ⵉⵡⴹⵏⵜ ⴰⵙ ⴷ ⵉ ⵓⵏⴱⴰⴹ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ ⴳⵔ 03 ⴷ 21 ⵎⴰⵢⵓ 2020, ⴽⵓ ⵥⵜ ⵏ ⵜⵎⵔⴰⵡⵉⵏ ⵏ ⵜⵏⵓⵔⵣⵉⵜⵉⵏ ⵏⵏⴰ ⵢⴰⵙ ⴷ ⵓⵣⵏⵏ ⵜⵏⵎⵓⵔⵉⵏ ⴷ ⵉⵏⵎⵓⵔⵉⵏ ⵅⴼ ⵓⵢⵏⵏⴰ ⵉⵣⴷⵉⵏ ⴷ ⵢⵉⵜⵙ ⵏ ⵉⵙⴰⵢⵙⵏ ⴷ ⴽⵔⴰ ⵏ ⵉⵙⵏⵓⵍⴼⵓⵜⵏ ⴳ ⵡⴰⵢⵢⵓⵔ ⵏ ⵕⵎⴹⴰⵏ, ⵙ ⵉⵎⵥⵍⵉ ⵜⵉⵡⵓⵔⵉⵡⵉⵏ ⵜⵉⵎⴰⵔⵓⵔⵉⵏ (ⵉⵎⵙⴷⴷⵉⵜⵏ, ⵉⵙⵜⵉⴽⵓⵎⵏ, ⴷ ⵉⵎⵙⴷⴷⵉⵜⵏ ⵏ ⵜⴰⴹⵚⴰ), ⵏⵏⴰ ⵉⵙⵙⴽⵏ ⵓⵙⴰⵔⵓ ⴰⵎⵣⵡⴰⵔⵓ ⴷ ⵓⵙⴰⵔⵓ ⵡⵉⵙⵙ ⵙⵉⵏ ⴳ ⵡⴰⵢⵢⵓⵔ ⵏ ⵕⵎⴹⴰⵏ ⵉⵣⵔⵉⵏ.

ⴷⴼⴼⵔ ⵜⴰⵖⵓⵔⵉ ⵏⵏⵙ ⵉ ⵜⵏⵓⵔⵣⵉⵜⵉⵏ ⴰⴷ, ⴷ ⵓⵎⵛⴰⵡⴰⵕ ⵅⴼ ⵓⵢⵏⵏⴰ ⵙⵔⵙⵏⵜ ⵉⵣⴷⵉⵏ, ⵢⵙⵉ ⵓⵙⵇⵇⵉⵎ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ ⵜⴰⵖⵜⵙⵜ ⴰⵙⵙ 04 ⵢⵓⵏⵢⵓ 2020 ⵏ ⵉⵙ ⵜⴳⴰ ⵜⵍⴻⵍⵍⵉ ⵏ ⵓⵙⵏⵓⵍⴼⵓ, ⵙ ⵉⵎⵥⵍⵉ ⵜⵉⵡⵓⵔⵉⵡⵉⵏ ⵜⵉⵎⴰⵔⵓⵔⵉⵏ, ⵢⴰⵏ ⵓⵎⵏⵣⴰⵢ ⵎⵇⵇⵓⵔⵏ ⴳ ⵜⵍⴻⵍⵍⵉ ⵏ ⵓⵎⵢⴰⵡⴰⴹ ⴰⵙⵍⵉⵥⵕ ⵙ ⵓⵢⵏⵏⴰ ⵉⵍⵍⴰⵏ ⴳ ⵓⵙⵍⴳⵏ ⵓⵟⵟⵓⵏ 77.03 ⵉⵣⴷⵉⵏ ⴷ ⵓⵎⵢⴰⵡⴰⴹ ⴰⵙⵍⵉⵥⵕ ⴷ ⵓⵙⵍⴳⵏ 11.15 ⵉⵣⴷⵉⵏ ⴷ ⵡⴰⵍⵍⴰⵙ ⵏ ⵓⵙⵏⵎⴰⵍⴰ ⵏ ⵓⴳⵔⴰⵡ ⴰⵎⴰⵜⵜⴰⵢ.

ⵙ ⵓⵢⴰ, ⵉⵙⵙⴽⵜⵉ ⴷ ⵓⵙⵇⵇⵉⵎ ⴰⵎⴰⵜⵜⴰⵢ ⵉⵙ ⵍⵍⴰⵏⵜ ⵜⵓⵎⴰⵢⵉⵏ ⵜⵉⵙⵍⵉⵥⵕⵉⵏ ⵏⵏⴰ ⵣⵣⵔⴰⵢⵏ ⵉⵏⵣⵡⴰⵢⵏ ⴷ ⵉⵙⵓⵔⴰ ⵉⵜⵍⴼⴰⵣⵏ, ⵜⵉⴳⴷⵓⴷⴰⵏⵉⵏ ⴷ ⵜⵎⵥⵍⵉⵢⵉⵏ ⴷⴷⴰⵡ ⵉⵎⵏⵣⴰⵢⵏ ⵉⵣⵔⴼⴰⵏⵏ ⵏⵏⴰ ⵅⴼ ⵢⵓⴳⴳⴰ ⵓⵙⵇⵇⵉⵎ ⴰⵎⴰⵜⵜⴰⵢ ⴰⵔ ⵉⴹⴼⴼⵓⵕ ⴰⵣⵔⴰⴽ ⵏⵏⵙⵏ, ⴰⵔ ⵉⵜⵜⴰⵙⵉ ⵜⵉⵖⵜⴰⵙⵉⵏ ⴷ ⵢⵓⵙⴰⵏ ⴳ ⵓⵢⵏⵏⴰ ⵉⴷⵙⵏⵜ ⵉⵣⴷⵉⵏ, ⴰⵎⵎ ⵓⵣⵓⵛⵛⵍ ⵏ ⵓⵣⵔⴰⴽ ⵏ ⵡⵓⴷⴷⵓⵔ ⴰⵏⴼⴳⴰⵏ, ⴰⵣⵔⴰⴽ ⵏ ⵓⵎⵏⵣⴰⵢ ⵏ ⵜⵉⵣⵣⵉⴷⴳⴰ  ⴷ ⵡⴰⵔ ⴰⵙⵉⵎⵎⵕ ⵅⴼ ⵜⵙⵙⴰⵥⵓⵕⵜ ⵏⵖ ⴰⴽⵙⴰⵏ ⴷ ⵜⴽⵕⴹⵉ, ⴷ ⴳⴰⵔ ⴰⵙⵏⵓⵃⵢⵓ ⴳⵔ ⵜⵎⵖⴰⵔⵜ ⵏⵖ ⴰⵙⵙⵉⵣⴷⵔ ⵙ ⵡⵓⴷⴷⵓⵔ ⵏⵏⵙ , ⴷ ⵓⴼⵔⴰⴳ ⵏ ⵉⵎⵥⵢⴰⵏⵏ ⴷ ⵓⴳⴷⵓⴷ ⵉⴳⵎⵎⴰⵏ ⴷ ⵡⴰⵔ ⴰⴼⵙⴰⵔ ⵏⵏⵙ ⵉ ⵜⵓⵎⴰⵢⵉⵏ ⴳ ⵉⵍⵍⴰ ⵉⵎⵉⵣⵉ ⵏ ⵜⴼⴳⴳⴰ ⵏⵖ ⵜⵉⵏ ⵢⵉⵎⴰⵏ ⵏⵖ ⵜⵉⵏ ⵓⵙⵡⵉⵏⴳⵎ, ⴷ ⵡⴰⵔ ⴰⴼⵙⴰⵔ ⵏⵏⵙⵏ ⴷⴰⵜ ⵜⵖⴰⵔⵉⵡⵉⵏ ⵉⵙⵙⵉⵖⵉⵢⵏ ⴽⴰ ⵉ ⵜⴷⵓⵙⵉ ⴷ ⵜⵏⴼⵔⵓⵜ ⵏ ⵎⴷⴷⵏ…

