ⵉⵙⵏⵎⴰⵍⴰ ⵓⴳⵔⴰⵡ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ ⴰⵙⵙ ⵏ 29 ⵏⵓⵡⴰⵏⴱⵉⵔ 2022 ⴳ ⵓⵙⵖⵉⵎ ⵏ ⵜⵎⵔⵙⵍⵜ, ⵢⴰⵜ ⵜⴼⵓⴳⵍⴰ ⵏ ⵓⵙⴳⵎⴹ ⵏ ⵡⴰⵍⵓⴳ ⴰⵎⴰⵢⵏⵓ ⵏ ⵡⴰⴳⴳⵯⴰⵜⵏ ⵏ ⵕⴰⴷⵢⵓ ⴰⵟⵍⴰⵏⵜⵉⴽ. ⴰⵙⵔⵔⵓⵙ ⵏ ⵡⴰⵍⵓⴳ ⴰⴷ ⴰⵎⴰⵢⵏⵓ ⵏ ⵡⴰⴳⴳⵯⴰⵜⵏ ⵉⵜⵜⵓⵣⵎⵎⴻⵎ ⴳ ⵓⵙⴰⵜⵉ ⵏ ⵓⵙⵎⴰⵢⵏⵓ ⵏⵏⴰ ⵉⵙⵙⴽⴰⵔ ⵓⵙⵇⵇⵉⵎ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ, ⵏ ⵜⵓⵔⴰⴳⵜ ⵉⵎⴷⴰⵏ ⵏ ⵓⵙⵡⵓⵔⵉ ⵏ ⵕⴰⴷⵢⵓ ⴰⵟⵍⴰⵏⵜⵉⴽ.

ⴰⵍⵓⴳ ⴰⵎⴰⵢⵏⵓ ⵏ ⵡⴰⴳⴳⵯⴰⵜⵏ ⵏ ⵕⴰⴷⵢⵓ ⴰⵟⵍⴰⵏⵜⵉⴽ ⵉⵙⵓⵍ ⴷⵉⴳⵙ ⵉⵙ ⵉⴳⴰ ⴰⵕⴰⴷⵢⵓ ⵏ ⵉⵏⵖⵎⵉⵙⵏ ⴷ ⵓⵎⴷⵉⵡⴰⵍ ⵉⵣⴷⵉⵏ ⴷ ⵜⴷⴰⵎⵙⴰ, ⵢⵉⵍⵉ ⵜⴰⴷⵓⵍⵉ ⵅⴼ ⵜⵙⴳⴳⵯⵉⵏ ⵉⴳⴳⵓⵜⵏ. ⴷⴰ ⵉⵙⴷⵓⵙ ⵜⵉⵎⵔⵉⵙⵉⵏ ⵏ ⵓⵎⵡⵓⵔⵉ ⴳ ⵢⵉⴳⵔ ⵏ ⵓⵙⵉⴽⵙⵍ ⴷ ⵜⵣⴷⴳⵉ ⵏ ⵓⵏⵖⵎⵉⵙ, ⴷ ⵓⵙⴳⵎⵉ ⵅⴼ ⵉⵙⵏⵖⵎⵉⵙⵏ, ⴷ ⵓⵣⵔⴰⴽ ⵏ ⵓⵙⵉⴽⵙⵍ ⵏ ⵡⴰⵏⴰⵡⵏ, ⴷ ⵓⴼⵔⴰⴳ ⵏ ⵡⵓⴷⴷⵓⵔ ⵏ ⵜⵎⵖⴰⵔⵜ..., ⴰⵔ ⵉⵙⵙⵏⵖⴰⴷ ⵓⴳⴰⵔ ⵜⵉⵎⵔⵉⵙⵉⵏ ⵏⵏⵙ ⴳ ⵢⵉⴳⵔ ⵏ ⵓⵎⵢⴰⵡⴰⴹ ⴰⵙⵓⵙⵙⴰⵏ ⴷ ⵉⵣⵓⵛⵛⵍⵏ ⵉⴷⵙⵍⴰⵏⵏ ⵉⵣⴷⵉⵏ ⴷ ⵜⵏⴼⵔⵓⵜ ⵏ ⵉⵙⵉⵜⵏ ⴷ ⵉⵙⵔⵔⵓⵙⵏ ⵏ ⵜⵙⵢⴰⴼⵓⵜ ⴷ ⵜⵉⵏ ⵓⵣⵓⵣⵣⵔ.

ⵉⵜⵜⵓⵙⴽⵔ ⵓⵣⵎⵣⵣⵓ ⵢⴰⴷ ⵙ ⵓⵃⵉⴹⵕ ⵏ ⵉⴳⵎⴰⵎⵏ ⵏ ⵓⵙⵇⵇⵉⵎ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ, ⴷ ⵓⵏⵎⵀⴰⵍ ⴰⵎⴰⵜⴰⵢ, ⴷ ⵉⵏⵎⵀⴰⵍⵏ ⵏ ⵓⴳⵔⴰⵡ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ, ⴷ ⵎⴰⵙⵙ ⵏⴰⴷⵉⵔ ⵎⴰⵡⵍⴰⵡⵉ, ⴰⵏⵙⵙⵉⵅⴼ ⴰⵏⵎⵀⴰⵍ ⴰⵎⴰⵜⴰⵢ ⴷ ⵎⴰⵙⵙ ⵅⴰⵍⵉⴷ ⴱⵍⵢⴰⵣⵉⴷ, ⴰⵏⵎⵀⴰⵍ ⵏ ⵜⵉⵔⵔⴰ ⵏ ⵜⵎⵙⵙⵓⵔⵜ ⵉⴽⵓⵎⵉⴷⵢⴰ, ⵜⴰⵎⵙⵙⵓⵔⵜ ⵏⵏⴰ ⵖⵓⵔ ⵜⵍⵍⴰ ⵜⵓⵔⴰⴳⵜ.

ⵉⵡⵏⴰⵏ ⵏ ⵜⴼⵓⴳⵍⴰ ⵏ ⵓⵙⴳⵎⴹ, ⵜⵙⵙⵔⵖⵓⴷ ⵜⵏⵙⵙⵉⵅⴼⵜ ⵏ ⵓⴳⵔⴰⵡ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ ⵉⵎⴰⵙⴰⵢⵏ ⵏ ⵓⵕⴰⴷⵢⵓ ⵅⴼ ⵜⵡⵓⵔⵉ ⵏⵏⵙⵏ ⴳ ⵓⵢⵏⵏⴰ ⵉⵣⴷⵉⵏ ⴷ ⵓⵙⵅⵉⵜⵔ ⵏ ⵜⴷⵓⵍⵉ ⵜⴰⵎⵓⵔⴰⵏⵜ ⵏ ⵓⵕⴰⴷⵢⵓ ⴷ ⵅⴼ ⵓⵙⴷⵓⵙ ⵏ ⵓⵙⴽⴰⵏ ⵏ ⵜⵓⵎⴰⵢⵜ ⵉⵣⴷⵉⵏ ⴷ ⵉⵏⵖⵎⵉⵙⵏ ⴷ ⵡⵉⵏ ⵓⵎⴷⵉⵡⴰⵍ ⵉⴷⴰⵎⵙⴰⵏⵏ.

ⵜⵏⵏⴰ ⴷⵉⵖ ⵎⴰⵙⵙⴰ ⴰⵅⴰⵔⴱⴰⵛ ⴰⵙⵉⵜⵎ ⵏⵏⵙ ⵉ ⵕⴰⴷⵢⵓ ⴰⵜⵍⴰⵏⵜⵉⴽ, ⴷ ⵉⵍⵓⵍⴰⵏ ⵙⴳ ⵜⵙⵓⵜⴰ ⵜⴰⵎⵣⵡⴰⵔⵓⵜ ⵏ ⵜⵓⵔⴰⴳⵉⵏ ⵏⵏⴰ ⵉⴼⴽⴰ ⵓⴳⵔⴰⵡ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ ⴰⵙⴳⴳⵯⴰⵙ ⵏ 2006, ⵜⵙⵙⵉⵜⵎ ⴰⵙ ⴰⴷ ⵉⵙⴷⵓⵙ ⴰⵙⵡⵉⵔ ⵏⵏⵙ ⵏ ⵜⵏⴰⴼⵓⵜ ⵜⴰⵙⵍⵉⵥⵕⵜ ⵉⵚⴽⴰⵏ ⵅⴼ ⵓⵙⴳⵓⵎ « ⵜⴰⴷⴰⵎⵙⴰ » ⴷ ⴰⴷ ⵢⴰⵡⵙ ⵙ ⵓⵢⴰ ⵓⴳⴰⵔ ⴳ ⵓⵎⵢⴰⵏⴰⵡ ⵏ ⵜⵎⵓⵖⵍⵉ ⵜⴰⵙⵍⵉⵥⵕⵜ ⵜⴰⵎⵖⵔⴰⴱⵉⵢⵜ.

ⴳ ⵜⵙⴳⴰ ⵏⵏⵙ, ⵉⵙⵏⵎⵎⵔ ⵎⴰⵙⵙ ⵎⴰⵡⵍⴰⵡⵉ ⵜⴰⵖⴰⵔⴰ ⵏ ⵉⵣⴷⴰⵢⵏ ⴳⵔ ⵜⵎⵔⵙⴰⵍ, ⵉⵣⴷⴰⵢⵏ ⵏⵏⴰ ⵉⴹⴼⴰⵕ ⵓⴳⵔⴰⵡ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ ⵏⵜⵜⴰ ⴷ ⵉⵎⵡⵓⵔⴰ ⴰⴽⴽⵯ ⵉⵙⵍⵉⵥⵕⵏ ⴳ ⵉⵍⵍⴰ ⴰⵡⴷ ⵉⴽⵓⵎⵉⴷⵉⵢⴰ ⴳ ⵓⵡⵜⵜⴰⵙ ⵏ ⵜⵓⵚⴽⴰ ⵜⴰⴳⵔⴰⵡⴰⵏⵜ ⵏ ⵜⴳⵎⵉ ⵏ ⵜⵎⵓⵖⵍⵉ ⵜⴰⵙⵍⵉⵥⵕⵜ ⵜⴰⵏⴰⵎⵓⵔⵜ.

ⵉⵔⵏⵓ ⵉⵏⵏⴰ ⵜⴰⵎⵔⵉⵙⵜ ⴷ ⵜⴰⵢⵔⵉ ⵏ ⵓⴳⵔⴰⵡ ⵉⴽⵓⵎⵉⴷⵢⴰ ⴳ ⵓⴹⴼⴼⵓⵔ ⵏ ⵓⵙⴷⵓⵙ ⵏ ⵓⵙⵡⵉⵔ ⴰⴷⴰⵎⵙⴰⵏ ⵏ ⵓⵕⴰⴷⵢⵓ, ⴷ ⵓⵙⴳⵓⵜ ⵏ ⵓⵙⴽⴰⵏ ⵏ ⵉⵖⴰⵡⴰⵙⵏ ⵜⴰⵙⴳⴰ ⵏ ⵓⵙⵎⵢⴰⵏⴰⵡ ⵏ ⵓⵙⴽⴰⵏ ⵏⵏⵙ ⵏ ⵉⵖⴰⵡⴰⵙⵏ ⴷ ⵓⵙⴳⵎ ⵏ ⵓⵙⵙⴼⴰⵡ ⴰⵏⴰⵎⵓⵔ ⴷ ⵓⵎⵏⵥⴰⵡ.