ⵉⵖⵜⵙ ⵓⵙⵇⵇⵉⵎ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ, ⴳ ⵓⵙⴰⵜⵉ ⵏ ⵜⵎⴰⵙⴰⵢⵜ ⵜⴰⵎⵔⵙⴰⵍⵜ ⵏ ⵓⴳⵔⴰⵡ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ, ⴳ ⵢⵉⴳⵔ ⵏ ⵜⴳⵎⵉ ⵏ ⵜⴷⵍⵙⴰ ⵏ ⵓⵙⵉⵙⴽⵍ ⴷ ⵓⵙⵙⵓⵎⵓ, ⵏ ⴰⴷ ⵉⵙⵙⴽⵏ ⵜⴰⵍⴳⴰⵎⵜ ⵏ ⵓⵣⵎⵣ ⵏ ⵡⴰⵡⴰⵍ ⵏ ⵜⵎⵖⴰⵔⵉⵏ ⴳ ⵉⵖⵎⵉⵙⵏ ⴷ ⵉⵙⵓⵢⴰⵙ ⵉⴳⴰⵏ ⵜⴰⵏⴰⴼⵓⵜ ⵜⴰⵎⴰⵜⴰⵢⵜ ⵅⴼ ⵉⵕⴰⴷⵢⵓⵜⵏ ⴷ ⵉⵜⵉⵍⵉⴼⵉⵣⵢⵓⵏⵏ ⵉⴳⴷⵓⴷⴰⵏⵏ ⴷ ⵡⵓⵙⵍⵉⴳⵏ.

ⴰⵙⵥⵕⴻⴳ ⵏ ⵜⵍⴳⴰⵎⵉⵏ ⴰⴷ ⴳ ⵓⵙⴰⵜⵉ ⵏ ⵓⵙⵎⴽⵜⵉ ⵏ ⵡⴰⵙⵙ ⴰⴳⵔⴰⵖⵍⴰⵏ ⵏ ⵉⵣⵔⴼⴰⵏ ⵏ ⵜⵎⵖⴰⵔⵉⵏ ⵉⴳⴰ ⵓⵡⵜⵜⴰⵙ ⵏⵏⵙ ⴰⴷ ⵉⵙⵎⵓⵙⵙ ⵜⵉⵙⴳⴳⵯⵉⵏ ⴰⴽⴽⵯ ⵅⴼ ⴳⴰⵔ ⴰⵙⵉⴽⵙⵍ ⴳⵔ ⵜⵎⴰⵖⴰⵔⵉⵏ ⴷ ⵉⵔⴳⴰⵣⵏ ⴳ ⵢⵉⴳⵔ ⵏ ⵓⵣⵎⵣ ⵏ ⵡⴰⵡⴰⵍ ⴰⴳⵓⵏⵙ ⵏ ⵉⵎⴰⵙⵙⵏ ⵏ ⵓⵙⵏⵖⵎⵙ ⴷ ⵅⴼ ⵜⴷⵔⵙⵉ ⵏ ⵓⵣⵣⵉⴳⵣ ⵏ ⵓⵙⵎⴷⵢⴰ ⵏ ⵜⵎⵖⴰⵔⵉⵏ ⴳ ⵓⵙⴰⵢⵔⴰⵔ ⴰⴳⴷⵓⴷⴰⵏ ⴰⵙⵏⵖⵎⴰⵙ.

ⴰⵙⵥⵕⴳ ⵏ ⵜⵍⴳⴰⵎⵉⵏ ⴰⴷ ⵏ ⵓⵣⵎⵣ ⵏ ⵡⴰⵡⴰⵍ ⵏ ⵜⵎⵖⴰⵔⵉⵏ ⵏⵏⴰ ⵓⵔ ⵉⵣⵔⵉⵏ 15% ⵏ ⵓⵣⵎⵣ ⴰⵎⴰⵜⴰⵢ ⵏ ⵡⴰⵡⴰⵍ ⵏ ⵉⵎⴷⴰⵏⵏ ⵉⴳⴷⵓⴷⴰⵏⵏ, ⵖⵓⵔⵙ ⴰⵡⵜⵜⴰⵙ ⵏ ⴰⴷ ⵢⴰⵡⵙ ⴳ ⵉⵎⵙⴰⵡⴰⵍ ⴰⴳⴷⵓⴷⴰⵏ ⵅⴼ ⵉⵙⴰⵔⵙⵏ ⵏ ⵜⵎⵓⵖⵍⵉ ⵏ ⵜⵉⵍⴰⵡⵜ ⵏ ⵓⵙⵎⴷⵢⴰ ⴰⵖⵎⵙⴰⵏ ⵏ ⵜⵎⵖⴰⵔⵉⵏ ⴷ ⵡⵓⵎⵓ ⵏⵏⵙⵏⵜ ⴳ ⵢⵉⴳⵔⴰⵏ ⴰⴽⴽⵯ ⵏ ⵜⵎⵓⵣⴰⵢⵜ.

