ⵜⴰⵖⵜⴰⵙⵜ ⵏ ⵓⵙⵇⵇⵉⵎ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ ⵓⵟⵟⵓⵏ 50-26
ⴳ ⵓⵙⴰⴽⵓⴷ ⵏ 16 ⵢⵓⵏⵢⵓ 2026 (30 ⵃⵉⵊⵊⴰ 1447)
ⵉⵣⴷⵉⵏ ⵙ ⵓⴹⵎⴰⵏ ⵏ ⵜⵎⴰⴳⵓⵜ ⵏ ⵓⵡⵏⵏⵉ ⴰⵙⵔⵜⴰⵏ
ⴰⴳⵓⵏⵙ ⵏ ⵜⵏⴰⴼⵓⵜⵉⵏ ⵏ ⵓⵎⵢⴰⵡⴰⴹ ⴰⵙⵍⵉⵥⵕ
ⴳ ⵓⵣⵎⵣ ⵏ ⵉⵙⵜⴰⵢⵏ ⵓⵣⵔⵉⴼⵏ ⵉⵎⴰⵜⴰⵢⵏ ⵏ ⵓⵙⴳⴳⵯⴰⵙ 2026

ⵙⵇⵇⵉⵎ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ,
ⵙ ⵓⵙⵏⴰⵍ ⵏ ⵜⵎⵏⴹⴰⵡⵜ, ⵙ ⵉⵎⵥⵍⵉ ⴳ ⵜⵣⵡⴰⵔⵓⵜ ⵏⵏⵙ ⴷ ⵉⵎⵏⵏⵉⵜⵏ ⵏⵏⵙ 28 ⴷ165;

ⵙ ⵓⵙⵏⴰⵍ ⵏ ⵓⵙⵍⴳⵏ ⵓⵟⵟⵓⵏ 15-11 ⵉⵣⴷⵉⵏ ⵙ ⵓⵙⵏⵎⴰⵍⴰ ⵏ ⵓⴳⵔⴰⵡ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ, ⴷ ⵉⴼⴼⵖⵏ ⴰⵙⵙ ⵏ 21 ⴷⵓ ⵍⵇⵉⵄⴷⴰ 1437 (25 ⵖⵓⵛⵜ 2016), ⵙ ⵓⵢⵏⵏⴰ ⴷⵉⴳⵙ ⵉⵜⵜⵓⵙⵏⴼⵍⵏ ⴷ ⵓⵢⵏⵏⴰ ⴷⵉⴳⵙ ⵉⵜⵜⵓⵔⵏⴰⵏ, ⵙ ⵉⵎⵥⵍⵉ ⵉⵎⵏⵏⵉ ⵡⵉⵙ 4 (ⵉⴳⵣⵣⵓⵎⵏ 6 ⴷ 7) ⴷ ⵉⵎⵏⵏⵉ ⵡⵉⵙ 28;

ⵙ ⵓⵙⵏⴰⵍ ⵏ ⵓⵙⵍⴳⵏ ⵓⵟⵟⵓⵏ 77.03 ⵉⵣⴷⵉⵏ ⵙ ⵓⵎⵢⴰⵡⴰⴹ ⴰⵙⵍⵉⵥⵕ, ⴷ ⵉⴼⴼⵖⵏ ⴰⵙⵙ ⵏ 25 ⴷⵓ ⵍⵇⵉⵄⴷⴰ 1425 (7 ⵉⵏⵏⴰⵢⵔ 2005) ⵙ ⵓⵢⵏⵏⴰ ⴷⵉⴳⵙ ⵉⵜⵜⵓⵙⵏⴼⵍⵏ ⴷ ⵓⵢⵏⵏⴰ ⴷⵉⴳⵙ ⵉⵜⵜⵓⵔⵏⴰⵏ, ⵙ ⵉⵎⵥⵍⵉ ⵜⴰⵣⵡⴰⵔⵓⵜ ⵏⵏⵙ ⴷ ⵉⵎⵏⵏⵉⵜⵏ 3, 4, 8, 9 ⴷ 48;

ⵙ ⵓⵙⵏⴰⵍ ⵏ ⵓⵙⵍⴳⵏ ⴰⵏⴳⵎⴰⵎ ⵓⵟⵜⵓⵏ 27.11 ⵉⵣⴷⵉⵏ ⵙ ⵓⵙⵇⵇⵉⵎ ⵏ ⵉⵎⵓⵔⴰ, ⴷ ⵉⴼⴼⵖⵏ ⴰⵙⵙ ⵏ 16 ⴷⵓ ⵍⵇⵉⵄⴷⴰ 1432 (14 ⴽⵜⵓⴱⵕ 2011), ⵙ ⵓⵢⵏⵏⴰ ⴷⵉⴳⵙ ⵉⵜⵜⵓⵙⵏⴼⵍⵏ ⴷ ⵓⵢⵏⵏⴰ ⴷⵉⴳⵙ ⵉⵜⵜⵓⵔⵏⴰⵏ, ⵙ ⵉⵎⵥⵍⵉ ⵉⵎⵏⵏⵉ ⴰⵎⵣⵡⴰⵔⵓ, ⵡⵉⵙ 23, 36 ⴷ 38;

ⵙ ⵓⵙⵏⴰⵍ ⵏ ⵓⵙⵍⴳⵏ ⴰⵏⴳⵎⴰⵎ ⵓⵟⵟⵓⵏ 29.11 ⵉⵣⴷⵉⵏⵙ ⵉⴽⴰⴱⴰⵕⵏ ⵉⵙⵔⵜⴰⵏⵏ, ⴷ ⵉⴼⴼⵖⵏ ⴰⵙⵙ ⵏ 24 ⴷⵓ ⵍⵇⵉⵄⴷⴰ 1432 (22 ⴽⵜⵓⴱⵕ 2011), ⵙ ⵓⵢⵏⵏⴰ ⴷⵉⴳⵙ ⵉⵜⵜⵓⵙⵏⴼⵍⵏ ⴷ ⵓⵢⵏⵏⴰ ⴷⵉⴳⵙ ⵉⵜⵜⵓⵔⵏⴰⵏ, ⵙ ⵉⵎⵥⵍⵉ ⵉⵎⵏⵏⵉⵜⵏ 2, 13, 15, 26, 55.1 ⴷ 55.2;

ⵙ ⵓⵙⵏⴰⵍ ⵏ ⵓⵙⵍⴳⵏ 57.11 ⵉⵣⴷⵉⵏ ⵙ ⵜⵍⴳⴰⵎⵉⵏ ⵜⵉⵎⵙⵜⴰⵢⵉⵏ ⵜⵉⵎⴰⵜⴰⵢⵉⵏ, ⵉⵣⴷⵉⵏ ⵙ ⵉⵙⵖⴰⵍⵏ ⵏ ⵜⴰⵏⵏⴰⵢⵜ ⴷ ⵓⵙⵡⵓⵔⵉ ⵏ ⵉⵎⴰⵙⵙⵏ ⵏ ⵓⵎⵢⴰⵡⴰⴹ ⴰⵙⵍⵉⵥⵕ ⴰⴳⴷⵓⴷⴰⵏ ⴷ ⵉⵎⵣⴰⵣⵣⴰⵍⵏ ⵉⵎⵙⵜⴰⵢⵏ ⴷ ⵡⵉⵏ ⵉⵙⵖⴰⵍⵏ ⵏ ⵜⴰⵏⵏⴰⵢⵜ, ⴷ ⵉⴼⴼⵖⵏ ⴰⵙⵙ ⵏ 30 ⴷⵓ ⵍⵇⵉⵄⴷⴰ 1432 (28 ⴽⵜⵓⴱⵕ 2011), ⵙ ⵓⵢⵏⵏⴰ ⴷⵉⴳⵙ ⵉⵜⵜⵓⵙⵏⴼⵍⵏ ⴷ ⵓⵢⵏⵏⴰ ⴷⵉⴳⵙ ⵉⵜⵜⵓⵔⵏⴰⵏ, ⵙ ⵉⵎⵥⵍⵉ ⵉⵎⵏⵏⵉⵜⵏ 115, 116, 117, ⴷ 118;

ⵙ ⵓⵙⵏⴰⵍ ⵏ ⵓⵙⵍⴳⵏ 30.11 ⵉⵙⵔⵙⵏ ⵜⵉⴼⴰⴷⵉⵡⵉⵏ ⴷ ⵜⵖⴰⵔⴰⵙⵉⵏ ⵏ ⵓⵙⴰⴹⴰⴼ ⴰⵙⵉⵎⴰⵏ ⴰⵔⴰⵡⵙⴰⵏ ⵏ ⵉⵙⵜⴰⵢⵏ, ⴷ ⵉⴼⴼⵖⵏ ⴰⵙⵙ ⵏ 1 ⴷⵓ ⵍⵇⵉⵄⴷⴰ 1432 (28 ⴽⵜⵓⴱⵕ 2011), ⵙ ⵉⵎⵥⵍⵉ ⵉⵎⵏⵏⵉⵜⵏ 1, 11, 16 ⴷ 17;

ⵙ ⵓⵙⵏⴰⵍ ⵏ ⵓⵎⵕⵚⵓⵎ ⵓⵟⵟⵓⵏ 2.11.610 ⴷ ⵉⴼⴼⵖⵏ ⴰⵙⵙ ⵏ 7 ⴷⵓ ⵍⵃⵉⵊⵊⴰ 1432 (4 ⵏⵓⵡⴰⵏⴱⵉⵔ 2011) ⵉⵣⴷⵉⵏ ⵙ ⵓⵙⵡⵓⵔⵉ ⵏ ⵉⵎⴰⵙⵙⵏ ⵏ ⵓⵎⵢⴰⵡⴰⴹ ⴰⵙⵍⵉⵥⵕ ⴰⴳⴷⵓⴷⴰⵏ ⴷ ⵉⵎⵣⴰⵣⵣⴰⵍⵏ ⵉⵎⵙⵜⴰⵢⵏ;

ⵙ ⵓⵙⵏⴰⵍ ⵏ ⵓⵎⵕⵚⵓⵎ ⵓⵟⵜⵓⵏ 2.26.190 ⴷ ⵉⴼⴼⵖⵏ ⴰⵙⵙ ⵏ 22 ⴳ ⵕⵎⴹⴰⵏ 1447 (12 ⵎⴰⵕⵚ) ⵉⵖⵜⵙⵏ ⴰⵙⴰⴽⵓⴷ ⵏ ⵓⵙⵜⴰⵢ ⵏ ⵉⴳⵎⴰⵎⵏ ⵏ ⵓⵙⵇⵇⵉⵎ ⵏ ⵓⵎⵓⵔⴰ;

ⵙ ⵓⵙⵏⴰⵍ ⵏ ⵜⵖⵜⴰⵙⵜ ⵏ ⵓⵙⵇⵇⵉⵎ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ ⵓⵟⵟⵓⵏ 18-20 ⵙ ⵓⵙⴰⴽⵓⴷ ⵏ 22 ⵕⵎⴹⴰⵏ 1439 (7 ⵢⵓⵏⵢⵓ 2018) ⵉⵣⴷⵉⵏ ⵙ ⵓⴹⵎⴰⵏ ⵏ ⵓⵡⵏⵏⵉ ⴰⵎⴰⴳⵓⵜ ⵏ ⵜⵎⵣⴰⵣⵉⵏ ⵏ ⵜⴰⵏⵏⴰⵢⵜ ⴷ ⵓⵙⵡⵉⵏⴳⵎ ⴰⴳⵓⵏⵙ ⵏ ⵜⵏⴰⴼⵓⵜⵉⵏ ⵏ ⵓⵎⵢⴰⵡⴰⴹ ⴰⵙⵍⵉⵥⵕ ⴱⵕⵔⴰ ⵏ ⵓⵣⵎⵣ ⵏ ⵉⵙⵜⴰⵢⵏ ⵉⵎⴰⵜⴰⵢⵏ ⴷ ⵉⵙⵖⴰⵍⵏ ⵏ ⵜⴰⵏⵏⴰⵢⵜ;

ⴷⴼⴼⵉⵔ ⴰⵎⴷⵉⵡⵍ:

ⵙ ⵓⵙⵏⴰⵍ ⵏ ⵜⵎⵏⴹⴰⵡⵜ ⵏ ⵜⴳⵍⴷⵉⵜ ⵉⴹⵎⵏⵏ ⵙ ⵡⴰⵜⵉⴳⵏ ⵏⵏⵙ, ⵉⵎⵏⵣⴰⵢ ⴷ ⵉⵍⵓⴳⵏⵏ ⵏⵏⴰ ⴷ ⵜⵙⵙⵓⴼⵖ ⴷ ⵜⵎⵔⵙⴰⵍ ⵏⵏⴰ ⵜⵚⴽⴰ, ⴽⵕⴰⴹⵜ ⵜⵔⵙⴰⵍ ⵜⵉⴷⵙⵍⴰⵏⵉⵏ ⵉ ⵓⵙⴷⵓⵙ ⵏ ⵜⴷⵉⵎⵓⵇⵕⴰⵟⵉⵜ: ⴰⵙⵎⴷⵢⴰ, ⴰⵎⵢⴰⵙ ⴷ ⵜⴰⴷⵔⴰⵡⵜ. ⵜⴹⵎⵏ ⴷⵉⵖ ⵉⵙⵜⴰⵢⵏ ⵉⵍⴻⵍⵍⵉⵢⵏ ⵉⵎⴰⴼⴰⵡⵏ ⵉⴳⴰⵏ ⵜⵉⵔⵙⴰⵍ ⵏ ⵜⵣⵔⴼⵜ ⵏ ⵓⵙⵎⴷⵢⴰ ⴰⴷⵉⵎⵓⵇⵕⴰⵟⵉ;

ⵙ ⵓⵙⵏⴰⵍ ⵏ ⵜⵉⵍⴰⵍⵜ ⵜⴰⴷⵙⵍⴰⵏⵜ ⵏ ⵜⵏⴰⴼⵓⵜⵉⵏ ⵜⵉⵏⵣⵡⴰⵢⵉⵏ ⴷ ⵜⴻⵜⵍⴼⴰⵣⵉⵏ ⴰⴳⵓⵏⵙ ⵏ ⵜⴳⵎⵉ ⵏ ⵜⴷⵍⵙⴰ ⵜⴰⴷⵉⵎⵓⵇⵕⴰⵟⵉⵜ, ⵏ ⵜⴳⵎⵉ ⵏ ⵜⵡⵏⴳⵉⵎⵜ ⵜⴰⵙⵔⵜⴰⵏⵜ ⴷ ⵓⵙⴷⵓⵙ ⵏ ⵜⵎⴷⵔⴰⵡⵜ ⵜⴰⵏⵎⵓⵔⵉⵜ, ⴷ ⵡⵓⵎⵓ ⵏⵏⵙⵏ ⴳ ⵓⵙⵎⵓⵙⵙ ⵏ ⵉⵏⵎⵓⵔⵉⵏ ⴳ ⵜⴷⵔⴰⵡⵜ ⴳ ⵉⵙⵜⴰⵢⵏ ⴰⴼⴰⴷ ⵙⵜⵉⵏ ⵉⴳⵏⵙⴰⵙ ⵏⵏⵙⵏ ⵏⵏⴰ ⵔⴰⴷ ⵢⴰⵙⵉ ⴰⴳⴳⵯⴰ ⵏ ⵓⵙⵡⵓⴷⴷⵓ ⵏ ⵜⵖⴰⵡⵙⵉⵡⵉⵏ ⵜⵉⴳⴷⵓⴷⴰⵏⵉⵏ;

ⵙ ⵓⵙⵏⴰⵍ ⵏ ⵜⵙⵎⵉⴳⵍⵜ ⵜⴰⴷⵓⵙⵜⵓⵔⵉⵜ ⵏ ⵓⴳⵔⴰⵡ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ, ⵉⴳⴰⵏ ⵜⵉⵏ ⵜⵉⴹⴰⴼ ⵅⴼ ⵓⵣⵔⴰⴽ ⵏ ⵓⵡⵏⵏⵉ ⴰⵎⴰⴳⵓⵜ ⵏ ⵉⵎⵣⴰⵣⵏ ⵏ ⵓⵡⵏⵏⵉ ⴷ ⵓⵙⵡⵉⵏⴳⵎ ⴷ ⵓⵣⵔⴼ ⴳ ⵓⵏⵖⵎⵉⵙ ⴰⴳⵓⵏⵙ ⵏ ⵢⵉⴳⵔ ⴰⵙⵍⵉⵥⵕ, ⴷ ⵢⵉⵔⵎ ⵏⵏⴰ ⵉⵙⵎⵓⵜⵜⵔ ⴳ ⵓⵙⵡⵓⴷⴷⵓ ⵏ ⵜⵎⴰⴳⵓⵜ ⵜⴰⵙⵔⵜⴰⵏⵜ ⴰⴳⵓⵏⵙ ⵏ ⵜⵏⴰⴼⵓⵜⵉⵏ ⵜⵉⵏⵣⵡⴰⵢⵉⵏ ⴷ ⵜⴻⵜⵍⴼⴰⵣⵉⵏ, ⴳ ⵓⵣⵎⵣ ⵏ ⵉⵙⵜⴰⵢⵏ ⵏⵖ ⴱⵕⵕⴰ ⵏ ⵓⵣⵎⵣ ⴰⴷ;

ⵙ ⵓⵙⵏⴰⵍ ⵏ ⵜⵉⵔⴰⵜ ⵏ ⵓⵙⵇⵇⵉⵎ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ, ⴳ ⵓⵙⴷⵓⵙ ⵏ ⵓⵙⴰⵜⵉ ⵏ ⵉⵖⴰⵡⴰⵙⵏ ⵉⵣⴷⵉⵏ ⵙ ⵉⵙⵜⴰⵢⵏ ⴰⴳⵓⵏⵙ ⵏ ⵜⵏⴰⴼⵓⵜⵉⵏ ⵏ ⵓⵎⵢⴰⵡⴰⴹ ⴰⵙⵍⵉⵥⵕ ⵙ ⵢⴰⵜ ⵜⵖⵜⴰⵙⵜ ⵉⵙⵎⵓⵏⵏ ⴽⵉⴳⴰⵏ ⵏ ⵉⵍⵓⴳⵏⵏ ⵉⵡⴰⵜⵙⵏ ⴰⴹⵎⴰⵏ ⵏ ⵓⵙⵡⵓⵔⵉ ⵏ ⵉⵎⵏⵣⴰⵢ ⵓⵣⵔⵉⴼⵏ ⵉⵣⵣⵉⴳⵉⵣⵏ ⴷ ⵉⵍⵓⴳⵏⵏ ⵏ ⵜⵡⵓⵔⵉ ⵜⴰⵣⵣⵓⵍⴰⵏⵜ, ⴰⵢⴰ ⴰⴽⴽⵯ ⴳ ⵓⵣⵔⴰⴽ ⵏ ⵉⵎⵏⵣⴰⵢ ⵏ ⵜⵍⴻⵍⵍⵉ ⵏ ⵓⵎⵢⴰⵡⴰⴹ ⴰⵙⵍⵉⵥⵕ, ⴷ ⵜⵙⵉⵎⴰⵏⵜ ⴷ ⵜⵎⵙⵜⴳⴳⴰⵔⵜ ⵏ ⵜⵉⵔⵔⴰ ⵖⵓⵔ ⵉⵎⵡⵓⵔⵉⵢⵏ;

ⵢⵓⵙⵉ ⵓⵙⵇⵇⵉⵎ ⵜⵉⵖⵜⴰⵙ ⴰⴷ:

ⵉⵎⵉⵔ ⴰⵎⵣⵡⴰⵔⵓ: ⵉⵙⵏⵎⴰⵍ ⴷ ⵉⵎⵏⵣⴰⵢ ⵉⵎⴰⵜⴰⵢⵏ
ⵎⵣⵡⴰⵔⵓ: ⵉⵙⵏⵎⴰⵍ

ⴰⵎⵏⵏⵉ ⴰⵎⵣⵡⴰⵔⵓ : ⵉ ⵓⵙⵡⵓⵔⵉ ⵏ ⵉⵍⵓⴳⵏⵏ ⵏ ⵜⵖⵜⴰⵙⵜ ⴰⴷ, ⵏⵔⴰ ⴰⴷ ⵏⵉⵏⵉ: 
ⵜⵉⵏⴰⴼⵓⵜⵉⵏ ⵏ ⵓⵎⵢⴰⵡⴰⴹ ⴰⵙⵍⵉⵥⵕ: ⵜⵉⵏⴰⴼⵓⵜⵉⵏ ⵏⵏⴰ ⵙⵙⵥⵔⴳⵏⵜ ⵜⵎⵙⵙⵓⵔⵉⵏ ⵜⵉⵏⴰⵎⵓⵔⵉⵏ ⵏ ⵓⵙⵍⵉⵥⵕ ⴰⴳⴷⵓⴷⴰⵏ ⴷ ⵉⵎⵡⵓⵔⴰ ⵓⵙⵍⵉⴳⵏ ⵏ ⵓⵎⵢⴰⵡⴰⴹ ⴰⵙⵍⵉⵥⵕ, ⵙ ⵓⵢⵏⵏⴰ ⵉⵏⵎⵏ ⴷ ⵉⵙⵏⵎⴰⵍ ⵉⵜⵜⵓⴱⴷⵔⵏ ⴳ ⵓⵙⵍⴳⵏ ⵓⵟⵟⵓⵏ 77.03, ⵙ ⵓⵢⵏⵏⴰ ⴷⵉⴳⵙ ⵉⵜⵜⵓⵙⵏⴼⵍⵏ ⴷ ⵓⵢⵏⵏⴰ ⴷⵉⴳⵙ ⵉⵜⵜⵓⵔⵏⴰⵏ;

ⵉⵙⵜⴰⵢⵏ: ⵉⵙⵜⴰⵢⵏ ⵓⵣⵔⵉⴼⵏ ⵉⵎⴰⵜⴰⵢⵏ ⵏⵏⴰ ⵔⴰⴷ ⵉⵜⵜⵓⵙⴽⵔ ⴰⵙⵙ ⵏ 23 ⵛⵜⴰⵎⴱⵉⵔ 2026 ⵉⵣⴷⵉⵏ ⵙ ⵉⵙⵜⴰⵢⵏ ⵏ ⵉⴳⵎⴰⵎⵏ ⵏ ⵓⵙⵇⵇⵉⵎ ⵏ ⵉⵎⵓⵔⴰ;

ⴰⵣⵎⵣ ⵏ ⵉⵙⵜⴰⵢⵏ: ⴰⵣⵎⵣ ⴰⵎⴰⵜⴰⵢ ⵉⴳⴰⵏ 39 ⵏ ⵡⵓⵙⵙⴰⵏ, ⵙⴳ ⵜⵙⴰⵔⴰⴳⵜ ⵜⴰⵎⵣⵡⴰⵔⵓⵜ ⵏ ⵡⴰⵙⵙ ⵏ ⵓⵙⵉⴹⵢⴰⵙ 15 ⵖⵓⵛⵜ 2026 ⴰⵔ ⴰⵎⵎⴰⵙ ⵏ ⵢⵉⴹ ⵏ ⵡⴰⵙⵙ ⵏ ⵓⵙⵉⵏⴰⵙ 22 ⵛⵜⴰⵎⴱⵉⵔ 2026;

ⵉⵖⴰⵡⴰⵙⵏ ⵏ ⵓⵣⵎⵣ ⵏ ⵉⵙⵜⴰⵢⵏ: ⵉⵖⴰⵡⴰⵙⵏ ⵏⵏⴰ ⵉⵜⵜⵓⵣⵓⵣⵣⵔⵏ ⵙⴳ ⵖⵓⵔ ⵜⵏⴰⴼⵓⵜⵉⵏ ⵏ ⵓⵎⵢⴰⵡⴰⴹ ⴰⵙⵍⵉⵥⵕ, ⴰⴳⴷⵓⴷⴰⵏ ⴷ ⵡⵓⵙⵍⵉⴳ, ⵉⵡⵏⴰⵏ ⵏ ⵓⵣⵎⵣ ⵏ ⵉⵙⵜⴰⵢⵏ, ⵉⵜⵜⵓⵣⵎⵎⴻⵎⵏ ⵏⵖ ⵙ ⵡⵓⵙⵔⵉⴷ, ⵙ ⵜⵙⵏⵜⴰⵢⵜ ⵏⵏⵙⵏ ⴷ ⵙ ⵜⵎⴰⵙⴰⵢⵜ ⵏⵏⵙⵏ ⵏ ⵜⵉⵔⴰ, ⵙ ⵓⵙⵡⵓⵔⵉ ⴰⵖⴰⵡⵙⴰⵏ ⵏⵖ ⵙ ⵓⵏⴳⴰⵔ, ⵙ ⵉⵎⵉⴽ ⵏⵖ ⴽⵉⴳⴰⵏ, ⵏ ⵉⵙⴳⵓⵎⵏ ⵉⵣⴷⵉⵏ ⵙ ⵉⵙⵜⴰⵢⵏ;

ⴰⵣⵎⵣ ⵏ ⴷⴰⵜ ⵓⵎⵣⵉⵣⵣⵍ ⴰⵎⵙⵜⴰⵢ ⴰⵎⴰⴷⴷⵓⴷ ⴰⵣⵎⵣ ⵉⴳⴰⵏ 26 ⵏ ⵡⵓⵙⵙⴰⵏ, ⵙⴳ ⵜⵙⴰⵔⴰⴳⵜ ⵜⴰⵎⵣⵡⴰⵔⵓⵜ ⵏ ⵓⵙⵉⴹⵢⴰⵙ 15 ⵖⵓⵛⵜ 2026 ⴰⵔ ⴰⵎⵎⴰⵙ ⵏ ⵢⵉⴹ ⵏ ⵓⴽⵕⴰⵙ 9 ⵛⵜⴰⵎⴱⵉⵔ 2026;

ⴰⵣⵎⵣ ⴰⵎⴰⴷⴷⵓⴷ ⵏ ⵜⵎⵣⴰⵣⵣⵍⵜ ⵜⴰⵎⵙⵜⴰⵢⵜ: ⴰⵣⵎⵣ ⵉⴳⴰⵏ 13 ⵏ ⵡⴰⵙⵙⴰⵏ, ⵙⴳ ⵜⵙⴰⵔⴰⴳⵜ ⵜⴰⵎⵣⵡⴰⵔⵓⵜ ⵏ ⵡⴰⵙⵙ ⵏ 10 ⵛⵜⴰⵎⴱⵉⵔ 2026 ⴰⵔ ⴰⵎⵎⴰⵙ ⵏ ⵢⵉⴹ ⵏ ⵓⵙⵉⵏⴰⵙ 22 ⵛⵜⴰⵎⴱⵉⵔ 2026, ⴰⵢⴰ ⵉⵣⴷⵉ ⵙ ⵉⵎⵥⵍⵉ ⵙ ⵜⵏⴰⴼⵓⵜⵉⵏ ⵜⵉⴳⴷⵓⴷⴰⵏⵉⵏ ⵏ ⵓⵎⵢⴰⵡⴰⴹ ⴰⵙⵍⵉⵥⵕ;

ⵉⵖⴰⵡⴰⵙⵏ ⵏ ⵜⵎⵣⴰⵣⵣⵍⵜ ⵜⴰⵎⵙⵜⴰⵢⵜ ⵜⴰⵎⴰⴷⴷⵓⴷⵜ : ⵉⵖⴰⵡⴰⵙⵏ ⵉⵜⵜⵓⵣⵓⵣⵣⵔⵏ ⵙⴳ ⵖⵓⵔ ⵜⵏⴰⴼⵓⵜⵉⵏ ⵜⵉⵙⵍⵉⵥⵕⵉⵏ ⵜⵉⴳⴷⵓⴷⴰⵏⵉⵏ ⵙ ⵙⴹⵉⵙ, ⵉⵡⵏⴰⵏ ⵏ ⵓⵣⵎⵣ ⵉⵍⵍⴰⵏ ⵙⴳ 10 ⵛⵜⴰⵎⴱⵉⵔ 2026 ⴰⵔ ⴰⵎⵎⴰⵙ ⵏ ⵢⵉⴹ ⵏ ⵡⴰⵙⵙ 22 ⵛⵜⴰⵎⴱⵉⵔ 2026, ⵢⵓⵎⴰⵏ ⵜⵉⵏⴰⵡⵉⵏ ⵜⵉⵏⵣⵡⴰⵢⵉⵏ ⴷ ⵜⴻⵜⵍⴼⴰⵣⵉⵏ, ⵉⵏⴱⴳⵉⵡⵏ ⵏ ⵉⵖⵎⵉⵙⵏ ⵏ ⵓⵙⵏⵖⵎⵙ ⴷ ⵜⴷⵓⵍⵉⵡⵉⵏ ⵏ ⵉⴳⵔⴰⵡⵏ ⵉⵎⵙⴰⵜⴰⵢⵏ, ⵙ ⵓⵢⵏⵏⴰ ⵉⵏⵎⵏ ⴷ ⵉⴹⵕⵉⵙⵏ ⵉⵙⵍⴳⴰⵏⵏ ⵉⵣⵣⵉⴳⵉⵣⵏ;

ⴰⵣⵎⵣ ⵏ ⵢⵉⵎⵥ ⵏ ⵡⴰⵡⴰⵍ: ⴰⵣⵎⵣ ⴰⵎⴰⵜⴰⵢ ⵉⵜⵜⵓⴼⴽⴰⵏ ⵉ ⵓⴽⴰⴱⴰⵕ ⴰⵙⵔⵜⴰⵏ ⵏⵖ ⵉ ⵢⴰⵏ ⵓⵎⵏⴽⴰⴷ ⵏⵏⵙ, ⵢⵓⵎⴰ ⴰⵣⵎⵣ ⵏ ⵡⴰⵡⴰⵍ ⴷ ⵉⵅⴼⴰⵡⴰⵍ, ⵜⵉⴳⵣⵣⵓⵎⵉⵏ ⴷ ⵜⴰⵍⵖⵉⵡⵉⵏ ⴰⴽⴽⵯ ⵏ ⵓⴱⴷⴰⵔ ⵏ ⵓⴽⴰⴱⴰⵕ ⵏⵖ ⵜⴰⵎⵏⴽⴰⴷⵜ.

ⵡⵉⵙ ⵙⵉⵏ : ⵉⵎⵏⵣⴰⵢ ⵉⵎⴰⵜⴰⵢⵏ

ⴰⵎⵏⵏⵉ 2 : ⵜⵉⵏⴰⴼⵓⵜⵉⵏ ⵏ ⵓⵎⵢⴰⵡⴰⴹ ⴰⵙⵍⵉⵥⵕ ⴷⴰ ⵜⵜⴰⴳⴳⴰⵏⵜ ⵅⴼ ⵜⵍⴻⵍⵍⵉ ⵏ ⵜⵉⵔⴰ ⴷ ⵜⵙⵉⵎⴰⵏⵜ, ⴰⵙⵉⵏⵜ ⵜⴰⵎⵙⵜⴳⴳⴰⵔⵜ ⵏ ⵉⵖⴰⵡⴰⵙⵏ ⵏ ⵓⵣⵎⵣ ⴰⵎⵙⵜⴰⵢ ⵏⵏⴰ ⴷⴰ ⵣⵓⵣⵣⵓⵔⵏⵜ.

ⴰⵎⵏⵏⵉ 3 : ⵜⵉⵏⴰⴼⵓⵜⵉⵏ ⵏ ⵓⵎⵢⴰⵡⴰⴹ ⴰⵙⵍⵉⵥⵕ ⵉⵇⵇⴰⵏ ⴰⴷ ⴰⴳⴳⵏⵜ ⵅⴼ ⵉⵖⴰⵡⴰⵙⵏ ⵏ ⵓⵣⵎⵣ ⵏ ⵉⵙⵜⴰⵢⵏ ⴰⴼⴰⴷ ⵓⵔ ⵢⵉⵍⵉ ⴽⵔⴰ ⵏⵏⴰ ⵉⵖⵉⵢⵏ ⴰⴷ:
-    ⵉⴹⴰⵙ ⵙ ⵜⵔⵙⴰⵍ ⵏ ⵜⴳⵍⴷⵉⵜ, ⵙ ⵓⵢⵏⵏⴰ ⵉⵍⵍⴰⵏ ⴳ ⵜⵎⵏⴹⴰⵡⵜ;
-    ⵉⴹⴰⵙ ⵙ ⵓⵏⵎⴰⵍⴰ ⴰⴳⴷⵓⴷⴰⵏ;
-    ⵉⴹⴰⵙ ⵙ ⵡⴰⴷⴷⵓⵔ ⴰⵏⴼⴳⴰⵏ, ⵙ ⵜⵓⴷⵔⵜ ⵜⵓⵙⵍⵉⴳⵜ ⵏⵖ ⴰⵣⵔⴰⴽ ⵏ ⵎⴷⴷⵏ ⵢⴰⴹⵏ;
-    ⴰⵙⵃⵓⵕⵕⵛ ⵅⴼ ⵜⴰⵙⵙⴰⵥⵓⵔⵜ, ⵅⴼ ⵓⴽⵙⴰⵏ ⵏⵖ ⵅⴼ ⵜⴽⵕⴹⵉ;
-    ⴰⵙⵙⵓⴼⵖ ⵏ ⵉⵙⴼⴽⴰ ⵏⵏⴰ ⵉⴼⵔⴳⵏ ⵙ ⵓⵙⵍⴳⵏ;
-    ⵜⵉⵖⵔⵉ ⵉ ⵓⵙⵎⵓⵜⵜⵔ ⵏ ⵉⴷⵔⵉⵎⵏ.

ⴰⵎⵏⵏⵉ 5 : ⵜⵉⵏⴰⴼⵓⵜⵉⵏ ⵏ ⵓⵎⵢⴰⵡⴰⴹ ⴰⵙⵍⵉⵥⵕ ⵉⵇⵇⴰⵏ ⴰⴷ ⴰⴳⴳⵏⵜ, ⵙ ⵓⵣⵔⴰⴽ ⵏ ⵜⵍⴻⵍⵍⵉ ⵏ ⵓⵡⵏⵏⵉ ⴷ ⵜⵙⵉⵎⴰⵏⵉⵜ ⵏ ⵜⵉⵔⴰ, ⵅⴼ ⵡⵓⵎⵓ ⴳ ⵓⵎⵏⵏⵓⵖ ⵎⴳⴰⵍ ⵉⵏⵖⵎⵉⵙⵏ ⵏ ⵜⴽⵔⴽⴰⵙ ⵉⵖⵉⵢⵏ ⴰⴷ ⵉⴹⴰⵙ ⴰⵣⵣⵉⴳⵣ ⵉⵕⵡⴰⵏ ⵏ ⵉⵙⵜⴰⵢⵏ ⵏⵖ ⴰⴷ ⵉⴹⴰⵙ ⵜⴰⵣⴷⴳⵉ ⵏ ⵓⵙⵏⵖⵎⵙ ⴰⵎⵙⵜⴰⵢ. ⵉⵇⵇⴰⵏ ⴷⵉⵖ ⴰⴷ ⴳⵏⵜ ⵜⴰⵎⵙⵙⵓⵎⴰⵏⵜ ⴰⴼⴰⴷ ⵙⵙⵉⵍⵉⵏⵜ ⴰⵙⵡⵉⵔ ⵏ ⵜⵉⴹⴰⴼ ⵏ ⵓⴳⴷⵓⴷ ⴷⴰⵜ ⵉⵏⵖⵎⵉⵙⵏ ⵏ ⵜⴽⵏⴷⴰⵡⵜ ⵉⵜⵜⵓⵣⵓⵣⵣⵓⵔⵏ, ⴳ ⵓⵡⵜⵜⴰⵙ ⵏ ⵓⴼⵔⴰⴳ ⵏ ⵓⵣⵔⴼ ⵏ ⵉⵏⵎⵓⵔⵉⵏ ⴳ ⵢⴰⵏ ⵓⵙⵜⴰⵢ ⵉⵍⴻⵍⵍⵉ ⴰⵎⵙⴼⴰⵡ.

ⴰⵎⵏⵏⵉ 6 : ⵜⵉⵏⴰⴼⵓⵜⵉⵏ ⵏ ⵓⵎⵢⴰⵡⴰⴹ ⴰⵙⵍⵉⵥⵕ ⵉⵇⵇⴰⵏ ⴰⴷ ⵓⵔ ⵣⵓⵣⵣⵔⵏⵜ ⵜⵓⵎⴰⵢⵉⵏ ⵜⵉⵎⵙⵜⴰⵢⵉⵏ ⵏⵏⴰ ⵉⵜⵜⵓⵙⴽⵔⵏ ⵙ ⵜⵉⵖⵉⵙⵜ ⵜⵉⵎⵍⵥⵉⵜ ⵉⵖⵉⵢⵏ ⴰⴷ ⵢⴰⵡⵉ ⴰⴳⴷⵓⴷ ⵖⵔ ⴰⵣⴳⴰⵍ ⵏⵖ ⴰⴷ ⵉⴹⴰⵙ ⵜⴰⵣⴷⴳⵉ ⴷ ⵜⵏⵓⵎⵉ ⵏ ⵓⵎⵙⴳⴷⴰⵍ ⴰⵎⵙⵜⴰⵢ. ⴰⵏⴰⵡ ⴰⴷ ⵏ ⵜⵓⵎⴰⵢⵉⵏ ⵉⵇⵇⴰⵏ ⴰⴷ ⵓⵔ ⵉⵜⵜⵓⵣⵓⵣⵣⵔ ⵖⴰⵙ ⴳ ⵓⵡⵜⵜⴰⵙ ⵏ ⵓⵙⵏⵖⵎⵙ, ⵏ ⵓⵙⵙⵉⴽⵣ ⵏⵖ ⴰⵣⵣⵔⴰⵢ, ⵎⴰⵛⴰ ⵉⵇⵇⴰⵏ ⴰⴷ ⵉⵜⵜⵓⵢⵉⵏⵉ ⵉⵙ ⴷ ⵜⵉⵖⵉⵙⵜ ⵜⵉⵎⵍⵥⵉⵜ ⴰⵢ ⴷ ⵉⴼⴽⴰⵏ ⵜⵓⵎⴰⵢⵜ ⴰⵏ. ⵉⵇⵇⴰⵏ ⴰⴷ ⴰⴳⴳⵏⵜ ⵜⵏⴰⴼⵓⵜⵉⵏ ⵅⴼ ⵜⵓⵎⴰⵢⵉⵏ ⵜⵉⵎⵙⵍⵉⵢⵉⵏ, ⵏⵖ ⵜⵉⵎⵥⵕⵉⵢⵉⵏ ⵏⵖ ⵜⵉⵙⵍⵉⵥⵕⵉⵏ ⵏⵏⴰ ⵉⵜⵜⵓⵙⴽⵔⵏ ⵙ ⵓⴱⵔⵉⴷ ⵏ ⵜⵉⵖⵉⵙⵜ ⵜⵉⵎⵍⵥⵉⵜ, ⵎⴽ ⵜⵜⵓⵙⴽⵔⵏⵜ ⴳ ⵓⵡⵜⵜⴰⵙ ⴰⴱⵉⴷⴰⵖⵓⵊⵉ ⵏⵖ ⵡⵉⵏ ⵓⵙⵙⵉⴽⵣ, ⵎⴰⵛⴰ ⵉⵇⵇⴰⵏ ⴰⴷ ⵉⵍⵉⵏⵜ ⵜⵓⵎⴰⵢⵉⵏ ⴰⴷ :
-    ⵎⵓⵏⵏⵜ ⴷ ⵢⴰⵜ ⵜⵎⴰⵜⴰⵔⵜ ⵏ ⵓⵙⵙⵉⴽⵣ ⵏ ⵓⵏⵖⵎⵉⵙ ⵉ ⵓⴳⴷⵓⴷ ⵅⴼ ⵓⵙⴳⵓⵎ ⵏⵏⵙ;
-    ⴰⴷ ⵜⵜⵓⵢⴰⴽⵣⵏⵜ ⵙ ⵜⵖⴰⵔⴰⵙⵜ ⵜⴰⵎⵙⴼⴰⵡⵜ ⴱⵍⴰ ⵓⴼⵓⵔ ⵖⵓⵔ ⵓⴳⴷⵓⴷ;
-    ⴰⴷ ⵓⵔ ⵜⵜⵓⵚⴽⵓⵏⵜ ⵜⵓⵎⴰⵢⵉⵏ ⴰⴷ ⵅⴼ ⵓⵙⵏⵖⵍ ⵏⵖ ⵅⴼ ⵜⴳⵍⵉⵎⵜ, ⵏⵖ ⵅⴼ ⵉⵎⵙⵍⵉ ⵏⵖ ⵅⴼ ⵜⵎⵓⵙⵜ ⵏ ⴽⵔⴰ ⵏ ⵓⵎⴷⴰⵏ ⵏ ⵜⵉⴷⵜ, ⵖⴰⵙ ⵎⴽ ⵉⵜⵜⵓⵢⴰⵏⵏⴰ ⵓⵢⴰⴷ ⵙ ⵜⵖⴰⵔⴰⵙⵜ ⵉⴱⴰⵢⵏⵏ, ⵉⵙⵓⵍⵏ ⵉⵜⵜⵓⵢⴰⴽⵣⵏ.

ⵉⵎⵉⵔ ⵡⵉⵙ ⵙⵉⵏ: ⵉⵍⵓⴳⵏⵏ ⵉⵙⵙⴰⵜⵉⵏ ⵉⵖⴰⵡⴰⵙⵏ ⵏ ⵓⵣⵎⵣ ⵏ ⵉⵙⵜⴰⵢⵏ

ⴰⵎⵏⵏⵉ 7 : ⵜⵉⵏⴰⴼⵓⵜⵉⵏ ⵏ ⵓⵎⵢⴰⵡⴰⴹ ⴰⵙⵍⵉⵥⵕ ⵉⵇⵇⴰⵏ ⴰⴷ ⵥⵍⵉⵏⵜ ⴳⵔ ⵓⵏⵖⵎⵉⵙ ⴷ ⵉⵅⴼⴰⵡⴰⵍ ⴰⴳⵓⵏⵙ ⵏ ⵉⵖⴰⵡⴰⵙⵏ ⵏ ⵓⵣⵎⵣ ⵏ ⵉⵙⵜⴰⵢⵏ, ⵉⵇⵇⴰⵏ ⴰⴷ ⵓⵔ ⵣⵓⵣⵣⵔⵏⵜ ⴰⵡⴷ ⵢⴰⵏ ⵡⴰⵡⴰⵍ ⴳ ⵉⵍⵍⴰ ⵓⵊⴷⴰⵔ ⵏⵖ ⵜⵉⵔⴳⴳⴰⵎ ⵏⵖ ⴰⵙⵙⵉⵣⴷⵔ. ⵜⵉⵏⴰⴼⵓⵜⵉⵏ ⵏ ⵓⵎⵢⴰⵡⴰⴹ ⴰⵙⵍⵉⵥⵕ ⵉⵇⵇⴰⵏ ⵜⵏⵜ ⴰⴷ ⵣⵔⴽⵏⵜ ⵓⴷⴷⵓⵔ ⴰⵏⴼⴳⴰⵏ ⴷ ⵜⵓⴷⵔⵜ ⵜⵓⵙⵍⵉⴳⵜ ⵏ ⵉⵎⵏⴽⴰⴷⵏ.

ⴰⵎⵏⵏⵉ 8 : ⵜⵉⵏⴰⴼⵓⵜⵉⵏ ⵏ ⵓⵎⵢⴰⵡⴰⴹ ⴰⵙⵍⵉⵥⵕ ⵉⵇⵇⴰⵏ ⵜⵏⵜ ⴰⴷ ⵓⵔ ⴽⴽⵙⵏⵜ ⴳ ⵡⴰⵏⴰⴹ ⵏⵏⵙⵏ ⴰⵡⴰⵍ ⴷ ⵉⵅⴼⴰⵡⴰⵍ ⵏⵏⴰ ⵜⵜⵉⵏⵉⵏ ⵉⵡⵔⵉⴽⵏ ⵉⵙⵔⵜⴰⵏⵏ ⵏⵖ ⵉⵏⴽⵛⴰⵎⵏ ⵢⴰⴹⵏ.

ⴰⵎⵏⵏⵉ 9 : ⵜⵉⵏⴰⴼⵓⵜⵉⵏ ⵏ ⵓⵎⵢⴰⵡⴰⴹ ⴰⵙⵍⵉⵥⵕ ⵉⵇⵇⴰⵏ ⵜⵏⵜ ⴰⴷ ⵟⵟⴼⵏⵜ ⵉⵎⵣⴳⵉ, ⴰⴷ ⴹⵎⵏⵏⵜ ⵉⵙ ⵓⵔ ⴰⴷ ⴽⴽⵏ ⵜⴰⵙⴳⴰ ⵉⵏⵖⵎⴰⵙⵏ ⵏⵉⵜⵏⵉ ⵓⵍⴰ ⵡⵉⵏⵏⴰ ⵉⵙⵎⵓⵙⵙⵓⵏ ⵉⵙⴰⵢⵙⵏ ⵏ ⵉⵖⴰⵡⴰⵙⵏ, ⵉⵡⵏⴰⵏ ⵏ ⵓⵡⵏⵏⵉ ⵏⵏⵙⵏ ⴷ ⵉⵙⵡⵉⵏⴳⵉⵎⵏ ⵏⵏⵙⵏ ⵏⵖ ⴰⵙⴼⵔⵓ ⵏⵏⵙⵏ ⵅⴼ ⵉⵙⵜⴰⵢⵏ.

ⴰⵎⵏⵏⵉ 10 : ⴰⴷⴰⴼ ⴰⵎⵢⴰⵙ ⵏ ⵉⴽⴰⴱⴰⵕⵏ ⵉⵙⵔⵜⴰⵏⵏ ⵖⵔ ⵜⵏⴰⴼⵓⵜⵉⵏ ⵏ ⵓⵎⵢⴰⵡⴰⴹ ⴰⵙⵍⵉⵥⵕ ⵉⵡⵏⴰⵏ ⵏ ⵓⵣⵎⵣ ⵏ ⵉⵙⵜⴰⵢⵏ ⴷⴰ ⵉⵜⵜⵓⵙⵖⴰⵍ ⵙ ⵓⵙⵎⴷⵢⴰ ⵏ ⵉⴽⴰⴱⴰⵕⵏ ⴰⴷ ⴰⴳⵓⵏⵙ ⵏ ⵓⴱⵕⵍⴰⵎⴰⵏ. ⴰⴽⵙⴰⵢ ⵏ ⵜⵉⵣⵉ ⵜⴰⵎⴰⵜⴰⵢⵜ ⵏ ⵓⵣⵎⵣ ⴳ ⵉⵎⵣⴳⵉ ⴰⴳⵓⵏⵙ ⵏ ⵉⵖⴰⵡⴰⵙⵏ ⵏ ⵓⵣⵎⵣ ⴰⵎⵙⵜⴰⵢ ⵉⵜⵜⵓⴱⴹⴰ ⴳⵔ ⵉⴽⴰⴱⴰⵕⵏ ⵉⵙⵔⵜⴰⵏⵏ ⵙ ⴽⵕⴰⴹ ⵉⵙⵎⵉⵍⵏ ⴰⴷ:

