ⵟⴰⵏⵊⴰ, 3 ⵏⵓⵡⴰⵏⴱⵉⵔ 2022

« ⵜⴰⵙⵙⴰⵙⵜ ⵏ ⴽⵓⴼⵉⴷ-19 ⵉⵟⵜⴰⵙⵏ ⴽⵉⴳⴰⵏ ⴰⵙⵏⵖⵎⵙ ⴰⴽⵍⴰⵙⵉⴽⵉ - ⵕⴰⴷⵢⵓ, ⵜⵉⵍⵉⴼⵉⵣⵢⵓⵏ ⴷ ⵜⵖⴰⵎⵙⴰ ⵉⵜⵜⵢⴰⵔⴰⵏ -  ⵏⵏⴰ ⵢⴰⴷ ⵎⵉ ⵔⴳⵉⴳⵏ ⵡⴰⵏⴰⵡⵏ ⵉⴷⴰⵎⵙⴰⵏⵏ ⵜⴻⵜⵜⵓⵜⵢ ⴰⵙ ⵜⵣⵎⵔⵜ ⵙ ⵉⵙⵏⵉⴼⵉⵍⵏ ⵉⵎⵓⵟⵟⵓⵏⵏ ⵏ ⵓⵎⵢⴰⵡⴰⴹ » ⴰⵢ ⵜⵏⵏⴰ ⵎⴰⵙⵙⴰ ⴰⵅⵔⴱⴰⵛ ⵜⴰⵏⵙⵙⵉⵅⴼⵜ ⵏ ⵓⴳⵔⴰⵡ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ ⵉⵡⵏⴰⵏ ⵏ ⵓⵙⴳⵔⴰⵡ ⵡⵉⵙⵙ 14 ⵏ ⵎⵉⴷⴰⵢⵣ, ⵏⵏⴰ ⵉⵙⵏⵎⴰⵍⴰ ⵙ ⵢⵉⵡⵉⵣ ⵢⴰⵜⵜⵓⵢⵏ ⵏ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⴰⵎⴷ ⵡⵉⵙⵙ ⵙⴹⵉⵙ, ⵙⴳ 2 ⴰⵔ 5 ⵏⵓⵡⴰⵏⴱⵉⵔ 2022 ⴳ ⵟⴰⵏⵊⴰ ⵓⵙⵉⵏⴰⴳ ⴰⵎⴰⴷⵢⵓⵙ ⴷⴷⴰⵡ ⵓⵙⴳⵓⵎ « ⵙⴳ ⵜⴰⵙⵙⴰⵙⵜ ⵖⵔ ⵜⴰⵢⴹ : ⵖⵔ ⴰⵏⵎⴰⵍⴰ ⴰⵎⴰⴹⵍⴰⵏ ⴰⵎⴰⵢⵏⵓ ? ». ⵜⵔⵏⵓ ⵜⵏⵏⴰ « ⴰⴽⵓⴽⴹ ⴰⴷ ⵉⵜⵜⵎⵖⵓⵔⵏ ⵏ ⵜⵖⴰⵎⵙⴰ, ⴷⴰ ⴷ ⵉⵜⵜⴰⵡⵉ ⵜⵉⵎⵓⴽⵔⵉⵙⵉⵏ ⵜⵉⴷⵉⵎⵓⵇⵕⴰⵟⵉⵢⵉⵏ ⴰⴷ ⴷ ⵉⵙⵙⵍⵡⵓ ⵉⵎⵉⵣⵉⵢⵏ ⵉ ⵜⴳⵍⴷⴰ ⵜⴰⵖⵎⵙⴰⵏⵜ ⴷ ⵜⴷⵍⵙⴰⵏⵜ ⵉ ⵜⵎⵓⵔⴰ ⵙ ⵉⵎⵥⵍⵉ ⵜⵉⵏ ⵓⵎⵏⵥⴰⵡ ⴰⴼⵔⵉⵇⵉ ».

