ⵜⴰⵏⴰⴹⵜ ⵜⴰⵙⴳⵯⵙⴰⵏⵜ ⵏ ⵓⴳⵔⴰⵡ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ ⵉⵣⴷⵉⵏ ⵙ ⵓⵙⴳⴳⵯⴰⵙ 2024 ⵜⵍⵍⴰ ⴷⵉⵖ ⴷⴰⵜ ⵓⴳⴷⵓⴷ ⴳ ⵓⵙⵉⵜ ⵏ ⵜⵎⵔⵙⵍⵜ (www.haca.ma). ⵜⴰⵏⴰⴹⵜ ⴰⴷ ⵉⵜⵜⵓⵥⵔⴳⵏ ⵙ ⴽⵓⵥ ⵏ ⵜⵓⵜⵍⴰⵢⵉⵏ: ⵜⴰⵄⵔⴰⴱⵜ, ⵜⴰⵎⴰⵣⵉⵖⵜ, ⵜⴰⴼⵕⴰⵏⵙⵉⵙⵜ ⴷ ⵜⵏⴳⵍⵉⵣⵜ, ⴷⴰ ⵜⵙⵙⴽⴰⵏ ⵢⴰⵜ ⵜⴰⵏⵏⴰⵢⵜ ⵜⵓⵏⵖⵉⴷⵜ ⵏ ⵡⴰⴷⴷⴰⴷ ⵏ ⵜⵎⴰⴳⵓⵜ ⵏ ⵓⵡⵏⵏⵉ ⴰⴳⵓⵏⵙ ⵏ ⵓⵙⵏⵖⵎⵙ ⴰⵙⵍⵉⵥⵕ, ⵜⵉⴳⴰⵡⵜ ⵏ ⵓⵙⵍⴳⵏ ⵏ ⵜⵓⵎⴰⵢⵉⵏ, ⵜⴰⵡⵓⵔⵉ ⵜⴰⵎⵓⵔⴰⵏⵜ ⵏ ⵜⵏⴰⴼⵓⵜⵉⵏ ⵜⵉⵙⵍⵉⵥⵕⵉⵏ ⴷ ⵜⵎⵔⵉⵙⵜ ⵜⴰⴳⵔⴰⵖⵍⴰⵏⵜ ⵏ ⵜⵎⵔⵙⵍⵜ ⵏ ⵓⵙⵍⴳⵏ.

1-    ⵜⴰⵎⴰⴳⵓⵜ ⵜⴰⵙⵔⵜⴰⵏⵜ ⴷ ⵓⵎⵢⴰⵏⴰⵡ ⵏ ⵓⵡⵏⵏⵉ ⴳ ⵓⵙⵏⵖⵎⵙ ⴰⵙⵍⵉⵥⵕ

ⴳ ⵓⵙⴰⵜⵉ ⵏ ⵜⵙⵎⵉⴳⵍⵜ ⵏⵏⵙ ⵜⴰⴷⵓⵙⵜⵓⵔⵉⵜ ⵜⵓⵣⵔⵉⴼⵜ ⵏ ⵓⴹⴼⴼⵓⵕ ⵏ ⵜⵎⴰⴳⵓⵜ ⵏ ⵓⵡⵏⵏⵉ ⴳ ⵜⵎⵣⴰⵣⵉⵏ ⵏ ⵓⵙⵡⵉⵏⴳⵎ ⵜⴰⵏⵏⴰⵢⵜ, ⵉⵙⵡⵓⵔⵉ ⵓⴳⵔⴰⵡ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ ⴰⵙⴳⴳⵯⴰⵙ ⵏ 2024 ⴳ ⵓⴹⴼⴼⵓⵕ ⵏ ⵉⴽⵛⵛⵓⵎⵏ ⵏ ⵉⵎⴷⴰⵏⵏ ⵉⴳⴷⵓⴷⴰⵏⵏ ⴰⴳⵓⵏⵙ ⵏ ⵉⵖⵎⵉⵙⵏ ⴷ ⵜⵙⵖⵓⵏⵉⵏ ⵏ ⵓⵙⵏⵖⵎⵙ ⴷ ⵓⵎⵙⴳⴷⴰⵍ ⵏⵏⴰ ⴷⴰ ⵣⵓⵣⵣⵔⵏⵜ ⵜⵏⵣⵡⴰⵢⵉⵏ ⴷ ⵉⵜⵉⵍⵉⴼⵉⵣⵢⵓⵏⵏ ⵉⴳⴷⵓⴷⴰⵏⵏ ⴷ ⵡⵓⵙⵍⵉⴳⵏ, ⵙ ⵓⵢⵏⵏⴰ ⵉⵡⵚⵚⴰ ⵓⵙⵇⵇⵉⵎ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ ⴷⴷⴰⵡ ⵡⵓⵟⵟⵓⵏ 20-18 ⵏ ⵡⴰⵙⵙ ⵏ 7 ⵢⵓⵏⵢⵓ 2018, ⵉⵜⵜⵓⵙⵡⵓⵔⵉⵏ ⴱⵕⵕⴰ ⵏ ⵉⵣⵎⵣⵏ ⵏ ⵉⵙⵜⴰⵢⵏ ⵉⵎⴰⵜⴰⵢⵏ ⴷ ⵉⵙⵖⴰⵍⵏ ⵏ ⵜⴰⵏⵏⴰⵢⵜ.
ⵉⵜⵜⵓⵢⴰⴽⵣ ⴳ ⵓⴹⴼⴼⵓⵕ ⴰⴷ ⵉⵙ ⴰⵣⵎⵣ ⵏ ⵢⵉⵎⵥ ⵏ ⵡⴰⵡⴰⵍ ⵏⵏⴰ ⴼⴽⴰⵏ ⵉⵙⵏⵖⵎⴰⵙⵏ ⵉⵙⵍⵉⵥⵕⵉⵏ ⵏ ⵜⵏⴰⴼⵓⵜ ⵜⴰⴳⴷⵓⴷⴰⵏⵜ ⵉ ⵓⵎⵙⴳⴷⴰⵍ ⵅⴼ ⵜⵎⵙⵍⴰⵢⵉⵏ ⵏ ⵓⴱⵖⵓⵔ ⴰⵎⴰⵜⴰⵢ ⵉⴱⴹⴰ ⵅⴼ 63% ⵉ ⵜⵏⴱⴰⴹⵜ ⴷ ⵜⵎⴰⴳⵓⵜ ⵜⴰⴱⵕⵍⴰⵎⴰⵏⵉⵜ ⴷ 38% ⵉ ⵜⵏⵎⴳⵍⴰ ⵜⴰⴱⵔⵍⴰⵎⴰⵏⵉⵜ. 
ⵙ ⵓⵢⴰ, ⵜⵙⴱⵓⵖⵔ ⵜⵏⵎⴳⵍⴰ ⵜⴰⴱⵕⵍⴰⵎⴰⵏⵉⵜ, ⴳ ⵜⵙⵖⵓⵏⵉⵏ ⵏ ⵉⵏⵖⵎⵉⵙⵏ ⴷ ⵉⵎⵙⴳⴷⴰⵍⵏ ⴰⴳⵓⵏⵙ ⵏ ⵜⵏⵣⵡⴰⵢⵉⵏ ⴷ ⵉⵜⵉⵍⵉⴼⵉⵣⵢⵓⵏⵏ ⵉⴳⴷⵓⴷⴰⵏⵏ ⵙ ⵢⴰⵏ ⵓⵣⵎⵣ ⵏ ⵡⴰⵡⴰⵍ ⵢⵓⴳⵔⵏ 12,18 ⵏ ⵜⵏⵇⵇⴰⴹ ⵏ ⵓⵙⵖⴰⵍ ⵏ ⵓⵎⵓⵔ ⵏⵏⵙ ⵏ ⵓⵙⵎⴷⵢⴰ ⵏ ⵜⵎⴰⵜⴰⵔⵜ (25,82%). ⴰⴷ ⵏⵙⵙⴽⵜⵉ ⵉⵙ, ⴰⵙⵎⴷⵢⴰ ⴰⴱⵕⵍⴰⵎⴰⵏⵉ ⴳ ⵜⵉⵣⵡⵉⵔⵉ ⵏ ⵓⵙⴳⴳⵯⴰⵙ 2024 ⵉⵕⵚⴰ ⴳ 74,18% ⵉ ⵜⵏⴱⴰⴹⵜ ⴷ ⵜⵓⴳⵜ ⴷ ⴳ 25,82 ⵉ ⵜⵏⵎⴳⵍⴰ. 
