ⵜⵏⵏⴰ ⵎⴰⵙⵙⴰ ⵍⴰⵟⵉⴼⴰ ⴰⵅⴰⵔⴱⴰⵛ, ⵜⴰⵏⵙⵙⵉⵅⴼⵜ ⵏ ⵓⴳⵔⴰⵡ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ ⵉⵙ « ⵉⵇⵇⴰⵏ ⴰⴷ ⵜⵚⴽⵓ ⵜⵖⴰⵔⴰⵙⵜ ⵏⵏⴰ ⵔⴰⴷ ⵙⵜⵉⵏⵜ ⵜⵙⵉⵍⴰⵡⵉⵏ ⵜⵉⵎⵓⵟⵟⵓⵏⵉⵏ ⵜⵉⵎⴰⵜⴰⵢⵉⵏ ⴳ ⵜⵖⵢⴰⵙⵜ ⵏ ⵜⵓⵎⴰⵢⵜ ⵅⴼ ⵓⵙⵓⵎⵓ ⴷ ⵓⵎⵢⴰⵏⴰⵡ ⴰⴷⵍⵙⴰⵏ ⴷ ⵡⵓⵜⵍⴰⵢ”. ⴰⵢⴰ ⵜⵏⵏⴰ ⵜ ⴳ ⵜⴳⵓⵔⵉ ⵏⵏⵙ ⴳ ⵓⵙⴳⵔⴰⵡ ⴰⴳⵔⴰⵖⵍⴰⵏ ⵏⵏⴰ ⵉⵙⵏⵎⴰⵍⴰ ⵍⵓⵏⵉⵙⴽⵓ ⵓⵙⵙⴰⵏ ⵏ 22 ⴷ 23 ⴼⴱⵕⴰⵢⵕ 2023 ⴳ ⴱⴰⵔⵉⵣ ⵅⴼ ⵓⵙⴳⵓⵎ ⵏ “ⵍⴰⵏⵜⵉⵔⵏⵉⵜ ⵉ ⵜⵓⵚⴽⴰ ⵏ ⵓⵎⵢⴰⵎⴰⵏ: ⴳ ⵓⵡⵜⵜⴰⵙ ⵏ ⵜⵓⵚⴽⴰ ⵏ ⵉⵎⵓⵣⴰⵢ ⵉⵎⵙⵙⵉⵙⴼⴰⵡⵏ ⵏ ⵓⵙⵏⵎⴰⵍⴰ ⵏ ⵜⵡⵓⵔⵉ ⵏ ⵜⵙⵉⵍⴰⵡⵉⵏ ⵜⵉⵎⵓⵟⵟⵓⵏⵉⵏ ⴰⴼⴰⴷ ⴰⴷ ⴳⵏ ⵉⵏⵖⵎⵉⵙⵏ ⵜⴰⵏⴰⴼⵓⵜ ⵜⴰⵎⴰⵜⴰⵢⵜ”.

ⴳ ⵓⵢⵏⵏⴰ ⵉⵣⴷⵉⵏ ⴷ ⵓⵙⵡⵓⵜⵜⵓ ⵏ ⵢⵉⴳⵔ ⵏ ⵓⴽⵛⵛⵓⵎ ⵏ ⵜⵡⵓⵔⵉ ⵏ ⵉⵜⵉⵇⵏⵉⵢⵏ, ⵜⵙⵙⴽⵏ ⵎⴰⵙⵙⴰ ⴰⵅⴰⵔⴱⴰⵛ ⵏⵏⴰ ⵉⴳⴰⵏ ⵜⴰⵏⵙⵙⵉⵅⴼⵜ ⵏ ⵓⵥⵟⵟⴰ ⵏ ⵉⴳⵔⴰⵡⵏ ⵉⴼⵔⵉⵇⵏ ⵏ ⵓⵙⵏⴰⵎ ⵏ ⵓⵎⵢⴰⵡⴰⴹ ⵉⵙ “ⵜⵉⵙⵉⵍⴰⵡⵉⵏ ⵜⵉⵎⵓⵟⵟⵓⵏⵉⵏ ⴷⴰ ⵙⵡⵓⵔⵉⵏⵜ ⴳ ⵓⵙⴰⵜⵉ ⵏ ⵓⴳⴰⴷⴰⵣ ⴰⵎⴰⵜⴰⵢ, ⵙ ⵓⵢⴰ, ⵉⵇⵇⴰⵏ ⵏ ⴰⴷ ⴰⵙⵏⵜ ⵏⵙⵙⵉⵙⵉ ⵜⴰⵎⴰⵙⴰⵢⵜ ⴷⵉⵖ ⵜⴰⵎⴰⵜⴰⵢⵜ”.