ⵜⴼⵙⵔ ⵎⴰⵙⵙⴰ ⴰⵅⴰⵔⴱⴰⵛ ⴰⵎⵏⵉⴷ ⵏ ⵓⵎⵙⵏⴰⵎ ⵉⵣⴷⵉⵏ ⴷ ⵓⵙⵎⴽⵍ ⴰⵖⵎⵙⴰⵏ ⴰⵎⴰⵜⴰⵢ ⵏ ⵜⴰⵙⵙⴰⵙⵜ ⵏ ⵡⴰⵟⵟⴰⵏ ⴽⵓⴼⵉⴷ-19, ⵜⵙⵙⴽⵏ ⵙ ⵉⵎⵥⵍⵉ ⵜⵓⵎⴰⵏⵜ ⵏ ⵓⵙⵙⵡⵀⵏ ⵏ ⵜⵎⵙⴽⴰⵔ ⵏ ⴳⴰⵔ ⵉⵏⵖⵎⵉⵙⵏ : « ⴰⵡⴷ ⵢⴰⵜ ⵜⵎⵓⵔⵜ ⴳ ⵓⵎⴰⴹⴰⵍ ⵓⵔ ⵜⵜⵓⴼⵔⵉⴳ ⴷⴰⵜ ⵓⵔⴰⵜⴰⵢ ⵏ ⵓⵙⵏⵖⵎⵙ. ⵜⴰⵙⵙⴰⵙⵜ ⵜⴰⵎⴰⴹⵓⵏ ⵜⵍⵍⴰ ⵜⴻⵜⵜⵓⵡⴰⵙⵙⵏ ⵙ ⵢⴰⵏ ⵡⴰⵟⵟⴰⵏ ⴰⵅⴰⵜⴰⵔ ⴰⵎⴰⵜⴰⵢ ⵏ ⵉⵏⵖⵎⵉⵙⵏ ».

ⵜⵉⵙⵔⵜⴰⵢ ⵜⵉⴳⴷⵓⴷⴰⵏⵉⵏ ⵏ ⵜⵉⴷⵜ, ⵜⵉⵙⵓⵍⴰⵏⵉⵏ, ⴰⵢ ⴷ ⵉⵇⵇⴰⵏⵏ, ⴳ ⵓⵣⵔⴰⴽ ⵏ ⵜⵍⴻⵍⵍⵉⵢⵉⵏ, ⴰⴷ ⵜⵜⵓⵙⴽⵔⵏⵜ ⵉ ⵓⵙⴱⴷⴷⵉ ⵏ ⴳⴰⵔ ⵉⵏⵖⵎⵉⵙⵏ ⴰⵢ ⵜ ⵜⵔⵏⴰ ⵎⴰⵙⵙⴰ ⴰⵅⴰⵔⴱⴰⵛ ⴳ ⵜⵉⵏⴰⵡⵜ ⵏⵏⵙ ⴰⵛⴽⵓ « ⴰⴷⴰⴼ ⵏ ⴳⴰⵔ ⵉⵏⵖⵎⵉⵙⵏ ⴷ ⵜⵉⵥⵉⵕⵉⵏ ⵏ ⵓⵏⴳⵓⵣ ⴰⴳⵓⵏⵙ ⵏ ⵉⵎⵓⵏⵏ ⴷⴰ ⵉⵙⴷⵉⴷⴷⵉⵢ ⵉⵣⴷⴰⵢⵏ ⴳⵔ ⵎⴷⴷⵏ ⴷ ⴳⵔ ⵉⴳⵔⴰⵡⵏ ⵎⴰⵛⴰ ⴰⵡⴷ ⴳⵔ ⵉⵎⴷⴰⵏⵏ ⴷ ⵜⵎⵔⵙⴰⵍ. ⴷⴰ ⵜⵜⴰⵡⵙ ⴳ ⵓⵙⴽⴰⵔ ⵏ ⵙⵏⴰⵜ ⵜⵙⴳⴳⵯⵉⵏ ⴰⴳⵓⵏⵙ ⵏ ⵡⴰⵎⵓⵏ ⴰⵔ ⵜⵔⴷⴷⵍ ⵜⵓⴷⵔⵜ ⵜⴰⵎⴳⵔⴰⵡⵜ ⴳ ⵓⵙⵡⵉⵔ ⴰⴷⵖⵔⴰⵏ ⴷ ⵓⴳⵔⴰⵖⵍⴰⵏ. » ⴰⵢ ⵜⵔⵏⴰ ⵜⵏⵏⴰ ⵎⴰⵙⵙⴰ ⴰⵅⴰⵔⵖⴰⵛ ⵏⵏⴰ ⵉⵙⴰⵔⵙⵏ ⴰⵛⴰⵕⵉⴹ ⵅⴼ ⵡⴰⵟⵟⴰⵏ, « ⵉⵎⴰⵙⵙⵏ ⵏ ⵓⵙⵏⵖⵎⵙ ⵍⵍⴰⵏ ⴳⴰⵏ ⴰⵙⴰⵢⵙ ⵏⵏⴰ ⴳ ⵎⵎⴰⵖⵏ ⵉⵏⵖⵎⵉⵙⵏ ⵉⵊⵉⵢⵓⵙⵟⵔⴰⵜⵉⵊⵉⵢⵏ ⵙ ⵓⵎⴷⵢⴰ ⴰⵎⵏⵏⵓⵖ ⴷ ⵓⵎⵣⴰⵣⵣⴰⵍ ⴰⵙⵖⵏⵣⴰⵏ ⴳⵔ ⵉⵎⵙⴽⴰⵔⵏ ⵏ ⵓⵙⴰⴼⴰⵔ ⵏ ⵓⵛⵕⴰⴹ ».

ⴳ ⵓⵢⵏⵏⴰ ⵉⵣⴷⵉⵏ ⴷ ⵜⵉⵍⴰⵍⵜ ⵏ ⵓⵙⵏⵖⵎⵙ ⴰⴳⵓⵏⵙ ⵏ ⵜⴰⵎⵓⵏⵜ ⵜⴰⴳⵔⴰⵖⵍⴰⵏⵜ ⴳ ⵓⵣⵎⵣ ⵏ ⵜⴰⵙⵙⴰⵙⵜ, ⵜⵎⵎⴳⵕⴰⵥ  ⵜⵏⵙⵙⵉⵅⴼⵜ ⵏ ⵓⴳⵔⴰⵡ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ ⴰⵛⴽⵓ « ⵎⵇⵇⴰⵔ ⵉⵅⴰⵜⵔ ⵡⴰⵟⵟⴰⵏ ⵜⵎⵖⵓⵔ ⵜⴰⵙⵙⴰⵙⵜ  ⵏⵏⴰ ⴷ ⵢⵉⵡⵉ, ⵉⵙⵏⵖⵎⵉⵙⵏ ⵉⵅⴰⵜⴰⵔⵏ ⵓⵔ ⴳⵉⵏ ⵜⵉⵣⵎⵎⴰⵔ ⵏⵏⵙⵏ ⴰⴼⴰⴷ ⴰⴷ ⵙⵙⴽⵏⵏ ⴰⵎⵎⵣⴷⴰⵢ ⵏ ⵉⵏⵓⵕⵥⵎⵏ ⴷ ⵡⴰⴷⴷⴰⴷⵏ ⵉⵏⴼⴳⴰⵏⵏ. ⵉⵥⵕⵉ ⵉⵜⵜⵓⵙⵔⵙ ⵅⴼ ⵜⵎⴰⵜⴰⵔⵜ ⵜⴰⵎⴰⵜⴰⵢⵜ ⵏ ⵓⵏⵢⵓⴷⴷⵓ ⵏ ⵓⴼⵉⵔⵓⵙ ⵎⴰⵛⴰ ⵇⵇⵏⵏ ⴰⵍⵍⵏ ⵅⴼ ⵜⴰⵙⴳⴰ ⵜⴰⴷⴰⵎⵙⴰⵏⵜ ⴷ ⵜⵏⴼⴳⴰⵏⵜ ⵏ ⵓⵎⵎⵣⴷⴰⵢ ⴰⴷ».

