ⵜⵙⵏⵓⴱⴳ ⵜⵏⵙⵙⵉⵅⴼⵜ ⵏ ⵓⴳⵔⴰⵡ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ, ⵎⴰⵙⵙⴰ ⵍⴰⵟⵉⴼⴰ ⴰⵅⴰⵔⴱⴰⵛ ⴰⵙⵙ ⵏ 23 ⵛⵜⴰⵎⴱⵉⵔ ⴳ ⵓⵙⵖⵉⵎ ⵏ ⵜⵎⵔⵙⵍⵜ, ⵎⴰⵙⵙ ⵡⴰⵢⵉⵍ ⵄⵉⵣⵣⴰⵜ, ⴰⵎⵙⵜⴳⴳⴰⵔ ⵏ ⵜⵙⵔⵜⴰⵢ ⵜⵉⴳⴷⵓⴷⴰⵏⵉⵏ ⵏ ⵜⵉⴽⵟⵓⴽ ⴳ ⵜⴼⵔⵉⵇⵜ ⵓⴳⴰⴼⴰⵢ ⴷ ⵎⵉⵚⵕ.
ⵉⵡⵏⴰⵏ ⵏ ⵓⵎⵙⴳⵔⴰⵡ ⴰⴷ, ⵜⵙⵙⴽⵜⵉ ⵎⴰⵙⵙⴰ ⴰⵅⴰⵔⴱⴰⵛ ⵉⵙ ⵉⵚⴽⴰ ⵓⵣⵓⵔⵜ ⴰⵎⵖⵔⴰⴱⵉ ⵏ ⵓⵙⵍⴳⵏ ⵏ ⵓⵙⵏⵖⵎⵙ ⵅⴼ ⵙⵉⵏ ⵉⵎⵏⵣⴰⵢ: ⴰⴼⵔⴰⴳ ⵏ ⵜⵍⴻⵍⵍⵉ ⵏ ⵓⵡⵏⵏⵉ ⴷ ⵓⵎⵢⴰⵡⴰⴹ, ⴷ ⵜⵏⴽⵔⴰ ⵙ ⵉⵣⵔⴼⴰⵏ ⵏ ⵉⵏⵎⵓⵔⵉⵏ ⵉⵙⵙⵡⵓⵔⵉⵏ ⴳ ⵢⴰⵜ ⵜⵡⵏⵏⴰⴹⵜ ⵜⴰⵙⵖⵎⵙⴰⵏⵜ ⵏ ⵍⴰⵎⴰⵏ ⵉⵣⵔⵔⴽⵏ ⵉⵣⵔⴼⴰⵏ ⵉⵏⴼⴳⴰⵏⵏ ⴷ ⵡⴰⵜⵉⴳⵏ ⵉⴷⵉⵎⵓⵇⵕⴰⵟⵉⵢⵏ.
