴰⵎⵓⵔⴰⵏⵜ ⴷ ⴽⵉⴳⴰⵏ ⵏ ⵉⵎⴰⵙⴰⵢⵏ ⵉⵅⴰⵜⴰⵔⵏ ⵉⵇⵓⵎⵓⵕⵉⵢⵏ ⴷ ⵉⴳⵏⵙⴰⵙⵏ ⵏ ⵓⵥⵟⵟⴰ ⴰⴷⵉⴱⵍⵓⵎⴰⵙⵉ ⴷ ⵉⵎⴰⵙⴰⵢⵏ ⵏ ⵉⵎⴰⵙⵙⵏ ⵏ ⵓⵙⵏⵖⵎⵙ ⵉⴷⵖⵔⴰⵏⵏ ⴷ ⴰⵡⴷ ⵉⵎⵙⵜⴳⴳⴰⵔⵏ ⵏ ⵜⵙⵏⵓⵔⴰⵢⵉⵏ ⵉⵣⴷⵉⵏ ⴷ ⵜⵏⵎⴰⵍⴰⵢⵜ ⵏ ⵜⵎⵜⵜⵉⵏ ⵎⵓⵏⵉⵏ ⴳ ⵎⵓⵕⵓⵏⵉ.

ⵉⵜⵜⵓⵙⵎⴰⵡⴰ ⵡⴰⵎⵎⴰⵙ ⴰⴷ ⵉⵍⵍⴰⵏ ⴳ ⵓⵙⵖⵉⵎ ⵏ ⵓⵙⵇⵇⵉⵎ ⴰⵏⴰⵎⵓⵔ ⵏ ⵜⵖⴰⵎⵙⴰ ⴷ ⵓⵙⵏⵖⵎⵙ ⴰⵙⵍⵉⵥⵕ, ⵙ ⵓⵖⴰⵡⴰⵙ ⴰⵎⵓⵟⵟⵓⵏ HMS+  ⵉⵥⵍⵉⵏ ⵉ ⵡⴰⴹⴰⴼ ⴷ ⵓⴹⴼⴼⵓⵕ ⵏ ⵉⵖⴰⵡⴰⵙⵏ ⵏⵏⴰ ⵎⵉ ⵉⵣⵎⵎⴻⵎ ⵓⴳⵔⴰⵡ ⴰⵎⴰⵜⵜⴰⵢⴰⵙⵏⵓⵍⴼⵓ ⵏⵏⵙ ⵖⵓⵔ ⵜⵏⵎⴰⵍⴰⵢⵜ ⵜⴰⵎⴰⴹⵍⴰⵏⵜ ⵏ ⵡⴰⵢⵍⴰ ⴰⵡⵏⴳⵉⵎ. ⵍⵍⴰⵏ ⴷⵉⵖ ⴳ ⵡⴰⵎⵎⴰⵙ ⴰⴷ ⴽⵉⴳⴰⵏ ⵏ ⵡⴰⵢⴰⵡⵏ ⵉⵏⵎⵏⴰⴹⵏ ⴳ ⵜⴳⵣⵉⵔⵜ ⵏ ⵎⵓⵀⵉⵍⵉ ⴷ ⵜⴳⵣⵉⵔⵜ ⵏ ⵓⵏⵊⵡⴰⵏ.

ⴽⴽⴰⵏ ⵉⵙⴰⵜⵉⵏ ⵏ ⵓⵙⵇⵇⵉⵎ ⴰⵏⴰⵎⵓⵔ ⵏ ⵜⵖⴰⵎⵙⴰ ⴷ ⵓⵙⵏⵖⵎⵙ ⴰⵙⵍⵉⵥⵕ ⵙⴱⵓⵖⵔⵏ ⴳ ⵢⴰⵜ ⵜⵙⵓⵜⵍⵜ ⵜⴰⵙⵎⵓⵜⵜⴳⵜ ⵉⵍⴰⵏ ⴽⵉⴳⴰⵏ ⵏ ⵡⵓⵙⵙⴰⵏ ⵅⴼ ⵓⵙⵡⵓⵔⵉ ⵏ ⵉⵎⴰⵙⵙⵏ ⴰⴷ ⵉⵕⵡⴰⵏ ⵉ ⵡⴰⴹⴰⴼ ⴷ ⵓⴹⴼⴼⵓⵕ ⵏ ⵉⵖⴰⵡⴰⵙⵏ, ⵢⵓⴳⴳⴰ ⵅⴼ ⵓⵙⵎⵓⵜⵜⴳ ⴰⴷ ⵎⴰⵙⵙ ⵏⴰⵊⵉⴱ ⴱⵓⵣⵎⴰⵕⵏⵉ ⴷ ⵎⴰⵙⵙ ⵄⴰⴷⵉⵍ ⴱⵓⵕⴱⴰⵟ, ⵉⵎⴰⵙⴰⵢⵏ ⴳ ⵜⵏⵎⵀⴰⵍⵜ ⵏ ⵉⵏⴳⵔⴰⵡⵏ ⵉⵎⵓⵟⵟⵓⵏ ⵖⵓⵔ ⵓⴳⵔⴰⵡ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ.