ⵙ ⵓⵎⵢⴰⵖ ⴷ ⵓⵙⵇⵙⵉ ⵅⴼ ⵓⵣⵣⵉⴳⵣ ⴷ ⵜⵕⵡⵉ ⵏ ⵓⵙⵡⵓⴷⴷ ⵏ ⵜⵖⵢⴰⵙⵜ ⵏ ⵜⵓⵎⴰⵢⵜ ⵏⵏⴰ ⵙⵜⵉⵏⵜ ⵜⵙⵉⵍⴰⵡⵉⵏ ⵜⵉⵎⵓⵟⵟⵓⵏⵉⵏ, ⵜⵏⵏⴰ ⵜⵏⵙⵙⵉⵅⴼⵜ ⵏ ⵓⴳⵔⴰⵡ ⴰⵎⴰⵜⵜⴰⵢ ⵉⵙ « ⵉⵙⵡⵓⴷⴷⵓⵜⵏ ⵏ ⵜⵖⵢⴰⵙⵜ ⵏ ⵜⵓⵎⴰⵢⵜ ⵏⵏⴰ ⵙⵜⵉⵏⵜ ⵜⵙⵉⵍⴰⵡⵉⵏ ⴷⴷⴰⵡ ⵜⴰⵙⵙⴰⵙⵜ ⵏ ⵜⴰⵏⵏⴰⵢⵜ ⵜⴰⵎⴰⵜⴰⵢⵜ, ⵜⴷⵔⵓⵙ ⵜⵕⵡⵉ ⵏⵏⵙ, ⴰⵛⴽⵓ, ⵙ ⵉⵎⵥⵍⵉ, ⵜⵉⵙⵉⵍⴰⵡⵉⵏ ⵓⵔ ⴷⴰ ⵙⵙⴽⴰⵔⵏⵜ ⵜⴰⵖⵢⴰⵙⵜ ⵏ ⵜⵓⵎⴰⵢⵜ ⵏ ⵉⵎⴰⵙⵙⵏ ⵉⵜⵉⵇⵏⵉⵢⵏ ⴷ ⵉⵏⴼⴳⴰⵏⵏ ⵉⵖⵉⵢⵏ ⴰⴷ ⴼⵔⴳⵏ ⵉ ⵓⵏⴳⵔⴰⵡ ⴰⵎⵓⵟⵟⵓⵏ ⵉ ⵉⵎⵙⵡⵓⵔⴰ ⵏ ⵍⴰⵏⵜⵉⵔⵏⵉⵜ ». ⵙ ⵓⵢⴰⴷ, ⵜⵙⴰⵡⵍ ⵎⴰⵙⵙⴰ ⴰⵅⴰⵔⴱⴰⵛ ⵅⴼ « ⵜⵅⵉⵜⵔⵜ ⵏ ⵓⵙⵔⵓⵙ ⵏ ⵜⵙⵔⵜⴰⵢ ⵜⵉⴳⴷⵓⴷⴰⵏⵉⵏ ⵉⵣⴷⵉⵏ ⴷ ⵓⵙⵎⵓⵜⵜⴳ ⴷ ⵜⵓⴽⴽⵉ ⵏ ⵜⵣⵎⵔⵜ ⵉ ⵉⵎⵙⵡⵓⵔⴰ ⵏ ⵓⵙⴰⵢⵔⴰⵔ ⴰⴳⴷⵓⴷⴰⵏ ⴰⵎⵓⵟⵟⵓⵏ ⴷ ⵓⵙⴷⵓⵙ ⵏ ⵓⵙⵡⵓⵔⵉ ⴰⵎⵙⴼⴰⵡ ⴷ ⵓⵎⵣⵖⴰⵏ ⵏ ⵉⵎⴰⵙⵙⵏ ⵏ ⵓⵙⵏⵖⵎⵙ ».