ⴳ ⵜⵙⴳⴰ ⵢⴰⴹⵏ, ⵉⵎⴰⵣⵣⴰⵍⵏ ⵉⵙⵔⵜⴰⵏⵏ ⵏⵉⵜⵏⵉ ⴰⵢ ⴳⴰⵏ ⵉⵏⴽⵛⴰⵎⵏ ⵉⴳⴳⵓⵜⵏ ⴰⴳⵓⵏⵙ ⵏ ⵉⵖⴰⵡⴰⵙⵏ ⵏ ⵉⵏⵖⵎⵉⵙⵏ (ⵉⵖⵎⵉⵙⵏ ⴷ ⵜⵙⵖⵓⵏⵉⵏ) ⵏ ⵓⵙⵏⵖⵎⵙ ⴰⵙⵍⵉⵥⵕ ⴰⴳⴷⵓⴷⴰⵏ ⴷ ⵡⵓⵙⵍⵉⴳ ⵙ 38,79% ⵏ ⵓⵣⵎⵣ ⵏ ⵢⵉⵎⵥ ⵏ ⵡⴰⵡⴰⵍ, ⴷⴰⵜ ⵉⴳⵏⵙⴰⵙⵏ ⵏ ⵡⴰⵎⵓⵏ ⵓⵖⵔⵉⵎ (37,93%), ⵉⵡⵔⵉⴽⵏ ⵉⵣⵣⵓⵍⴰⵏⵏ (13,66%) ⴷ ⵉⵡⵔⵉⴽⵏ ⵉⵏⵎⴰⵍⵍⴰⵏⵏ ⵙ 9,61%.

2-    ⴰⵙⴷⵓⵙ ⵏ ⵜⵖⴰⵔⴰ ⵜⴰⵎⵓⵔⴰⵏⵜ ⴳ ⵢⵉⴳⵔ ⵏ ⵓⵣⵓⵣⵣⵔ ⴰⵙⵍⵉⵥⵕ

ⴳ ⵓⵙⴰⵜⵉ ⵏ ⵜⵙⵎⵉⴳⵍⵜ ⵏⵏⵙ ⵏ ⵓⴹⵎⴰⵏ ⵏ ⵡⴰⴷⴰⴼ ⴰⵎⵙⵓⵎⵓ ⵏ ⵉⵏⵎⵓⵔⵉⵏ ⵖⵔ ⵜⵏⴰⴼⵓⵜⵉⵏ ⵜⵉⵙⵍⵉⵥⵕⵉⵏ ⴳⵖⴼ ⵡⴰⴽⴰⵏ ⴰⴽⴽⵯ ⴰⵏⴰⵎⵓⵔ, ⵉⵙⵙⴽⵔ ⵓⴳⵔⴰⵡ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ ⴳ ⵓⵙⴳⴳⵯⴰⵙ 2024, ⴰⵙⵎⴰⴳⵉ ⴷ ⵜⵓⴽⴽⵉ ⵏ 23 ⵏ ⵉⵙⵏⴰⴳⴰⵔⵏ ⵉⵎⴰⵢⵏⵓⵜⵏ ⵉⴼⵉⵎ ⴳ 13 ⵏ ⵉⴷⵖⴰⵔⵏ, ⴳ ⵓⴱⵖⵓⵔ ⵏ ⵉⵎⵡⵓⵔⴰ ⵉⴳⴷⵓⴷⴰⵏⵏ ⴷ ⵡⵓⵙⵍⵉⴳⵏ.