-    ⴰⵙⵎⵉⵍ ⴰⵎⵣⵡⴰⵔⵓ ⵢⵓⵎⴰ ⵉⴽⴰⴱⴰⵕⵏ ⵉⵙⵔⵜⴰⵏⵏ ⵖⵓⵔ ⵉⵍⵍⴰ ⵓⴳⵔⴰⵡ ⵏ ⵉⵎⵢⵓⵔⴰ ⴰⴳⵓⵏⵙ ⵏ ⵢⴰⵏ ⴳ ⵉⵎⵚⵕⵉⵢⵏ ⵏ ⵓⴱⵕⵍⴰⵎⴰⵏ, ⵏⵖ ⵖⵓⵔⵙⵏ ⴰⵎⴹⴰⵏ ⵏ ⵉⴳⵎⴰⵎⵏ ⵓⵔ ⵉⴷⵔⵓⵙⵏ ⵅⴼ ⵓⵢⵏⵏⴰ ⵉⵇⵇⴰⵏⵏ ⴰⴼⴰⴷ ⵜⴻⵜⵜⵓⵙⴽⵔ ⵜⵔⴰⴱⴱⵓⵜ ⵜⴰⴱⵕⵍⴰⵎⴰⵏⵉⵜ ⴰⴳⵓⵏⵙ ⵏ ⵓⵙⵇⵇⵉⵎ ⵉⵡⴰⵜⵙⵏ ; ⵖⵓⵔⵙⵏ 50% ⵏ ⵓⴽⵙⴰⵢ ⴰⵣⵎⵣⴰⵏ ⴰⵎⴰⵜⴰⵢ ⵏ ⵉⵖⴰⵡⴰⵙⵏ ⵏ ⵓⵣⵎⵣ ⴰⵎⵙⵜⴰⵢ, ⴰⴷ ⵉⵜⵜⵓⴱⴹⵓ ⴳⵔ ⵉⴽⴰⴱⴰⵕⵏ ⵏ ⵓⵙⵎⵉⵍ ⴰⴷ;
-    ⴰⵙⵎⵉⵍ ⵡⵉⵙⵙ ⵙⵉⵏ ⵢⵓⵎⴰ ⵉⴽⴰⴱⴰⵕⵏ ⵉⵙⵔⵜⴰⵏⵏ ⵓⵔ ⵉⵍⵍⵉⵏ ⴳ ⵓⵙⵎⵉⵍ ⴰⵎⵣⵡⴰⵔⵓ, ⵖⵓⵔⵙⵏ 30% ⵏ ⵓⴽⵙⴰⵢ ⴰⵣⵎⵣⴰⵏ ⴰⵎⴰⵜⴰⵢ ⵏ ⵉⵖⴰⵡⴰⵙⵏ ⵏ ⵓⵣⵎⵣ ⴰⵎⵙⵜⴰⵢ, ⴰⴷ ⵉⵜⵜⵓⴱⴹⵓ ⴳⵔ ⵉⴽⴰⴱⴰⵕⵏ ⵏ ⵓⵙⵎⵉⵍ ⴰⴷ ;
-    ⴰⵙⵎⵉⵍ ⵡⵉⵙⵙ ⴽⵕⴰⴹ ⵢⵓⵎⴰ ⵉⴽⴰⴱⴰⵕⵏ ⵉⵙⵔⵜⴰⵏⵏ ⵏⵏⴰ ⵓⵔ ⵉⵍⵍⵉⵏ ⴳ ⵓⴱⵕⵍⴰⵎⴰⵏ ⵖⵓⵔⵙⵏ 20% ⵏ ⵓⴽⵙⴰⵢ ⴰⵣⵎⵣⴰⵏ ⴰⵎⴰⵜⴰⵢ ⵏ ⵉⵖⴰⵡⴰⵙⵏ ⵏ ⵓⵣⵎⵣ ⵏ ⵉⵙⵜⴰⵢⵏ, ⴰⴷ ⵉⵜⵜⵓⴱⴹⵓ ⵙ ⵜⵖⴷⵎⵜ ⵅⴼ ⵉⴽⴰⴱⴰⵕⵏ ⴰⴷ.
ⴽⵓ ⴰⵎⵓⵍⵍⵉ ⵢⴰⵎⵓⵏ ⴳ ⵉⵙⵜⴰⵢⵏ ⴰⴳⵓⵏⵙ ⵏ ⵢⴰⵜ ⵜⴰⵎⵓⵏⵜ ⵏ ⵉⴽⴰⴱⴰⵕⵏ ⵉⵙⵔⵜⴰⵏⵏ ⵖⵓⵔⵙ ⴰⴷⴰⴼ ⵖⵔ ⵜⵏⴰⴼⵓⵜⵉⵏ ⵏ ⵓⵎⵢⴰⵡⴰⴹ ⴰⵙⵍⵉⵥⵕ.
ⴰⵎⵏⵏⵉ 11 : ⴷⴰ ⵜⵜⴰⴳⴳⴰⵏⵜ ⵜⵏⴰⴼⵓⵜⵉⵏ ⵏ ⵓⵎⵢⴰⵡⴰⴹ ⴰⵙⵍⵉⵥⵕ ⴰⴼ ⴰⴷ ⵢⵉⵍⵉ ⵖⵓⵔ ⵉⵎⵏⴽⴰⴷⵏ ⵏ ⵢⴰⵜ ⵜⴳⵔⴰⵡⵜ ⵜⴰⵎⵙⵜⴰⵢⵜ ⵢⴰⵜ ⵜⴷⵓⵍⵉ ⵜⴰⵙⵖⵎⵙⴰⵏⵜ ⵜⴰⵎⵢⴰⵙⵜ ⴰⴷⴷⴰⵢ ⵜⵙⵙⴽⵔ ⵜⴰⴷⵓⵍⵉ ⵉ ⵢⴰⵜ ⵜⵎⵏⴽⴰⴷⵜ ⴳ ⵜⴳⵔⴰⵡⵜ ⴰⴷ.

ⴰⵎⵏⵏⵉ 12 : ⴷⴰ ⵜⵜⴰⴳⴳⴰⵏⵜ ⵜⵏⴰⴼⵓⵜⵉⵏ ⵏ ⵓⵎⵢⴰⵡⴰⴹ ⴰⵙⵍⵉⵥⵕ ⵅⴼ ⵜⴰⵎⵓⵏⵜ ⴰⴽⴷ ⵉⴽⴰⴱⴰⵕⵏ ⵉⵙⵔⵜⴰⵏⵏ ⴰⴳⵓⵏⵙ ⵏ ⵜⴳⵔⴰⵡⵉⵏ ⵙ ⵓⵎⵏⵣⴰⵢ ⵏ ⵓⵎⵢⴰⵙ ⴳⵔ ⵜⵎⵟⵟⵓⵟ ⴷ ⵓⵔⴳⴰⵣ ⴳ ⵓⵙⵡⵉⵔ ⵏ ⵓⵙⵜⴰⵢ ⵏ ⵉⴳⵏⵙⴰⵙ ⵏⵏⵙⵏ ⴰⴳⵓⵏⵙ ⵏ ⵉⵖⴰⵡⴰⵙⵏ ⵏ ⵓⵣⵎⵣ ⵏ ⵉⵙⵜⴰⵢⵏ. ⵜⵉⵏⴰⴼⵓⵜⵉⵏ ⴰⴷ ⴷⴰ ⵜⵜⴰⴳⴳⴰⵏⵜ ⵅⴼ ⵓⵙⵙⵓⵎⵓ ⵏ ⵜⵎⵖⴰⵔⵉⵏ ⴳ ⵉⵖⴰⵡⴰⵙⵏ ⵏ ⵓⵙⵏⵖⵎⵙ ⴷ ⵉⵎⵙⴳⴷⴰⵍⵏ ⵉⵣⴷⵉⵏ ⵙ ⵜⵎⵙⴰⵍⵉⵏ ⵏ ⵓⴱⴰⵖⵓⵔ ⴰⵎⴰⵜⴰⵢ ⵢⵓⴳⵍⵏ ⵙ ⵉⵙⵜⴰⵢⵏ.
ⴰⵎⵏⵏⵉ 13 : ⴷⴰ ⵜⵜⴰⴳⴳⴰⵏⵜ ⵜⵏⴰⴼⵓⵜⵉⵏ ⵏ ⵓⵎⵢⴰⵡⴰⴹ ⴰⵙⵍⵉⵥⵕ ⵖⵓⵔ ⵜⵍⵍⴰ ⵜⴷⵓⵍⵉ ⵜⴰⵏⵎⵏⴰⴹⵜ ⵏⵖ ⵜⴰⴷⵖⵔⴰⵏⵜ, ⵜⴰⴳⴷⵓⴷⴰⵏⵜ ⵏⵖ ⵜⵓⵙⵍⵉⴳⵜ, ⵅⴼ ⴰⴷ ⴹⴼⵓⵕⵏⵜ ⵉⵏⵖⵎⵉⵙⵏ, ⵉⵎⵙⵓⵔⵙⵏ ⴷ ⵉⵎⵣⵣⵓⵜⵏ ⵉⵎⵙⵜⴰⵢⵏ, ⵙ ⵉⵎⵥⵍⵉ ⵡⵉⵏⵏⴰ ⵉⵣⴷⵉⵏ ⵙ ⵜⵍⴳⴰⵎⵉⵏ ⵜⵉⵏⵎⵏⴰⴹⵉⵏ, ⵉⵏⵎⵏ ⴷ ⵓⵙⴳⵓⵎ ⵏ ⵜⵓⵔⴰⴳⵜ ⵏⵏⴰ ⵢⴰⵙ ⵉⵜⵜⵓⴼⴽⴰⵏ ⴷ ⵓⵙⴽⴰⵏ ⵏⵏⵙⵏ ⵏ ⵉⵖⴰⵡⴰⵙⵏ ⵙ ⵓⵢⵏⵏⴰ ⵉⵍⵍⴰⵏ ⴳ ⵡⴰⵍⵓⴳ ⵏ ⵡⴰⴳⴳⵯⴰⵜⵏ ⵏⵏⵙⵏ, ⵙ ⵓⵣⵔⴰⴽ ⵏ ⵉⵙⵍⴳⵏⵏ ⵏ ⴰⵎⵏⵏⵉⵜⵏ 10 ⴷ 11. ⵜⵉⵏⴰⴼⵓⵜⵉⵏ ⵏ ⵓⵎⵢⴰⵡⴰⴹ ⴰⵙⵍⵉⵥⵕ ⵜⵉⴳⴷⵓⴷⴰⵏⵉⵏ, ⵉⵇⵇⴰⵏ ⴰⴷ ⴰⴳⴳⵏⵜ ⵅⴼ ⵉⵖⴰⵡⴰⵙⵏ ⵏ ⵓⵣⵎⵣ ⴰⵎⵙⵜⴰⵢ ⵙ ⵓⵢⵏⵏⴰ ⵉⵏⵎⵏ ⴷ ⵜⵙⵎⵉⴳⵍⵉⵏ ⵏ ⵜⵏⴰⴼⵓⵜ ⵜⴰⴳⴷⵓⴷⴰⵏⵜ ⵏⵏⴰ ⵖⵉⴼⵙⵏⵜ ⵉⵍⵍⴰⵏ, ⴰⴷ ⴷⵍⵏⵜ ⵉⵙⵜⴰⵢⵏ ⴳ ⵜⵎⵏⴰⴹⵉⵏ ⴰⴽⴽⵯ ⵏ ⵜⴳⵍⴷⵉⵜ, ⴰⴼⴰⴷ ⵙⴷⵓⵙⵏⵜ ⵓⵎⵓ ⵏ ⵓⵙⵏⵖⵎⵙ ⵏ ⵜⵙⴳⴰ ⴳ ⵜⵓⵚⴽⴰ ⵏ ⵓⵎⵢⴰⵏⴰⵡ ⴰⵎⵓⵔⴰⵏ ⴷ ⵓⵙⴷⵓⵙ ⵏ ⵜⵎⴷⵔⴰⵡⵜ ⵜⴰⵏⵎⵓⵔⵉⵜ ⴷ ⵜⵉⴳⴰⵡⵜ ⵜⴰⴷⵉⵎⵓⵇⵕⴰⵟⵉⵜ ⴳ ⵓⵙⵡⵉⵔ ⴰⵎⵓⵔⴰⵏ.