ⴳ ⵜⴳⵉⵔⴰ ⵜⵏⵙⵙⵉⵅⴼⵜ ⵏ ⵓⴳⵔⴰⵡ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ ⵜⵙⵙⵉⵜⵎ ⴳ ⵉⵎⴰⵙⵙⵏ ⵏ ⵓⵙⵏⵖⵎⵙ ⵉⴼⵔⵉⵇⵉⵢⵏ ⴰⴷ ⵣⵎⵔⵏ ⴰⴷ ⵙⴷⵓⵙⵏ ⴰⵡⵉⵏ, ⴳ ⵓⵎⴰⴹⴰⵍ ⵏ ⴷⴼⴼⵉⵔ ⴽⵓⴼⵉⴷ, ⵉⵡⵙ ⵉ ⵢⵉⴽⵣ ⵏ ⵓⵎⴰⴹⴰⵍ ⴷ ⵓⵙⵙⴳⵎ ⵏ ⵜⴰⵎⵓⵏⵜ ⵜⴰⵏⴼⴳⴰⵏⵜ ».

ⴰⵙⴳⵔⴰⵡ ⴰⴷ ⵉⵙⵏⵎⴰⵍⴰ ⵜ ⵓⵙⵉⵏⴰⴳ ⴰⵎⴰⴷⵢⵓⵙ, ⵉⵎⵙⵡⵉⵏⴳⵎⵏ ⵉⵎⵖⵔⴰⴱⵉⵢⵏ ⵏⵏⴰ ⵉⵏⵙⵙⵉⵅⴼ ⵎⴰⵙⵙ ⴱⵕⴰⵀⵉⵎ ⴼⴰⵙⵙⵉ ⴼⵉⵀⵔⵉ, ⵜⴰⵙⵓⵜⵍⵜ ⵜⵉⵙⵙ 14 ⵏ ⵓⵙⴳⵔⴰⵡ ⵎⵉⴷⴰⵢⵣ, ⵏⵏⴰ ⵉⵜⵜⵓⵙⵏⵎⴰⵍⴰⵏ ⴷⴼⴼⵉⵔ ⵙⵉⵏ ⵉⵙⴳⴳⵯⴰⵙⵏ ⵏ ⵓⵙⵙⵉⴽⵢ, ⵙ ⵜⵎⵏⵜⵉⵍⵜ ⵏ ⵜⴰⵙⵙⴰⵙⵜ ⵏ ⵡⴰⵟⵟⴰⵏ, ⵉⵜⵜⵓⵕⵛⵎ ⵙ ⵜⵎⴷⵔⴰⵡⵜ ⵏ ⵓⵏⵙⵙⵉⵅⴼ ⵏ ⵜⴳⴷⵓⴷⴰⵏⵜ ⵏ ⵍⵉⴱⵉⵔⵢⴰ ⵎⴰⵙⵙ ⵊⵓⵕⵊ ⵡⵉⵛ, ⵉⴳⴰ ⴰⵏⴱⴳⵉ ⵏ ⵡⴰⴷⴷⵓⵔ. ⵜⵉⵡⵓⵔⵉⵡⵉⵏ ⵏ ⵜⵙⵓⵍⵜ ⴰⴷ ⴽⴽⴰⵏⵜ ⴽⵓⵥ ⵏ ⵡⵓⵙⵙⴰⵏ ⴳ ⵍⵍⴰⵏ ⴽⵉⴳⴰⵏ ⵏ ⵉⵎⵛⴰⵡⴰⵕⵏ ⴷ ⵉⵎⴷⵉⵡⴰⵍ ⴷ ⵜⵎⵢⴰⵖⵜ, ⵙ ⵓⴱⵔⵉⴷ ⵏ ⵓⴳⴰⵔ ⵏ 250 ⵏ ⵉⵎⴰⴷⴰⴼⵏ ⵉⴳⵔⴰⵖⵍⴰⵏⵏ ⵉⵜⵜⵓⵢⴰⵙⵙⵏⵏ ⴰⴼⴰⴷ ⴰⴷ ⵎⵙⴰⵡⴰⵍⵏ ⵅⴼ ⵉⵙⴳⵓⵎⵏ ⵉⴷⵙⵍⴰⵏⵏ ⵉⵊⵉⵢⵓ-ⵉⵙⵔⵜⴰⵏⵏ, ⵉⴷⴰⵎⵙⴰⵏⵏ ⴷ ⵉⵏⴰⵎⵓⵏⵏ ⵏⵏⴰ ⵉⵙⴷⵉⴷⴷⵢⵏ ⴰⵎⴰⴹⴰⵍ.