ⵜⵙⵏⵓⴱⴳ ⵜⵙⵍⵡⴰⵢⵜ ⵏ ⵓⴳⵔⴰⵡ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ, ⵎⴰⵙⵙⴰ ⵍⴰⵟⵉⴼⴰ ⴰⵅⴰⵔⴱⴰⵛ, ⴰⵙⵙ ⵏ 18 ⵛⵜⴰⵎⴱⵉⵔ 2026, ⴳ ⵓⵙⵖⵉⵎ ⵏ ⵜⵎⵔⵙⵍⵜ, ⵢⵉⵡⵏ ⵓⴽⴰⴱⴰⵕ ⵏ ⵓⵙⵏⵎⴰⵍⴰ ⴰⴳⵔⴰⵖⵍⴰⵏ ⵏ ⵜⴼⵔⴰⵏⴽⵓⴼⵓⵏⵉⵜ (OIF), ⵉⵍⵍⴰⵏ ⴳ ⵜⵙⵎⵉⴳⵍⵜ ⵏ ⵜⵉⵏⵥⵉ ⵏ ⵉⵙⵜⴰⵢⵏ ⵓⵣⵔⵉⴼⵏ ⵏⵏⴰ ⵔⴰⴷ ⵢⵉⵍⵉ ⴳ 23 ⵛⵜⴰⵎⴱⵉⵔ 2026.
ⴰⵎⵙⴳⵔⴰⵡ ⴷⴷⵖ ⵢⵓⵏⴼ ⵉ ⵎⴰⵙⵙⴰ ⴰⵅⴰⵔⴱⴰⵛ ⵏ ⴰⴷ ⵜⵙⵎⵏⵉⴷ ⵉ ⵜⵙⵎⵉⴳⵍⵜ ⵜⴰⵎⵙⵜⴰⵢⵜ ⵏ ⵜⴼⵕⴰⵏⴽⵓⴼⵓⵏⵉⵜ, ⵎⵉ ⵉⵣⵡⴰⵔ ⵎⴰⵙⵙ ⴰⵏⴷⵔⵉ-ⵎⴰⴳⵏⵓⵙ ⵉⴽⵓⵎⵓ, ⴰⵎⵙⵇⴰⴷ ⵏ ⵍⴽⴰⵎⵉⵔⵓⵏ ⴳ ⴼⵕⴰⵏⵙⴰ, ⴰⵙⴰⵜⵉ ⴰⵣⵔⴼⴰⵏ ⵉⵙⵡⵓⴷⴷⵓⵏ ⵜⴰⵎⴰⴳⵓⵜ ⵜⴰⵙⵔⵜⴰⵏⵜ ⴰⴳⵏⵙⵓ ⵏ ⵓⵙⵍⵉⵥⵕ ⴰⵎⵖⵔⴰⴱⵉ, ⴳ ⵓⵣⵎⵣ ⵏ ⵉⵙⵜⴰⵢⵏ ⵏⵖ ⴱⵔⵔⴰ ⵏ ⵓⵣⵎⵣ ⴷⴷⵖ. ⵜⵙⵙⵉⴽⵣ ⵉⵙ ⵉⴳⴰ ⵓⴹⴼⴼⵓⵕ ⵏ ⵜⵎⴰⴳⵓⵜ ⵏ ⵓⵡⵏⵏⵉ ⴰⴳⵏⵙⵓ ⵏ ⵓⵙⵏⵖⵎⵙ ⴰⵙⵍⵉⵥⵕ ⴰⴳⴷⵓⴷⴰⵏ ⴷ ⵡⵓⵙⵍⵉⴳ ⴳⴰⵏ ⵜⴰⵙⵎⵉⴳⵍⵜ ⵜⴰⵙⵓⵍⴰⵏⵜ ⵏ ⵓⴳⵔⴰⵡ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ. ⵜⵙⵙⴽⵜⵉ ⴷ ⴷⵉⵖ ⵉⵙ ⵉⴳⴰ ⵓⵣⵓⵔⵜ ⴰⵎⵖⵔⴰⴱⵉ ⵏ ⵓⵙⵍⴳⵏ, ⴰⴷⴰⴼ ⵏ ⵓⴳⴷⵓⴷ ⵖⵔ ⵉⵏⵖⵎⵉⵙⵏ ⵉⵎⵢⴰⵏⴰⵡⵏ, ⵉⵎⵢⴰⵙⵏ, ⵉⵣⴷⴷⵉⴳⵏ ⵉⴳⴰ ⵢⴰⵏ ⵓⵣⵔⴼ ⴰⴷⵙⵍⴰⵏ ⵏ ⵓⵏⵎⵓⵔⵉ, ⵉⵣⴷⵉⵏ ⵙ ⵓⵙⵡⵓⵔⵉ ⵏ ⵢⴰⵏ ⵓⵙⵜⴰⵢ ⴰⵎⴰⴼⴰⵡ.