ⴰⵙⵇⵇⵉⵎ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ ⴷⴰ ⵉⵙⵙⴽⵜⴰⵢ ⴽⵓ ⵜⵉⴽⴽⵍⵜ ⵉⵙ ⴰⵙⵎⴷⵢⴰ ⴰⵙⴰⴽⵙⴰⵍ ⵏ  ⵉⴳⴰ ⵉⵎⴰⵙⵙ ⵏ ⵓⵙⵣⵔⴼ ⵏ ⵢⵉⵍⵉ ⵏ ⵜⵎⵖⴰⵔⵉⵏ ⴰⴳⵓⵏⵙ ⵏ ⵓⵙⴰⵢⵔⴰⵔ ⴰⴳⴷⵓⴷⴰⵏ ⴷ ⵜⴳⵎⵉ ⵏ ⵜⵏⴰⵔⴰ ⵏⵏⵙⵏⵜ. ⵉⵜⵜⵓⵢⴰⵙⵙⵏ ⵉⵙ ⵉⵍⵉ ⵏⵏⵙⵏⵜ ⴷⴰ ⵉⵙⵙⵣⵎⴰⵔ ⵜⴰⵎⵔⵉⵙⵜ ⵏ ⵜⵎⵖⴰⵔⵉⵏ ⴳ ⵜⵏⴰⴼⵓⵜ ⵜⴰⴳⴷⵓⴷⴰⵏⵜ, ⴰⵔ ⵜⵙⵙⵓⵀⴰⵏ ⵉⵙⵢ ⵏ ⵉⵎⵏⵣⴰⵢ ⴷ ⵡⴰⵜⵉⴳⵏ ⵏ ⵜⵏⵎⵓⵔⵉ ⴷ ⵓⵙⵉⴽⵙⵍ .

ⴰⵙⵇⵇⵉⵎ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ ⵉⵥⵕⴰ ⴳ ⵜⵙⴳⴰ ⵢⴰⴹⵏ ⵉⵙ ⵎⵇⵇⴰⵔ ⵍⵍⴰⵏⵜ ⵜⵣⵎⵎⴰⵔ ⵉⵜⵜⵓⵙⴽⵔⵏ, ⴽⵉⴳⴰⵏ ⵏ ⵜⵎⵓⴽⵔⵉⵙⵉⵏ ⵙⵓⵍⵏⵜ ⴳ ⵢⵉⴳⵔ ⴰⴷ, ⵎⵇⵇⴰⵔ ⵉⵍⵍⴰ ⵓⵙⵎⵓⵙⵙ ⵏ ⵓⵙⵏⵖⵎⵙ, ⴰⵢⴰ ⴷⴰ ⵉⵙⵔⵓⵙ ⵜⴼⵉⴽⴽⴰⵛ ⴷⴰⵜ ⵓⵙⵏⵉⵎⴰⵏ ⴰⵙⵔⵜⴰⵏ ⴷ ⵓⵏⴰⵎⵓⵏ ⵏ ⵜⵎⵖⴰⵔⵉⵏ.