ⴳ ⵜⵉⵣⵡⵉⵔⵉ ⵏ ⵓⵏⵏⵓⵕⵥⵎ ⵏ ⵡⴰⵎⵎⴰⵙ ⴰⴷ, ⵉⵜⵜⵓⵙⴳⵎⴹ ⵅⴼ ⵜⵎⵢⴰⵇⵇⴰⵏⵜ ⵏ ⵓⵎⵢⴰⵡⴰⵙ ⴳⵔ ⵉⵏⵙⵙⵉⵅⴼⵏ ⵏ ⵉⴳⵔⴰⵡⵏ ⵏ ⵓⵙⵍⴳⵏ ⴰⵎⵖⵔⴰⴱⵉ ⴷ ⵓⵇⵓⵎⵓⵕⵉ. ⵙ ⵜⵎⵢⴰⵇⵇⴰⵏⵜ ⴰⴷ, ⵔⴰⴷ ⵜⵉⵍⵉ ⵜⵎⴷⵔⴰⵡⵜ ⴳ ⵓⵢⵏⵏⴰ ⴷ ⵢⵓⵛⴽⴰⵏ ⴳ  ⵓⴳⵔⴰⵡ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ ⴷ ⵢⵉⴽⵏ ⵏⵏⵙ ⴰⵇⵓⵎⵓⵕⵉ ⵅⴼ ⵓⵙⵏⵎⴰⵍⴰ ⵏ ⵜⵡⵓⵔⵉⵡⵉⵏ ⵏ ⵜⵎⵓⵣⴰⵢⵜ ⴷ ⵜⵖⵓⵔⵉⵡⵉⵏ ⵉⵛⵛⴰⵔⵏ ⴷ ⵓⵙⵏⴼⵍ ⵏ ⵢⵉⵔⵎⵏ ⴳ ⵢⵉⴳⵔ ⵏ ⵓⵙⵖⵓⴷⴰ ⵏ ⵉⵎⴰⵙⵙⵏ ⴷ ⵜⵖⴰⵔⴰⵙⵉⵏ ⵏ ⵓⵙⵍⴳⵏ ⴷ ⵓⵙⴷⵓⵙ ⵏ ⵉⵎⵏⵣⴰⵢ ⵏ ⵉⵣⵔⴼⴰⵏ ⵉⵏⴼⴳⴰⵏⵏ ⵙ ⵓⴱⵔⵉⴷ ⵏ ⵉⵎⴰⵙⵙⵏ ⵏ ⵓⵙⵏⵖⵎⵙ ⴷ ⵓⴼⵔⴰⴳ ⵏ ⵓⵏⵎⵓⵔⵉ ⵙⴳ ⵜⴽⵏⴷⴰⵡⵜ ⵜⴰⵙⵏⵖⵎⴰⵙⵜ ⴷ ⵓⵡⵏⵏⵉ ⵏ ⵓⴽⵙⴰⵏ ⴷ ⵓⵢⵏⵏⴰ ⵉⵜⵜⴳⴳⴰⵏ ⵜⴼⵉⴽⴽⴰⵛ ⴷⴰⵜ ⵓⵣⵣⵉⴳⵣ ⴰⴷⵉⵎⵓⵇⵔⴰⵟⵉ ⵏ ⵡⴰⵎⵓⵏⵏ.

 ⵉⵃⴰⴹⵕ ⴳ ⵜⴼⵓⴳⵍⴰ ⵢⴰⴷ ⵜⵓⵏⵚⵉⴱⵜ ⴰⵡⴷ ⵎⴰⵙⵙ ⴱⵏⵄⵉⵙⵙⴰ ⵄⴰⵙⵍⵓⵏ, ⴰⵏⵎⵀⴰⵍ ⴰⵎⴰⵜⴰⵢ ⵏ ⵓⴳⵔⴰⵡ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ, ⴷ ⵎⴰⵙⵙ ⵟⴰⵍⴰⵍ ⵚⴰⵍⴰⵃ ⴷⴷⵉⵏ, ⴰⵎⴰⵙⴰⵢ ⵅⴼ ⵉⵙⴽⴽⵉⵏⵏ ⵉⴼⵔⵉⵇⵏ ⴳ ⵜⵎⵔⵙⵍⵜ, ⴷ ⵎⴰⵙⵙ ⴷⵔⵉⵙⵙ ⵄⴰⵍⴰⵡⵉ, ⴰⵏⴱⴷⴰⴷ ⵏ ⵜⵡⵓⵔⵉⵡⵉⵏ ⴳ ⵜⵎⵙⵇⴰⴷⵜ ⵜⴰⵎⵖⵔⴰⴱⵉⵢⵜ ⵖⵓⵔ ⵜⴰⵎⵓⵏⵜ ⵏ ⵜⴳⵣⵉⵔⵉⵏ ⵏ ⵍⵇⵓⵎⵓⵕ.