ⴰⵎⵓⵏ ⴳ ⵓⴳⵔⴰⵡ ⴰⴷ ⵏⵏⴰ ⵉⵜⵜⵓⵕⵥⵎⵏ ⵙ ⵜⴳⵓⵔⵉ ⵏ ⵎⴰⵙⵙⴰ ⵓⴷⵔⵉ ⴰⵥⵓⵍⴰⵢ, ⵜⴰⵏⵎⵀⴰⵍⵜ ⵜⴰⵎⴰⵜⴰⵢⵜ ⵏ ⵍⵢⵓⵏⵉⵙⴽⵓ, ⵓⴳⴰⵔ ⵏ 1500 ⵏ ⵓⵎⴷⵔⴰⵡ ⵙⴳ ⵉⵎⴰⵡⵙⴰⵙⵏ ⴷ ⵉⴳⵔⴰⵡⵏ ⵏ ⵓⵙⵏⴰⵎ ⴰⵖⵎⵙⴰⵏ ⴷ ⵉⴳⵏⵙⴰⵙ ⵏ ⵜⵙⵉⵍⴰⵡⵉⵏ ⵜⵉⵎⵓⵟⵟⵓⵏⵉⵏ ⵜⵉⵅⴰⵜⴰⵔⵉⵏ ⵜⵉⴳⵔⴰⵖⵍⴰⵏⵉⵏ ⴷ ⵉⵎⵔⵣⴰ ⵉⴽⴰⴷⵉⵎⵉⵢⵏ ⴷ ⵉⵎⴳⴳⴰⵢⵏ ⵙⴳ ⵡⴰⵎⵓⵏ ⵓⵖⵔⵉⵎ ⴷ ⵉⴳⵏⵙⴰⵙ ⵏ ⵜⵎⴳⵓⵔⵉ ⵏ ⵜⴻⵜⵉⴽⵏⵓⵍⵓⵊⵉⵜ ⵏ ⵓⵙⵏⵖⵎⵙ ⴷ ⵓⵎⵢⴰⵡⴰⴹ. ⴰⵡⵜⵜⴰⵙ ⵏ ⵓⴳⵔⴰⵡ ⴰⴷ ⴰⵅⴰⵜⴰⵔ ⵉⴳⴰ ⴰⵙⴷⵓⵙ ⵏ ⵓⵎⵙⴰⵡⴰⵍ ⵎⵉ ⴳⴳⵓⵜⵏ ⵜⵙⴳⴳⵯⵉⵏ ⵅⴼ ⵓⵙⵏⴰⵎ ⵏ ⵜⵙⵉⵍⴰⵡⵉⵏ ⴳ ⵓⵣⵎⵣ ⵏ ⵜⴽⵏⴷⴰⵡⵜ ⵜⴰⵙⵏⵖⵎⴰⵙⵜ ⴳ ⵓⵡⵜⵜⴰⵙ ⵏ ⴰⴷ ⵉⵜⵜⵓⵙⵓⵎⵔ ⵢⴰⵏ ⵓⵣⵓⵔⵜ ⵏ ⵓⵙⵏⴰⵎ ⴰⵎⴰⵢⵏⵓ ⵉⵡⵏⴰⵏ ⵏ ⵓⴳⵔⴰⵡ ⴰⴳⵔⴰⵖⵍⴰⵏ ⴷ ⵢⵓⵙⴰⵏ ⵉ ⵓⵏⴰⵎⵓⵏ ⵏ ⵓⵙⵏⵖⵎⵙ ⴷ ⵓⴳⵔⴰⵡ ⴰⴳⵔⴰⵖⵍⴰⵏ ⵅⴼ ⵓⵏⴱⴰⴹ ⵏ ⵍⴰⵏⵜⵉⵔⵏⵉⵜ.

ⵜⴰⵙⴳⴰ ⵏ ⵎⴰⵙⵙⴰ ⵍⴰⵟⵉⴼⴰ ⴰⵅⴰⵔⴱⴰⵛ, ⵉⵍⵍⴰ ⴳ ⵓⴽⴰⴱⴰⵕ ⵏ ⵓⴳⵔⴰⵡ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ ⴷⵉⵖ ⵎⴰⵙⵙ ⴰⵎⵉⵏ ⵍⴱⵓⵄⵣⵣⴰⵡⵉ, ⴰⵙⴰⵜⵉ ⴰⵏⴰⴼⵍⵍⴰ ⴳ ⵜⵎⵀⴰⵍⵜ ⵏ ⵓⵎⵢⴰⵡⴰⵙ ⴰⵎⴰⴹⵍⴰⵏ.