ⴰⴷⴰⴼ ⴰⵏⵙⵙⵓⵎⵓ ⵏ ⵉⴽⴰⴱⴰⵕⵏ ⵖⵔ ⵉⵎⵣⴳⵉ ⴷ ⵓⵙⵎⴽⵍ ⴰⵙⵏⵖⵎⴰⵙ ⴰⵔⴰⵡⵙⴰⵏ ⵉ ⵓⴼⵔⴰⴳ ⵏ ⵜⵍⴻⵍⵍⵉ ⵏ ⵓⵙⵜⴰⵢ ⵏ ⵉⵎⵙⵜⴰⵢⵏ

ⴳ ⵓⵙⴰⵜⵉ ⵏ ⵜⵙⵎⵉⴳⵍⵜ ⵜⴰⴷⵓⵙⵜⵓⵔⵉⵜ ⵜⴰⵎⴰⵜⴰⵢⵜ ⵉⵍⵍⴰⵏ ⵅⴼ ⵓⴳⵔⴰⵡ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ ⴳ ⵢⵉⴳⵔ ⵏ ⵓⵎⵓⵢⴷ ⵅⴼ ⵓⵣⵔⴰⴽ ⵏ ⵓⵡⵏⵏⵉ ⴰⵎⴰⴳⵓⵜ ⵉ ⵜⵎⵣⴰⵣⵉⵏ ⵏ ⵜⴰⵏⵏⴰⵢⵜ ⴷ ⵓⵙⵡⵉⵏⴳⵎ ⴳ ⵜⵏⵣⵡⴰⵢⵉⵏ ⴷ ⵜⴷⴰⴱⵓⵜⵉⵏ ⵜⵉⵜⵍⴼⴰⵣⵉⵏ, ⵉⵙⵙⵓⴼⵖ ⴷ ⵓⵙⵇⵇⵉⵎ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ ⴳ ⵓⴳⵔⴰⵡ ⵏⵏⵙ ⵉⵜⵜⵓⵙⴽⵔⵏ ⴳ ⵓⵙⴰⴽⵓⴷ ⵏ 02 ⵢⵓⵍⵢⵓⵣ 2021 ⵢⴰⵜ ⵜⵖⵜⴰⵙⵜ ⵉⵣⴷⵉⵏ ⵙ ⵓⵙⵡⵓⴷⴷⵓ ⵏ ⵓⵡⵏⵏⵉ ⴰⵙⵔⵜⴰⵏ ⴰⵎⴰⴳⵓⵜ ⴳ ⵉⵙⵜⴰⵢⵏ ⵓⵣⵔⵉⴼⵏ ⴷ ⵉⵏⵎⵏⴰⴹⵏ ⴷ ⵉⵏⴳⵔⴰⵡⵏ ⵉⵎⴰⵜⴰⵢⵏ ⵏ ⵓⵙⴳⴳⵯⴰⵙ 2021.

ⴰⵡⵜⵜⴰⵙ ⵏ ⵜⵖⵜⴰⵙⵜ ⴰⴷ ⵉⴳⴰ ⵜⴰⵏⴼⵔⵓⵜ ⵏ ⵓⵣⵔⴼ ⵏ ⵓⵏⵎⵓⵔⵉ ⴷ ⵜⵏⵎⵓⵔⵉⵜ,  ⴳ ⵓⵏⵖⵎⵉⵙ ⴷ ⵓⵙⴰⴳⴳ ⵅⴼ ⵜⵎⵣⴰⵣⵉⵏ ⴰⴽⴽⵯ ⵏ ⵓⵡⵏⵏⵉ ⵙ ⵜⵖⴰⵔⴰⵙⵜ ⵏⵏⴰ ⵔⴰⴷ ⴰⵙ ⵢⴰⵡⵙ ⵅⴼ ⵓⵙⵜⴰⵢ ⵉⵍⴻⵍⵍⵉ ⴷ ⵓⵙⵜⴰⵢ ⴰⵏⴼⵔⴰⴽ, ⵙ ⵜⵖⴰⵔⴰⵙⵜ ⵏ ⵓⵙⵙⵓⵊⴷ ⵏ ⵡⴰⴷⴰⴼ ⴰⵏⵙⵙⵓⵎⵓ ⵉ ⵉⴽⴰⴱⴰⵕⵏ ⵉⵙⵔⵜⴰⵏⵏ ⵢⴰⵎⵓⵏ ⴳ ⵉⵙⵜⴰⵢⵏ ⵖⵔ ⵉⵖⴰⵡⴰⵙⵏ ⵉⵏⵣⵡⴰⵢⵏ ⴷ ⵉⵜⵍⴼⴰⵣⵏ ⴰⴼⴰⴷ ⴰⴷ ⵉⵏⵉⵏ ⵜⴰⵏⵏⴰⵢⵉⵏ ⵏⵏⵙⵏ ⵙⵔⵙⵏ ⵜⵉⵥⵕⵉⵡⵉⵏ ⵏⵏⵙⵏ, ⵙ ⵓⵙⵖⵏ ⵙ ⵓⵎⵏⵣⴰⵢ ⵏ ⵜⵍⴻⵍⵍⵉ ⵏ ⵜⵉⵔⵔⴰ ⵉ ⵉⵎⴷⵔⴰⵡⵏ ⵏ ⵓⵎⵢⴰⵡⴰⴹ ⴰⵙⵍⵉⵥⵕ ⴷ ⵜⵏⵉⵎⴰⵏⵉⵜ ⵏⵏⵙⵏ ⴳ ⵓⵙⵙⵓⵊⴷ ⵏ ⵉⵖⴰⵡⴰⵙⵏ ⵏⵏⵙⵏ, ⴷ ⵓⵢⵏⵏⴰ ⵉⴹⴼⴰⵕⵏ ⴰⵢⴰⴷ ⴳ ⵜⵎⴰⵙⴰⵢⵉⵏ ⵜⵓⵍⴳⵉⵏⵉⵏ ⴷ ⵜⵣⵣⵓⵍⴰⵏⵉⵏ.

ⵍⵍⵉⴳ ⵎⵢⴰⴽⵓⴷⵏ ⵉⵙⵜⴰⵢⵏ ⵉⵏⵎⵏⴰⴹⵏ ⴷ ⵉⵙⵜⴰⵢⵏ ⵓⵣⵔⵉⴼⵏ ⴳ ⵉⵙⵜⴰⵢⵏ ⵏ 2021, ⵜⵙⵙⵖⵍⴼ ⵜⵖⵜⴰⵙⵜ ⵏ ⵓⵙⵇⵇⵉⵎ ⴰⵎⴰⵜⵜⴰⵢ ⵙ ⵜⵏⴼⵔⵓⵜ ⵏ ⵜⵉⵔⵎⵜ ⵉⴳⴳⵓⵜⵏ ⵉ ⵜⵎⵙⴰⵔⵉⵏ ⴷ ⵉⵎⵙⴰⵔⴰⵙⵏ ⵉⵣⴷⵉⵏ ⴷ ⵜⵖⴰⵡⵙⴰ ⵜⴰⵏⵎⵏⴰⴹⵜ ⴷ ⵜⴷⵖⵔⴰⵏⵜ ⴰⴳⵓⵏⵙ ⵏ ⵓⵎⴷⴰⴽⴰⵕ ⴰⴳⴷⵓⴷⴰⵏ ⵉⵣⴷⵉⵏ ⴷ ⵉⵙⵜⴰⵢⵏ ⴳ ⵉⵖⴰⵡⴰⵙⵏ ⵉⵏⵣⵡⴰⵢⵏ ⴷ ⵉⵜⵍⴼⴰⵣⵏ. ⴰⵔ ⵉⵙⵙⵓⵜⵓⵔ ⴳ ⵉⵎⴷⵔⴰⵡⵏ ⵏ ⵓⵎⵢⴰⵡⴰⴹ ⴰⵙⵍⵉⵥⵕ ⴰⴷ ⵎⵓⵏⵏ ⴷ ⵉⴽⴰⴱⴰⵕⵏ ⵉⵙⵔⵜⴰⵏⵏ ⴳ ⵢⵉⵡⴹ ⵖⵔ ⵓⵙⵉⴽⵙⵍ ⴳⵔ ⵜⵎⵖⴰⵔⵉⵏ ⴷ ⵉⵔⴳⴰⵣⵏ ⵅⴼ ⵓⵙⵡⵉⵔ ⵏ ⵡⵉⵏⵏⴰ ⵜⵏ ⵉⵜⵜⵓⵙⵎⴷⵢⴰⵏ ⴳ ⵉⵖⴰⵡⴰⵙⵏ, ⴷⵉⵖ, ⴰⴷ ⵙⴱⵖⵙⵏ ⵜⵉⵎⵖⴰⵔⵉⵏ ⴳ ⵓⵙⵔⵔⵓⵙ ⴷ ⵓⵎⵛⴰⵡⴰⵕ ⵅⴼ ⵜⵎⵙⴰⵔⵉⵏ ⴰⴽⴽⵯ ⵏ ⵜⵖⴰⵡⵙⴰ ⵜⴰⴳⴷⵓⴷⴰⵏⵜ ⵉⵣⴷⵉⵏ ⴷ ⵉⵙⵜⴰⵢⵏ ⵓⵔ ⵉⴷ ⵖⴰⵙ ⴳ ⵉⵖⴰⵡⴰⵙⵏ ⵏⵏⴰ ⵉⵙⴰⵡⴰⵍⵏ ⵅⴼ ⵜⵖⴰⵡⵙⵉⵡⵉⵏ ⵏ ⵉⵣⵔⴼⴰⵏ ⵏ ⵜⵎⵖⴰⵔⵉⵏ. ⵙ ⵓⵙⴷⵓⵙ ⵏ ⵢⵉⴳⵉ ⴰⴷⵉⵎⵓⵇⵕⴰⵟⵉ ⴰⵎⴷⵔⴰⵡ ⴷ ⵓⵙⴷⵓⵙ ⵏ ⵓⵎⵏⵣⴰⵢ ⵏ ⵜⵉⴳⵓⵜ, ⴷⴰ ⵜⵙⵙⵓⵜⵓⵔ ⵜⵖⵜⴰⵙⵜ ⴳ ⵜⵏⵣⵡⴰⵢⵉⵏ ⴷ ⵜⴷⴰⴱⵓⵜⵉⵏ ⵜⵉⵜⵍⴼⴰⵣⵉⵏ  ⴰⴷ ⵙⵙⵉⴷⴼⵏⵜ ⵜⵉⵎⵙⴰⵔⵉⵏ ⵏ ⵉⵄⵔⵔⵉⵎⵏ ⴷ ⵉⵎⵖⵔⴰⴱⵉⵢⵏ ⵉⵣⴷⵖⵏ ⴱⵕⵕⴰ ⴷ ⵉⴼⴳⴰⵏⵏ ⴰⵢⵜ ⵜⵉⵎⵎⵓⵄⴹⵕⵜ ⴳⵔ ⵉⵖⴰⵡⴰⵙⵏ ⵏ ⵓⵎⵛⴰⵡⴰⵕ ⴰⴳⴷⵓⴷⴰⵏ.

ⴷ ⵙ ⵜⵏⴼⵔⵓⵜ ⵏ ⵜⵣⴷⴳⵉ ⴷ ⵜⵔⴰⵡⵙⵏⵜ ⵏ ⵉⵖⴰⵡⴰⵙⵏ ⵉⵏⵣⵡⴰⵢⵏ ⴷ ⵉⵜⵍⴼⴰⵣⵏ ⵉⵣⴷⵉⵏ ⴷ ⵉⵙⵜⴰⵢⵏ, ⴷⴰ ⵜⵙⵙⵓⵜⵓⵔ ⵜⵖⵜⴰⵙⵜ ⵙ ⵓⵙⵖⵏ ⵙ ⵜⵖⴰⵔⵉⵡⵉⵏ ⵜⵉⵣⵣⵓⵍⴰⵏⵉⵏ ⵙ ⵉⵎⵥⵍⵉ ⴰⵙⵏⵓⵃⵢⵓ ⴳⵔ ⵓⵏⵖⵎⵉⵙ ⴷ ⵉⵅⴼⴰⵡⴰⵍ, ⵡⴰⵔ ⴰⴱⴹⴰⵡ ⴳⵔ ⵜⵙⴳⵓⵔⵉⵏ ⴷ ⵉⵅⴼⴰⵡⴰⵍⵏ ⵏ ⵉⵎⴰⵣⵣⴰⵍⵏ ⵉⵙⵔⵜⴰⵏⵏ ⴷ ⵡⵉⵢⴰⴹ ⵏ ⵉⵏⴽⵛⴰⵎⵏ ⵅⴼ ⵓⵎⵏⴰⴹ ⵏⵏⵙⵏⵜ, ⵡⴰⵔ ⴰⵙⵡⵓⵔⵉ ⵏ ⵉⵏⵖⵎⴰⵙⵏ ⴷ ⵉⵎⵙⵎⵓⵙⵙⵏ ⵏ ⵉⵖⴰⵡⴰⵙⵏ ⵉ ⵉⴷⴳⴳⵏ ⵏⵏⵙⵏ ⴳ ⵉⴽⵛⵛⵓⵎⵏ ⵏⵏⵙⵏ, ⴰⴼⴰⴷ ⴰⴷ ⵉⵏⵉⵏ ⵉⵙⵡⵉⵏⴳⵉⵎⵏ ⵉⴽⴽⴰⵏ ⵜⴰⵙⴳⴰ ⵉ ⴽⵔⴰ ⵏⵖ ⴰⵙⵎⵏⵉⴷ ⵏ ⵓⴼⴰⵙⵔ ⵏ ⵜⴽⵔⴽⴰⵙ, ⵡⴰⵔ ⴰⵙⵙⴽⵏ ⵏⵖ ⴰⴽⵛⵛⵓⵎ ⵏ ⵉⵏⵖⵎⴰⵙⵏ ⴷ ⵉⵎⵙⵎⵓⵙⵙⵏ ⴷ ⵉⵎⵙⵎⵏⵉⴷⵏ ⵏ ⵉⵖⴰⵡⴰⵙⵏ ⴰⴷⴷⴰⵢ ⴳⴰⵏ ⵉⵎⵏⴽⴰⴷⵏ ⴳ ⵉⵙⵜⴰⵢⵏ, ⵡⴰⵔ ⴰⵙⵏⵓⴱⴳ ⵏ ⵉⴼⴳⴰⵏⵏ ⵉⴳⴷⵓⴷⴰⵏⵏ ⵖⵓⵔ ⵉⵍⵍⴰ ⵓⵍⵜⴰⵖ ⵉ ⴽⵔⴰ ⵏ ⵓⴽⴰⴱⴰⵕ ⴰⵙⵔⵜⴰⵏ ⴳ ⵉⵖⴰⵡⴰⵙⵏ ⵓⵔ ⵉⵣⴷⵉⵏ ⴷ ⵉⵙⵜⴰⵢⵏ, ⴰⵎ ⵉⵖⴰⵡⴰⵙⵏ ⵏ ⵜⵓⵏⵏⵓⵏⵜ ⵏⵖ ⵓⵔⴰⵔ ⵏⵖ ⵡⵉⵏ ⵜⵥⵓⵕⵉ ⴷ ⵡⵉⵢⴰⴹ.

ⵉⵍⵍⴰ ⴷⵉⵖ ⴳ ⵜⵖⵜⴰⵙⵜ ⴽⵉⴳⴰⵏ ⵏ ⵉⵣⵣⵉⴳⵉⵣⵏ ⵏ ⵓⵙⵡⵓⵔⵉ ⴰⵖⵎⵙⴰⵏ ⴷ ⵓⵎⵢⴰⵡⴰⴹ, ⴰⵎⵎ ⵜⴰⵖⵓⵔⵉ ⵉ ⵜⵏⵣⵡⴰⵢⵉⵏ ⴷ ⵜⴷⴰⴱⵓⵜⵉⵏ ⵜⵉⵜⵍⴼⴰⵣⵉⵏ ⵖⵔ ⵡⵓⵎⵓ ⴳ ⵓⵙⴰⴹⴼ ⴷ ⵓⵙⴼⵔⵓⵔⵉ ⵏ ⵉⵏⵖⵎⵉⵙⵏ ⵏ ⵜⴽⵔⴽⴰⵙ ⵏⵏⴰ ⴷⴰ ⵉⵜⵜⵓⵢⵉⵏⵉⵏ ⴳ ⵓⵙⴰⵢⵔⴰⵔ ⴰⵎⵓⵟⵟⵓⵏ ⴷ ⵜⵏⵏⴰ ⵉⵖⵉⵢⵏ ⴰⴷ ⵉⴳ ⵜⴰⵙⵙⴰⵙⵜ ⵅⴼ ⵓⵣⵣⵉⴳⵣ ⵉⵀⵢⵢⴰⵏ ⵏ ⵉⵙⵜⴰⵢⵏ, ⴰⵔ ⴷⵉⴳⵙ ⵜⵙⵙⵓⵜⵓⵔ ⵜⵖⵜⴰⵙⵜ ⴰⵣⵔⴰⴽ ⵏ ⵉⵙⵖⵍⴰⴼ ⵉⵜⵜⵓⴱⴷⵔⵏ ⴳ ⵉⵍⵓⴳⵏⵏ ⵏⵏⵙ ⴳ ⵜⵓⵎⴰⵢⵉⵏ ⵏⵏⴰ ⴷⴰ ⵉⵜⵜⵓⵥⵔⴰⴳⵏ ⴳ ⵜⴰⴷⴷⵓⴽⴽⴰⵏⵉⵏ ⵜⵉⵎⵓⵟⵟⵓⵏⵉⵏ ⵏⵏⵙ.