ⴳ ⵜⴳⵉⵔⴰ ⵏ 2024, 34 ⵏ ⵉⵙⵓⵔⵙⵏ ⵏ ⵜⵏⵣⵡⴰⵢⵜ ⵜⴰⴳⴷⵓⴷⴰⵏⵜ ⴷ ⵜⵓⵙⵍⵉⴳⵜ ⴷ 10 ⵏ ⵜⴷⴰⴱⵓⵜⵉⵏ ⵏ ⵓⵜⵉⵍⵉⴼⵉⵣⵢⵓⵏ ⵙ ⵜⵖⴰⵔⴰⵙⵜ ⵜⴰⵀⵉⵓⴷⵣⵉⵜ ⵜⴰⵏⴰⴽⴰⵍⵜ ⵜⴰⵎⵓⵟⵟⵓⵏⵜ (ⵜⵉⵏⵜⵉ) ⵉⵍⵍⴰ ⵖⵓⵔⵙ ⵙ ⵓⵢⴰ ⵢⴰⵜ ⵜⵣⵢⴰⵣⵣⴰⵍⵜ ⵜⴰⵎⴰⵜⴰⵢⵜ ⵏ 1399 ⵏ ⵉⵙⵏⴰⴳⴰⵔⵏ ⵉⴼⵉⵎ ⵉⵙⵡⵓⵔⵉⵏ ⴳ 220 ⵏ ⵉⴷⵖⴰⵔⵏ ⴷ 394 ⵏ ⵜⴷⴰⴱⵓⵜⵉⵏ ⵜⵉⵏⵜⵉ ⵉⵙⵡⵓⵔⵉⵏ ⴳ 197 ⵏ ⵉⴷⵖⴰⵔⵏ.

3-    ⵜⴰⴷⵔⵙⵉ ⴳ ⵜⵎⵓⵖⵍⵉ ⵏ ⵜⵎⵖⴰⵔⵉⵏ ⴰⴳⵓⵏⵙ ⵏ ⵉⵖⴰⵡⴰⵙⵏ ⵏ ⵉⵏⵖⵎⵉⵙⵏ ⴷ ⵉⵎⵙⴳⴷⴰⵍⵏ

ⴰⵣⵎⵣ ⵏ ⵢⵉⵎⵥ ⵏ ⵡⴰⵡⴰⵍ ⵖⵓⵔ ⵜⵎⵖⴰⵔⵉⵏ ⴰⴳⵓⵏⵙ ⵏ ⵉⵖⴰⵡⴰⵙⵏ ⵏ ⵉⵏⵖⵎⵉⵙⵏ (ⵉⵖⵎⵉⵙⵏ ⴷ ⵜⵙⵖⵓⵏⵉⵏ) ⵏ ⵓⵙⵏⵖⵎⵙ ⴰⵙⵍⵉⵥⵕ ⴰⴳⴷⵓⴷⴰⵏ ⴷ ⵡⵓⵙⵍⵉⴳ, ⵉⵕⵚⴰ ⴳ 16,75% ⵏ ⵓⴽⵙⴰⵢ ⴰⵎⴰⵜⴰⵢ ⵏ ⵉⴽⵛⵛⵓⵎⵏ ⵏ ⵉⵎⴷⴰⵏⵏ ⵉⴳⴷⵓⴷⴰⵏⵏ, ⴰⵢⴰ ⵉⴳⴰ ⵢⴰⵜ ⵡⵓⵖⵓⵍ ⵖⵔ ⴷⴼⴼⵉⵔ ⴷⴰⵜ ⵓⵙⴳⴳⵯⴰⵙ 2023 ⵍⵍⵉⴳ ⵏ ⵢⵉⵡⴹ 18,01%. ⴰⵣⵣⵉⴳⵣ ⴰⴷ ⴷⴰ ⵉⵙⵙⵉⴽⵉⵣ ⵜⴰⴷⵔⵙⵉ ⵏ ⵓⵙⵎⴷⵢⴰ ⵏ ⵜⵎⵖⴰⵔⵉⵏ ⴰⴳⵓⵏⵙ ⵏ ⵉⵖⴰⵡⴰⵙⵏ ⵏ ⵉⵏⵖⵎⵉⵙⵏ ⵏ ⵓⵙⵏⵖⵎⵙ ⴰⵙⵍⵉⵥⵕ.

4-    ⴰⵙⴷⵓⵙ ⴰⵙⵓⵍⴰⵏ ⵏ ⵜⵎⵢⴰⵖⵜ ⴳⵔ ⵉⵏⵎⵓⵔⵉⵏ ⴷ ⵓⵙⵍⴳⴰⵏ

ⴳ ⵓⵙⴳⴳⵯⴰⵙ 2024, ⴰⵜⵜⴰⵢⵏ ⵏ ¾ ⵏ ⵜⵏⵓⵔⴰⵣ ⵏⵏⴰ ⵢⵓⵎⵥ ⵓⴳⵔⴰⵡ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ ⵓⵙⴰⵏⵜ ⴰⵙ ⴷ ⵙⴳ ⵖⵓⵔ ⵉⵏⵎⵓⵔⵉⵏ. ⴰⵣⵡⵍ ⴰⴷ ⴷⴰ ⵉⵙⵙⴽⴰⵏ ⵉⵙ ⵢⴰⵖⵓⵍ ⵓⴳⴷⵓⴷ ⵢⵓⵎⵥ ⴳ ⵉⵎⵉⴽⴰⵏⵉⵙⵎ ⵏ ⵜⵏⵓⵔⵣⵉⵜ ⵉⴳ ⵜⵏ ⴷ ⵜⵔⵙⵍⵜ ⵏ ⵓⵙⵍⴳⵏ ⴷ ⵉⵎⴰⵙⵙⵏ ⵏ ⵓⴼⵔⴰⴳ ⵉ ⵉⵣⵔⴼⴰⵏ ⵏ ⵉⵏⵎⵓⵔⵉⵏ ⴰⴳⵓⵏⵙ ⵏ ⵓⵙⴰⵢⵔⴰⵔ ⴰⵙⵖⵎⵙⴰⵏ.
ⴰⴼⴰⴷ ⴰⴷ ⵉⵎⵓⵏ ⴷ ⵜⴷⵉⵏⴰⵎⵉⵢⵜ ⴰⴷ, ⵉⵙⵅⵉⵜⵔ ⵓⴳⵔⴰⵡ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ ⵜⵉⵖⴰⵔⴰⵙⵉⵏ ⵏ ⵜⵎⵔⵓⵔⵜ ⵉ ⵉⵙⵓⵜⵓⵔⵏ ⵏ ⵓⴳⴷⵓⴷ, ⵙ ⵉⵎⵥⵍⵉ ⵙ ⵓⴱⵔⵉⴷ ⵏ ⵜⴱⵔⴰⵜⵉⵏ ⵙ ⵢⵉⵙⵎⴰⵡⵏ ⴷ ⵡⵓⵖⵓⵍ ⵖⵔ ⵜⵙⵉⵍⴰ ⵏⵏⵙ ⵏ ⵉⵏⵖⵎⵉⵙⵏ. ⴳ ⵢⴰⵏ ⵓⵎⵏⴰⴹ ⴳ ⵉⵍⵍⴰ ⵓⵎⵙⴽⵛⴰⵎ ⴰⵅⴰⵜⴰⵔ ⴳⵔ ⵉⵙⴰⵢⵔⴰⵔⵏ ⵉⵙⵍⵉⵥⵕⵏ ⴷ ⵉⵎⵓⵟⵟⵓⵏⵏ, ⵜⵙⴷⵓⵙ ⵜⵎⵔⵙⵍⵜ ⴷⵉⵖ ⴰⵣⵣⵉⴳⵣ ⵏⵏⵙ ⴰⴱⵉⴷⴰⵖⵓⵊⵉ ⴰⵎⵔⵙⴰⵍ ⴰⴼⴰⴷ ⴰⴷ ⵜⵙⵙⵉⵙⵏ ⵜⵉⵙⵎⵉⴳⵍⵉⵏ ⵏⵏⵙ, ⵜⴰⵡⵓⵔⵉ ⵏⵏⵙ ⴷ ⵉⵡⵜⵜⴰ ⵏ ⵢⵉⴳⵔ ⵏ ⵜⵙⵓⴳⵔⵜ ⵏⵏⵙ, ⴰⵔ ⵜⵜⴰⵡⵙ ⵙ ⵓⵢⴰ ⴳ ⵓⵙⴼⴰⵡ ⵏ ⵜⵉⴳⴰⵡⵜ ⵏ ⵓⵙⵍⴳⵏ ⵖⵓⵔ ⵓⴳⴷⵓⴷ ⴰⵎⵇⵔⴰⵏ.

5-    ⴰⵙⵍⴳⵏ ⵏ ⵜⵓⵎⴰⵢⵉⵏ: ⵜⴰⵎⵢⴰⴷⴰⵙⵜ ⵜⴰⵎⵣⵣⵉⴳⵣⵜ ⵜⴰⵎⵢⴰⵙⵜ

ⴳ ⵢⵉⴳⵔ ⵏ ⵓⵙⵍⴳⵏ ⵏ ⵜⵓⵎⴰⵢⵉⵏ ⵉⵜⵜⵓⵣⵓⵣⵣⵓⵔⵏ ⴳ ⵜⵏⵣⵡⴰⵢⵉⵏ ⴷ ⵉⵜⵉⵍⵉⴼⵉⵣⵢⵓⵏⵏ ⵉⴳⴷⵓⴷⴰⵏⵏ ⴷ ⵡⵓⵙⵍⵉⴳⵏ, ⵜⵉⵡⵉ ⴷ ⵜⴰⵏⴰⴹⵜ ⵉⵙ ⵉⵙⵙⴽⵔ ⵓⵙⵇⵇⵉⵎ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ  44 ⵏ ⵜⵖⵜⴰⵙⵉⵏ ⴰⵙⴳⴳⵯⴰⵙ ⵏ 2024, ⵙ ⵜⵎⵔⵓⵔⵜ ⵉ ⵜⵏⵓⵔⴰⵣ ⵏⵏⴰ ⵙⵔⵙⵏ ⵉⵎⵙⵡⵓⵔⴰ.
ⵜⴰⵙⴳⴰ ⵏ ⵓⵢⴰⴷ, 38 ⵏ ⵜⵏⵓⵔⴰⵣ ⴳⴰⵏⵜ ⴰⵙⴳⵓⵎ ⵏ ⵜⵖⵜⴰⵙ ⵏ ⵜⴰⴳⵯⵉⵜ ⵏⵖ ⵡⵉⵏ ⵓⵙⵜⵜⴼ ⵡⴰⵔ ⵜⴰⵎⵔⵓⵔⵜ, ⴷⵉⴳⵙⵏⵜ ⴰⵣⴳⵏ ⵣⴷⵉⵏⵜ ⴷ ⴽⵉⴳⴰⵏ ⵏ ⵢⵉⴳⵔⴰⵡ ⴳ ⵓⵔ ⵉⵏⴱⵉⴹ ⵓⴳⵔⴰⵡ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ (ⵜⵓⵎⴰⵢⵉⵏ ⵉⵜⵜⵓⵣⵓⵣⵣⵔⵏ ⴰⴳⵓⵏⵙ ⵏ ⵉⵥⴹⵡⴰⵏ ⵉⵏⴰⵎⵓⵏⵏ, ⵉⵎⵏⵖⴰⵏ ⴷⴼⴼⵉⵔ ⵉⵎⵢⴰⵙⵙⴰⵜⵏ ⵙ ⵉⵎⵖⵓⵏⵏ ⴳⵔ ⵉⵎⵡⵓⵔⴰ ⴷ ⵓⴳⴷⵓⴷ, ⴰⵜⴳ.) ⵙⴹⵉⵙ ⵏ ⵜⵖⵜⴰⵙⵉⵏ ⵏ ⵜⵉⴳⵯⵉⵜ ⵏ ⵜⵏⵓⵔⴰⵣ ⵣⴷⵉⵏⵜ ⵙ ⵓⴼⵔⴰⴳ ⵏ ⵜⵍⴻⵍⵍⵉ ⵏ ⵜⵉⵔⵔⴰ ⴷ ⵓⵙⵏⵓⵍⴼⵓ.
ⴰⵏⵣⵣⵓⵖ ⵖⵔ ⵜⴷⵔⵙⵉ ⴷⴰ ⵉⵜⵜⴱⴰⵏ: ⵖⴰⵙ ⵢⴰⵏ ⵓⵙⵎⵉⴳⵍ ⴰⵢ ⵉⵜⵜⵓⵢⴰⵏⵏⴰⵏ ⴰⵙⴳⴳⵯⴰⵙ ⵏ 2024, ⴰⵡⴷ ⵢⴰⵏ ⵡⵓⴽⵓⵙ ⵏ ⵓⵖⴰⵡⴰⵙ ⵏⵖ ⴰⵣⵓⵣⵣⵔ ⵏ ⵓⵙⵉⵡⴹ ⴳ ⵡⵓⵙⵔⵉⴷ ⵓⵔ ⵜ ⵉⵖⵜⵉⵙ ⵓⵙⵇⵇⵉⵎ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ. ⴰⵢⴰ ⴷⴰ ⵉⵙⵙⴽⴰⵏ ⵜⵉⵣⵎⵎⴰⵔ ⵏⵏⴰ ⴷⴰ ⵙⵙⴽⴰⵔⵏ ⵉⵎⵡⵓⵔⴰ ⴳ ⵢⵉⴳⵔ ⵏ ⵓⵙⵍⴳⵏ ⴰⵏⵉⵎⴰⵏ ⴷ ⵓⵣⵣⵉⴳⵣ ⵏ ⵜⵡⵓⵔⵉ ⵏ ⵓⴳⵔⴰⵡ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ ⵖⵔ ⵢⴰⵏ ⵓⵙⵍⴳⵏ ⵉⵚⴽⴰⵏ ⵅⴼ ⵜⵎⵢⴰⵙⵜ ⴷ ⵜⴱⵉⴷⴰⵖⵓⵊⵉⵜ, ⴷ ⵓⵙⵢⵉⴼ, ⴰⴷⴷⴰⵢ ⵖⵔⵙ ⵜⵓⴼⴰ, ⵏ ⵜⵖⴰⵔⴰⵙⵜ ⵏ ⵜⴰⵎⵓⵏⵉ ⴷ ⵓⵙⵙⵉⴽⵉ, ⵙ ⵉⵎⵥⵍⵉ ⴰⴱⵔⵉⴷ ⵏ ⵜⵖⵓⵔⵉ ⵉ ⵜⵉⴹⴰⴼ ⵏⵏⴰ ⵜⴽⴽⴰ ⵙ ⵢⵉⵙⵉ ⵏ ⴽⵓⵥ ⵏ ⵜⵖⵜⴰⵙⵉⵏ ⵏⵏⴰ ⵜⵓⵣⵏ ⵉ ⵉⵎⵡⵓⵔⴰ ⵉⵙⵍⵉⵥⵕⵏ.

6-    ⴰⵎⵢⴰⵡⴰⵙ ⴰⴼⵔⵉⵇ ⴷ ⵓⴳⵔⴰⵖⵍⴰⵏ

ⴰⵙⴳⴳⵯⴰⵙ ⵏ 2024 ⵜⵜⵓⵕⵛⵎ ⴰⵡⴷ ⵙ ⵓⴹⴼⴼⵓⵕ ⵏ ⵜⵖⵜⵙⵜ ⵏ ⵓⴳⵔⴰⵡ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ ⴰⴳⵓⵏⵙ ⵏ ⵉⵥⴹⵡⴰⵏ ⴷ ⵜⵎⵔⵙⴰⵍ ⵏ ⵓⵎⵢⴰⵡⴰⵙ ⴰⵏⵎⵏⴰⴹ ⴷ ⵓⴳⵔⴰⵖⵍⴰⵏ ⴳⵔ ⵉⵙⵍⴳⴰⵏⵏ ⵏ ⵓⵙⵏⵖⵎⵙ.