ⵜⵙⵙⴽⵏ ⴷⵉⵖ ⵜⵙⵍⵡⴰⵢⵜ ⵏ ⵓⴳⵔⴰⵡ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ, ⵉⵎⴰⵙⵙⵏ ⵉⵙⵍⴳⴰⵏⵏ ⵏⵏⴰ ⵉⵙⵡⵓⵔⵉ ⵓⵙⵇⵇⵉⵎ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ (CSCA), ⵙ ⵉⵎⵥⵍⵉ ⵜⴰⵖⵜⴰⵙⵜ ⵓⵟⵟⵓⵏ 50-26 ⵏ 16 ⵢⵓⵏⵢⵓ 2026, ⵉⵜⵜⵓⵥⵕⴳⵏ ⴳ ⵓⵍⵓⴳ ⵓⵏⵚⵉⴱ ⵉⵣⴷⵉⵏ ⵙ ⵓⴹⴼⴼⵓⵕ ⵏ ⵜⵎⵣⴰⵣⵣⵍⵜ ⵏ ⵉⵙⵜⴰⵢⵏ ⵓⵣⵔⵉⴼⵏ ⵏ 23 ⵛⵜⴰⵎⴱⵉⵔ. ⴰⴹⵕⵉⵙ ⴷⴷⵖ, ⵉⵙⵙⵎⵀⵍ ⵉ ⵓⵙⵏⵖⵎⵙ ⴰⵙⵍⵉⵥⵕ ⴰⴳⴷⵓⴷⴰⵏ ⴷ ⵡⵓⵙⵍⵉⴳ, ⵉⵡⵏⴰⵏ ⵏ ⵓⵣⵎⵣ ⵏ ⵉⵙⵜⴰⵢⵏ (ⵙⴳ 15 ⵖⵓⵛⵜ ⴰⵔ 22 ⵛⵜⴰⵎⴱⵉⵔ 2026, ⴰⵙⵙ ⵏ ⵓⵙⵜⴰⵢ ⵢⵓⴷⴼ), ⴰⴹⵕⵉⵙ ⴰ, ⵢⵓⵎⴰ ⵙ ⵉⵎⵥⵍⵉ ⴰⴱⵟⵟⵓ ⵏ ⵉⵣⵎⵣⵏ ⵏ ⵉⵎⵥⴳⵉ ⴷ ⵡⴰⵡⴰⵍ, ⴰⵙⵓⵎⵓ ⵏ ⵡⴰⴷⴰⴼ ⵖⵔ ⵉⵎⴰⵙⵙⵏ ⵏ ⵓⵙⵏⵖⵎⵙ ⴷ ⵉⵎⵏⵣⴰⵢ ⵏ ⵜⵖⴷⵎⵜ ⴷ ⵜⵔⴰⵡⵙⴰⵏⵜ ⵏ ⵜⵉⵔⴰ.
ⵜⴱⴷⵔ ⴷⵉⵖ ⵎⴰⵙⵙⴰ ⴰⵅⴰⵔⴱⴰⵛ ⵉⵣⵓⵛⵛⵍⵏ ⵏ ⵓⴳⵔⴰⵡ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ ⴳ ⵢⵉⴳⵔ ⵏ ⵓⵙⵎⴷⵢⴰ ⴰⵎⵢⴰⵙ ⵏ ⵜⵎⵖⴰⵔⵉⵏ, ⵏ ⵉⵄⵔⵔⵉⵎⵏ, ⵏ ⵎⴷⴷⵏ ⵉⵍⵍⴰⵏ ⴳ ⵡⴰⴷⴷⴰⴷⵏ ⵏ ⵜⵉⵎⵎⵓⵄⴹⵔⵜ ⴷ ⵉⵎⵖⵔⴰⴱⵉⵢⵏ ⵉⵣⴷⵖⵏ ⴱⵕⵕⴰ ⵏ ⵜⵎⵓⵔⵜ ⴰⴳⵏⵙⵓ ⵏ ⵉⵖⴰⵡⴰⵙⵏ ⵉⵣⴷⵉⵏ ⴷ ⵜⵎⵣⴰⵣⵣⵍⵜ ⵜⴰⵎⵙⵜⴰⵢⵜ.
