“ⴰⵎⵙⴰⵔⴰⵙ ⴰⴷⵙⵍⴰⵏ ⵏ ⵜⵡⵓⵔⵉ ⵏ ⵉⵙⵍⴳⴰⵏⵏ ⴳ ⵢⵉⴳⵔ ⵏ ⵓⵙⴱⴷⴷⵉ ⵏ ⵉⵏⴰⵡⵏ ⵏ ⵓⴽⵙⴰⵏ ⵉⴳⴰ ⴰⴼⵔⴰⴳ ⵏ ⵉⵣⵔⴼⴰⵏ ⵏ ⵉⵏⵎⵓⵔⵉⵏ ⴳ ⵢⴰⵜ ⵜⵡⵏⵏⴰⴹⵜ ⵜⴰⵙⵖⵎⵙⴰⵏⵜ ⵜⴰⵏⴼⵔⵓⵜ, ⵜⴰⵎⵙⵜⴳⴳⴰⵔⵜ ⵉⵜⵜⵏⵏⴰⵍⵏ ⴰⵔⵣⴰⵢ ⵏ ⵜⴷⵍⵙⴰ ⵏ ⵜⴽⵕⴹⵉ” ⴰⵢ ⵜⵏⵏⴰ ⵎⴰⵙⵙⴰ ⵍⴰⵟⵉⴼⴰ ⴰⵅⴰⵔⴱⴰⵛ, ⵜⴰⵏⵙⵙⵉⵅⴼⵜ ⵏ ⵓⴳⵔⴰⵡ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ ⵉⵡⵏⴰⵏ ⵏ ⵢⵉⵏⴰⵡ ⵏⵏⵙ ⴳ ⵜⵡⵓⵔⵉⵡⵉⵏ ⵏ ⵓⵎⴳⵔⴰⵡ ⴰⴳⵔⴰⵖⵍⴰⵏ ⵅⴼ ⵉⵎⴰⵙⵙⵏ ⵏ ⵓⵙⴱⴷⴷⵉ ⵏ ⵉⵏⴰⵡⵏ ⵏ ⵓⴽⵙⴰⵏ, ⵏⵏⴰ ⵉⵙⵏⵎⴰⵍⴰ ⵓⴳⵔⴰⵡ ⴰⵎⴰⵜⵜⴰⵢ ⵏ ⵓⵙⵏⵖⵎⵙ ⴷ ⵓⵙⵍⵉⵥⵕ ⵏ ⵜⵛⴰⴷ ⴳ ⵏⴷⵊⴰⵎⵉⵏⴰ ⵙⴳ 25 ⴰⵔ 27 ⵛⵜⴰⵎⴱⵉⵔ 2025.

ⵜⵏⵏⴰ ⵜⵏⵙⵙⵉⵅⴼⵜ ⴷⵉⵖ ⵉⵙ ⴰⵙⴱⴷⴷⵉ ⵏ ⵓⴽⵙⴰⵏ ⴰⵙⵖⵎⵙⴰⵏ ⵉⵇⵇⴰⵏ ⴰⴷ ⴷⵉⴳⵙ ⴰⵎⵓⵏ ⴽⵉⴳⴰⵏ ⵏ ⵉⵎⵙⴽⴰⵔⵏ ⴳ ⵜⵍⵍⴰ ⵜⵏⴱⴰⴹⵜ ⵜⴰⴳⴷⵓⴷⴰⵏⵜ, ⵜⵉⵎⵔⵙⴰⵍ ⵏ ⵓⵙⵍⴳⵏ, ⴰⵙⵏⵖⵎⵙ, ⵜⵉⵙⴰⵍⵉⵡⵉⵏ ⵜⵉⵎⵓⵟⵟⵓⵏⵉⵏ, ⵉⵎⵔⵣⴰ ⴳ ⵢⵉⴳⵔ ⵏ ⵓⵙⵏⵖⵎⵙ ⴷ ⵓⵎⵢⴰⵡⴰⴹ, ⵜⵉⵏⵎⴰⵍⴰⵢⵉⵏ ⵏ ⵡⴰⵎⵓⵏ ⵓⵖⵔⵉⵎ ⴷ ⵓⴳⴷⵓⴷ ⵙ ⵓⵎⴰⵜⴰ.