ⵢⵓⵙⴰ ⴷ ⵓⵢⴰ ⴷ ⵜⴳⵉⵔⴰ ⵏ ⵜⵙⵎⵉⴳⵍⵜ ⵏ ⵙⵉⵏ ⵉⵙⴳⴳⵯⴰⵙⵏ (2023-2024) ⵏ ⵓⴳⵔⴰⵡ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ ⴳ ⵜⵏⵙⵙⵉⵅⴼ ⵏ ⵓⵥⵟⵟⴰ ⴰⴼⵔⵉⵇ ⵏ ⵓⵙⵍⴳⵏ ⵏ ⵓⵎⵢⴰⵡⴰⴹ. ⵉⵡⵏⴰⵏ ⵏ ⵜⵙⵎⵉⴳⵍⵜ ⴰⴷ, ⵜⵙⵡⵓⵔⵉ ⵜⵎⵔⵙⵍⵜ ⴳ ⵜⴷⵉⵏⴰⵎⵉⵜ ⵏ ⵉⵙⵏⵉⴼⵉⵍⵏ ⵉⵣⵣⵓⵍⴰⵏⵏ ⴳⵔ ⵉⵙⵍⴳⴰⵏⵏ ⵉⴼⵔⵉⵇⵏ ⴳ ⴽⵕⴰⴹⵜ ⵉⵙⴳⵓⵎⵏ ⵉⵙⵟⵕⴰⵜⵉⵊⵉⵢⵏ:
-    ⵜⴰⵏⴰⵎⵉⵜ ⵏ ⵓⵙⵍⴳⵏ ⵏ ⵓⵙⵏⵖⵎⵙ ⴰⴽⴷ ⵜⵡⵏⵏⴰⴹⵜ ⵜⴰⵎⵓⵟⵟⵓⵏⵜ;
-    ⵜⴰⵏⴽⵔⴰ ⵙ ⵜⵎⴰⴳⵓⵜ ⴷ ⵓⵎⵢⴰⵏⴰⵡ ⵏ ⵓⵡⵏⵏⵉ;
-    ⵜⵉⵍⴰⵍⵜ ⵏ ⵉⵙⵍⴳⴰⵏⵏ ⴳ ⵓⴼⵔⴰⴳ ⵏ ⵜⵏⵓⵎⵉ ⵏ ⵓⵣⵣⵉⴳⵣ ⵏ ⵉⵙⵜⴰⵢⵏ ⴰⴳⵓⵏⵙ ⵏ ⵜⵎⵏⵥⴰⵡⵜ ⵜⴰⴼⵔⵉⵇⵜ.
 

• ⴰⴳⵎ ⵜⵓⵏⵖⵉⵍⵜ ⵜⴰⵄⵔⴰⴱⵜ ⵏ ⵜⴰⵏⴰⴹⵜ
• ⴰⴳⵎ ⵜⵓⵏⵖⵉⵍⵜ ⵜⴰⵎⴰⵣⵉⵖⵜ ⵏ ⵜⴰⵏⴰⴹⵜ
• ⴰⴳⵎ ⵜⵓⵏⵖⵉⵍⵜ ⵜⴰⴼⵕⴰⵏⵙⵉⵙⵜ ⵏ ⵜⴰⵏⴰⴹⵜ
• ⴰⴳⵎ ⵜⵓⵏⵖⵉⵍⵜ ⵜⴰⴼⵕⴰⵏⵙⵉⵙⵜ ⵏ ⵜⴰⵏⴰⴹⵜ