ⵉⵎⵛⴰⵡⴰⵕⵏ ⴷⴷⵖ ⵓⵏⴼⵏ ⴰⴱⵔⵉⴷ ⵉ ⵓⵎⵙⴰⵡⴰⵍ ⵅⴼ ⵛⵉⴳⴰⵏ ⵏ ⵉⵙⴳⵓⵎⵏ ⵏⵏⴰ ⴱⴷⵔⵏ ⵉⴳⵎⴰⵎⵏ ⵏ ⵜⵙⵎⵉⴳⵍⵜ, ⵙ ⵉⵎⵥⵍⵉ ⵜⴰⵡⵏⵏⴰⴹⵜ ⵜⴰⵎⵙⵜⴰⵢⵜ ⵜⴰⵎⴰⵜⴰⵢⵜ, ⴰⴷⴰⴼ ⵏ ⵓⵙⵏⵖⵎⵙ ⴰⴳⴷⵓⴷⴰⵏ ⴷ ⵡⵓⵙⵍⵉⴳ ⴳ ⵜⴷⵓⵍⵉ ⵏ ⵉⵙⵜⴰⵢⵏ, ⴰⵙⵎⴷⵢⴰ ⵏ ⵜⵎⵖⴰⵔⵉⵏ ⴷ ⵉⵄⵔⵔⵉⵎⵏ, ⴰⵙⵎⴽⵍ ⵏ ⵜⵏⵓⵔⴰⵣ, ⴰⵙⵙⵓⴷⵓ ⵏ ⵜⵎⵣⴰⵣⵣⵍⵜ ⵅⴼ ⵉⵥⴹⵡⴰⵏ ⵉⵏⴰⵎⵓⵏⵏ ⴷ ⵉⵎⵉⵣⴰ ⵏ ⵓⴽⵛⵛⵓⵎ ⴷ ⵜⴽⵏⴷⴰⵡⵜ ⵜⴱⵕⵔⴰⵏⵉⵜ.
ⴰⴽⴰⴱⴰⵔ ⵏ ⵢⵓⵎⴰ ⵎⴰⵙⵙ ⴱⵉⵢⴰⵏⴼⴻⵏⵓ ⵓⵍⵉⴼⵉⵢⵉ ⵏⵜⵓⵎⴱⴰ, ⴰⵎⴰⵔⵉ ⴳ ⵜⵣⵇⵇⴰ ⵏ ⵜⵖⵉⵡⴰⵏⵉⵏ ⵏ ⴽⴰⵏⴰⴷⴰ ⴷ ⴰⴳⵎⴰⵎ ⵏ ⵓⴳⵔⴰⵡ ⴰⴱⵕⵍⴰⵎⴰⵏⵉ ⵏ ⵜⴼⵕⴰⵏⴽⵓⴼⵓⵏⵉⵜ; ⵎⴰⵙⵙ ⴽⴰⵔⵉⵎ ⵍⴱⵓⵔⴽⵉ, ⴰⵙⵍⵡⴰⵢ ⵏ ⵓⵙⵇⵇⵉⵎ ⴰⵎⴰⵜⵜⴰⵢ ⵏ ⵓⵙⵏⵖⵎⵙ ⵏ ⵜⴼⵉⴷⵉⵔⴰⵍⵉⵜ ⵏ ⵡⴰⵍⵓⵏⵉ-ⴱⵔⵓⴽⵙⵉⵍ; ⵎⴰⵙⵙ ⴱⵉⵕⴰⵎ ⵙⵉⵏ, ⴰⵏⵎⵀⴰⵍ ⴰⵎⴰⵜⴰⵢ ⵏ ⵉⵙⵜⴰⵢⵏ ⵏ ⵙⵙⵉⵏⵉⴳⴰⵍ; ⵎⴰⵙⵙⴰ ⵕⴰⵊⴰ ⵊⴰⴱⵔⵉ ⵃⴰⵍⵡⴰⵏⵉ, ⵜⴰⵏⵖⵎⴰⵙⵜ ⵏ ⵜⵙⵎⵉⴳⵍⵜ (ⵜⵓⵏⵙ); ⵎⴰⵙⵙ ⴱⵉⵔⵜⵔⴰⵏⴷ ⵍⵓⴼⴰⵏ, ⴰⵎⵖⴰⵔ ⵏ ⵜⵔⵙⵍⵜ ⵜⴰⵣⴷⴳⴰⵏⵜ ⵏ ⵓⵙⵏⵖⵎⵙ ⴳ ⵜⵎⵀⵍⴰ ⵏ ⵜⵖⴰⵡⵙⵉⵡⵉⵏ ⵜⵉⵙⵔⵜⴰⵏⵉⵏ ⴷ ⵜⵉⵏⵏⵓⴱⴹⴰ ⵜⴰⴷⵉⵎⵓⵇⵕⴰⵟⵉⵢⵜ ⵏ OIF; ⵜⵉⵍⵉ ⴰⵡⴷ ⵎⴰⴷⵉⵏⴰ ⴰⵜⵀⵉ, ⵜⴰⵎⵓⵣⴰⵢⵜ ⵏ ⵓⵖⴰⵡⴰⵙ ⴳ ⵓⵙⵎⴷⵢⴰ ⵏ OIF ⵉ ⵜⴼⵔⵉⵇⵜ ⵏ ⵓⴳⴰⴼⴰ.
ⵜⴰⵙⴳⴰ ⵏ ⵓⴳⵔⴰⵡ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ, ⵃⴰⴹⵔⵏ ⵉ ⵓⵎⵙⴳⵔⴰⵡ ⴷⴷⵖ ⵎⴰⵙⵙ ⴱⵏⵄⵉⵙⵙⴰ ⵄⴰⵙⵍⵓⵏ, ⴰⵏⵎⵀⴰⵍ ⴰⵎⴰⵜⴰⵢ; ⵎⴰⵙⵙ ⵄⴱⴷⵍⵊⵍⵉⵍ ⵍⵃⵎⵎⵓⵎⵉ, ⴰⵏⵏⵎⵀⴰⵍ ⴰⵎⴰⵜⴰⵢ ⵡⵉⵙⵙ ⵙⵉⵏ; ⵎⴰⵙⵙ ⵍⵎⵀⴷⵉ ⵍⴰⵄⵕⵓⵙⵙⵉ ⵉⴷⵔⵉⵙⵙⵉ, ⴰⵏⵎⵀⴰⵍ ⵏ ⵜⵣⵓⵏⵉ ⵏ ⵜⵖⵓⵔⵉⵡⵉⵏ ⵜⵉⵣⵔⴼⴰⵏⵉⵏ; ⵎⴰⵙⵙ ⵏⴰⴷⵉⵔ ⵟⴰⵀⵉⵔ, ⴰⵏⵎⵀⴰⵍ ⵏ ⵜⵣⵓⵏⵉ ⵏ ⵓⴹⴼⴼⵓⵕ ⵏ ⵉⵖⴰⵡⴰⵙⵏ; ⵎⴰⵙⵙⴰ ⵍⴰⵟⵉⴼⴰ ⵜⴰⵢⴰⵀ, ⵜⴰⵏⵎⵀⴰⵍⵜ ⵏ ⵜⵣⵓⵏⵉ ⵏ ⵜⵖⵓⵔⵉⵡⵉⵏ ⴷ ⵜⴳⵎⵉ; ⵎⴰⵙⵙ ⴰⵎⵉⵏ ⵄⵣⵣⵉⵎⴰⵏ, ⴰⵏⵎⵀⴰⵍ ⵏ ⵜⵣⵓⵏⵉ ⵏ ⵓⵎⵢⴰⵡⴰⵙ ⴰⴳⵔⴰⵖⵍⴰⵏ.