ⵜⵖⵔⴰ ⵜⵏⵙⵙⵉⵅⴼⵜ ⵏ ⵓⴳⵔⴰⵡ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ, ⵎⴰⵙⵙⴰ ⵍⴰⵟⵉⴼⴰ ⴰⵅⴰⵔⴱⴰⵛ, ⴰⵙⵙ ⵏ 23 ⵉⴱⵔⵉⵔ ⴳ ⴰⴱⵉⴷⵊⴰⵏ ⵉ ⵢⴰⵜ ⵜⵎⵢⴰⴷⴰⵙⵜ ⵜⴰⵎⴰⴹⵍⴰⵏⵜ ⵉⵎⵙⴰⵙⴰⵏ ⴳ ⵢⵉⴳⵔ ⵏ ⵓⵙⵍⴳⵏ ⵏ ⵜⵙⴰⵍⵉⵡⵉⵏ ⵜⵉⵎⵓⵟⵟⵓⵏⵉⵏ ⵜⵉⵎⴰⵜⴰⵢⵉⵏ ⴰⵛⴽⵓ « ⴰⵍⵍⴰⵍ ⴰⵢⵉⵡⴰⵏ ⵉ ⵓⴹⵎⴰⵏ ⵏ ⵢⴰⵜ ⵜⵡⵏⵏⴰⴹⵜ ⵜⴰⵎⵓⵟⵟⵓⵏⵜ ⵜⴰⵏⴼⵍⴰⵙⵜ ⵉ ⴽⵓ ⵢⴰⵏ, ⵜⴳ ⴰⵡⴷ ⵢⴰⵏ ⵓⴳⴰⴷⴰⵣ ⴰⵎⵓⵟⵟⵓⵏ ⵉⵏⵏⵓⵕⵥⵎⵏ, ⴰⵎⴰⵍⵡⴰⵖ ⴷ ⵓⵎⵙⵙⵓⵎⵓ. ⵉ ⵜⵎⵏⵥⴰⵡⵜ ⵜⴰⴼⵔⵉⵇⵜ ⴷ ⵜⵙⴳⴳⵯⵉⵏ ⵢⴰⴹⵏ ⵏ ⵓⵎⴰⴹⴰⵍ, ⴰⵎⵙⴰⵔⴰⵙ ⴰⴷ ⵉⴳⴰ ⴰⵎⵇⵔⴰⵏ » ⴰⵢ ⵜⵏⵏⴰ. ⴳ ⵜⴳⵓⵔⵉ ⵏⵏⵙ ⵉⵡⵏⴰⵏ ⵏ ⵓⵏⵏⵓⵕⵥⵎ ⵏ ⵜⵉⵏⴰⵡⵜ ⵜⴰⴳⵔⴰⵖⵍⴰⵏⵜ ⵏⵏⴰ ⵜⵙⵏⵎⴰⵍⴰ ⵓⵙⵙⴰⵏ ⵏ 23 ⴷ 24 ⵉⴱⵔⵉⵔ ⴳ ⴰⴱⵉⴷⵊⴰⵏ ⵙ ⵓⵃⵉⴹⵕ ⵏ ⵓⵎⴰⵡⵙⴰⵙ ⴰⵎⵣⵡⴰⵔⵓ ⵎⴰⵙⵙ ⵕⵓⴱⵉⵔ ⵎⵎⴰⵎⴱⵉ ⴱⵓⴳⵔ, ⵜⵎⵔⵙⵍⵜ ⵏ ⵓⵙⵍⴳⵏ ⵏ ⵜⵎⵓⵔⵜ ⵏ ⵙⴰⵃⵉⵍ ⵍⵄⴰⵊ, ⴷⴷⴰⵡ ⵓⵙⴳⵓⵎ ⵏ « ⴰⵙⴷⵓⵙ ⵏ ⵓⵎⵙⴰⵡⴰⵍ ⴳⵔ ⵉⵎⵙⵍⴳⵏⵏ ⴷ ⵜⵙⵉⵍⴰⵡⵉⵏ ⵜⵉⵅⴰⵜⴰⵔⵉⵏ ⴳ ⵉⴼⵉⵍⵉ ⵅⴼ ⵜⵎⵏⵥⴰⵡⵜ ⵜⴰⴼⵔⵉⵇⵜ ⴷ ⵓⵙⴰⵢⵔⴰⵔ ⴰⴼⵕⴰⵏⴽⵓⴼⵓⵏⵉ », ⵜⵏⵏⴰ ⴷⵉⵖ ⵎⴰⵙⵙⴰ ⴰⵅⴰⵔⴱⴰⵛ ⵉⵙ ⵜⴰⴼⵔⵉⵇⵜ ⵉⵇⵇⴰⵏ ⴰⴷ ⵜⴳ ⵜⴰⵎⴳⴳⴰⵢⵜ ⵏ ⵓⵙⵍⴳⵏ ⴰⵎⴰⴹⵍⴰⵏ ⴷ ⴰⴷ ⵜⴰⵡⵙ ⴳ ⵜⵓⵚⴽⴰ ⵏ ⵓⵎⵙⴰⵙⴰ ⴰⴳⵔⴰⵖⵍⴰⵏ ⵅⴼ ⵉⵍⵓⴳⵏⵏ ⴷ ⵜⵖⴰⵔⴰⵙⵉⵏ ⵏ ⵓⵙⴰⵜⵉ ⵏ ⵜⵡⵓⵔⵉⵡⵉⵏ ⵏ ⵜⵙⵉⵍⴰⵡⵉⵏ ⵜⵉⵎⵓⵟⵟⵓⵏⵉⵏ ⵜⵉⵎⴰⵜⴰⵢⵉⵏ.

ⵜⵥⵕⴰ ⵜⵏⵙⵙⵉⵅⴼⵜ ⵏ ⵜⵎⵔⵙⵍⵜ ⵜⴰⵎⵖⵔⴰⴱⵉⵢⵜ ⵏ ⵓⵙⵍⴳⵏ, ⵉⴳⴰⵏ ⴰⵡⴷ ⵜⴰⵏⵙⵙⵉⵅⴼⵜ ⵏ ⵓⵥⵟⵟⴰ ⵏ ⵜⵎⵔⵙⴰⵍ ⵜⵉⴼⵔⵉⵇⵉⵏ ⵏ ⵓⵙⵍⴳⵏ ⴷ ⵓⵎⵢⴰⵡⴰⴹ, ⵉⵙ ⵜⴳⴰ ⵜⵖⵓⵔⵉ ⵢⴰⴷ ⵢⴰⵏ ⵓⵙⵓⵜⵔ ⵏ ⵜⵖⴹⴼⵜ ⵉ ⵜⵎⵥⵍⵉⵢⵉⵏ ⴷ ⵜⵉⵍⴰⵡⵉⵏ ⵏ ⵜⵎⵏⵥⴰⵡⵜ, ⵉⵜⵜⵓⵢⴰⵣⵏⵏ ⵉ ⵜⵙⵉⵍⴰⵡⵉⵏ ⵜⵉⵎⵀⵔⴰⴼⵏ ⵜⵉⵎⴰⵜⴰⵢⵉⵏ ⴷ ⵜⵉⵏⵏⴰ ⵉⵜⵜⴳⴳⴰⵏ ⵛⵛⵉⵍ ⵙ ⵜⵣⵎⵔⵜ ⵏⵏⵙⵏⵜ ⵅⴼ ⵓⴳⴰⴷⴰⵣ ⴰⵔ ⵣⵣⵔⴰⵢⵏⵜ ⵙ ⵛⵛⵉⵍ ⵉⵍⵓⴳⵏⵏ ⵉⴷⵍⵙⴰⵏⵏ ⴷ ⵉⵙⵔⵜⴰⵏⵏ ⵏⵏⵙⵏⵜ.

 ⴰⵔ ⵜⵜⴰⵏⵏⴰⵢ ⵎⴰⵙⵙⴰ ⴰⵅⴰⵔⴱⴰⵛ ⵉⵙ « ⵉ ⵢⴰⵜ ⵜⵎⵏⵥⴰⵡⵜ ⵏⵏⴰ ⵉⵇⵇⴰⵏ ⴰⴷ ⵜⵏⵏⴰⵍ ⵉⵎⵙⵓⵔⵙⵏ ⵉⵅⴰⵜⴰⵔⵏ ⵏ ⵜⴰⵎⵓⵏⵜ ⵜⴰⵏⴰⵎⵓⵏⵜ, ⵜⴰⴷⵓⵙⵉ ⵜⴰⵏⴰⵎⵓⵔⵜ ⴷ ⵜⵙⵏⵉⵎⴰⵏⵜ ⵜⴰⴷⵍⵙⴰⵏⵜ, ⵜⴰⵣⴷⴳⵉ ⵏ ⵜⵖⴰⵔⴰⵙⵉⵏ ⵏ ⵉⵙⵜⴰⵢⵏ, ⴰⵎⵙⵏⵓⴹ ⵏ ⵓⵎⵙⴳⴷⴰⵍ ⴰⴳⴷⵓⴷⴰⵏ, ⵉⵡⵏⵏⵉⵜⵏ ⵏ ⵓⴽⵙⴰⵏ, ⴰⵙⵔⵓⵙ ⵏ ⵓⵣⵓⵔⵜ ⵏ ⵓⵙⵍⴳⵏ ⵉⵚⴽⴰⵏ ⵅⴼ ⵉⵣⵔⴼⴰⵏ ⴷ ⵜⵍⴻⵍⵍⵉⵢⵉⵏ ⴰⵢⴰ ⴰⴽⴽⵯ ⵉⴳⴰ ⵢⴰⵏ ⵓⵡⵜⵜⴰⵙ ⴰⵎⵇⵔⴰⵏ ⵏⵏⴰ ⵉⵇⵇⴰⵏ ⴰⴷ ⵏⴰⵡⴹ ⵙ ⵉⵖⵉⵡⵍ. »

ⴳ ⵓⵢⵏⵏⴰ ⵉⵣⴷⵉⵏ ⵙ ⵓⵙⵍⴳⵏ ⵏ ⵜⵉⵖⵉⵙⵜ ⵜⵉⵎⵍⵥⵉⵜ, ⵜⵥⵕⴰ ⵜⵏⵙⵙⵉⵅⴼⵜ ⵏ ⵓⴳⵔⴰⵡ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ ⵉⵙ ⵏ ⵉⵇⵇⴰⵏ ⴰⴷ ⵉⵜⵜⵓⵙⵔⵙ ⵓⵙⵇⵙⵉ ⵢⴰⴷ ⵓⵔ ⵉⴷ ⵙ ⵢⵉⵔⵎⵏ ⵏ ⵓⵙⵡⵓⵜⵜⵓ ⵏ ⵓⵙⵡⵓⵔⵉ ⵎⴰⵛⴰ ⵙ ⵢⵉⵔⵎⵏ ⵏ ⵜⵉⴹⴰⴼ ⵏ ⵓⵙⵡⵓⵔⵉ ⵏⵏⵙ ⴷ ⵢⵉⵔⵎⵏ ⵏ ⵓⵙⵅⵉⵜⵔ ⵏ ⵡⴰⴷⴰⴼ ⵖⵔ ⵜⴻⵜⵉⴽⵏⵓⵍⵓⵊⵉⵜ ⴰⴷ ⴳ ⵢⵉⴳⵔ ⵏ ⵜⴳⵎⵉ ⵜⴰⵎⴰⵜⴰⵢⵜ ⵏ ⵜⵎⵓⵔⴰ. ⵜⵏⵏⴰ ⵅⴼ ⵓⵢⴰ: « ⵉⵇⵇⴰⵏ ⵏ ⴰⴷ ⵏⵔⴰⵔ ⵜⴰⵖⴹⴼⵜ ⵉ ⵜⵓⵎⵙⵉⵙⵜ ⴷ ⵓⵙⵙⵓⵎⵓ ⵏ ⵜⵖⵜⵙⵜ ⵜⴰⵎⵣⵡⴰⵔⵓⵜ ⵏ ⵜⵎⴰⴷⴷⴰⵙⵜ ⵏ ⵜⵎⵓⵔⴰ ⵎⵓⵏⵉⵏ ⵅⴼ ⵜⵉⵖⵉⵙⵜ ⵜⵉⵎⵍⵥⵉⵜ ⵏⵏⴰ ⵜⵖⵜⵙ ⵙ ⵓⵎⵙⴰⵙⴰ, ⵓⵙⵙⴰⵏ ⵏ 21 ⵎⴰⵕⵚ 2024, ⵙ ⵓⵙⵓⵎⵔ ⴰⵎⴷⵔⴰⵡ ⵏ ⵍⵎⵖⵔⵉⴱ ⴷ ⵎⴰⵔⵉⴽⴰⵏ. ⵜⴰⵖⵜⵙⵜ ⴰⴷ ⵜⴳⴰ ⴰⴱⵖⵓⵔ ⵍⵍⵉⴳ ⵜⵔⵓⵔⴰ ⵜⴰⵖⴹⴼⵜ ⵉ ⵓⵣⵓⵛⵛⵍ ⵏ ⵓⵙⵡⵓⵔⵉ ⵏ ⵜⵖⴰⵔⴰⵙⵉⵏ ⵏ ⵜⵉⵏⵏⵓⴱⴹⴰ ⵉⵕⵡⴰⵏ ⵏ ⵜⵉⵖⵉⵙⵜ ⵜⵉⵎⵍⵥⵉⵜ, ⵏⵏⴰ ⵉⵇⵇⴰⵏ ⴰⴷ ⵜⵚⴽⵓ ⵅⴼ ⵓⵣⵔⴼ ⴰⴳⵔⴰⵖⵍⴰⵏ, ⵜⴳ ⵜⴰⵎⵙⴰⴷⴰⴼⵜ ⴷ ⴰⴷ ⵜⵎⵙⴰⵙⴰ ⴷ ⵉⵏⵎⵔⴰⵏ ⴷ ⵜⵣⵎⵎⴰⵔ ⵏ ⵜⵎⵓⵔⴰ ⵉⴳⵎⴰⵏ ⴷ ⵜⵉⵏⵏⴰ ⵉⵍⵍⴰⵏ ⴳ ⵓⴱⵔⵉⴷ ⵏ ⵜⴳⵎⵉ » .

ⵎⵓⵏⵏ ⴳ ⵜⵡⵓⵔⵉⵡⵉⵏ ⵏ ⵜⵉⵏⴰⵡⵜ ⴰⴷ ⵜⴰⴳⵔⴰⵖⵍⴰⵏⵜ ⵜⴰⵎⵇⵔⴰⵏⵜ ⴽⵉⴳⴰⵏ ⵏ ⵉⵎⵙⵍⴳⵏⵏ ⵏ ⵙⵏⴰⵜ ⵜⵎⵔⴰⵡⵉⵏ ⵏ ⵜⵎⵓⵔⴰ ⵜⵉⴼⵔⵉⵇⵉⵏ ⴷ ⵓⵙⴰⵢⵔⴰⵔ ⴰⴼⵕⴰⵏⴽⵓⴼⵓⵏ, ⵉⵍⵉⵏ ⵉⵎⵙⵜⴳⴳⴰⵔⵏ ⵏ ⵍⵓⵏⵉⵙⴽⵓ ⴷ ⵡⵉⵏ ⵜⵎⴰⴷⴷⴰⵙⵜ ⵜⴰⴳⵔⴰⵖⵍⴰⵏⵜ ⵏ ⵜⴼⵕⵓⵏⴽⵓⴼⵓⵏⵉⵜ ⴷ ⵉⴳⵏⵙⴰⵙⵏ ⵏ ⵜⵙⵉⵍⴰⵡⵉⵏ ⵜⵉⵎⵓⵟⵟⵓⵏⵉⵏ ⵜⵉⵎⴰⵜⴰⵢⵉⵏ, ⵎⵉⵟⴰ, ⵜⵉⴽⵟⵓⴽ, ⵉⴽⵙ ⴷ ⴳⵓⴳⵍ.

ⴰⴽⴰⴱⴰⵔ ⵏ ⵓⴳⵔⴰⵡ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ ⴳ ⵜⵉⵏⴰⵡⵜ ⴰⴷ ⵏ ⴰⴱⵉⴷⵊⴰⵏ ⴷⵉⴳⵙ ⴰⵡⴷ ⵎⴰⵙⵙ ⵟⴰⵍⴰⵍ ⵚⴰⵍⴰⵃⴷⴷⵉⵏ, ⴰⵎⵙⴰⵢ ⵏ ⵜⵖⴰⵡⵙⵉⵡⵉⵏ ⵜⵉⴼⵔⵉⵇⵉⵏ ⴷ ⵜⴳⵔⴰⵖⵍⴰⵏⵉⵏ ⴷ ⵎⴰⵙⵙ ⵄⵜⵎⴰⵏ ⵄⴰⵍⴰⵎⵉ, ⴰⵙⴰⵜⵉ ⴰⵎⴰⵜⵜⴰⵢ ⴳ ⵜⵣⵓⵏⵉ ⵏ ⵜⵖⵓⵔⵉⵡⵉⵏ ⵜⵉⵣⵔⴼⴰⵏⵉⵏ.