ⴳ ⵓⵙⴰⵜⵉ ⵏ ⵜⵎⴷⵔⴰⵡⵜ ⵏⵏⵙ ⵜⴰⴷⵓⵙⵜⵓⵔⵉⵜ ⴳ ⵓⵙⵉⵍⵉ ⵙ ⵜⴷⵍⵙⴰ ⵏ ⵓⵙⵓⵎⵓ ⴷ ⵢⵉⴽⵙⵉⵍ ⴳ ⵓⵙⵏⵖⵎⵙ ⴰⵙⵍⵉⵥⵕ, ⵉⵙⵙⵓⴼⵖ ⴷ ⵓⴳⵔⴰⵡ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ ⴰⵙⵙ ⵏ 29 ⵉⴱⵔⵉⵔ 2025, ⵢⴰⵏ ⵓⴼⵉⴷⵢⵓ ⵏ ⵓⵙⵎⵓⵙⵙⵓ ⵉⵙⵎ ⵏⵏⵙ “ⴰⵙⵎⴷⵢⴰ ⵏ ⵜⵎⵖⴰⵔⵉⵏ ⴳ ⵓⵙⵏⵖⵎⵙ ⴳ ⵍⵎⵖⵔⵉⴱ, ⴰⵎⵙⴰⵔⴰⵙ ⵏ ⵢⵉⴽⵙⵉⵍ ⴰⵏⵎⵓⵔⴰⵏ ⴷ ⵡⴰⴷⴰⴼ ⴰⴷⵉⵎⵓⵇⵕⴰⵟⵉ”.
ⵉⵜⵜⵓⵙⵎⵏⵉⴷ ⴰⴼⵉⴷⵢⵓ ⴰⴷ ⵉⵙⵡⴰⵍⴰⵏ ⵉⵎⵙⴰⵔⴰⵙⵏ ⵉⵏⴰⵎⵓⵏⵏ, ⵉⴷⵍⵙⴰⵏⵏ ⴷ ⵉⴷⵉⵎⵓⵇⵕⴰⵟⵉⵢⵏ ⴷ ⵢⵉⴽⵙⵉⵍ ⵏ ⵓⵙⵎⴷⵢⴰ ⵏ ⵜⵎⵖⴰⵔⵉⵏ ⴰⴳⵓⵏⵙ ⵏ ⵓⵙⵏⵖⵎⵙ, ⵉⵜⵜⵓⵙⵎⵏⵉⴷ ⵉⵡⵏⴰⵏ ⵏ ⵢⴰⵜ ⵜⵙⴰⵡⵔⵜ ⵏ ⵓⵙⵡⵉⵏⴳⵎ ⵏⵏⴰ ⵜⵙⵏⵎⴰⵍⴰ ⵜⵎⵔⵙⵍⵜ ⵏ ⵓⵙⵍⴳⵏ.
ⵙ ⵜⵎⴷⵔⴰⵡⵜ ⵏ ⵉⴳⵎⴰⵎⵏ ⵏ ⵓⵙⵇⵇⵉⵎ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ, ⴷ ⵜⵏⵙⵙⵉⵅⴼⵜ ⵏ ⵓⴳⵔⴰⵡ ⵏ ⵜⵡⵓⵔⵉ ⵏ ⵓⵙⴳⵓⵎ ⵏ ⵢⵉⴽⵙⵉⵍ ⴷ ⵓⵙⵓⵎⵓ ⴰⴳⵓⵏⵙ ⵏ ⵓⵎⵚⵕⵉ ⵏ ⵉⴳⵏⵙⴰⵙⵏ, ⵢⴰⵏ ⵓⴳⵏⵙⴰⵙ ⵏ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⵢⴰⵏ ⵓⴳⵏⵙⴰⵙ ⵏ ⵜⵎⴰⵡⵙⴰⵙⵜ ⵏ ⵜⴰⵎⵓⵏⵜ, ⴰⴷⴰⴼ ⴰⵏⴰⵎⵓⵏ ⴷ ⵜⴰⵡⵊⴰ, ⵉⵏⵖⵎⴰⵙⵏ, ⵉⵎⴰⵙⴰⵢⵏ ⵏ ⵜⵉⵔⵔⴰ ⵏ ⵜⵏⵣⵡⴰⵢⵉⵏ ⴷ ⵉⵜⵉⵍⵉⴼⵉⵣⵢⵓⵏⵏ ⵉⵎⵖⵔⴰⴱⵉⵢⵏ ⵉⴳⴷⵓⴷⴰⵏⵏ ⴷ ⵡⵓⵙⵍⵉⴳⵏ, ⵢⵉⵍⵉ ⴽⵉⴳⴰⵏ ⵏ ⵉⵎⴰⵣⵣⴰⵍⵏ ⵏ ⵡⴰⵎⵓⵏ ⵓⵖⵔⵉⵎ ⴷ ⵉⵎⵓⵣⴰⵢ ⵏ ⵓⵎⵓⵟⵟⵓⵏ, ⴰⵙⴳⵓⵎ ⵏ ⵓⵙⵎⴷⵢⴰ ⵏ ⵜⵎⵖⴰⵔⵉⵏ ⴳ ⵓⵙⵏⵖⵎⵙ ⵉⵜⵜⵓⵔⵣⴰ ⵙⴳ ⴽⵉⴳⴰⵏ ⵏ ⵜⴰⵏⵏⴰⵢⵉⵏ ⴷ ⵜⵖⵎⵔⵉⵏ.
ⴰⵎⵙⴳⵔⴰⵡ ⴰⴷ ⵢⵓⴷⵊⴰ ⵉⵎⴷⵔⴰⵡⵏ ⴰⴷ ⵎⵔⴰⵔⴰⵏ ⵜⴰⵏⵏⴰⵢⵉⵏ ⴷ ⵢⵉⵔⵎⵏ ⵅⴼ ⵉⵎⵙⴽⴰⵔⵏ ⵉⵜⵜⴰⵡⵙⵏ ⴳ ⵙⵎⴷⵢⴰ ⵉⴷⵔⵓⵙⵏ ⵏ ⵜⵎⵖⴰⵔⵉⵏ ⴳ ⵓⵙⵏⵖⵎⵙ ⵙ ⵓⵙⵎⴰⴳⵉ ⵏ ⵜⵔⵙⴰⵍ ⵏ ⵜⵉⴳⴰⵡⵜ ⴳ ⵓⴱⵖⵓⵔ ⵏ ⵢⴰⵏ ⵓⵙⵏⵖⵎⵙ ⴰⵎⵢⴰⵙ, ⴰⵎⴰⴷⴰⴼ ⴷ ⴰⵎⴰⴽⴰⵣ ⵏ ⵡⴰⵜⵉⴳⵏ ⵏ ⵓⵎⵢⴰⵏⴰⵡ.
ⵙ ⵓⵙⵙⵏⵜⵉ ⵏ ⵡⴰⵖⴰⵍ ⵉⵙ ⵉⴳⴰ ⵓⵙⵏⵖⵎⵙ ⵢⴰⵏ ⵓⵖⴱⴰⵍⵓ ⴰⴷⵙⵍⴰⵏ ⵏ ⵓⵙⵡⵓⵔⵉ ⴰⴷⵉⵎⵓⵇⵕⴰⵟⵉ ⵉⵕⵡⴰⵏ, ⵉⵎⴷⵔⴰⵡⵏ ⵢⴰⵎⵓⵏ ⴳ ⵓⵎⵙⴳⵔⴰⵡ ⴰⴷ ⵙ ⵜⵖⵢⴰⵙⵜ ⵏ ⵓⵏⵎⵀⴰⵍ ⴰⵎⴰⵜⴰⵢ ⵏ ⵓⴳⵔⴰⵡ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ ⵎⴰⵙⵙ ⴱⵏⵄⵉⵙⵙⴰ ⵄⴰⵙⵍⵓⵏ, ⵔⵓⵔⴰⵏ ⵜⴰⵖⴹⴼⵜ ⵉ ⵢⵉⴽⵙⵉⵍ ⴷ ⵜⵖⴰⵔⴰ ⵏ ⵓⵙⵎⴷⵢⴰ ⵏ ⵜⵎⵖⴰⵔⵉⵏ ⴳ ⵓⵙⵏⵖⵎⵙ ⴰⴼⴰⴷ ⴰⴷ ⵣⵣⵉⴳⵣⵏⵜ ⵜⵡⵏⴳⵉⵎⵉⵏ ⴷ ⵢⵉⴽⵣ ⵏ ⵉⵍⵓⴳⵏⵏ ⵉⵏⴰⵎⵓⵏⵏ ⴷ ⴰⴼⴰⴷ ⴰⴷ ⵜⵜⵓⵢⴰⴽⵣⵏ ⵉⵙⵎⴰⵢⵏⵓⵜⵏ ⵉⵅⴰⵜⴰⵔⵏ ⵣⵓⵏⴷ ⴰⵙⵍⴳⵏ ⵏ ⵜⴰⵡⵊⴰ ⴳ ⵢⵓⴷⴼ ⵍⵎⵖⵔⵉⴱ ⵜⵉⴳⵉⵔⴰ ⵢⴰⴷ.