ⵜⵙⴰⵡⵍ ⵜⵏⵙⵙⵉⵅⴼⵜ ⵏ ⵓⴳⵔⴰⵡ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ ⵅⴼ ⵜⵡⵓⵔⵉ ⵏ ⵡⴰⴳⴳⴰ ⴷ ⵜⵖⵓⵔⵉⵡⵉⵏ ⵏⵏⴰ ⴷⴰ ⵙⵙⴽⴰⵔⵏⵜ ⵜⵣⵓⵏⵉⵏ ⵏ ⵜⵎⵔⵙⵍⵜ, ⵜⵏⵏⴰ ⵉⵙ ⵣⵓⵏⴷ ⵜⵉⵎⵓⵔⴰ ⵢⴰⴹⵏ, ⵉⵎⵙⵡⵓⵔⴰ ⵉⵎⵖⵔⴰⴱⵉⵢⵏ ⵏⵏⴰⵍⵏ ⵉⵏⵖⵎⵉⵙⵏ ⵏ ⵜⴽⵔⴽⴰⵙ ⵉⵍⵍⴰⵏ ⴳ ⵉⴼⵉⵍⵉ, ⵉ ⵡⴰⵡⴰⵍ ⵏ ⵓⴽⵙⴰⵏ, ⵉⵡⴹ ⵏ ⵜⵓⴷⵔⵜ ⵜⵓⵙⵍⵉⴳⵜ ⴷ ⵡⴰⴷⴷⵓⵔ ⴰⵏⴼⴳⴰⵏ, ⵉⵡⵏⵏⵉⵜⵏ ⵏ ⵜⵉⵟⵟⵓⵕⴼⴰ ⴷ ⵓⵙⵙⵃⵕⵎ... ⴰⵜⴳ. “ⵜⵓⵎⴰⵢⵉⵏ ⴰⴷ ⵜⵉⵎⴹⴰⵕⵕⵉⵏ ⵉⵜⵜⵏⵢⵓⴷⴷⵓⵏ ⴰⵡⴷ ⵅⴼ ⵜⵉⴽⵟⵓⴽ, ⴷⴰ ⵙⵇⵍⵍⴰⵇⵏⵜ ⴰⵎⵓⵏ ⴰⵎⵖⵔⴰⴱⵉ, ⵓⴳⴰⵔ ⵍⵍⵉⴳ ⴷⴰ ⵏⵣⵣⵖⵏⵜ ⵜⵙⴰⵍⵉⵡⵉⵏ ⴰⴷ ⵢⴰⵏ ⵓⵎⵏⵏⴰⵡ ⴰⵅⴰⵜⴰⵔ ⵏ ⵓⴳⴷⵓⴷ ⴰⵎⵥⵢⴰⵏ ⴷ ⵉⵄⵔⵔⵉⵎⵏ”, ⴰ ⵅⴼ ⵜⴰⴷⴷ ⴷⵉⵖ.
ⴳ ⵜⵙⴳⴰ ⵢⴰⴹⵏ, ⵜⵙⴰⵡⵍ ⵜⵏⵙⵙⵉⵅⴼⵜ ⵏ ⵓⴳⵔⴰⵡ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ ⵉ ⵉⵏⴱⴳⵉⵡⵏ ⵏⵏⵙ ⵅⴼ ⵉⵙⵍⴳⵏⵏ ⵏⵏⴰ ⵢⵓⵙⵉ ⵜⵉⴽⵟⵓⴽ ⴳ ⵢⵉⴳⵔ ⵏ ⵜⵙⵓⵙⵖⵜ ⵜⴰⵍⴳⵓⵔⵉⵜⵎⵉⵜ, ⴰⴼⵔⴰⴳ ⵏ ⵉⵎⵥⵢⴰⵏⵏ ⴷ ⵡⵓⵖⵓⴷ ⵏ ⵉⵏⵖⵎⵉⵙⵏ.
