ⵢⴰⵎⵓ ⵓⴳⵔⴰⵡ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ ⵓⵙⵙⴰⵏ ⵏ 24 ⴷ 25 ⵏⵓⵡⴰⵏⴱⵉⵔ 2022 ⴳ ⵓⵎⵙⴳⵔⴰⵡ  ⴰⵎⴰⵜⴰⵢ ⵏ ⵜⵙⵉⵍⴰ ⵏ ⵉⵎⵙⵏⴰⵎⵏ ⵉⵙⵍⵉⵥⵕⵏ ⵉⴱⵉⵔⵓ-ⵉⵎⵉⵔⵉⴽⴰⵏⵉⵢⵏ (PRAI) ⵏⵏⴰ ⵉⵙⵏⵎⴰⵍⴰ ⵓⴳⵔⴰⵡ ⵏ ⵓⵙⵏⴰⵎ ⵏ ⵉⵎⵢⴰⵡⴰⴹⵏ (CRC) ⵏ ⴽⵓⵍⵓⵎⴱⵉⵢⴰ.

ⵢⴰⵎⵓ ⵓⴳⵔⴰⵡ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ ⴳ ⵓⵎⵙⴳⵔⴰⵡ ⴰⴷ ⴳ ⵉⴳⴰ ⴰⴳⵎⴰⵎ ⵉⵎⵏⵥⵉ, ⵉⵙⵎⴷⵢⴰ ⵜ ⵎⴰⵙⵙ ⴱⵏⵄⵉⵙⵙⴰ ⵄⴰⵙⵍⵓⵏ ⴰⵏⵎⵀⴰⵍ ⴰⵎⴰⵜⴰⵢ ⴷ ⵎⴰⵙⵙ ⴰⵎⵉⵏ ⵄⵣⵣⵉⵎⴰⵏ ⴰⵏⵎⵀⴰⵍ ⵏ ⵜⵣⵓⵏⵉ ⵏ ⵓⵎⵢⴰⵡⴰⵙ ⴰⴳⵔⴰⵖⵍⴰⵏ.

ⵉⵙⴰⵡⵍ ⵎⴰⵙⵙ ⴱⵏⵄⵉⵙⵙⴰ ⵄⵙⵍⵓⵏ ⴷⴰⵜ 12 ⵏ ⵜⵎⵔⵙⴰⵍ ⵜⵉⴳⵎⴰⵎⵉⵏ ⵏ ⵜⵙⵉⵍⴰ, ⵢⴰⴷⴷ ⵅⴼ ⵓⵣⴷⴰⵢ ⵏ ⵓⴳⵔⴰⵡ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ ⴰⴽⴷ ⵜⵙⵉⵍⴰ ⵏ ⵉⵎⵙⵏⴰⵎⵏ ⵉⵙⵍⵉⵥⵕⵏ ⵉⴱⵉⵔⵓ-ⵉⵎⵉⵔⵉⴽⴰⵏⵉⵢⵏ ⴷ ⵜⴰⵢⵔⵉ ⵏⵏⵙ ⵏ ⴰⴷ ⵉⴹⴼⵓⵕ ⵜⴰⵡⵓⵔⵉ, ⵙ ⵉⵎⵥⵍⵉ ⵍⵍⵉⴳ ⵉⴳⴰ ⴰⵏⵙⵙⵉⵅⴼ ⵉⵙⵡⵓⵔⵉⵏ ⵏ ⵓⵥⵟⵟⴰ ⵏ ⵜⵎⵔⵙⴰⵍ ⵜⵉⴼⵔⵉⵇⵉⵏ ⵏ ⵓⵙⵏⴰⵎ ⵏ ⵓⵎⵢⴰⵡⴰⴹ (RIARC), ⴳ ⵓⵙⵏⵎⴰⵍⴰ ⴳⵔ ⵙⵉⵏ ⵉⵥⴹⵡⴰⵏ ⵏⵏⴰ ⵉⵙⵙⵏⵜⵉⵏ ⴳ 2017 ⴷ ⵜⴳⵎⵉ ⵏ ⵉⵙⵏⵉⴼⵉⵍⵏ ⴳⵔ ⵉⴳⵎⴰⵎⵏ ⵏⵏⵙⵏ.