ⴰⵎⵏⵏⵉ 14 : ⵜⵉⵏⴰⴼⵓⵜⵉⵏ ⵏ ⵓⵎⵢⴰⵡⴰⴹ ⴰⵙⵍⵉⵥⵕ ⵉⵇⵇⴰⵏ ⵜⵏⵜ ⴰⴷ ⵣⵔⴽⵏⵜ ⵜⴰⵎⴰⴳⵓⵜ ⵜⴰⵙⵏⵉⵍⵙⵜ ⴰⴳⵓⵏⵙ ⵏ ⵉⵖⴰⵡⴰⵙⵏ ⵏ ⵓⵣⵎⵣ ⵏ ⵉⵙⵜⴰⵢⵏ, ⵙ ⵜⵏⵓⵎⵉ ⴷ ⵓⵢⵏⵏⴰ ⵉⵍⵍⴰⵏ ⴳ ⵓⵍⵓⴳ ⵏ ⵡⴰⴳⴳⵯⴰⵜⵏ ⵏⵏⵙⵏⵜ.

ⴰⵎⵏⵏⵉ 15 : ⴷⴰ ⵜⵜⴰⴳⴳⴰⵏⵜ ⵜⵏⴰⴼⵓⵜⵉⵏ ⵏ ⵓⵎⵢⴰⵡⴰⴹ ⴰⵙⵍⵉⵥⵕ ⵅⴼ ⵓⴹⵎⴰⵏ ⵏ ⵢⵉⵍⵉ ⵏ ⵉⵄⵔⵔⵉⵎⵏ ⴰⴳⵓⵏⵙ ⵏ ⵉⵖⴰⵡⴰⵙⵏ ⵏ ⵓⵣⵎⵣ ⵏ ⵉⵙⵜⴰⵢⵏ, ⴰⵔ ⵜⵜⴰⴳⴳⴰⵏⵜ ⵅⴼ ⵓⵙⵙⵓⵎⵓ ⵏ ⵉⵄⵔⵔⵉⵎⵏ ⴳ ⵉⵖⴰⵡⴰⵙⵏ ⵏ ⵓⵙⵏⵖⵎⵙ ⴷ ⵓⵎⵙⴳⴷⴰⵍ ⵉⵣⴷⵉⵏ ⵙ ⵜⵖⴰⵡⵙⵉⵡⵉⵏ ⵏ ⵓⴱⴰⵖⵓⵔ ⴰⵎⴰⵜⴰⵢ ⵢⵓⴳⵍⵏ ⵙ ⵉⵙⵜⴰⵢⵏ.

ⴰⵎⵏⵏⵉ 16 : ⴷⴰ ⵜⵜⴰⴳⴳⴰⵏⵜ ⵜⵏⴰⴼⵓⵜⵉⵏ ⵏ ⵓⵎⵢⴰⵡⴰⴹ ⴰⵙⵍⵉⵥⵕ ⵅⴼ ⵓⴹⵎⴰⵏ ⵏ ⵢⵉⵍⵉ ⵏ ⵉⵎⵖⵔⴰⴱⵉⵢⵏ ⵏ ⵓⵎⴰⴹⴰⵍ ⴰⴳⵓⵏⵙ ⵏ ⵉⵖⴰⵡⴰⵙⵏ ⵏ ⵓⵣⵎⵣ ⵏ ⵉⵙⵜⴰⵢⵏ, ⴰⵔ ⵜⵜⴰⴳⴳⴰⵏⵜ ⵅⴼ ⵓⵙⵙⵓⵎⵓ ⵏ ⵉⵎⵖⵔⴰⴱⵉⵢⵏ ⵏ ⵓⵎⴰⴹⴰⵍ ⴳ ⵉⵖⴰⵡⴰⵙⵏ ⵏ ⵓⵙⵏⵖⵎⵙ ⴷ ⵓⵎⵙⴳⴷⴰⵍ ⵉⵣⴷⵉⵏ ⵙ ⵜⵎⵙⴰⵍ ⵏ ⵓⴱⴰⵖⵓⵔ ⴰⵎⴰⵜⴰⵢ ⵢⵓⴳⵍⵏ ⵙ ⵉⵙⵜⴰⵢⵏ.

ⴰⵎⵏⵏⵉ 17 : ⴷⴰ ⵜⵜⴹⵎⴰⵏⵏⵜ ⵜⵏⴰⴼⵓⵜⵉⵏ ⵏ ⵓⵎⵢⴰⵡⴰⴹ ⴰⵙⵍⵉⵥⵕ ⴰⴷⴰⴼ ⵉ ⵎⴷⴷⵏ ⵉⵍⵍⴰⵏ ⴳ ⵡⴰⴷⴷⴰⴷ ⵏ ⵜⵉⵎⵎⵓⵄⴹⵔⵜ ⵖⵔ ⵉⵖⴰⵡⴰⵙⵏ ⵏ ⵡⵓⵙⵙⴰⵏ ⵏ ⵉⵙⵜⴰⵢⵏ. ⴰⴷⴰⴼ ⴰⴷ ⵉⵇⵇⴰⵏ ⴰⴷ ⵢⵉⵍⵉ ⵙ ⵡⴰⵍⵍⴰⵍⵏ ⴷ ⵢⵓⵙⴰⵏ ⵣⵓⵏⴷ ⴰⵡⴰⵍ ⵙ ⵜⴷⵓⴳⴰⵎⵉⵏ, ⵜⵉⵔⴰ ⵏ ⴷⴷⴰⵡ ⵜⵡⵍⴰⴼⵜ ⴷ ⵓⵙⵙⵉⴽⵣ ⵏ ⵡⴰⵡⴰⵍ, ⴽⵓ ⵜⵉⴽⴽⵍⵜ ⴳ ⵜ ⵉⵙⵙⵓⵔⴼ ⵓⵖⴰⵡⴰⵙ. ⵜⵉⵏⴰⴼⵓⵜⵉⵏ ⵏ ⵓⵎⵢⴰⵡⴰⴹ ⴰⵙⵍⵉⵥⵕ ⵉⵇⵇⴰⵏ ⴰⴷ ⴰⴳⴳⵏⵜ ⵅⴼ ⵓⵙⵙⵓⵎⵓ ⵏ ⵉⵎⵖⵔⴰⴱⵉⵢⵏ ⵏ ⵓⵎⴰⴹⴰⵍ ⴳ ⵉⵖⴰⵡⴰⵙⵏ ⵏ ⵓⵙⵏⵖⵎⵙ ⴷ ⵓⵎⵙⴳⴷⴰⵍ ⵉⵣⴷⵉⵏ ⵙ ⵜⵎⵙⴰⵍⵉⵏ ⵏ ⵓⴱⴰⵖⵓⵔ ⴰⵎⴰⵜⴰⵢ ⵢⵓⴳⵍⵏ ⵙ ⵉⵙⵜⴰⵢⵏ.

ⴰⵎⵏⵏⵉ 18 : ⵜⵉⵏⴰⴼⵓⵜⵉⵏ ⵏ ⵓⵎⵢⴰⵡⴰⴹ ⴰⵙⵍⵉⵥⵕ ⵉⵇⵇⴰⵏ ⵜⵏⵜ ⴰⴷ ⴰⵏⴼⵏⵜ ⵉⵍⵉ ⵏ ⵉⵎⵏⴽⴰⴷⵏ ⴷ ⵉⵎⴷⴰⵏⵏ ⵉⵣⴷⵉⵏ ⵙ ⵉⴽⴰⴱⴰⵕⵏ ⵉⵙⵔⵜⴰⵏⵏ ⵖⴰⵙ ⵉ ⵉⵖⴰⵡⴰⵙⵏ ⵉⵣⴷⵉⵏ ⵙ ⵉⵙⵜⴰⵢⵏ. ⵜⵉⵏⴰⴼⵓⵜⵉⵏ ⵉⵇⵇⴰⵏ ⴰⴷ ⵓⵔ ⵙⵏⵓⴱⴳⵏⵜ ⵉⵎⴰⵣⵣⴰⵍⵏ ⴰⴷ ⵉⵙⵔⵜⴰⵏⵏ ⴰⴳⵓⵏⵙ ⵏ ⵉⵖⴰⵡⴰⵙⵏ ⵉⴷⵍⵙⴰⵏⵏ, ⵉⵖⴰⵡⴰⵙⵏ ⵏ ⵜⵓⵏⵏⵓⵏⵜ, ⵏ ⵜⵥⵓⵔⵉ, ⵏ ⵡⵓⵔⴰⵔⵏ ⴷ ⵡⴰⵏⴰⵡⵏ ⵢⴰⴹⵏ ⵏ ⵉⵖⴰⵡⵙⵏ ⵓⵔ ⵉⵣⴷⵉⵏ ⵙ ⵜⵙⵔⵜⵉⵜ, ⴰⴼⴰⴷ ⵉⵜⵜⵓⵙⴷⵓⵙ ⵓⵎⵢⴰⵙ ⵏ ⵜⴼⵓⵍⵉⵏ ⴳ ⵓⵎⵣⴰⵣⵣⴰⵍ ⴰⵎⵙⵜⴰⵢ, ⴰⴷ ⴱⴹⵓⵏⵜ ⴷ ⵓⵢⵏⵏⴰ ⵉⵖⵉⵢⵏ ⴰⴷ ⵉⵙⵙⴽⵔ ⴰⵙⵓⵙⵙⵏ ⴰⵎⵙⵜⴰⵢ ⴰⵔⵓⵙⵔⵉⴷ ⵉ ⴽⴰ ⵏ ⵓⵎⵏⴽⴰⴷ ⵏⵖ ⴽⵔⴰ ⵏ ⵓⴽⴰⴱⴰⵕ ⴰⵙⵔⵜⴰⵏ, ⴷ ⵉⵇⵇⴰⵏ ⴰⴷ ⵓⵔ ⴰⵡⵉⵏⵜ ⵉⵎⵥⵕⴰ ⴷ ⵉⵎⵙⵙⴼⵍⵉⴷⵏ ⵖⵔ ⴰⵣⴳⴰⵍ ⵅⴼ ⵜⵉⵍⴰⵡⵜ ⵏ ⵉⵖⴰⵡⴰⵙⵏ ⵉⵜⵜⵓⵙⵎⵏⵉⴷⵏ.

ⴰⵎⵏⵏⵉ 19 : ⵜⵉⵏⴰⴼⵓⵜⵉⵏ ⵏ ⵓⵎⵢⴰⵡⴰⴹ ⴰⵙⵍⵉⵥⵕ ⵉⵇⵇⴰⵏ ⵜⵏⵜ ⴰⴷ ⵙⴱⴷⴷⵏⵜ ⴰⵣⵓⵣⵣⵔ ⴷ ⵓⵙⴽⴰⵏ ⵏ ⵉⵏⵖⵎⴰⵙⵏ ⵏⵏⵙⵏⵜ, ⵉⵎⵙⵎⵓⵙⵙⵏ ⵏ ⵉⵖⴰⵡⴰⵙⵏ ⴷ ⵉⵎⴰⵡⴰⵙⵏ ⵉⴳⴰⵏ ⵉⵎⵏⴽⴰⴷⵏ ⴳ ⵉⵙⵜⴰⵢⵏ ⵏⵖ ⵡⵉⵏⵏⴰ ⵉⵏⵏⴰⵏ ⵉ ⵓⴳⴷⵓⴷ ⵉⵡⵙ ⵏⵏⵙ ⵉ ⴽⵔⴰ ⵏ ⵓⵎⵏⴽⴰⴷ ⵏⵖ ⴽⵔⴰ ⵏ ⵓⴽⴰⴱⴰⵕ ⴰⵙⵔⵜⴰⵏ, ⴳ ⵉⵖⴰⵡⴰⵙⵏ ⵏⵏⵙ ⴰⴽⴽⵯ, ⵙⴳ ⵓⵙⴰⴽⵓⴷ ⵏ ⵓⵙⵙⵏⵜⵉ ⵏ ⵜⵎⵏⴽⴰⴷⵜ ⴰⵔ ⵜⵉⴳⵉⵔⴰ ⵏ ⵉⵙⵜⴰⵢⵏ.
ⵜⵉⵏⴰⴼⵓⵜⵉⵏ ⵉⵇⵇⴰⵏ ⵜⵏⵜ ⴷⵉⵖ ⴰⴷ ⵙⵔⵙⵏⵜ ⴽⵔⴰ ⵏ ⵜⵎⴰⵜⴰⵔⵜ ⵙ ⵜⵜⵓⵢⴰⴽⴰⵣⵏⵜ ⵜⵡⵍⴰⴼⵉⵏ ⵏ ⵍⴰⵔⵛⵉⴼ ⴰⴷⴷⴰⵢ ⵜⵜⵓⵙⵡⵓⵔⵉⵏⵜ.