ⵉⵡⵏⴰⵏ ⵏ ⵜⵙⴰⵡⵔⵜ ⴰⴷ, ⵜⵙⵎⵏⵉⴷ ⵎⴰⵙⵙⴰ ⵍⴰⵟⵉⴼⴰ ⴰⵅⴰⵔⴱⴰⵛ, ⵜⴰⵏⵙⵙⵉⵅⴼⵜ ⵏ ⵓⴳⵔⴰⵡ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ ⴰⵢⴰⴼⵓ ⵏ ⵜⵖⵓⵔⵉⵡⵉⵏ ⵏⵏⴰ ⵉⵙⵙⴽⵔ ⵓⴳⵔⴰⵡ ⴰⵎⴰⵜⵜⴰⵢ ⴳ ⵓⵙⴰⵜⵉ ⵏ ⵓⵙⵏⵜⵉ ⴰⵎⴰⴹⵍⴰⵏ ⵏ ⵓⵎⵙⴰⵏⵓⵏ ⵏ ⵓⵙⵏⵖⵎⵙ, ⴷ ⴽⵉⴳⴰⵏ ⵏ ⵜⴰⵏⴰⴹⵉⵏ ⵅⴼ ⵓⵙⵎⴷⵢⴰ ⵏ ⵜⵎⵖⴰⵔⵉⵏ ⴳ ⵓⵙⵏⵖⵎⵙ ⴰⵙⵍⵉⵥⵕ ⴷ ⵜⵡⵍⴰⴼⵜ ⵏ ⵜⵏⵖⵎⴰⵙⵜ.
ⵜⵔⵏⵓ ⵜⵏⵙⵙⵉⵅⴼⵜ ⵜⵏⵏⴰ ⵉⵙ ⵓⴼⵓⵖ ⵏ ⵓⴼⵉⴷⵢⵓ ⵢⴰⴷ ⵏ ⵓⵙⵎⵓⵙⵙⵓ, ⵏⵏⴰ ⵔⴰⴷ ⵢⵉⵍⵉ ⴳ ⵉⵥⴹⵡⴰⵏ ⵉⵏⴰⵎⵓⵏⵏ, ⵉⴷⴷⴰ ⴷ ⵉⵔⵏⵓ ⵉ ⵜⵣⵎⵎⴰⵔ ⵏ ⵓⵙⴷⵓⵙ ⴰⴳⵓⵏⵙⵓ ⵏ ⵡⴰⵎⵓⵏ ⴰⵎⵖⵔⴰⴱⵉ ⵏ ⵜⴷⵍⵙⴰ ⵏ ⵓⵙⵍⴳⵏ ⵏ ⵓⵙⵏⵖⵎⵙ ⵉⵚⴽⴰⵏ ⵅⴼ ⵉⵣⵔⴼⴰⵏ ⵏ ⵉⵏⴼⴳⴰⵏⵏ.