ⵉⵙⵙⴽⵜⵉ ⴷ ⵜⴰⵎⴷⵔⴰⵡⵜ ⵉⵜⵜⵎⵓⵙⵙⵓⵏ ⵏ ⵓⴳⵔⴰⵡ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ ⴳ ⵜⵡⵓⵔⵉⵡⵉⵏ ⵏ ⵉⴳⵔⴰⵡⵏ ⵏ ⵜⵡⵓⵔⵉ « ⴰⵙⴳⵎⵉ ⴳ ⵓⵙⵏⵖⵎⵙ ⴷ ⵓⵏⵖⵎⵉⵙ » ⴷ « ⵜⵉⵡⵍⴰⴼⵉⵏ ⵏ ⵡⴰⵏⴰⵡ ⴷ ⵓⵙⵉⴽⵙⵍ ⵉⵔⴳⴰⵣⵏ/ⵜⵉⵎⵖⴰⵔⵉⵏ », ⵉⵙⴷⴷⵉⴷ ⵎⴰⵙⵙ ⵄⵙⵍⵓⵏ ⵅⴼ ⵜⵅⵉⵜⵔⵜ ⵏ ⵉⵙⵏⵉⴼⵉⵍⵏ ⴷ ⵜⵎⵓⵖⵍⵉⵡⵉⵏ ⵉⵎⵣⴰⵔⴰⵢⵏ ⴳⵔ ⵜⵎⵔⵙⴰⵍ ⵏ ⵓⵙⵏⴰⵎ ⵉⵍⵍⴰⵏ ⴳ ⵜⵎⵏⴰⴹⵉⵏ ⵜⵉⴳⵉⵢⵓⴳⵔⴰⴼⵉⵏ ⵢⴰⴳⴳⵓⴳⵏ ⵎⴰⵛⴰ ⵛⵛⴰⵔⵏⵜ ⴽⵉⴳⴰⵏ ⵏ ⵓⵎⵎⵔⵡⴰⵙ ⵏ ⵓⵎⵏⴰⴹ  ⴷ ⵉⵎⵙⴰⵔⴰⵙⵏ ⵏ ⵓⵙⵏⴰⵎ ⵉⵏⵎⴰⵍⴰⵏ.  ⵉⵙⵙⴽⵏ ⵓⵏⵎⵀⴰⵍ ⴰⵎⴰⵜⴰⵢ ⵏ ⵓⴳⵔⴰⵡ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ ⵜⵉⵅⵉⵜⵔⵜ ⵏ ⵓⵎⵙⴰⵔⵙ ⵏ ⵓⵙⵏⴰⵎ ⵏ ⵜⵙⵉⵍⴰⵡⵉⵏ ⵜⵉⵎⵇⵔⴰⵏⵉⵏ ⵜⵉⵎⵓⵟⵟⵓⵏⵉⵏ ⵏⵏⴰ ⵅⴼ ⵔⴰⴷ ⵜⵜⵉⵏ ⵉⵙⵏⵉⴼⵉⵍⵏ ⵏ ⵉⵎⴰⵍ ⴳⵔ ⵙⵉⵏ ⵉⵥⴹⵡⴰⵏ ⴰⴷ.

ⵉⵡⵏⴰⵏ ⵏ ⵓⵎⵙⴳⵔⴰⵡ ⴰⴷ, ⵢⵉⵡⴹ ⵙ ⵡⵓⴷⵎ ⵓⵏⵚⵉⴱ ⵓⵙⵇⵇⵉⵎ ⴰⵙⵍⵉⵥⵕ ⴰⴽⴰⵟⴰⵍⴰⵏⵉ (CAC) ⵖⵔ ⵜⵏⵙⵙⵉⵅⴼⵜ ⵏ PRAI ⵉ ⵓⵣⵎⵣ 2022-24. ⴷⵉⵖ, ⵜⵉⵎⵔⵙⴰⵍ ⵏ ⵛⵉⵍⵉ (CNTV) ⴷ ⵜⵉⵏ ⴽⵓⵍⵓⵎⴱⵢⴰ (CRTC) ⵉⵡⴹⵏⵜ ⵖⵔ ⵜⵎⵉⵔⵉⵜ ⵏ ⵜⵏⵙⵙⵉⵅⴼⵜ ⵏ ⵓⵥⵟⵟⴰ ⵉ ⵓⵣⵎⵣ ⴰⴷ ⵏⵉⵜ. ⵉⴳⵎⴰⵎⵏ ⴰⴽⴽⵯ ⵏ ⵓⵥⵟⵟⴰ ⵇⴱⵍⵏ ⴰⵙⵇⵇⵉⵎ ⴰⵙⵍⵉⵥⵕ ⵏ ⵜⴳⵔⴰⵡⵜ ⵏ ⴼⴰⵍⴰⵏⵙ (CACV) ⴰⴷ ⵉⴳ ⴰⴳⵎⴰⵎ ⴰⵎⴰⵢⵏⵓ ⵏ ⵓⵥⵟⵟⴰ.

ⵜⵍⵓⵍⴰ ⴷ ⵜⵙⵉⵍⴰ ⵏ ⵉⵎⵙⵏⴰⵎⵏ ⵉⵙⵍⵉⵥⵕⵏ ⵉⴱⵉⵔⵓ-ⵉⵎⵉⵔⵉⴽⴰⵏⵉⵢⵏ, ⴳ 2010, ⵉⴳⴰ ⴷⵉⴳⵙ ⵓⴳⵔⴰⵡ ⴰⵎⴰⵜⵜⴰⵢ ⴰⴳⵎⴰⵎ ⵉⵎⵏⵥⵉ ⵙⴳ 2014, ⵉⴳⴰ ⵢⴰⵏ ⵓⵥⵟⵟⴰ ⵏ ⵓⵙⵏⵉⴼⵍ ⵏ ⵢⵉⵔⵎⵏ ⴷ ⵉⵏⵖⵎⵉⵙⵏ ⴳⵔ ⵉⵎⵙⵏⴰⵎⵏ ⵉⵙⵍⵉⵥⵕⵏ ⵉⵙⵉⵎⴰⵏⵏ ⵏ ⴰⵎⵔⵉⴽⴰ ⵏ ⵡⴰⵎⵎⴰⵙ ⴷ ⵜⵉⵏ ⵓⵥⵥⵍⵎⴹ ⴷ ⵜⵎⵏⴰⴹ ⵉⵔⵡⴰⵙⵏ ⵜⴰⴳⵣⵉⵔⵜ ⵏ ⵚⴱⴰⵏⵢⴰ ⴷ ⵍⴱⵓⵕⵜⵓⵖⴰⵍ.