ⴽⵉⴳⴰⵏ ⵏ ⵜⵖⵜⴰⵙⵉⵏ ⵜⵉⵙⵍⵓⴳⴰⵏⵉⵏ ⵏⵏⴰ ⵢⵓⵙⵉ ⵓⵙⵇⵇⵉⵎ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ ⴷⴷⴰⵏⵜ ⴳ ⵓⴱⵔⵉⴷ ⵏ ⵓⵙⵎⵖⵔ ⵏ ⵓⵙⵙⵓⵎⵓ ⴰⵏⵎⵓⵔⵉ ⵏ ⵜⵎⵖⴰⵔⵉⵏ ⴰⴳⵓⵏⵙ ⵏ ⵢⵉⴳⵔ ⴰⵙⵏⵖⵎⴰⵙ ⴰⴳⴷⵓⴷⴰⵏ. ⵣⵓⵏⴷ ⵙ ⵉⵎⵥⵍⵉ ⵜⴰⵖⵜⵙⵜ ⵓⵜⵜⵓⵏ 20.18 ⵉⵙⵣⵉⵏ ⴷ ⵜⴷⴳⴳⴰⵔⵜ ⵏ ⵓⵡⵏⵏⵉ ⴰⵎⴰⴳⵓⵜ ⵏ ⵜⵎⵣⴰⵣⵉⵏ ⵏ ⵓⵙⵡⵉⵏⴳⵎ ⴱⵕⵕⴰ ⵏ ⵉⵣⵎⴰⵣ ⵏ ⵉⵙⵜⴰⵢⵏ ⴷ ⵜⵖⵜⴰⵙⵜ ⵓⵟⵟⵓⵏ 37.21 ⵉⵣⴷⵉⵏ ⴷ ⵜⴷⴳⴳⴰⵔⵜ ⵏ ⵜⵎⴰⴳⵓⵜ ⵏ ⵓⵡⵏⵏⵉ ⴰⵙⵔⵜⴰⵏ ⴰⴳⵓⵏⵙ ⵏ ⵓⵣⵎⵣ ⵏ ⵉⵙⵜⴰⵢⵏ ⵓⵣⵔⵉⴼⵏ, ⵉⵏⵎⵏⴰⴹⵏ ⴷ ⵉⴳⵔⴰⵡⴰⵏⵏ ⴳ 2021. ⵍⵍⵉⴳ ⵉⵥⵕⴰ ⵉⵙ ⵜⴰⵎⵓⴽⵔⵉⵙⵜ ⵏ ⵢⵉⵙⵉ ⵏ ⵡⴰⵡⴰⵍ ⵏ ⵜⵎⵖⴰⵔⵉⵏ ⴷ ⵓⵙⵎⴷⵢⴰ ⵏⵏⵙⵏⵜ ⴰⵎⵙⵙⵓⵎⵓ ⵓⵔ ⵉⵣⴷⵉ ⵖⴰⵙ ⴷ ⵓⵙⵏⵖⵎⵙ, ⵢⵓⵙⵉ ⵓⵙⵇⵇⵉⵎ ⴰⵎⴰⵜⵜⴰⵢ ⵜⴰⵖⵜⵙⵜ ⵏ ⴰⴷ ⵉⵙⵥⵕⴳ ⵜⵉⵍⴳⴰⵎⵉⵏ ⴽⵓ ⴽⵕⴰⴹ ⵡⴰⵢⵓⵔⵏ ⵏ ⵉⴽⵛⵛⵓⵎⵏ ⵏ ⵉⴼⴳⴰⵏⵏ ⵉⴳⴷⵓⴷⴰⵏⵏ ⴳ ⵉⵎⴰⵙⵙⵏ ⵏ ⵓⵕⴰⴷⵓ ⴷ ⵓⵜⵉⵍⵉⴼⵉⵣⵢⵓⵏ, ⵜⵉⴳⵍⴰⵎⵉⵏ ⵉⵣⴷⵉⵏ ⴷ ⵢⵉⵙⵉ ⵏ ⵡⴰⵡⴰⵍ ⵏ ⵜⵎⵖⴰⵔⵉⵏ. ⵜⴰⴳⵍⴰⵎⵜ ⴰⴷ « ⵜⴰⵎⴰⵏⴰⵡⵜ » ⴷⴰ ⵜⵜ ⵉⵜⵜⴰⵣⵏ ⵓⴳⵔⴰⵡ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ ⵉ ⴽⵉⴳⴰⵏ ⵏ ⵜⵎⵔⵙⴰⵍ ⵉⵙⵎⵓⵙⵙⵓⵏ ⴳ ⵢⵉⴳⵔ ⵏ ⵜⵙⵔⵜⵉⵜ ⴷ ⵉⵣⵔⴼⴰⵏ ⵏ ⵓⴼⴳⴰⵏ.

ⵢⵓⴽⵣ ⵓⵙⵇⵇⵉⵎ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ ⵉⵙ ⵓⵔ ⴳⵉⵏ ⵉⵎⴰⵙⵙⵏ ⵏ ⵓⵙⵏⵖⵎⵙ ⵖⴰⵙ ⵜⵉⵙⵉⵜⵜ ⵏ ⵜⵉⵍⴰⵡⵜ ; ⴳⴰⵏ ⴰⵡⴷ ⵉⵡⵔⵉⴽⵏ ⵏ ⵓⵙⵏⴼⵍ ⴰⵏⴰⵎⵓⵏ ⴰⵛⴽⵓ ⴷⴰ ⵜⵜⴰⵡⵙⵏ  ⴳ ⵜⵓⵚⴽⴰ ⵏ ⵓⵙⵡⵉⵏⴳⵎ ⴷ ⵜⵎⵓⴽⵜⵉⵜ ⵜⴰⴳⵔⴰⵡⴰⵏⵜ . ⵙ ⵓⴹⵎⴰⵏ ⵏ ⵓⵙⵎⴷⵢⴰ ⵎⵙⵙⵓⵎⵓ ⵏ ⵜⵎⵖⴰⵔⵉⵏ, ⵔⴰⴷ ⴰⵡⵙⵏⵜ ⴳ ⵜⴳⵎⵉ ⵏ ⵜⵖⴰⵔⵉⵡⵉⵏ ⴳ ⵜⵏⴰⴼⵓⵜ ⵜⴰⵎⴰⵜⴰⵢⵜ ⵏ ⵡⴰⵎⵓⵏ ⴰⵎⵖⵔⴰⴱⵉ ⴷ ⵜⴳⵎⵉ ⵏ ⵉⵎⵏⵣⴰⵢ ⵉⴷⵉⵎⵓⵇⵔⴰⵟⵉⵢⵏ, ⵉⴷⴰⵎⵙⴰⵏⵏ ⴷ ⵉⵏⴰⵎⵓⵏⵏ ⵏ ⵜⵎⵓⵔⵜ.