ⴳ ⵜⵙⴳⴰ ⵢⴰⴹⵏ, ⴰⵔ ⵉⵜⵜⴰⵍⵙ ⵓⵙⵇⵇⵉⵎ ⵅⴼ ⵓⵙⴱⵓⵖⵍⵓ ⵏ ⵜⴷⵍⵙⴰ ⵏ ⵓⵙⵡⵓⵔⵉ ⵏ ⵉⵎⴰⵙⵙⵏ ⵏ ⵓⵙⵏⴰⵎ ⴰⴳⵓⵏⵙⴰⵏ ⴳ ⵓⴱⵔⵉⴷ ⵏ ⵉⵏⴰⵔⵓⵣⵏ ⵏ ⴷ ⵜⵏⴰⴼⵓⵜ ⵜⴰⵎⴰⵜⴰⵢⵜ ⵏ ⵉⵏⵎⵓⵔⵉⵏ ⵉⵙⵡⵓⵔⵉⵏ ⴰⵙⵏⵖⵎⵙ, ⵉⵎⴼⴽⴰⵏ ⵉⵙⵍⵉⵥⵕⵏ ⵙ ⵉⵎⵥⵍⵉ ⵡⵉⵏ ⵜⵏⴰⴼⵓⵜ ⵜⴰⴳⴷⵓⴷⴰⵏⵜ, ⵉⵇⵇⴰⵏ ⵏ ⴰⴷ ⴰⴼⵏ ⵉⵎⴰⵙⵙⵏ ⵉⴳⵓⵏⵙⴰⵏⵏ ⵉⵏⵎⵏ ⵉⵍⵍⴰⵏ ⴳ ⵉⵍⵓⴳⵏ ⵏ ⵡⴰⴳⴳⵯⴰⵜⵏ ⵉⴳⴰⵏ ⵡⵉⵏ ⵓⵙⴷⵓⵙ ⵏ ⵓⵙⵙⴼⵍⴷ ⵏ ⵜⵎⵖⴰⵢⵜ ⴷ ⵓⴳⴷⵓⴷ ⴷ ⵓⵙⵏⴱⴳ ⵏ ⵉⵏⵓⵔⵓⵣⵏ ⴷ ⵉⵙⵉⵜⵉⵎⵏ ⵏⵏⵙ ⴳ ⵓⵢⵏⵏⴰ ⵉⵣⴷⵉⵏ ⴷ ⵢⵉⴳⵔ ⴰⵙⵍⵉⵥⵕ.

ⴳⵔ ⵉⵎⴰⵙⵙⵏ ⴰⴷ ⵏⵏⴰ ⵉⵙⵔⵙ ⵓⵙⵇⵇⵉⵎ ⴰⵎⴰⵜⵜⴰⵢ : ⴰⵎⴰⵣⵣⴰⵍ ⵢⵓⵙⵉⵏ ⵜⴰⵎⴰⵙⴰⵢⵜ ⴰⴳⵓⵏⵙ ⵏ ⵜⵎⵙⵙⵓⵔⵉⵏ ⵜⵉⵏⴰⵎⵓⵔⵉⵏ  ⵏ ⵓⵙⵍⵉⵥⵕ ⴰⴳⴷⵓⴷⴰⵏ ⴰⴷ ⵉⵜⵜⴰⵙⵉ ⵜⵉⵖⵜⴰⵙ ⵉⵏⵎⵏ ⵉ ⵢⵉⵎⵥ ⴷ ⵓⵙⵎⴽⵍ ⵏ ⵜⴰⵏⵏⴰⵢⵉⵏ ⴷ ⵉⵙⵓⵎⴰⵔ ⵏ ⵓⴳⴷⵓⴷ, ⴰⴳⵔⴰⵡ ⵏ ⵜⵙⵓⵏⴰⴳ ⴷ ⵉⵖⴰⵡⴰⵙⵏ ⵉⵣⵣⵔⴰⵢⵏ ⵅⴼ ⵡⴰⵜⵉⴳⵏ ⵉⵣⴷⵉⵏ ⴷ ⵜⵖⴰⵔⵉⵡⵉⵏ ⵏ ⵜⵓⵎⴰⵢⵜ ⵜⴰⵙⵍⵉⵥⵕⵜ ⴷ ⴰⴷ ⵉⴼⴽ ⵜⴰⵏⵏⴰⵢⵜ ⵏⵏⵙ ⵅⴼ ⵓⵢⴰⴷ ⴷⴰⵜ ⵓⵣⵓⵣⵣⵔ, ⵔⵏⵓ ⵢⴰⵙ ⴰⴳⵔⴰⵡ ⵏ ⵓⵙⵜⴰⵢ ⵏ ⵉⵙⴰⵢⵙⵏ ⵏⵏⴰ ⴷ ⵓⵡⵉⵏ ⵉⵎⵙⵢⴰⴼⵓⵜⵏ ⵏ ⴱⵕⵕⴰ ⵅⴼ ⵉⵙⵓⵔⴰ ⴰⴳⵓⵏⵙ ⵏ ⵓⵙⴰⵜⵉ ⵏ ⵜⵓⵜⵔⴰ ⵏ ⵉⵙⴽⴰⵏⵏ ⵏⵏⴰ ⵉⵍⵍⴰⵏ ⴳ ⵓⵙⵍⴳⵏ.