ⴳ ⵓⵎⵔⴰⵔⴰ ⵏ ⵡⴰⵡⴰⵍ ⵅⴼ ⵜⵎⵙⴰⵍⵉⵏ ⴰⴷ, ⵉⵙⵙⴽⵏ ⵎⴰⵙⵙ ⵡⴰⵢⵉⵍ ⵄⵉⵣⵣⴰⵜ ⵜⵉⵖⵜⴰⵙⵉⵏ ⵏⵏⴰ ⵢⵓⵙⵉ ⵜⵉⴽⵟⵓⴽ ⴰⴼⴰⴷ ⴰⴷ ⵉⵙⵖⵓⴷⴰ ⵜⵉⵖⴰⵔⴰⵙⵉⵏ ⵏ ⵓⵣⵣⵔⴰⵢ ⵅⴼ ⵓⵏⵖⵎⵉⵙ ⴷ ⵓⵙⴷⵓⵙ ⵏ ⵉⵙⴰⴳⵎⵏ ⵏ ⵜⵖⵢⴰⵙⵜ ⵜⴰⵏⴼⴳⴰⵏⵜ ⵏ ⵜⵓⵎⴰⵢⵉⵏ ⵉⵡⴰⵜⵙⵏ ⵉⵎⵖⵔⴰⴱⵉⵢⵏ. ⵏⵏⴰⵏ ⴷⵉⵖ ⵉⵎⵙⵜⴳⴳⴰⵔⵏ ⵏ ⵜⵉⴽⵟⵓⴽ ⵉⵙ ⵔⵓⵔⴰⵏ ⵜⵖⴹⴼⵜ ⵉ ⵓⵣⵣⵉⴳⵣ ⵏ ⵓⴳⴰⴷⴰⵣ ⴰⵎⵖⵔⴰⴱⵉ ⵉⴳⴰⵏ ⴰⵍⵉⴱⵉⵕⴰⵍⵉ, ⴰⵔ ⴷⵉⴳⵙ ⵜⵜⴳⵉⴷⵉⵢⵏⵜ ⴳ ⵉⵙⴳⴳⵯⴰⵙⵏ ⴰⴷ ⵉⵎⴳⴳⵓⵔⴰ, ⵜⵓⵎⴰⵢⵉⵏ ⵉⵣⴷⵉⵏ ⵙ ⵜⵎⵙⵙⵏⵜⵉⵢⵉⵏ  ⴷ ⵜⵏⴽⵔⴰ ⵙ ⵓⵙⵖⵏⵣⵉ ⵙ ⵉⵎⵥⵍⵉ ⵖⵓⵔ ⵉⵄⵔⵔⵉⵎⵏ. ⵉⵏⵏⴰ ⴷⵉⵖ ⵓⵎⵙⵜⴳⴳⴰⵔ ⵉⵙ ⵔⴰⴹ ⵉⴹⴼⵓⵕ ⴰⵎⵢⴰⵖ ⴰⴽⴷ ⵜⵏⴱⴰⴹⵉⵏ ⵜⵉⴳⴷⵓⴷⴰⵏⵉⵏ ⵜⵉⵎⵖⵔⴰⴱⵉⵢⵉⵏ ⵙ ⵓⵎⴰⵜⴰ, ⴷ ⵓⴳⵔⴰⵡ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ ⵙ ⵉⵎⵥⵍⵉ, ⴰⴼⴰⴷ ⵉⵔⴰⵔ ⵉ ⵓⴳⴰⵏⵏⵉ ⵏ ⵡⴰⵎⵓⵏ ⴰⵎⵖⵔⴰⴱⵉ ⴷ ⵉⵎⵙⵡⵓⵔⴰ ⴰⴽⴽⵯ.
ⵃⴰⴹⵔⵏⵜ ⵉ ⵓⵎⵙⴳⵔⴰⵡ ⴰⴷ, ⵎⴰⵙⵙⴰ ⵍⴰⵟⵉⴼⴰ ⵜⴰⵢⴰⵀ, ⵜⴰⵏⵎⵀⴰⵍⵜ ⵏ ⵜⵣⵓⵏⵉ ⵏ ⵜⵖⵓⵔⵉⵡⵉⵏ ⴷ ⵜⴳⵎⵉ ⴰⴳⵓⵏⵙ ⵏ ⵜⵎⵔⵙⵍⵜ ⵜⴰⵎⵖⵔⴰⴱⵉⵢⵜ ⴷ ⵎⴰⵙⵙⴰ ⵡⵉⵙⵙⴰⵍ ⵎⴰⵕⵚⴰⵡⵉ, ⵜⴰⵎⵙⵙⵓⴷⵓⵜ ⴰⴳⵓⵏⵙ ⵏ ⵓⵙⵉⵔⴰ ⵏ ⵓⵙⵇⵇⵉⵎ ⴰⵎⴷⵔⴰⵡ ⵏ ⵜⵣⵓⵏⵉ ⵏ ⵉⵣⴷⴰⵢⵏ ⵉⴳⴷⵓⴷⴰⵏⵏ ⵏ ⵜⵉⴽⵟⵓⴽ.