ⴰⵎⵏⵏⵉ 20 : ⵜⵉⵏⴰⴼⵓⵜⵉⵏ ⵏ ⵓⵎⵢⴰⵡⴰⴹ ⴰⵙⵍⵉⵥⵕ ⴷⴰ ⵜⵜⴰⴳⴳⴰⵏⵜ ⵅⴼ ⵓⴹⵎⴰⵏ ⵏ ⵜⵎⴰⴼⴰⵡⵜ ⵏ ⵜⵖⴰⵔⴰ ⵏ ⵉⵎⵓⵣⴰⵢ, ⵉⵎⵙⴷⴰⵡⵏ, ⵉⵎⴰⴼⵙⴰⵢⵏ, ⵉⵅⴼⴰⵡⴰⵍⵏ, ⵉⵎⵙⵙⵓⵔⵏ ⴷ ⵉⵎⴰⵣⵣⴰⵍⵏ ⵉⵎⵙⵎⵓⵏⵏ ⵢⴰⵎⵓⵏ ⴳ ⵉⵖⴰⵡⴰⵙⵏ ⵏ ⵓⵣⵎⵣ ⵏ ⵉⵙⵜⴰⵢⵏ. ⵎⴽ ⵉⵍⵜⵖ ⴽⵔⴰ ⴷⵉⴳⵙⵏ ⴽⵔⴰ ⴳ ⵉⴽⴰⴱⴰⵕⵏ ⵉⵙⵔⵜⴰⵏⵏ, ⵏⵖ ⵖⵓⵔⵙ ⴽⵔⴰ ⵏ ⵓⵣⴷⴰⵢ ⵏ ⵓⴱⴰⵖⵓⵔ ⵉⴷⵙ, ⵉⵇⵇⴰⵏ ⵏ ⴰⴷ ⵉⵜⵜⵓⵢⵉⵏⵉ ⵉ ⵓⴳⴷⵓⴷ. ⵉⵇⵇⴰⵏ ⵏ ⴰⴷ ⵓⵔ ⵏⵙⵡⵓⵔⵉ ⵜⴰⵖⴰⵔⴰ ⵏ ⵓⵎⵓⵣⴰⵢ ⵏⵖ ⴰⵎⴼⵙⴰⵢ ⵉ ⴽⵔⴰ ⵏ ⵓⵎⵣⵉⵣⵣⵍ ⴰⵎⵙⵜⴰⵢ ⴰⵔⵓⵙⵔⵉⴷ ⴳ ⵓⴱⵖⵓⵔ ⵏ ⴽⵔⴰ ⵏ ⵜⵙⴳⴰ ⵅⴼ ⵜⴰⵢⴹ.

ⴰⵎⵏⵏⵉ 21 : ⵜⵉⵏⴰⴼⵓⵜⵉⵏ ⵏ ⵓⵎⵢⴰⵡⴰⴹ ⴰⵙⵍⵉⵥⵕ ⵉⵇⵇⴰⵏ ⵜⵏⵜ ⴰⴷ ⵙⴱⴷⴷⵏⵜ ⴰⵣⵓⵣⵣⵔ ⵏ ⵜⵢⴰⴼⵓⵜⵉⵏ ⵏ ⵉⵙⵖⴰⵍⵏ ⵏ ⵜⴰⵏⵏⴰⵢⵜ ⵉⵣⴷⵉⵏ ⵙ ⵡⵓⵙⵔⵉⴷ ⵏⵖ ⴰⵔⵓⵙⵔⵉⴷ ⴷ ⵉⵙⵜⴰⵢⵏ, ⴳ ⵓⵣⵎⵣ ⵏ ⵉⵙⵜⴰⵢⵏ ⵉⵍⵍⴰⵏ ⴳⵔ ⵡⴰⵙⵙ ⵡⵉⵙ ⵎⵔⴰⵡ ⴷ ⵙⵎⵎⵓⵙ ⴷⴰⵜ ⵓⵙⴰⴽⵓⴷ ⵏ ⵓⵙⵙⵏⵜⵉ ⵏ ⵜⵎⵣⴰⵣⵣⵍⵜ ⵜⴰⵎⵙⵜⴰⵢⵜ ⵜⴰⵎⴰⴷⴷⵓⴷⵜ ⴰⵔ ⵜⵉⴳⵉⵔⴰ ⵏ ⵉⵙⵜⴰⵢⵏ.

ⴰⵎⵏⵏⵉ 22 : ⴱⵔⵔⴰ ⵏ ⵓⵣⵎⵣ ⵉⵡⴰⵜⵙ ⵓⵎⵏⵏⵉ ⵉⵣⵔⵉⵏ, ⴰⵣⵓⵣⵣⵔ ⵏ ⵜⵢⴰⴼⵓⵜⵉⵏ ⵏ ⵉⵙⵖⴰⵍⵏ ⵏ ⵜⴰⵏⵏⴰⵢⵜ ⵉⵣⴷⵉⵏ ⵙ ⵉⵙⵜⴰⵢⵏ ⵏⵖ ⵉⵅⴼⴰⵡⴰⵍⵏ ⵉⵇⵇⴰⵏ ⵏ ⴰⴷ ⴳⵏ ⵉⵎⵙⴼⴰⵡⵏ ⴰⵔ ⵣⵔⵔⴽⵏ ⵉⵍⵓⴳⵏⵏ ⵉⵣⵣⵉⴳⵉⵣⵏ, ⵙ ⵉⵎⵥⵍⵉ :
-    ⵜⴰⵎⵓⵙⵜ ⵏ ⵡⵏⵏⴰ ⵉⵙⵙⴽⵔⵏ ⴰⵙⵖⴰⵍ ⵏ ⵜⴰⵏⵏⴰⵢⵜ ;
-    ⵜⴰⵎⵓⵙⵜ ⵏ ⵜⵎⵙⴷⵓⵙⵜ ⵏⵏⴰ ⵉⵙⵡⵓⵔⵉⵏ ⴰⵙⵖⴰⵍ ;
-    ⴰⴱⴷⴰⵔ ⵏ ⵓⵙⴳⵓⵎ ⵏ ⵓⵙⵖⴰⵍ ;
-    ⴰⵙⵎⵏⵉⴷ ⵏ ⵜⵓⵙⵙⵉⴼⵜ ⵏⵏⴰ ⵉⵜⵜⵓⵙⵇⵙⴰⵏ ;
-    ⴰⴱⴷⴰⵔ ⵏ ⵓⴷⵖⴰⵔ ⵏⵖ ⵉⴷⵖⴰⵔⵏ ⴳ ⵉⵜⵜⵓⵙⴽⵔ ⵓⵙⵖⴰⵍ ;
-    ⴰⵙⴰⴽⵓⴷ ⵏⵖ ⵉⵙⴰⴽⵓⴷⵏ ⵏⵏⴰ ⴳ ⵉⵜⵜⵓⵙⴽⵔ ⵓⵙⵖⴰⵍ ⴷ ⵜⵥⵔⵉⴳⵉⵏ ⵏ ⵜⵢⴰⴼⵓⵜⵉⵏ ⵏⵏⵙ ;
-    ⴰⴱⴷⴰⵔ ⵏ ⵜⵙⴳⴰ ⵏ ⵓⵣⴳⴰⵍ ⵉⵖⵉⵢⵏ ⴰⴷ ⵢⵉⵍⵉ ⴳ ⵜⵢⴰⴼⵓⵜⵉⵏ ⵏ ⵓⵙⵖⴰⵍ.

ⴰⵎⵏⵏⵉ 23 : ⵉⵍⵓⴳⵏⵏ ⵏ ⵜⵖⵜⴰⵙⵜ ⵏ ⵓⵙⵇⵇⵉⵎ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ ⵓⵟⵟⵓⵏ 18-20 ⵉⵣⴷⵉⵏ ⵙ ⵓⴹⵎⴰⵏ ⵏ ⵜⵎⴰⴳⵓⵜ ⵏ ⵓⵡⵏⵏⵉ ⵏ ⵉⵎⵣⴰⵣⵏ ⵏ ⵜⵡⵏⴳⵉⵎⵜ ⴷ ⵜⴰⵏⵏⴰⵢⵜ ⴰⴳⵓⵏⵙ ⵏ ⵜⵏⴰⴼⵓⵜⵉⵏ ⵏ ⵓⵎⵢⴰⵡⴰⴹ ⴰⵙⵍⵉⵥⵕ ⴱⵕⵕⴰ ⵏ ⵉⵣⵎⵣⵏ ⵏ ⵉⵙⵜⴰⵢⵏ ⵉⵎⴰⵜⴰⵢⵏ ⴷ ⵉⵙⵖⴰⵍⵏ ⵏ ⵜⴰⵏⵏⴰⵢⵜ ⴷⴰ ⵣⵣⵉⴳⵉⵣⵏ ⴰⵡⴷ ⵅⴼ ⵜⵏⴰⴼⵓⵜⵉⵏ ⵓⵎⵢⴰⵡⴰⴹ ⴰⵙⵍⵉⵥⵕ ⵉⵡⵏⴰⵏ ⵏ ⵜⴷⵓⵍⵉ ⵏ ⵉⵎⵣⵣⴰ ⴷ ⵓⵙⵎⴽⵍ ⵏ ⵉⵏⵖⵎⵉⵙⵏ ⵓⵔ ⵉⵣⴷⵉⵏ ⵙ ⵉⵙⵜⴰⵢⵏ.

ⵉⵎⵉⵔ ⵡⵉⵙ ⴽⵕⴰⴹ : ⵉⵍⵓⴳⵏⵏ ⵉⵙⵙⴰⵜⵉⵏ ⵉⵖⴰⵡⴰⵙⵏ ⴰⵙⵙ ⵏ ⵓⵙⵜⴰⵢ
ⴰⵎⵏⵏⵉ 24 : ⵜⵉⵏⴰⴼⵓⵜⵉⵏ ⵏ ⵓⵎⵢⴰⵡⴰⴹ ⴰⵙⵍⵉⵥⵕ, ⴷⴰ ⵙⴱⴷⴰⴷⵏⵜ ⴰⵙⵙ ⵏ ⵓⵙⵜⴰⵢ, ⴰⵣⵓⵣⵣⵔ, ⵙ ⵡⴰⵍⵍⴰⵍⵏ ⴰⴽⴽⵯ, ⵜⵉⵢⴰⴼⵓⵜⵉⵏ ⵏ ⵉⵙⵖⴰⵍⵏ ⵏ ⵜⴰⵏⵏⴰⵢⵜ ⵉⵚⴽⴰⵏ ⵅⴼ ⵜⴰⵏⵏⴰⵢⵜ ⵉⵜⵜⵓⵙⵎⵓⵜⵜⵔⵏ ⵖⵓⵔ ⵉⵎⵙⵜⴰⵢⵏ ⴰⴷⴷⴰⵢ ⴷ ⴼⴼⵖⵏ ⴳ ⵉⵙⵉⵔⴰ ⵏ ⵓⵙⵜⴰⵢ, ⴷ ⵓⵙⵜⴰⵍ ⵏ ⵜⵢⴰⴼⵓⵜⵉⵏ, ⴰⵔ ⴰⴷⴷⴰⵢ ⵇⵇⵏⵏ ⵉⵙⵉⵔⴰ ⵉⵎⴳⴳⵓⵔⴰ ⵏ ⵓⵙⵜⴰⵢ.