ⴰⵙⵇⵇⵉⵎ ⴰⵎⴰⵜⵜⴰⵢ ⴷⴰ ⵉⵜⵜⴰⵍⵙ ⴳ ⵢⵉⴳⵔ ⴰⴷ, ⵅⴼ ⵓⵣⵓⵛⵛⵍ ⵏ ⵜⵜⵓⴽⴽⵉ ⵉ ⵜⵎⵙⵙⵓⵔⵉⵏ ⵜⵉⵏⴰⵎⵓⵔⵉⵏ ⵏ ⵓⵙⵍⵉⵥⵕ ⴰⴳⴷⵓⴷⴰⵏ ⵉⵎⴰⵙⵙⵏ ⴷ ⵉⵙⴰⴳⵎⵏ ⵏ ⵉⵇⵇⴰⵏⵏ ⴰⴼⴰⴷ ⴰⴷ ⵉⵜⵜⵓⵚⴽⴰ ⵓⴱⴰⵕⵓⵎⵉⵜⵔ ⵏ ⵓⵏⵎⴰⵎⴽ ⴷ ⵓⵙⵙⴽⴰⵔ ⵏ ⵜⵖⵓⵔⵉⵡⵉⵏ ⵅⴼ ⵓⴷⴳⵉ ⵏ ⵓⴳⴷⵓⴷ ⴳ ⵓⵢⵏⵏⴰ ⵉⵣⴷⵉⵏ ⴷ ⵉⵙⴰⵢⵙⵏ ⴷ ⵉⵖⴰⵡⴰⵙⵏ ⵉⵙⵍⵉⵥⵕⵏ ⵉⵜⵜⵓⵣⵓⵣⵣⵔⵏ. ⴰⵙⵡⵓⵔⵉ ⵏ ⵜⵖⵜⴰⵙⵉⵏ ⴰⴷ, ⵉⵍⵍⴰⵏ ⴳ ⵉⵍⵓⴳⵏ ⵏ ⵡⴰⴳⴳⵯⴰⵜⵏ, ⵉⴳⴰ ⵜⵉⵡⵉⵙⵉ, ⵙ ⵓⵢⵏⵏⴰ ⵉⵍⵍⴰⵏ ⴳ ⵓⵏⴳⵔⴰⵡ ⵏ ⵓⵙⵙⴼⵍⴷ, ⵉ ⵜⵓⵙⵙⵏⴰ ⵉⴳⵣⵉⵏ ⴷ ⵜⵎⴷⵔⴰⵡⵜ ⵉⵀⵢⵢⴰⵏ ⵏ ⵜⵏⴰⴼⵓⵜⵉⵏ ⵜⵉⵙⵍⵉⵥⵕⵉⵏ ⴳ ⵓⵣⵣⵉⴳⵣ ⵏ ⵉⵏⵓⵔⵓⵣⵏ ⵏ ⵡⴰⵏⴰⵡⵏ ⴰⴽⴽⵯ ⵉⵏⴰⵎⵓⵏⵏ ⴷ ⵉⴷⵍⵙⴰⵏⵏ ⵏ ⵓⴳⴷⵓⴷ.