ⵜⵏⵏⴰ ⵎⴰⵙⵙⴰ ⵍⴰⵟⵉⴼⴰ ⴰⵅⴰⵔⴱⴰⵛ, ⵜⴰⵏⵙⵙⵉⵅⴼⵜ ⵏ ⵓⴳⵔⴰⵡ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ ⴷ ⵜⵏⵙⵙⵉⵅⴼⵜ ⴷⵖⵉ ⵏ ⵓⵥⵟⵟⴰ ⵏ ⵉⴳⵔⴰⵡⵏ ⵉⴼⵔⵉⵇⵏ ⵏ ⵓⵙⵏⴰⵎ ⵏ ⵓⵎⵢⴰⵡⴰⴹ, ⴰⵙⵙ ⵏ 07 ⵢⵓⵏⵢⵓ 2023 ⴳ ⴰⴱⵉⴷⵊⴰⵏ ⵙⴰⵃⵉⵍ ⵍⵄⴰⵊ, ⵉⵙ « ⵓⵔ ⵜⵍⵍⵉ ⵜⵙⵉⵎⴰⵏⵜ ⵜⴰⵎⵓⵟⵟⵓⵏⵜ ⵉⵕⵡⴰⵏ ⵡⴰⵔ ⴰⵙⴰⵢⵔⴰⵔ ⴰⵎⵓⵟⵟⵓⵏ ⴳ ⵉⵍⵍⴰ ⵍⴰⵎⴰⵏ ⴷ ⵓⵙⴽⴰⵏ ⴰⴷⵍⵙⴰⵏ ⴷ ⵓⵙⵏⵖⵎⵙ ⴰⵏⴰⵎⵓⵔ, ⵉⵖⵉⵢⵏ ⴰⴷ ⵢⴰⴼ ⴰⴷⵖⴰⵔ ⴷ ⵓⴳⴷⵓⴷ ⴳ ⵓⵙⴰⵢⵔⴰⵔ ⴰⵎⵓⵟⵟⵓⵏ ⴰⵎⴰⵜⴰⵢ ⴰⵎⴰⵢⵏⵓ ». ⵜⵙⴷⴷⵉⴷ ⴳ ⵜⴳⵓⵔⵉ ⵏⵏⵙ ⵉⵡⵏⴰⵏ ⵏ ⵜⵡⵓⵔⵉⵡⵉⵏ ⵏ ⵜⵉⵏⴰⵡⵜ ⵜⴰⵎⴰⴹⵍⴰⵏⵜ ⵏⵏⴰ ⵉⵙⵏⵎⴰⵍⴰ ⵓⴳⵔⴰⵡ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ ⵏ ⵙⴰⵃⵉⵍ ⵍⵄⴰⵊ, ⵅⴼ ⵜⵎⵢⴰⴷⴰⵙⵜ ⵜⴰⵎⴷⵔⴰⵡⵜ ⵏ ⵜⵎⵓⵔⴰ ⵏ ⵜⴰⵢⵎⵓⵏⵜ ⵜⴰⴷⴰⵎⵙⴰⵏⵜ ⴷ ⵜⵥⵕⴼⴰⵏⵜ ⵏ ⵜⵎⵓⵔⴰ ⵏ ⵓⵢⴼⴼⵓⵙ ⵏ ⵉⴼⵔⵉⵇⵉⵢⴰ ⴳ ⵢⵉⴳⵔ ⵏ ⵓⵙⵏⴰⵎ ⵏ ⵜⵙⵉⵍⴰⵡⵉⵏ ⵜⵉⵎⵓⵟⵟⵓⵏⵉⵏ ⵜⵉⵎⴰⵜⴰⵢⵉⵏ, ⵜⵏⵏⴰ « ⵜⵓⵚⴽⴰ ⵏ ⵜⵙⵉⵎⴰⵏⵜ ⵜⴰⴷⵍⵙⴰⵏⵜ ⴷ ⵜⵏⵖⵎⴰⵙⵜ ⵜⴰⴼⵔⵉⵇⵜ ⵉⴳⴰ ⵜⴰⵡⵓⵔⵉ ⵎⵉ ⴳⴳⵓⵜⵏ ⵉⵎⵏⵉⴷⵏ ⵜⴳ ⵜⴰⵎⵖⵉⵡⵍⵜ, ⵙ ⵉⵎⵥⵍⵉ ⵍⵍⵉⴳ ⵍⵍⴰⵏ ⵉⵙⵏⵉⴼⵍⵏ ⵉⵅⴰⵜⴰⵔⵏ ⴳ ⵓⵏⴳⵔⴰⵡ ⴰⵙⵏⵖⵎⴰⵙ. ⵔⵏⵓ ⵉ ⵓⵙⵔⵔⵓⵙ ⵏ ⵢⴰⵜ ⵜⵣⵎⵔⵜ ⴳ ⵢⵉⴳⵔ ⵏ ⵓⵙⵍⵍⵡⵓ ⵏ ⵜⵓⵎⴰⵢⵉⵏ, ⵉⵇⵇⴰⵏ ⵏ ⵉ ⵜⵡⵓⵔⵉ ⵢⴰⴷ ⴰⴷ ⵜⴰⴼ ⵉⴼⵙⵙⴰⵢⵏ ⵉ ⴽⵉⴳⴰⵏ ⵏ ⵜⵎⵓⴽⵔⵉⵙⵉⵏ ⴰⵎ ⵓⵣⵔⴰⴽ ⵏ ⵉⵣⵔⴼⴰⵏ ⵏ ⵓⵎⵙⴽⴰⵔ, ⴰⴼⵔⴰⴳ ⵏ ⵓⴳⴷⵓⴷ ⴰⵎⵥⵢⴰⵏ ⴷ ⵜⵏⴽⵔⴰ ⵙ ⵓⵙⵍⵍⵡⵓ ⴷ ⵓⵙⵢⴰⴼⵓ ⴰⵙⵍⵉⵥⵕ ⴷ ⵓⵎⵓⵟⵟⵓⵏ ⴷ ⵙⵙⵉⵏⵉⵎⴰ ⵜⴰⴼⵔⵉⵇⵜ ⵏⵏⴰ ⴷⴰ ⵉⵙⵙⴽⴰⵏⵏ ⴰⵔ ⵜⵙⵎⵓⵙⵙⵓ ⴰⵎⵢⴰⵏⴰⵡ ⴰⴷⵍⵙⴰⵏ ⴷ ⵓⵏⴼⴳⴰⵏ ».
ⴳ ⵓⵢⵏⵏⴰ ⵉⵣⴷⵉⵏ ⴷ ⵜⵖⴰⵔⴰⵙⵉⵏ ⵏ ⵓⵙⵏⴰⵎ ⵏ ⵜⵙⵉⵍⴰⵡⵉⵏ ⵜⵉⵎⵓⵟⵟⵓⵏⵉⵏ ⵜⵉⵎⴰⵜⴰⵢⵉⵏ ⵏⵏⴰ ⵏ ⵉⵇⵇⴰⵏ ⴰⴷ ⵜⵜⵓⵙⵔⵙⵏⵜ ⵅⴼ ⵓⵙⵡⵉⵔ ⵏ ⵓⵎⵏⵥⴰⵡ, ⵜⵏⵏⴰ ⵜⵏⵙⵙⵉⵅⴼⵜ ⵏ ⵓⵥⵟⵟⴰ ⵏ ⵉⴳⵔⴰⵡⵏ ⵉⴼⵔⵉⵇⵏ ⵏ ⵓⵙⵏⴰⵎ ⵏ ⵓⵎⵢⴰⵡⴰⴹ, ⵉⵍⵍⴰ ⵏ ⵜⵎⵓⵏ ⴷ ⵎⴰⵙⵙ ⵟⴰⵍⴰⵍ ⵚⴰⵍⴰⵃⴷⴷⵉⵏ, ⴰⵏⴱⴷⴰⴷ ⵅⴼ ⵉⵣⴷⴰⵢⵏ ⵉⴼⵔⵉⵇⵏ ⴷ ⵉⵎⴰⴹⵍⴰⵏⵏ ⴳ ⵓⴳⵔⵡⴰ ⴰⵎⴰⵜⵜⴰⵢ, ⵜⵏⵏⴰ ⵉⵙ « ⵉⵇⵇⴰⵏ ⵏ ⴳ ⵓⵙⴰⵜⵉ ⵏ ⵓⵙⵏⴰⵎ ⵏ ⵜⵙⵉⵍⴰⵡⵉⵏ ⴰⴷ, ⴰⵎ ⵓⵢⵏⵏⴰ ⵉⵍⵍⴰⵏ ⴳ ⵢⵉⵔⵎⵏ ⵢⴰⴹⵏ, ⵜⴰⵎⵔⵉⵙⵜ ⵙ ⵓⵙⴷⵓⵙ ⵏ ⵜⵎⴳⵓⵔⵉ ⵜⴰⴷⵍⵙⴰⵏⵜ, ⵜⴰⵙⵏⵖⵎⴰⵙⵜ ⴷ ⵓⵙⵍⵍⵡⵓ ⴰⴷⵖⵔⴰⵏ », ⵜⵔⵓ ⵜⵏⵏⴰ « ⵎⴰⵛⴰ ⴰⵢⴰ ⵓⵔ ⴰⴷ ⵉⴼⵙⵢ ⵜⵎⵓⴽⵔⵉⵙⵜ ⵜⴰⴷⵙⵍⴰⵏⵜ ⵉⴳⴰ ⴰⵣⵓⵛⵛⵍ ⵏ ⴰⴷ ⵚⴽⵓⵏⵜ ⵜⵏⴱⴰⴹⵉⵏ ⵜⵉⴳⴷⵓⴷⴰⵏⵉⵏ ⴳ ⵓⵎⵏⵥⴰⵡ ⵉⵏⴳⵔⴰⵡⵏ ⵉⵙⵖⵎⵙⴰⵏⵏ ⴷ ⵉⴷⵍⵙⴰⵏⵏ ⵉⴼⵔⵉⵇⵏ ⵉⵔⵡⴰⵏ ⵉⵙⵓⵍⴰⵏⵏ ».
ⵜⴰⵙⴳⴰ ⵏ ⵉⴳⵔⴰⵡⵏ ⵏ ⵜⵎⵓⵔⴰ ⵙ ⵙⵉⵏ ⴷ ⵎⵔⴰⵡ ⵜⵓⵎⴰ ⵜⵢⴰⵎⵓⵏⵜ ⵜⴰⴷⴰⵎⵙⴰⵏⵜ ⴷ ⵜⵥⵕⴼⴰⵏⵜ ⵏ ⵓⵢⴼⴼⵓⵙ ⵏ ⵉⴼⵔⵉⵇⵉⵢⴰ, ⵢⴰⵎⵓ ⴳ ⵜⵡⵓⵔⵉⵡⵉⵏ ⵏ ⵜⵉⵏⴰⵡⵜ ⴰⴷ ⴽⵉⴳⴰⵏ ⵏ ⵉⴳⵔⴰⵡⵏ ⵏ ⵓⵙⵏⴰⵎ ⵉⴼⵔⵉⵇⵏ ⵢⴰⴹⵏ, ⴷ ⵉⴳⵏⵙⴰⵙ ⵏ ⵜⵙⵉⵍⴰⵡⵉⵏ ⵜⵉⵎⵓⵟⵟⵓⵏⵉⵏ ⵜⵉⵎⴰⵜⴰⵢⵉⵏ ⵣⵓⵏⴷ ⵜⵉⴽⵟⵓⴽ ⴷ ⴳⵓⴳⵍ ⴷ ⵓⴳⵏⵙⴰⵙ ⵏ ⵜⵢⵙⵇⵇⵉⵎⵜ ⵏ ⵜⵢⴰⵎⵓⵏⵜ ⵜⴰⴷⴰⵎⵙⴰⵏⵜ ⴷ ⵜⵥⵕⴼⴰⵏⵜ ⵏ ⵜⵎⵓⵔⴰ ⵏ ⵓⵢⴼⴼⵓⵙ ⵏ ⵉⴼⵔⵉⵇⵉⵢⴰ ⴷ ⵜⵏⵙⵙⵉⵅⴼⵜ ⵏ ⵓⵥⵟⵟⴰ ⵏ ⵉⴳⵔⴰⵡⵏ ⵉⴼⵔⵉⵇⵏ ⵏ ⵓⵙⵏⴰⵎ ⵏ ⵓⵎⵢⴰⵡⴰⴹ ⴷ ⵓⴳⵏⵙⴰⵙ ⵏ ⵓⵥⵟⵟⴰ ⴰⴼⵕⴰⵏⴽⵓⴼⵓⵏ ⵏ ⵉⴳⵔⴰⵡⵏ ⵏ ⵓⵙⵏⴰⵎ ⵏ ⵓⵙⵏⵖⵎⵙ.