ⴰⵎⵏⵏⵉ 25 : ⵜⵉⵏⴰⴼⵓⵜⵉⵏ ⵏ ⵓⵎⵢⴰⵡⴰⴹ ⴰⵙⵍⵉⵥⵕ ⵉⵇⵇⴰⵏ ⴰⴷ ⵙⴱⴷⴷⵏⵜ ⴰⵣⵓⵣⵣⵔ ⵏ ⵜⵓⵎⴰⵢⵉⵏ ⵉⵣⴷⵉⵏ ⵙ ⵉⵙⵜⴰⵢⵏ ⴳ ⵓⴱⴰⵖⵓⵔ ⵏ ⵉⴽⴰⴱⴰⵔⵏ ⵉⵙⵔⵜⴰⵏⵏ ⴰⵙⵙ ⴰⴽⴽⵯ ⵏ ⵓⵙⵜⴰⵢ, ⵉⵜⵜⵓⴳⴷⵍ ⵓⵣⵓⵣⵣⵔ ⵏ ⵜⵢⴰⴼⵓⵜⵉⵏ ⴷⴰⵜ ⵜⴳⵉⵔⴰ ⵏ ⵉⵙⵜⴰⵢⵏ ⴳ ⵡⴰⴽⴰⵍ ⴰⴽⴽⵯ ⴰⵏⴰⵎⵓⵔ.

ⴰⵎⵏⵏⵉ 26 : ⵜⵉⵏⴰⴼⵓⵜⵉⵏ ⵏ ⵓⵎⵢⴰⵡⴰⴹ ⴰⵙⵍⵉⵥⵕ ⴷⴰ ⵙⴱⴷⴰⴷⵏⵜ ⴰⵣⵓⵣⵣⵔ ⵏ ⵓⵡⵏⵏⵉ, ⵏ ⵉⵍⵖⵓⵜⵏ, ⵏ ⵉⵅⴼⴰⵡⴰⵍⵏ ⴷ ⵉⴽⵛⵛⵓⵎⵏ ⵏ ⵉⵎⵏⵥⴰ ⵏ ⵉⵙⵜⴰⵢⵏ ⴷⴰⵜ ⵜⴳⵉⵔⴰ ⵏ ⵓⵙⵜⴰⵢ.

ⵉⵎⵉⵔ  ⵡⵉⵙ ⴽⵓⵥ : ⵉⵍⵓⴳⵏⵏ ⵉⵜⵜⵓⵙⵎⵀⵍⵏ ⵅⴼ ⵉⵖⴰⵡⴰⵙⵏ ⵏ ⵜⵎⵣⴰⵣⵣⵍⵜ ⵜⴰⵎⵙⵜⴰⵢⵜ ⵜⴰⵎⴰⴷⴷⵓⴷⵜ

ⴰⵎⵏⵏⵉ 27 : ⵙ ⵡⴰⵔ ⴰⵎⵖⵣⴰⴷ ⵏ ⵉⵍⵓⴳⵏⵏ ⵉⵣⴷⵉⵏ ⵙ ⵉⵣⵔⴼⴰⵏ ⵏ ⵉⵎⵙⴽⴰⵔⵏ ⴷ ⵉⵣⵔⴼⴰⵏ ⴰⵙ ⵉⵏⵎⴰⵍⴰⵏ, ⴷ ⵓⴹⵎⴰⵏ ⵏ ⵓⵣⵔⴼ ⴳ ⵜⵡⵍⴰⴼⵜ, ⵜⵉⵎⵙⵙⵓⵔⵉⵏ ⵜⵉⵏⴰⵎⵓⵔⵉⵏ ⵏ ⵓⵙⵍⵉⵥⵕ ⴰⴳⴷⵓⴷⴰⵏ ⴷⴰ ⵣⵓⵣⵣⵓⵔⵏⵜ ⵉⵖⴰⵡⴰⵙⵏ ⵉⵜⵜⵓⵙⴽⵔⵏ ⵉ ⵜⵎⵣⴰⵣⵣⵍⵜ ⵜⴰⵎⵙⵜⴰⵢⵜ ⵜⴰⵎⴰⴷⴷⵓⴷⵜ, ⵙ ⵓⵢⵏⵏⴰ ⵉⵍⵍⴰⵏ ⴳ ⵉⴹⵕⵉⵙⵏ ⵉⵎⵙⵍⴳⵏⵏ ⵉⵣⵣⵉⴳⵉⵣⵏ.

ⴰⵎⵏⵏⵉ 28 : ⵜⵉⵎⵙⵙⵓⵔⵉⵏ ⵜⵉⵏⴰⵎⵓⵔⵉⵏ ⵏ ⵓⵙⵍⵉⵥⵕ ⴰⴳⴷⵓⴷⴰⵏ ⴷⴰ ⵙⵏⵖⵎⴰⵙⵏⵜ ⵙ ⵜⵉⵔⵔⴰ ⴰⴳⵔⴰⵡ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ ⵅⴼ ⵉⵣⵎⵣⵏ ⵏ ⵓⵣⵓⵣⵣⵔ ⵏ ⵉⵖⴰⵡⴰⵙⵏ ⵏ ⵜⵎⵣⴰⵣⵣⵍⵜ ⵜⴰⵎⵙⵜⴰⵢⵜ ⵜⴰⵎⴰⴷⴷⵓⴷⵜ ⵙ ⵜⴷⵔⵙⵉ 24 ⵏ ⵜⵙⴰⵔⴰⴳⵉⵏ ⴷⴰⵜ ⵓⵏⵏⵓⵕⵥⵎ ⵏ ⵓⵣⵎⵣ ⵏ ⵜⵎⵣⴰⵣⵣⵍⵜ ⵜⴰⵎⵙⵜⴰⵢⵜ ⵜⴰⵎⴰⴷⴷⵓⴷⵜ.

ⴰⵎⵏⵏⵉ 29 : ⵉⵖⴰⵡⴰⵙⵏ ⵏ ⵜⵎⵣⴰⵣⵣⵍⵜ ⵜⴰⵎⵙⵜⴰⵢⵜ ⵜⴰⵎⴰⴷⴷⵓⴷⵜ ⵓⵔ ⵉⵇⵇⴰⵏ ⴰⴷ ⵓⵎⴰⵏ ⴰⵡⴷ ⵢⴰⵜ ⵜⵓⵎⴰⵢⵜ :
-    ⵉⵙⵡⵓⵔⵉⵏ ⵜⵉⵎⵉⵜⴰⵔ ⵏ ⵓⴱⵓⵔⵣ ⵏ ⵜⴳⵍⴷⵉⵜ
-    ⴰⵙⴽⴰⵏ ⵏ ⵉⴷⵖⴰⵔⵏ ⵏ ⴷⴷⵉⵏ ⵏⵖ ⴰⵙⵡⵓⵔⵉ ⵉⴷⵔⵓⵙⵏ ⵏⵖ ⵉⴳⴳⵓⵜ ⵏ ⵉⴷⵖⴰⵔⵏ ⴰⴷ ;
-    ⴰⵙⴽⴰⵏ ⴰⴳⵓⵏⵙ ⵏ ⵉⵙⵖⵉⵎⵏ ⵉⵎⴰⴷⴷⵓⴷⵏ, ⵉⵜⵜⵓⵡⴰⵙⵙⵏⵏ ⵙ ⵓⵢⴰⴷ, ⴳⴰⵏ ⵉⵙⵖⵉⵎⵏ ⵉⵏⵎⵏⴰⴹⵏ ⵏⵖ ⵉⵏⴰⵎⵓⵔⵏ ;
-    ⴰⵙⴽⴰⵏ ⵏ ⵉⴼⵔⴷⵉⵙⵏ, ⵉⴷⵖⴰⵔⵏ ⵏⵖ ⵉⵙⵖⵉⵎⵏ ⵉⵖⵉⵢⵏ ⴰⴷ ⵉⴳ ⴽⵔⴰ ⵏ ⵜⵎⴰⵜⴰⵔⵜ ⵜⴰⵙⵖⵏⵣⴰⵏⵜ.
ⴰⵛⵏⵢⴰⵍ ⵏ ⵜⴳⵍⴷⵉⵜ, ⵜⴰⵥⵓⴳⴰⵢⵜ ⵜⴰⵏⴰⵎⵓⵔⵜ ⴷ ⵜⴼⵔⵉⵙⵜ ⵜⴰⵎⴰⴷⴷⵓⴷⵜ ⵏ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ, ⵉⵜⵜⵓⵡⴰⴳⵍⵏ ⴳ ⵉⵙⵇⵇⵉⴼⵏ ⵏ ⵓⵙⵏⵓⴱⴳ ⵏ ⵉⴳⵔⴰⵡⵏ ⵉⵣⴷⵉⵏ ⵙ ⵜⵎⵣⴰⵣⵣⵍⵜ ⵜⴰⵎⵙⵜⴰⵢⵜ ⵖⵉⵢⵏ ⴰⴷ ⵜⵜⵓⵙⵡⵓⵔⵉⵏ.

ⵉⵎⵉⵔ ⵡⵉⵙ ⵙⵎⵎⵓⵙ : ⵉⵍⵓⴳⵏⵏ ⵉⵎⴰⵜⴰⵢⵏ

ⴰⵎⵏⵏⵉ 30 : ⵜⴰⵖⵜⴰⵙⵜ ⴰⴷ ⵜⴻⵜⵜⵡⴰⵜⵙ ⵉⵎⵡⵓⵔⴰ ⵏ ⵓⵎⵢⴰⵡⴰⴹ ⴰⵙⵍⵉⵥⵕ ⴷ ⵜⴻⵜⵜⵓⵙⵥⵕⴳ ⴳ ⵓⵖⵎⵉⵙ ⴰⵎⴰⴷⴷⵓⴷ.
ⵉⵎⴷⵉⵡⵍ ⵜⵜ ⵓⵙⵇⵇⵉⵎ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ ⵉⵡⵏⴰⵏ ⵏ ⵜⵉⵔⵎⵜ ⵏⵏⵙ ⵏ 30 ⴷⵓ ⵍⵃⵉⵊⵊⴰ 1447 (16 ⵢⵓⵏⵢⵓ 2026), ⵉⵜⵜⵓⵙⵏⵎⴰⵍⴰⵏ ⴳ ⵓⵙⵖⵉⵎ ⵏ ⵓⴳⵔⴰⵡ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ ⴳ ⵕⵕⴱⴰⵟ, ⴳ ⵜⵍⵍⴰ ⵎⴰⵙⵙⴰ ⵍⴰⵟⵉⴼⴰ ⴰⵅⴰⵔⴱⴰⵛ, ⵜⴰⵙⵍⵡⴰⵢⵜ, ⵎⴰⵙⵙⴰ ⵏⴰⵕⵊⵉⵙ ⵕⴰⵖⴰⵢ, ⵎⴰⵙⵙ ⵊⴰⵄⴼⴰⵔ ⴽⴰⵏⵙⵓⵙⵙⵉ, ⵎⴰⵙⵙ ⵄⵍⵉ ⴱⴰⵇⵇⴰⵍⵉ ⵃⴰⵙⵙⴰⵏⵉ, ⵎⴰⵙⵙ ⵢⴰⵙⵉⵔ ⵖⵓⵔⴱⴰⵍ, ⵎⴰⵙⵙⴰ ⴼⴰⵟⵉⵎⴰ ⴱⴰⵕⵓⴷⵉ, ⵎⴰⵙⵙ ⵎⵓⵃⴰⵎⴷ ⵍⴰⵄⵔⵓⵙⵙⵉ, ⵎⴰⵙⵙ ⵄⴱⴷⵍⵍⴰⵟⵉⴼ ⵄⴰⴷⵉⵍ ⴷ ⵎⴰⵙⵙ ⵄⴰⴷⵉⵍ ⴱⵏⵃⴰⵎⵣⴰ, ⴳⴰⵏ ⵉⴳⵎⴰⵎⵏ.

 

ⵉ ⵓⵙⵇⵇⵉⵎ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕⵉ