ⵜⵙⵏⵓⴱⴳ ⵜⵙⵍⵡⴰⵢⵜ ⵏ ⵓⴳⵔⴰⵡ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ, ⵎⴰⵙⵙⴰ ⵍⴰⵟⵉⴼⴰ ⴰⵅⴰⵔⴱⴰⵛ, ⴰⵙⵙ ⵏ 1 ⵛⵜⴰⵎⴱⵉⵔ 2026, ⴳ ⵓⵙⵖⵉⵎ ⵏ ⵎⵔⵙⵍⵜ ⴳ ⵕⵕⴱⴰⵟ, ⵢⵉⵡⵏ ⵓⴽⴰⴱⴰⵕ ⵏ ⵜⵙⵇⵇⵉⵎⵜ ⵏ ⵜⵎⵙⵎⵓⵏⵜ ⵜⴰⴱⵕⵍⴰⵎⴰⵏⵉⵜ ⵏ ⵓⵙⵇⵇⵉⵎ ⵏ ⵓⵕⵓⴱⴱⴰ (APCE) ⵢⵓⴳⴳⴰⵏ ⵅⴼ ⵜⵉⵏⵥⵉ ⵏ ⵉⵙⵜⴰⵢⵏ ⵓⵣⵔⵉⴼⵏ ⵏ 23 ⵛⵜⴰⵎⴱⵉⵔ 2026. ⴰⵎⵙⴳⵔⴰⵡ ⵖⵖⴷ ⵓⵙⵜⵉⵢ ⵉⵍⵍⴰ ⴳ ⵓⵙⴰⵜⵉ ⵏ ⵜⵙⵎⵉⴳⵍⵜ ⵏ ⴷⴰⵜ ⵜⵉⵏⵥⵉ ⵜⴰⵎⵙⵜⴰⵢⵜ ⵉⵜⵜⵓⵙⵏⵎⴰⵍⴰⵏ ⵙⴳ 31 ⵖⵓⵛⵜ ⴰⵔ 2 ⵛⵜⴰⵎⴱⵉⵔ 2026.
ⴰⴽⴰⴱⴰⵕ ⴷⴷⵖ ⴰⴱⵕⵍⴰⵎⴰⵏⵉ, ⵜⵣⵡⴰⵔ ⴰⵙ ⵎⴰⵙⵙⴰ ⵉⵍⵉⵣⴰⴱⵉⵟ ⴳⴰⵔⴷⵉⵏⵉ (ⵉⵟⴰⵍⵉⵢⴰ, CEPA), ⵢⵓⵎⴰ ⵉⴳⵏⵙⴰⵙ ⵏ ⵛⵉⴳⴰⵏ ⵏ ⵉⴽⴰⴱⴰⵕⵏ ⵉⵙⵔⵜⴰⵏⵏ ⴷ ⵉⵎⵓⵣⴰⵢ ⵏ ⵜⵎⵙⴰⵍⵉⵏ ⵜⵉⵙⵜⴰⵏⵉⵏ ⴷ ⵜⵉⵏ ⵉⵙⵜⴰⵢⵏ ⴰⴳⵏⵙⵓ ⵏ APCE.
ⵉⵡⵏⴰⵏ ⵏ ⵓⵎⵙⴳⵔⴰⵡ ⴷⴷⵖ ⵏ ⵓⵎⵛⴰⵡⴰⵕ ⴷ ⵓⵙⵏⵖⵎⵙ, ⵜⵙⵎⵏⵉⴷ ⵎⴰⵙⵙⴰ ⴰⵅⴰⵔⴱⴰⵛ ⵉⵎⵏⵣⴰⵢⵏ, ⵉⵍⵓⴳⵏⵏ ⴷ ⵉⵎⵉⴽⴰⵏⵉⵣⵎⵏ ⵉⵙⵙⴰⵜⵉⵏ ⴰⵡⵏⵏⵉ ⴰⵙⵔⵜⴰⵏ ⴰⵎⴰⴳⵓⵜ ⴰⴳⵏⵙⵓ ⵏ ⵓⵙⵏⵖⵎⵙ ⴰⵙⵍⵉⵥⵕ, ⴳ ⵓⵣⵎⵣ ⵏ ⵉⵙⵜⴰⵢⵏ ⴷ ⵓⵣⵎⵣ ⵏ ⴱⵕⵕⴰ ⵏ ⵉⵙⵜⴰⵢⵏ. ⵜⵙⵙⴽⵜⵉ ⴷ ⵉⵙ, ⴳ ⵢⴰⵏ ⵓⵣⵓⵔⵜ ⴰⵎⵖⵔⴰⴱⵉ ⵏ ⵓⵙⵍⴳⵏ ⵏ ⵓⵙⵏⵖⵎⵙ, ⵜⴰⵎⴰⴳⵓⵜ ⵜⴳⴰ ⵢⵉⵡⵜ ⵜⵙⴳⴰ ⵜⴰⴷⵙⵍⴰⵏⵜ ⵏ ⵓⵣⵔⴼ ⵏ ⵓⴳⴷⵓⴷ ⴳ ⵓⵙⵏⵖⵎⵙ ⴰⵎⵢⴰⵏⴰⵡ, ⴰⵎⵢⴰⵙ, ⴳ ⵉⵍⵍⴰ ⵓⵎⵢⴰⵎⴰⵏ, ⵉⴳⴰⵏ ⵜⴰⵔⵙⵍⵜ ⵏ ⵓⵙⵡⵓⵔⵉ ⴰⵎⴰⴼⴰⵡ ⵏ ⵓⵣⵔⴼ ⵏ ⵓⵙⵜⴰⵢ.
ⵜⵙⴼⵔⵓⵔⵉ ⵜⵙⵍⵡⴰⵢⵜ ⵏ ⵓⴳⵔⴰⵡ ⴰⵎⴰⵜⵜⴰⵢ ⵉⵙⵍⴳⵏⵏ ⵉⵍⵍⴰⵏ ⴳ ⵜⵖⵜⴰⵙⵜ ⵓⵕⵕⵓⵏ 50-26 ⵏ ⵓⵙⵇⵇⵉⵎ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ, ⵏⵏⴰ ⵉⵣⵔⵉⵏ ⴰⵙⵙ ⵏ 16 ⵢⵓⵏⵢⵓ 2026 ⵉⵜⵜⵓⵥⵕⴳ ⴳ ⵓⵖⵎⵉⵙ ⵓⵏⵚⵉⴱ. ⵉⵜⵜⵓⵙⵡⵓⵔⵉ ⵖⵓⵔ ⵉⵎⵡⵓⵔⴰ ⵉⴳⴷⵓⴷⴰⵏⵏ ⴷ ⵡⵓⵙⵍⵉⴳⵏ ⵉⵡⵏⴰⵏ ⵏ ⵓⵣⵎⵣ ⵏ ⵉⵙⵜⴰⵢⵏ - ⵉⵜⵜⵓⵙⵔⵙⵏ ⴳⵔ 15 ⵖⵓⵛⵜ ⴰⵔ 22 ⵛⵜⴰⵎⴱⵉⵔ 2026, ⵉⴽⵛⵎ ⵡⴰⵙⵙ ⵏ ⵓⵙⵜⴰⵢ - ⵜⴰⵖⵜⴰⵙⵜ ⴷⴷⵖ ⵜⵙⵔⵙ ⵜⵉⵖⴰⵔⴰⵙⵉⵏ ⵏ ⵓⴱⵟⵟⵓ ⵏ ⵉⵣⵎⵣⵏ ⴳ ⵉⵎⵣⴳⵉ ⴷ ⵡⵉⵏ ⵡⴰⵡⴰⵍ, ⵉⵍⵓⴳⵏⵏ ⵏ ⵓⵙⵓⵎⵓ ⵏ ⵡⴰⴷⴰⴼ ⵖⵔ ⴰⵙⵏⵖⵎⵙ, ⴷ ⵉⵣⵓⵛⵛⵍⵏ ⵏ ⵜⵖⴷⵎⵜ ⴷ ⵜⵔⴰⵡⵙⴰⵏⵜ ⵉⵡⵏⴰⵏ ⵏ ⵉⵙⵜⴰⵢⵏ. ⵜⵙⵙⵉⴷⴼ ⴷⵉⵖ ⵉⵍⵓⴳⵏⵏ ⵉⵎⴰⵢⵏⵓⵜⵏ ⵉⵣⴷⵉⵏ ⵙ ⵓⵎⵏⵏⵓⵖ ⵎⴳⴰⵍ ⵉⵅⵔⵔⵉⵇⵏ ⴷ ⵜⴽⵔⴽⴰⵙ ⴳ ⵓⵙⵏⵖⵎⵙ ⴷ ⵓⵙⵙⵉⵜⵉ ⵏ ⵜⵓⵎⴰⵢⵉⵏ ⵏ ⵉⵙⵜⴰⵢⵏ ⵉⵜⵜⵓⵙⴽⵔⵏ ⵙ ⵜⵉⵖⵉⵙⵜ ⵜⵉⵎⵍⵥⵉⵜ.
 

 ⵜⵙⴰⵡⵍ ⵎⴰⵙⵙⴰ ⴰⵅⵔⴱⴰⵛ ⴳ ⵜⵙⴳⴰ ⵢⴰⴹⵏ ⵅⴼ ⵉⵣⵓⵛⵛⵍⵏ ⵏ ⵓⵙⵍⴳⴰⵏ ⴳ ⵢⵉⴳⵔ ⵏ ⵓⵙⵎⴷⵢⴰ ⴰⵏⵙⵙⵓⵎⵓ ⵏ ⵜⵎⵖⴰⵔⵉⵏ, ⵏ ⵉⵄⵔⵔⵉⵎⵏ, ⵏ ⵎⴷⴷⵏ ⵉⵍⵍⴰⵏ ⴳ ⵡⴰⴷⴷⴰⴷⵏ ⵏ ⵜⵉⵎⵎⵓⵄⴹⵔⵜ ⴷ ⵉⵎⵖⵔⴰⴱⵉⵢⵏ ⵉⵣⴷⵖⵏ ⴱⵕⵕⴰ ⵏ ⵜⵎⵓⵔⵜ (MRE) ⴰⴳⵏⵙⵓ ⵏ ⵉⵖⴰⵡⴰⵙⵏ ⵉⵎⵙⵜⴰⵢⵏ, ⴱⵍⴰ ⵜⴰⵙⵙⴰⵙⵜ ⵏⵖ ⵜⴰⵏⵏⴰⵢⵜ ⵜⵓⵔⵙⵉⵍⵜ.
ⵉⴳⵎⴰⵎⵏ ⵏ ⵜⵙⵎⵉⴳⵍⵜ ⵏ ⴷⴰⵜ ⵜⵉⵏⵥⵉ ⵏ ⵉⵙⵜⴰⵢⵏ ⵏ APCE ⵙⵇⵙⴰⵏ ⵅⴼ ⵉⵣⵓⵔⵜⵏ ⵏ ⵓⵙⵡⵓⵜⵜⵓ ⵏ ⵓⴱⵟⵟⵓ ⵏ ⵉⵣⵎⵣⵏ ⵏ ⵡⴰⵡⴰⵍ ⴳⵔ ⵉⴽⴰⴱⴰⵕⵏ ⵉⵙⵔⵜⴰⵏⵏ, ⵉⵎⵉⴽⴰⵏⵉⵣⵎⵏ ⵏ ⵓⵏⴱⴰⴹ ⴷ ⵉⵣⵎⴰⵣ, ⴰⴼⵔⴰⴳ ⵏ ⵜⵍⴻⵍⵍⵉ ⵏ ⵉⵏⵖⵎⴰⵙⵏ ⴷ ⵉⴹⵎⴰⵏⵏ ⵉⵜⵜⵏⵏⴰⵍⵏ ⴰⵙⵍⴳⵎ ⴰⵙⵉⵎⴰⵏ, ⴷ ⵓⴼⵔⴰⴳ ⵏ ⵜⵍⴻⵍⵍⵉ ⵏ ⵜⵉⵔⴰ ⵖⵓⵔ ⵉⵎⵡⵓⵔⴰ ⵉⵙⵍⵉⵥⵕⵏ ⴷⴰⵜ ⵜⴰⵙⵙⴰⵙⵉⵏ ⵜⵉⵙⵔⵜⴰⵏⵉⵏ ⴷ ⵜⴷⴰⵎⵙⴰⵏⵉⵏ. ⴰⵎⵏⵏⴰⵡ ⵉⴷⵔⵓⵙⵏ ⵏ ⵜⵎⵖⴰⵔⵉⵏ ⵏⵏⴰ ⵙⵙⴽⵏ ⵉⴽⴰⴱⴰⵕⵏ ⵉⵙⵔⵜⴰⵏⵏ, ⴷ ⵜⵉⴳⴰⵡⵜ ⵏⵏⴰ ⵉⵙⵙⴽⵔ ⵓⴳⵔⴰⵡ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ ⴷ ⵜⵎⵔⵙⴰⵍ ⵢⴰⴹⵏ ⵜⵉⵎⵖⵔⴰⴱⵉⵢⵉⵏ ⴳ ⵓⴱⵖⵓⵔ ⵏ ⵓⵙⴷⵓⵙ ⵏ ⵉⵣⵔⴼⴰⵏ ⴷ ⵜⵎⴷⵔⴰⵡⵜ ⵜⴰⵙⵔⵜⴰⵏⵜ ⵏ ⵜⵎⵖⴰⵔⵉⵏ, ⵍⵍⴰⵏ ⴰⴽⴽⵯ ⴳ ⵉⵙⴳⵓⵎⵏ ⵏ ⵓⵎⵛⴰⵡⴰⵕ.

ⵃⴰⴹⵔⵏ ⵉ ⵓⵎⵙⴳⵔⴰⵡ ⴷⴷⵖ : ⵎⴰⵙⵙ ⴱⵏⵄⵉⵙⵙⴰ ⵄⵙⵍⵓⵏ, ⴰⵏⵎⵀⴰⵍ ⴰⵎⴰⵜⴰⵢ ⵏ ⵓⴳⵔⴰⵡ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ ; ⵎⴰⵙⵙ ⵄⴱⴷⵍⵊⵍⵉⵍ ⵍⵃⴰⵎⵎⵓⵎⵉ, ⴰⵏⵎⵀⴰⵍ ⴰⵎⴰⵜⴰⵢ ⵡⵉⵙⵙ ⵙⵉⵏ ; ⵎⴰⵙⵙⴰ ⵍⴰⵟⵉⴼⴰ ⵜⴰⵢⵀ, ⵜⴰⵏⵎⵀⴰⵍⵜ ⵏ ⵜⵖⵓⵔⵉⵡⵉⵏ ⴷ ⵜⴳⵎⵉ ; ⴷ ⵎⴰⵙⵙ ⵏⴰⴷⵉⵔ ⵟⴰⵀⵉⵔ, ⴰⵏⵎⵀⴰⵍ ⵏ ⵜⵣⵓⵏⵉ ⵏ ⵓⴹⴼⴼⵓⵕ ⵏ ⵉⵖⴰⵡⴰⵙⵏ.