ⵜⴰⵎⵓ ⵜⵙⵍⵡⴰⵢⵜ ⵏ ⵓⴳⵔⴰⵡ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ, ⵎⴰⵙⵙⴰ ⵍⴰⵟⵉⴼⴰ ⴰⵅⴰⵔⴱⴰⵛ, ⴳ ⵜⵙⵓⵜⵍⵜ ⵜⵉⵙⵙ 4 ⵏ ⵓⵎⵙⴳⵔⴰⵡ ⴰⵎⴰⵜⴰⵢ ⵏ ⵓⵙⵏⵖⵎⵙ, ⵉⵜⵜⵓⵙⵏⵎⴰⵍⴰⵏ ⵙ ⵛⵓⵛⴰ, ⴳ ⵜⵎⵓⵔⵜ ⵏ ⴰⵣⵉⵔⴱⴰⵢⴷⵊⴰⵏ, ⵓⵙⵙⴰⵏ ⵙⴳ 13 ⴰⵔ 15 ⵢⵓⵍⵢⵓⵣ 2026, ⵅⴼ ⵓⵙⴳⵓⵎ ⵏ « ⵜⵉⵍⴰⵍⵜ ⵏ ⵓⵙⵏⵖⵎⵙ ⴳ ⵜⴳⵎⵉ ⵏ ⵓⴼⵔⴰ : ⵜⵓⵚⴽⴰ ⵏ ⵜⵉⴷⵜ ⴷ ⵜⵎⵢⴰⵎⴰⵏⵜ ».

ⴳ ⵜⵉⵏⴰⵡⵜ ⵏⵏⵙ ⵉⴳⴰⵏ ⵙ ⵢⵉⵙⵎ « ⴰⴼⵔⴰ ⴷ ⵜⵉⴷⵜ ⴳ ⵓⵣⵎⵣ ⵏ ⵡⴰⵍⴳⵓⵔⵉⵜⵎ : ⵜⵓⵚⴽⴰ ⵏ ⵜⵎⵢⴰⵎⴰⵏⵜ ⴰⴳⵓⵏⵙ ⵏ ⵓⵙⵏⵖⵎⵙ », ⵜⵙⵔⵙ ⵜⵙⵍⵡⴰⵢⵜ ⵏ ⵓⴳⵔⴰⵡ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ ⵢⴰⵜ ⵜⴰⵏⴰⴹⵜ ⵏ ⵜⴰⵏⵏⵢⵜ ⵉⵣⴷⵉⵏ ⵙ ⵉⵎⵉⵣⴰⵏ ⵏ ⵓⵙⵏⵖⵎⵙ ⵉⴳⴰⵏ ⴰⴳⴳⵯⴰ ⴰⵙⵙⴰ ⵅⴼ ⵜⴷⵓⵙⵉ ⵏ ⵡⴰⵎⵓⵏⵏ ⴷ ⵅⴼ ⵓⴼⵔⴰ. ⵜⵙⵙⴽⵏ ⵉⵙ ⵉⴳⴰ ⵓⵣⵓⵔⵜ ⴰⴷⴰⵎⵙⴰⵏ ⵏ ⵜⵙⴰⵍⵉⵡⵉⵏ ⵜⵉⵎⴰⵜⴰⵢⵉⵏ, ⵉⵚⴽⴰⵏ ⵅⴼ ⵜⵖⴹⴼⵜ, ⴷ ⵓⵙⵡⵓⵔⵉ ⵏ ⵜⴰⵙⴰ ⴷ ⵓⵣⵓⵣⵣⵔ, ⵉⵙⵍⵓⵍⴰ ⴷ ⴰⵏⴰⵡⵏ ⵉⴳⴳⵓⵜⵏ ⵏ ⵉⵎⵏⵣⴰⵖⵏ ⵉⵜⵜⴰⵡⵉⵏ ⵖⵔ ⴰⵙⵎⵓⵜⵜⵢ ⵏ ⵓⵙⴰⵢⵔⴰⵔ ⴰⴳⴷⵓⴷⴰⵏ ⵖⵔ ⵢⴰⵏ ⵓⵙⴰⵢⵙ ⵏ « ⵉⵏⵖⵉ ⴰⵡⴷ ⵏⵜⵜⴰ - ⴽⴰ ⵏ ⵜⵉⴽⴽⴰⵍ ⴷ ⴰⵎⵣⵡⴰⵔⵓ- ⴳ ⵓⵙⴰⵢⵙ ⵏ ⵓⵙⵏⵖⵎⵙ ».

ⴰⴼⴰⴷ ⵏⵙⵙⵉⴽⵣ ⴰⵎⵉⵣⵉ ⴰⵅⴰⵜⴰⵔ ⵏ ⵡⵓⵛⵓⴹⵏ ⴰⴷ, ⵜⴱⴷⵔ ⵎⴰⵙⵙⴰ ⴰⵅⴰⵔⴱⴰⵛ ⵉⵎⵏⵖⵉ ⴰⵙⵖⵎⵙⴰⵏ ⵉⴽⴽⴰⵏ ⵅⴼ ⵍⵎⵖⵔⵉⴱ ⵉⵡⵏⴰⵏ ⵏ ⵍⴽⴰⵙⵙ ⵏ ⵜⴼⵔⵉⵇⵜ ⵏ ⵡⴰⵎⵓⵏⵏ ⵏ ⵍⴽⵓⵔⵜ ⵓⴹⴰⵕ. ⵜⵙⵙⴽⵜⵉ ⴷ ⵎⴰⵎⴽ, ⴳ ⵜⵙⴳⴰ ⵏ ⵢⴰⵏ ⵓⵣⵎⵣⵣⵓ ⵏ ⵜⵓⵏⵏⵓⵏⵜ, ⵉⵜⵜⵓⵙⵏⵎⴰⵍⴰⵏ ⵙ ⵜⵖⴰⵔⴰⵙⵜ ⵜⴰⵎⵇⵔⴰⵏⵜ, ⵢⴰⵜ ⵜⵎⴰⵛⵉⵏⵜ ⵏ ⵉⵏⵖⵎⵉⵙⵏ ⵏ ⵜⴽⵔⴽⴰⵙ - ⵉⵎⵓⵏⵏ ⴷ ⴽⵉⴳⴰⵏ ⵏ ⵜⵉⵥⵉⵔⵉⵏ ⵏ ⵓⵏⴳⵓⵣ, ⴷ ⵉⵏⴰⵡⵏ ⵏ ⵓⴽⵙⴰⵏ, ⴷ ⵜⵉⴳⴰⵡⵉⵏ ⵏ ⵜⴰⵙⵙⴰⵥⵓⵔⵜ ⴷ ⵜⵓⵎⴰⵢⵉⵏ ⵏ ⵜⴽⵏⴷⴰⵡⵜ, ⵙ ⵉⵎⵥⵍⵉ ⵜⵓⵎⴰⵢⵉⵏ ⵏ ⵜⵉⴷⴷⴰⵙ- ⵏⵏⴰ ⵉⵜⵜⵓⵙⵅⵉⵜⵔⵏ ⵙ ⵓⴱⵔⵉⴷ ⵏ ⵉⵥⴹⵡⴰⵏ ⵉⵏⴰⵎⵓⵏⵏ, ⴰⵍⵍⵉⴳ ⵉⵡⴹⵏ ⵖⵔ ⵢⴰⵏ ⵓⵙⴰⵢⵔⴰⵔ ⵏ ⵜⵓⵅⵅⵓⵜ ⴷ ⵓⵎⵏⵏⵓⵖ ⴳⵔ ⵍⵎⵖⵔⵉⴱ ⴷ ⵙⵙⵉⵏⵉⵖⴰⵍ, ⵙⵉⵏ ⵡⴰⵎⵓⵏⵏ ⵉⵎⵓⵏⵏ ⵉⵡⵏⴰⵏ ⵏ ⵜⵙⵓⵜⵉⵡⵉⵏ ⵅⴼ ⵜⴰⵢⵎⴰⵜ ⴷ ⵜⵉⴷⴷⵓⴽⵍⴰ.

ⴷⴰⵜ ⵓⵎⵎⵔⵡⵉ ⵢⴰⴷ ⵏ ⵉⵏⵖⵎⵉⵙⵏ, ⵜⵖⵔⴰ ⵜⵙⵍⵡⴰⵢⵜ ⵏ ⵓⴳⵔⴰⵡ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ ⵉ ⵜⵎⵙⵜⴳⴳⴰⵔⵜ ⴷ ⵜⴼⴳⵓⵔⵜ ⵜⴰⵙⵓⵍⴰⵏⵜ ⵉ ⵡⵉⵏⵏⴰ ⴰⴽⴽⵯ ⵉⵣⴷⵉⵏ ⵙ ⵓⵙⴰⵢⵔⴰⵔ ⵏ ⵓⵙⵏⵖⵎⵙ. ⵜⵏⵏⴰ ⵉⵙ ⵜⵇⵇⴰⵏ ⵜⵎⵙⵜⴳⴳⴰⵔⵜ ⵏ ⵓⵙⵏⵖⵎⵙ ⵙ ⵓⵙⴷⵓⵙ ⵏ ⵓⵙⵍⴳⵏ ⴰⵏⵉⵎⴰⵏ ⴰⵣⵣⵓⵍⴰⵏ ⴷ ⵉⵙ ⵉⵇⵇⴰⵏ ⵡⴰⴷⴰⴼ ⵏ ⵓⵙⵡⵓⵔⵉ ⵉⵕⵡⴰⵏ ⵏ ⵜⵉⵖⵉⵙⵜ ⵜⵉⵎⵍⵥⵉⵜ ⴰⴳⵓⵏⵙ ⵏ ⵉⵙⵉⵔⴰ ⵏ ⵜⵉⵔⴰ.

ⵜⴰⴷⴷ ⵎⴰⵙⵙⴰ ⴰⵅⴰⵔⴱⴰⵛ ⵅⴼ ⵜⵎⵙⵜⴳⴳⴰⵔⵜ ⵏ ⵓⴳⴷⵓⴷ ⵏ ⵉⵇⵇⴰⵏⵏ ⵉ ⵓⵙⵎⴰⵜⴰ ⵏ ⵜⴳⵎⵉ ⵅⴼ ⵓⵙⵏⵖⵎⵙ, ⵅⴼ ⵓⵎⵓⵟⵟⵓⵏ ⴷ ⵅⴼ ⵜⵉⵖⵉⵙⵜ ⵜⵉⵍⵎⵥⵉⵜ, ⵏⵏⴰ ⵉⵇⵇⴰⵏ ⴰⴷ ⵜⵜⵓⵢⴰⴽⵣ ⴰⵎⵎ ⵓⵣⵔⴼ ⵏ ⵉⵏⵎⵓⵔⵉⵏ. ⵜⴰⴷⴷ ⴳ ⵜⵙⴳⴰ ⵢⴰⴹⵏ ⵎⴰⵙⵙⴰ ⴰⵅⴰⵔⴱⴰⵛ ⵅⴼ ⵓⵣⵓⵛⵛⵍ ⵏ ⵓⵎⵙⵇⵙⵉ ⴰⴷⵉⵎⵓⵇⵕⴰⵜⵉ ⵏ ⵜⵙⵉⵍⴰⵡⵉⵏ ⵜⵉⵎⵓⵟⵜⵓⵏⵉⵏ ⵜⵉⵎⴰⵜⴰⵢⵉⵏ, ⵏⵏⴰ ⵏ ⵉⵇⵇⴰⵏ ⴰⴷ ⴰⵙⵉⵏⵜ ⵜⴰⵎⵙⵜⴳⴳⴰⵔⵜ ⵏⵏⵙⵏ ⵅⴼ ⵜⵓⵎⴰⵢⵉⵏ ⵏ ⵓⴽⵙⴰⵏ ⵙ ⵜⵖⴰⵔⴰⵙⵜ ⵏ ⵓⵏⴳⵔⴰⵡ ⵏ ⵓⵙⵖⵍⴼ ⴷ ⵜⵉⴹⴰⴼ ⴷ ⵜⵖⵢⴰⵙⵜ, ⵏⵏⴰ ⴽⵉⴳⴰⵏ ⵏ ⵜⵉⴽⴽⴰⵍ ⵓⵔ ⵎⵢⴰⵙⵏⵜ ⴷ ⴰⵔ ⵜⵅⵉⵜⵉⵔⵏⵜ, ⵙ ⵉⵎⵥⵍⵉ ⵖⵓⵔ ⵉⵎⵙⵡⵓⵔⴰ ⵏ ⵜⵎⵓⵔⴰ ⵏ ⵢⵉⴼⴼⵓⵙ.

ⴳ ⵓⵎⵙⴳⵔⴰ ⵏ ⵜⵉⵏⴰⵡⵜ ⵏⵏⵙ, ⵜⵖⵔⴰ ⵎⴰⵙⵙⴰ ⴰⵅⴰⵔⴱⴰⵛ ⵉ ⵜⴳⵔⴰⵡⵉⵏ ⵜⵉⴳⵔⴰⵖⵍⴰⵏⵉⵏ ⴰⴼⴰⴷ ⴰⵙⵉⵏⵜ ⵜⴰⵎⵔⵉⵙⵜ ⵜⴰⵇⵓⵔⴰⵔⵜ ⴰⴼ ⴰⴷ ⵉⵖⵉⵢⵏⵜ ⵜⵎⵓⵔⴰ, ⵙ ⵓⵎⵣⵔⵓⵢ ⵏⵏⵙⵏⵜ ⴷ ⵜⴷⵍⵙⴰ ⵏⵏⵙⵏⵜ ⴷ ⵜⵎⵔⵙⴰⵍ ⵏⵏⵙⵏⵜ, ⴰⴷ ⵚⴽⵓⵏⵜ ⵢⴰⵏ ⵓⵙⴰⵢⵔⴰⵔ ⴰⵙⵖⵎⵙⴰⵏ ⵉⵥⴹⴰⵔⵏ ⴰⴷ ⵢⴰⵡⵙ ⴳ ⵓⵙⴷⵓⵙ ⵏ ⵓⴼⵔⴰ ⴷ ⵜⴳⵎⵉ ⵏ ⵜⵓⴷⵔⵜ ⵜⴰⵎⴷⵔⴰⵡⵜ. ⵜⵙⵙⴽⵜⵉ ⴷ ⴷⵉⵖ ⵉⵙ « ⴰⵙⴰⵢⵔⴰⵔ ⴰⴳⴷⵓⴷⴰⵏ ⴳ ⵉⵍⵍⴰ ⵓⴼⵔⴰ ⵓⵔ ⴷⴰ ⵉⵜⵜⵓⵙⴽⴰⵔ ⵙ ⵜⵖⵜⴰⵙⵜ, ⴷⴰ ⵉⵜⵜⵓⴽⵔⴰⵣ ⵙ ⵜⵜⴰⵡⵉⵍ », ⵜⴰⴷⴷ ⵅⴼ ⵓⵙⵖⵓⵍ ⵏ ⵡⴰⵜⵉⴳ ⵏ ⵜⵖⴰⵎⵙⴰ ⵜⴰⵣⵣⵓⵍⴰⵏⵜ ⴰⵛⴽⵓ ⵜⴳⴰ ⴰⵙⵙⴰ ⵢⴰⵏ ⵓⵙⵙⵓⵔⵓ ⴰⵅⴰⵜⴰⵔ ⴳ ⵜⴷⵓⵙⵉ ⵜⴰⵏⴰⵎⵓⵏⵜ ⴷ ⵓⴼⵔⴰ ⴰⵖⵔⵎⴰⵏ.

ⵜⵉⵡⵓⵔⵉⵡⵉⵏ ⵏ ⵜⵙⵓⵜⵍⵜ ⵜⵉⵙⵙ ⴽⵓⵥⵜ ⵏ ⵓⵎⵙⴳⵔⴰⵡ ⴰⴳⵔⴰⵖⵍⴰⵏ ⵏ ⵛⵓⵛⴰ, ⵏⵏⴰ ⴷⴰ ⵜⵙⵏⵎⴰⵍⴰ ⴽⵓ ⴰⵙⴳⴳⵯⴰⵙ, ⵙⴳ 2023, ⵜⵙⵏⵓⵔⴰⵢⵜ ⵏ ⵜⴳⵎⵉ ⵏ ⵓⵙⵏⵖⵎⵙ ⵏ ⴰⵣⵉⵔⴱⴰⵢⴷⵊⴰⵏ, ⵜⵜⵓⵕⵛⵎ ⵙ ⵢⴰⵏ ⵓⴳⵔⴰⵡ ⴰⵎⵇⵔⴰⵏ ⵏⵏⴰ ⵉⵙⵡⵓⴷⴷⴰ ⵎⴰⵙⵙ ⵉⵍⵀⴰⵎ ⵄⴰⵍⵉⴰⴼ, ⴰⵙⵍⵡⴰⵢ ⵏ ⵜⴳⴷⵓⴷⴰⵏⵜ ⵏ ⴰⵣⵉⵔⴱⴰⵢⴷⵊⴰⵏ. ⵜⵉⵡⵓⵔⵉⵡⵉⵏ ⵏ ⵓⵎⵙⴳⵔⴰⵡ ⵜⵜⵓⵙⴽⵔⵏⵜ ⵙ ⵢⵉⵍⵉ ⵏ ⵉⵎⵙⵜⴳⴳⴰⵔⵏ ⵏ ⵜⵏⴱⴰⴹⵉⵏ, ⴷ ⵉⵎⵓⵣⴰⵢ ⴷ ⵉⵣⵣⵓⵍⴰⵏⵏ ⵏ ⵓⵙⵏⵖⵎⵙ ⴷ ⵢⵓⵙⴰⵏ ⵙⴳ 54 ⵏ ⵜⵎⵓⵔⴰ ⵏ ⵓⵎⴰⴹⴰⵍ.