ⴳ ⵓⵢⵏⵏⴰ ⵉⵣⴷⵉⵏ ⵙ ⵜⵉⴳⴰⵡⵜ ⵉⵥⵍⵉⵏ ⵙ ⵉⵙⵍⴳⴰⵏⵏ, ⵜⵙⵙⵎⵏⵉⴷ ⵜⵏⵙⵙⵉⵅⴼⵜ ⵏ ⵓⴳⵔⴰⵡ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ ⴽⵔⴰ ⵏ ⵉⵙⴳⵓⵎⵏ ⵏ ⵢⵉⵔⵎ ⴰⵎⵖⵔⴰⴱⵉ, ⵜⵙⵙⴽⵜⵉ ⵉⵙ “ⴳ ⵜⵎⵓⵔⴰ ⴰⴽⴽⵯ ⵏ ⵓⵎⴰⴹⴰⵍ, ⵜⵎⵎⵓⵔⴽⵙ ⵜⵉⴳⴰⵡⵜ ⵏ ⵉⵙⵍⴳⴰⵏⵏ ⴳ ⵢⵉⴳⵔ ⴰⴷ, ⴰⵛⴽⵓ ⵉⵇⵇⴰⵏ ⵏ ⴰⴷ ⵙⵎⵓⵏⵏ ⴰⴹⵎⴰⵏ ⵏ ⵜⵍⴻⵍⵍⵉ ⵏ ⵓⵡⵏⵏⵉ ⵏⵜⵜⴰ ⴷ ⵓⴼⵔⴰⴳ ⵎⴳⴰⵍ ⵜⵉⴽⵕⴹⵉ ⵜⴰⵎⵏⵉⴳⵍⵜ ⵏⵏⴰ ⵣⵣⵔⴰⵢⵏ ⵉⵏⴰⵡⵏ ⵏ ⵓⴽⵙⴰⵏ ⴰⴳⵓⵏⵙ ⵏ ⵓⵙⵏⵖⵎⵙ”.

ⵉⵙⵎⵓⵏ ⵓⵎⴳⵔⴰⵡ ⴰⴷ ⵢⵓⴷⴼⵏ ⴳ ⵓⵙⵡⵓⴷⴷⵓ ⵏ ⵓⵖⴰⵡⴰⵙ ⵏ ⵜⵡⵓⵔⵉⵡⵉⵏ 2025-2026 ⵏ ⵓⵥⵟⵟⴰ ⵏ ⵜⵎⵔⵙⴰⵍ ⵜⵉⴼⵔⵉⵇⵉⵏ ⵏ ⵓⵙⵍⴳⵏ ⵏ ⵓⵎⵢⴰⵡⴰⴹ, ⵉⵙⵎⵓⵏ ⵉⵏⵙⵙⵉⵅⴼⵏ ⵏ ⵡⴰⵜⵜⴰⵢⵏ ⵏ ⵎⵔⴰⵡ ⴷ ⵙⵎⵎⵓⵙ ⵏ ⵜⵎⵔⵙⴰⵍ ⵉⴳⵎⴰⵎⵏ ⵉⵍⵉⵏ ⴰⵡⴷ ⵉⴳⵏⵙⴰⵙ ⵏ ⵜⵙⴳⴳⵯⵉⵏ ⵢⴰⴹⵏ ⵏ ⵓⵙⵍⴳⵏ ⴰⵏⵉⵎⴰⵏ ⵏ ⵓⵙⵏⵖⵎⵙ, ⵉⵎⵓⵣⴰⵢ ⵉⵎⵓⵟⵟⵓⵏⵏ ⴷ ⵉⵎⵙⴷⴰⵡⵏ. ⵜⴰⴼⵓⴳⵍⴰ ⵏ ⵓⵕⵥⵥⵓⵎ ⵃⴰⴹⵕⵏ ⴷⵉⴳⵙ ⵉⴳⵎⴰⵎⵏ ⵏ ⵜⵏⴱⴰⴹⵜ ⵏ ⵓⴱⵕⵍⴰⵎⴰⵏ ⵏ ⵜⵛⴰⴷ, ⵉⵍⵉⵏ ⴰⵡⴷ ⵉⵎⵙⵇⴰⴷ ⴷ ⵉⴳⵏⵙⴰⵙ ⵏ ⵜⵙⵏⵎⴰⵍⴰⵢⵉⵏ ⵜⵉⴳⵔⴰⵖⵍⴰⵏⵉⵏ.

ⴰⴽⴰⴱⴰⵔ ⵏ ⵓⴳⵔⴰⵡ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ ⴳ ⵓⵎⵙⴳⵔⴰⵡ ⴰⴷ ⴷⵉⴳⵙ ⵎⴰⵙⵙ ⵎⵓⵃⴰⵎⴷ ⵍⴰⵄⵕⵓⵙⵉ, ⴰⴳⵎⴰⵎ ⵏ ⵓⵙⵇⵇⵉⵎ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ ⴷ ⵎⴰⵙⵙ ⵟⴰⵍⴰⵍ ⵚⴰⵍⴰⵃⴷⴷⵉⵏ, ⴰⵎⵙⵙⵓⴳⵓⵔ ⵏ ⵜⵖⴰⵡⵙⵉⵡⵉⵏ ⵜⵉⴼⵔⵉⵇⵉⵏ ⴷ ⵜⴳⵔⴰⵖⵍⴰⵏⵉⵏ ⴰⴳⵓⵏⵙ ⵏ ⵓⴳⵔⴰⵡ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ.