"ⵜⴰⵏⴼⵔⵓⵜ ⵏ ⵓⵣⵔⴰⴽ ⵏ ⵡⴰⵜⵉⴳⵏ ⵉⴷⵉⵎⵓⵇⵕⴰⵟⵉⵢⵏ ⴷ ⵉⵣⵔⴼⴰⵏ ⵉⵏⴼⴳⴰⵏⵏ ⴳ ⵜⵓⵎⴰⵢⵉⵏ ⵜⵉⵙⵍⵉⵣⵕⵉⵏ ⵜⴳⴰ ⵢⴰⵜ ⴳ ⵜⵙⵎⵉⴳⴰⵍ ⵜⵉⴷⵙⵍⴰⵏⵉⵏ ⵏ ⵓⴳⵔⴰⵡ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵣⵕ" ⴰⵢ ⵜⵏⵏⴰ ⵎⴰⵙⵙⴰ ⵍⴰⵟⵉⴼⴰ  ⴰⵅⴰⵔⴱⴰⵛ ⵜⴰⵏⵙⵙⵉⵅⴼⵜ ⵏ ⵓⴳⵔⴰⵡ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵣⵕ ⴳ ⵓⵙⴳⵔⴰⵡ ⵏⵏⴰ ⵜⵙⵏⵎⴰⵍⴰ ⵜⵎⵔⵙⴰⵍⵜ ⵜⴰⴷⵉⴱⵍⵓⵎⴰⵙⵉⵜ ⴳ ⴰⵎⵓⵏ 34 ⵏ ⵉⵎⵙⵇⴰⴷ ⴷ ⵉⴳⵏⵙⴰⵙⵏ ⵏ ⵜⵙⵎⵉⴳⴰⵍ ⵜⵉⴷⵉⴱⵍⵓⵎⴰⵙⵉⵏ ⵜⵓⵖⵣⵉⵏⵉⵏ ⴳ ⵍⵎⵖⵔⵉⴱ.

« ⴳⵔ ⵉⵣⵓⵛⵛⴰⵍ ⵉⵍⵍⴰⵏ ⴳ ⵉⵍⵓⴳⵏⵏ ⵏ ⵡⴰⴳⴳⵯⴰⵜⵏ ⵏ ⵉⵎⵡⵓⵔⴰ ⵉⴳⴷⵓⴷⴰⵏⵏ ⴷ ⵡⵓⵙⵍⵉⴳⵏ ⵏ ⵜⵏⵣⵡⴰⵢⵜ ⴷ ⵜⵉⵍⵉⴼⵉⵣⵢⵓⵏ, ⵢⴰⵜ ⵜⵖⴹⴼⵜ ⵉⵥⵍⵉⵏ ⵜⴻⵜⵜⵓⴼⴽⴰ ⵙⴳ ⵖⵓⵔ ⵜⵎⵔⵙⵍⵜ ⵏ ⵓⵙⵏⴰⵎ ⵉ ⵉⵎⵏⵣⴰⵢⵏ ⵉⴷⵙⵍⴰⵏⵏ ⵏ ⵜⴷⵉⵎⵓⵇⵕⴰⵟⵉⵜ ⴰⵎⵎ ⵓⵣⵔⴰⴽ ⵏ ⵡⵓⴷⴷⵓⵔ ⴰⵏⴼⴳⴰⵏ ⴷ ⵜⵉⵣⵣⵉⴷⴳⴰ, ⴷ ⵓⵙⵙⵓⵎⵓ ⵏ ⵡⴰⵏⴰⵡ, ⴷ ⵓⵙⴱⴷⴷⵉ ⵏ ⵉⵏⴰⵡⵏ ⵏ ⵓⴽⵙⴰⵏ ⴷ ⵓⵙⵏⵓⵃⵢⵓ ⵏⵖ ⴷⵉⵖ ⴰⴼⵔⴰⴳ ⵏ ⵜⵓⴷⵔⵜ ⵜⵓⵙⵍⵉⴳⵜ ⴷ ⵓⴼⵔⴰⴳ ⵉⵎⵥⵢⴰⵏⵏ, ⴰⵢ ⵜⵔⵏⴰ ⵎⴰⵙⵙⴰ ⴰⵅⴰⵔⴱⴰⵛ ». ⵜⵏⵏⴰ ⴷⵉⵖ ⵉⵙⴷ ⵜⵉⴳⴰⵡⵜ ⵏ ⵓⴳⵔⴰⵡ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ ⵉⴳⴰⵏ ⵢⴰⵜ ⵜⵎⵔⵙⵍⵜ ⵜⴰⵙⵏⵉⵎⴰⵏⵜ ⵢⵓⵙⵉⵏ ⴰⴳⴳⵯⴰ ⵏ ⵓⵙⵏⴰⵎ ⵏ ⵓⵎⵢⴰⵡⴰⴹ ⴰⵙⵍⵉⵥⵕ ⵢⵓⵙⴰ ⴷ ⴳ ⵓⵙⴰⵜⵉ ⴰⵎⴰⵜⴰⵢ ⵏ ⵓⵙⴷⵓⵙ ⵏ ⵓⵙⵡⵓⵔⵉ ⴰⴷⵉⵎⵓⵇⵕⴰⵟⵉ ⵏ ⵡⴰⵎⵓⵏ ⴰⵎⵖⵔⴰⴱⵉ, ⴷ ⵜⵙⵙⴽⵜⵉ ⴷ ⵉⵙⴷ ⵜⴰⵍⴰⵍⵉⵜ ⵏ ⵜⵎⵔⵙⵍⵜ ⴰⵙⴳⴳⵯⴰⵙ ⵏ 2002 ⵜⵓⵙⴰ ⴷ ⴳ ⵜⵖⴰⵔⴰⵙⵜ ⵏ ⵉⵙⵏⵉⴼⵍⵏ ⵉⵙⵔⵜⴰⵏⵏ ⴰⵎⵎ ⵡⵉⵏ ⵜⵣⵔⴼⵜ, ⵉⵣⵔⴼⴰⵏ ⵏ ⵓⴼⴳⴰⵏ, ⵜⵉⵏⵏⵓⴱⴹⴰ ⵉⵖⵓⴷⴰⵏ, ⴰⵙⵏⴼⵍ ⵏ ⵍⵎⵓⴷⵡⴰⵏⴰ… ⴰⵜⴳ. « ⴳ ⵢⵉⴳⵔ ⵏ ⵓⵎⵢⴰⵡⴰⴹ ⴰⵙⵍⵉⵥⵕ, ⴰⵢ ⵜⵏⵏⴰ, ⵜⴰⵖⴰⵔⴰⵙⵜ ⴰⴷ ⵏ ⵓⵙⵏⴼⵍ ⵢⵉⵡⵉⴷ ⵓⴽⵓⵙ ⵏ ⵓⴽⵡⴰⵛ ⵏ ⵓⵡⴰⵏⴽ ⵅⴼ ⵢⵉⴳⵔ ⵏ ⵜⵏⵣⵡⴰⵢⵜ ⴷ ⵜⵉⵍⵉⴼⵉⵣⵢⵓⵏ ⴰⵍⵍⵉⴳ ⵢⴰⵖⵓⵍ ⵉⴳⴰ ⵢⵉⴳⵔ ⴰⴷ ⵉⵍⴻⵍⵍⵉ »

ⵜⵙⵙⴽⵏ ⵎⴰⵙⵙⴰ ⴰⵅⴰⵔⴱⴰⵛ ⴷⵉⵖ ⵉⵛⴰⵕⵉⴹⵏ ⵉⵅⴰⵜⴰⵔⵏ ⵏ ⵜⵙⵎⵉⴳⵍⵜ ⵜⴰⴷⵓⵙⵜⵓⵔⵉⵜ ⵏ ⵓⴳⵔⴰⵡ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ ⴳ ⵓⵢⵏⵏⴰ ⵉⵣⴷⵉⵏ ⴷ ⵡⴰⴳⴳⴰⵢ ⵅⴼ ⵓⵣⵔⴰⴽ ⵏ ⵜⴰⵏⵏⴰⵢⵜ ⵜⴰⵎⴰⴳⵓⵜ ⴳ ⵜⵎⵣⴰⵣⵉⵏ ⵏ ⵓⵙⵡⵉⵏⴳⵎ ⴰⴳⵓⵏⵙ ⵏ ⵉⵕⴰⴷⵢⵓⵜⵏ ⴷ ⵉⵜⵉⵍⵉⴼⵉⵣⵢⵓⵏⵏ, ⵙ ⵓⵎⴷⵢⴰ ⴰⵙⵍⵍⵡⵓ ⴰⵙⴱⴷⴰⴷ ⴷ ⵜⵎⵙⵙⴰⵏⵓⵏⵜ ⵏ ⵜⴷⵓⵍⵉ ⵜⴰⵖⵎⵙⴰⵏⵜ ⴳ ⵓⵣⵎⵣ ⵏ ⵉⵙⵜⴰⵢⵏ ⵏⵏⴰ ⵜⵙⵙⴽⵔ ⵜⵎⵔⵙⵍⵜ ⵓⵙⵙⴰⵏ ⵏ ⵉⵙⵜⴰⵢⵏ ⵉⵎⴰⵜⴰⵢⵏ ⵏ 8 ⵛⵜⴰⵎⴱⵉⵔ 2021.

ⵜⵉⵏⴰⵡⵜ ⵏ ⵎⴰⵙⵙⴰ ⴰⵅⴰⵔⴱⴰⵛ ⴷⴰⵜ ⵉⴷⵉⴱⵍⵓⵎⴰⵙⵉⵢⵏ ⵜⵉⵡⵉ ⴷ ⴷⵉⵖ ⵅⴼ ⵜⵎⵔⵉⵙⵜ ⵜⴰⴳⵔⴰⵖⵍⴰⵏⵜ ⵏ ⵓⴳⵔⴰⵡ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵔ ⴷ ⵜⵉⴳⴰⵡⵜ ⵏⵏⵙ ⴳ ⵢⵉⴳⵔ ⵏ ⵓⵎⵢⴰⵡⴰⵙ ⴷ ⵓⵙⵙⵖⴱⵓ ⵏ ⵉⵣⴷⴰⵢⵏ ⵉⵎⵔⵙⴰⵍⵏ ⵏⵜⵜⴰ ⴷ ⵜⵎⵔⵙⴰⵍ ⵜⵉⴼⵔⵉⵇⵉⵏ ⴰⵙ ⵉⵔⵡⴰⵙⵏ, ⵜⵉⵏ ⵢⵉⵍⵍ ⴰⴳⵔⴰⴽⴰⵍ, ⵜⵉⵏ ⵜⵎⵓⵔⴰ ⵜⴰⵄⵔⴰⴱⵉⵏ, ⵜⵉⵏ ⴰⵙⵉⵢⴰ ⴷ ⵜⵉⵏ ⵎⴰⵔⵉⴽⴰⵏ ⵏ ⵓⵢⴼⴼⵓⵙ.

ⵜⵔⵓⵔ ⵎⴰⵙⵙⴰ ⴰⵅⵔⴱⴰⵛ ⵅⴼ ⴽⵉⴳⴰⵏ ⵏ ⵉⵙⵇⵙⵉⵜⵏ ⵏ ⵉⵎⵙⵇⴰⴷⵏ ⴷ ⵉⴳⵏⵙⴰⵙ ⵏ ⵜⵙⵎⵉⴳⵍⵉⵏ ⵜⵉⴷⵉⴱⵍⵓⵎⴰⵙⵉⵏ ⴳ ⵍⵎⵖⵔⵉⴱ, ⵜⵙⵙⴽⵏ ⵜⵉⵣⵎⵎⴰⵔ ⵏⵏⴰ ⵉⵙⵙⴽⴰⵔ ⵓⴳⵔⴰⵡ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ ⴰⴼⴰⴷ ⴰⴷ ⵉⵙⴷⵓⵙ ⵢⴰⵜ ⵜⵎⵓⵖⵍⵉ ⵜⴰⵙⵍⵉⵥⵕⵜ ⵜⴰⵎⴰⴳⵓⵜ, ⵜⴰⵎⵢⴰⵏⴰⵡⵜ ⵏⵏⴰ ⵉⵜⵜⵔⴰⵔⵏ ⵅⴼ ⵉⵣⵓⵛⵛⵍⵏ ⵏ ⵓⵙⵙⵓⵎⵓ ⴰⵎⵓⵔⴰⵏ ⴳ ⵢⵉⴳⵔ ⵏ ⵡⴰⴷⴰⴼ ⵏ ⵉⵏⵎⵓⵔⵉⵏ ⵖⵔ ⵜⵏⴰⴼⵓⵜⵉⵏ ⵜⵉⵙⵍⵉⵥⵕⵉⵏ, ⴳ ⵢⴰⵏ ⵓⵙⴰⵜⵉ ⵏ ⵓⵙⵏⴼⵍ ⴰⵎⴰⵜⴰⵢ ⵉⵜⵜⵓⵕⵛⵎⵏ ⵙ ⵉⵙⵏⴼⵍⵏ ⵉⵜⵉⴽⵏⵓⵍⵓⵊⵉⵏ ⴷ ⵉⵣⵣⵓⵍⴰⵏⵏ ⵉⵖⴱⴰⵏ ⵏ ⵜⵡⵏⵏⴰⴹⵜ ⵜⴰⵖⵎⵙⴰⵏⵜ.